SULA MAR 22
Ere Kaka Inyalo Lando Wach Maber?
Sama ichako puonjori adiera mag Muma, samoro inyalo wacho ni ‘Mae en gima ji duto onego ong’e!’ En adier ni ji duto onego ong’e wachno. Kata kamano, inyalo winjo ka iluor nyiso jomoko gik ma ipuonjori. We wane ane kaka inyalo loyo luorono kendo chako lando wach maber kimor.
1. Ere kaka inyalo nyiso joma ing’eyo gik ma isepuonjori?
Jopuonjre Yesu nowacho niya: “Ok wanyal weyo wuoyo e wi gik ma waseneno kendo ma wasewinjo.” (Tich Joote 4:20) Ne gihero ahinya adiera ma Yesu nosepuonjogi, omiyo, ne gidwaro lando adierago ne ji mang’eny kaka nyalore. Be in be iwinjoga kamano? Ka en kamano, many yore ma inyalo nyisogo joodu kod osiepeni gik ma isepuonjori kitimo kamano e yo mang’won.—Som Jo-Kolosai 4:6.
Moko kuom yore ma wanyalo chakogo lendo
Sama iwuoyo gi wedeni, nyisgi wach moro ma yudore e Muma kiwachonegi niya: “Nitie gimoro maber ma ne apuonjora jumani.”
Nyis osiepni matuo kata ma nigi parruok ndiko moro ma nyalo jiwe.
Ka joma itiyogo openji kaka juma oteri, inyalo nyisogi gimoro ma nomori sama ne ipuonjori Muma kata sama ne in e chokruok.
Tang’ ne osiepeni websaitwa mar jw.org/luo.
Gwel jomoko mondo obed kodi sama ipuonjori Muma kata inyisgi kaka ginyalo kwayo mondo opuonjgi Muma e websaitwa mar jw.org/luo.
2. Ang’o momiyo onego ilend gi kanyakla?
Jopuonjre Yesu ne lendo ne ji duto to ok mana ne joma ne ging’eyo kende. Yesu ‘noorogi ji ariyo-ariyo e dala ka dala’ mondo gilendi. (Luka 10:1) Lendo e yo mochanore kamano nomiyo ji mang’eny thuolo mar winjo wach maber. Lendo kanyachiel bende ne omiyo jopuonjrego obedo mamor ahinya. (Luka 10:17) Donge in bende inyalo timo kinda mondo ilend gi kanyakla?
TIM NONRO
Non ane kaka inyalo loyo luoro ma in-go kendo bedo mamor sama ilando wach maber.
3. Jehova biro bedo kodi
Nitie jomoko ma dwaroga lendo, kata kamano, gibedoga maluor nikech ok ging’eyo ni ji biro nenogi nade kendo gikia ka be ji biro rwako wach ma giteronegi.
Be iwinjoga ka iluor nyiso ji gik ma isepuonjori? Ang’o momiyo iwacho kamano?
Tug VIDIO, kae to uwuo e wi penjo ma luwo.
Ere kaka rowere ma Jonenogo noloyo luoro ma ne gin-go?
Som Isaya 41:10, kae to uwuo e wi penjo ma luwoni:
Ere kaka lamo nyalo konyi sama iwinjo kiluor lendo?
Be ing’eyo?
Joneno mag Jehova mang’eny ne paroga ni ok ginyal lendo nikech ne gionge gi chir mar timo kamano. Kuom ranyisi, Sergey ne en ng’at maluor luor kendo wuoyo gi ji ne teknega. Kata kamano, bang’ puonjore Muma, nowacho niya: “Kata obedo ni ne aluor, ne achako wuoyo gi ji e wi gik ma ne apuonjora e Muma. Gima ne awuoro en ni nyiso ji gik ma ne apuonjora e Muma ne omiyo amedo bedo gi chir. Mano nomiyo an be amedo bedo gi yie motegno.”
4. Nyis luor
Sama ilando wach maber onego inon gima iwacho kod kaka iwache. Som 2 Timotheo 2:24 kod 1 Petro 3:15, kae to uwuo e wi penjo ma luwogi:
Ere kaka inyalo tiyo gi ndikogo sama iwuoyo gi ji e wi Muma?
Inyalo timo ang’o ka po ni joodu kata osiepeni kwedi? Ang’o ma ok onego itim?
Ang’o momiyo ber tiyo gi penjo e yo mariek kar nyiso ji gik monego giyiego?
5. Lando wach maber miyo ng’ato bedo mamor
Jehova nomiyo Yesu tij lando wach maber. Yesu ne okawo nade tijno? Som Johana 4:34, kae to uwuo e wi penjo ma luwogi:
Chamo chiemo maber miyo wabedo mangima kendo mamor. Ang’o momiyo Yesu nopimo timo dwach Nyasaye kaka dhi e tij lendo gi chiemo?
Gin ber mage ma inyalo yudo sama ilando wach maber?
Tim kama:
Sama in e chokruok ma kor juma, tem nono yore ma inyalo chakogo mbaka gi ji.
Wuo gi japuonjni mondo onyisi kaka inyalo bedo japuonjre e chokruoge mitimoga e kor juma. Migepe ma imiyoga jopuonjre nyalo konyi ikori wuoyo gi ji e wi gik mipuonjori.
Ti gi kama wacho ni “Paro ma Jomoko Nigo” kata “Ng’ato Nyalo Penji Niya,” e tiegruok kaka inyalo dwoko penjo ma ji bedogago kata gik ma ginyalo tiyogo e kwedowa.
NG’ATO NYALO PENJI NIYA: “Wachnae manyien?”
Ere kaka inyalo tiyo gi thuolono e nyiso ng’at mopenji penjono gima ipuonjori?
PUONJ MADUONG’
Nyiso jomoko wach maber kelo mor kendo chako timo kamano nyalo bedo mayot moloyo kaka iparo.
Ang’o ma ipuonjori?
Ang’o momiyo onego waland ne ji wach maber?
Ere kaka inyalo timo kamano e yo ma nyiso luor?
Ere kaka inyalo loyo luoro moro amora minyalo bedogo e wi tij lendo?
MED TIMO NONRO
Ne ane yore moko ang’wen ma inyalo tiyogo e lando wach maber ka itiyo gi kad mar jw.org.
Kaka Wanyalo Chako Wuoyo gi Ji ka Wagwelo Ji gi Kad mar JW.ORG (1:43)
Ne ane kido ang’wen ma nyalo konyi lando wach maber.
“Be Iseikori Bedo Jaywa Ji?” (Ohinga mar Jarito, Septemba 2020)
Ne ane kaka nono ranyisi manie Muma nyalo miyowa chir mar lando wach maber kata ka pod watindo.
Ne ane kaka inyalo nyiso joodu ma ok ong’eyo Jehova gik ma isepuonjori e Muma.
“Wanyalo Timo Ang’o Mondo Waywa Wedewa e Adiera?” (Ohinga mar Jarito, Mach 15, 2014)