Be Pesa e Chakruok mar Richo Duto?

Dwoko ma Muma chiwo

Ooyo. Nitie weche mong’ere ahinya ni “pesa e chakruok mar richo duto”. Muma ok wach ni pesa rach, to bende ok owach ni pesa e ma kelo richo duto. Gima Muma wacho en ni “hero pesa en chakruok mar richo duto.”a—1 Timotheo 6:10, The Bible in Luo, 1968.

Ang’o ma Muma wacho e wi pesa?

Muma wacho ni pesa nyalo konyo ahinya ka oti kode maber, kendo ni onyalo ritowa. (Eklesiastes 7:12) E wi mano, Muma puoyo joma ohero chiwo gigegi ne jomoko moriwo chiwo mich mag pesa.—Ngeche 11:25.

Kata kamano, Muma bende siemowa ni kik waher pesa. Owacho kama: “Kik ubed jo mohero pesa, to ubed jo ma gik ma un-go sani romou.” (Jo-Hibrania 13:5) Puonj ma wayudo en ni onego wati gi pesa e yo maber kendo kik walawre gi mwandu. Kar mano, gik ma wan-go onego oromwa. Gigo gin chiemo, lewni, gi kar dak.—1 Timotheo 6:8.

**Ang’o momiyo Muma siemowa ni kik waher pesa?**

Joma igi lach ok bi yudo ngima ma nyaka chieng’. (Jo-Efeso 5:5) Mano en nikech ich lach en lamo sanamu. (Jo-Kolosai 3:5) Bende, sama joma igi lach temo chopo gombogi, giweyoga luwo puonj mabeyo. Ngeche 28:20 wacho niya: “Ng’at ma rikni bedo jamwandu lwete ok nodong’ ka ler.” Ich lach nyalo miyo ji otim gik maricho kaka mecho, wuondo ng’ato mondo imaye gimoro, mako ng’ato githuon mondo ogol pesa eka iweye, kata nek.

Kata ka hero pesa ok mi ng’ato obed gi timbe maricho, pod onyalo kelone gik mamoko maricho. Muma wacho niya: “Jo ma kedo ahinya mondo gibed jomwandu lwarga e tem gi obadho kod gombo mang’eny manono kendo ma kelo hinyruok.”—1 Timotheo 6:9.

Ere kaka puonj ma Muma chiwo e wi pesa nyalo konyowa?

Ka ok wahero pesa kendo wadhi nyime timo gik ma moro Nyasaye kendo ma wang’eyo ni beyo, wabiro bedo joma Nyasaye oyiego kendo obiro konyowa. Nyasaye singo ne joma temo tiyone gi chunygi duto kama: “Ok anaweu, kendo ok anajwang’u.” (Jo-Hibrania 13:5, 6) Bende, osingonwa ni “ng’at ma ja adiera noyud gueth mang’eny.”—Ngeche 28:20.

Ndiko ma Wuoyo e Wi Pesa

Eklesiastes 7:12: “Pesa . . . konyo.”

Tiend ndikono: Ka watiyo gi pesa e yo maber, onyalo konyowa nikech onyalo ritowa e okang’ moro.

Luka 12:15: “Kata ka ng’ato nigi gik mogundho, ngimane ok otenore kuom gik ma en-go.”

Tiend ndikono: Pesa ok e gima duong’ e ngima dhano, kendo ok obi miyo wayud resruok.

1 Timotheo 6:10: “Hero pesa en achiel kuom chakruok mar gik moko duto ma kelo hinyruok, kendo kuom bedo gi hera ma kamano, jomoko osebayo yo mi giweyo yie kendo gisechwowore giwegi kuonde duto gi lit mang’eny.”

Tiend ndikono: Pesa ok rach. Kata kamano, joma ohero pesa, tiende ni joma oketo pesa obed gima duong’ e ngimagi kelo chandruok kuomgi giwegi. Kuom ranyisi, kend margi kethore kendo ginyalo yudo tuoche ma biro nikech gitiyo mokalo tong’.

Jo-Hibrania 13:5: “Kik ubed jo mohero pesa, to ubed jo ma gik ma un-go sani romou.”

Tiend ndikono: Kar tiyo gi thuolowa duto e manyo mwandu, gik ma wan-go sani onego oromowa.

Mathayo 19:24: “Yot mondo ngamia okal e wang’ sandan moloyo jamwandu donjo e Pinyruodh Nyasaye.”

Tiend ndikono: Yesu oa mana gwelo rawera moro ma jamwandu mondo obed jalupne. Rawerano nodagi bedo jalupne nikech nogeno mwandune ahinya. Omiyo, Yesu ne chiwo siem. Ng’at mohero mwandu moloyo Nyasaye nyalo koso yudo ngima ma nyaka chieng’.

a Ndikono bende ilokoga ni: “Hero pesa en achiel kuom chakruok mar gik moko duto ma kelo hinyruok.”