Kaka Dinde mag Miriambo Ketho Nying Nyasaye

Ka Nyasaye en hera, ang’o momiyo joma nie dinde ma wacho ni lame osetimo gik maricho ahinya? Dwoko mayot en ni dindego gin mag miriambo kendo gisebedo ka giketho nying Nyasaye. Ere kaka gisetimo mano? Ere kaka Nyasaye neno wachno? To en ang’o ma obiro timo?

1. Ere kaka puonj mag dinde mag miriambo oseketho nying Nyasaye?

Dinde mag miriambo ok ‘oyie gi adiera mar Nyasaye, to giluwo miriambo.’ (Jo-Rumi 1:25) Kuom ranyisi, dinde mang’eny pok opuonjo ji nying Nyasaye. Kata kamano, Muma to wacho ni nyaka wati gi nying Nyasaye. (Jo-Rumi 10:13, 14) Jotend dinde moko wachoga ni sama gimoro marach otimore, mano en dwach Nyasaye. Mano en miriambo. Nyasaye ok nyal timo ne ji gik maricho. (Som Jakobo 1:13.) Gima rach en ni miriambo ma dinde puonjo oseketo ji mabor gi Nyasaye.

2. Ere kaka gik ma dinde mag miriambo timo oseketho nying Nyasaye?

Gik ma dinde mag miriambo timo ne ji, opogore ahinya gi gik ma Jehova timo ne ji. Muma wuoyo e wi dinde mag miriambo kowacho niya: “Richone osebiwore kanyachiel mochopo nyaka e polo.” (Fweny 18:5) Kuom higni mang’eny, dinde osedonjore e weche siasa, giseriwo lwedo lwenje, kendo gisemiyo ji mang’eny otho. Jotend dinde moko dwaro bedo jomwandu, omiyo, gikwayoga jolupgi pesa. Timbe kaka mago nyiso ni ok ging’eyo Nyasaye kendo ok onego giwach ni gilamo Nyasaye.​—Som 1 Johana 4:8.

3. Nyasaye neno nade dinde mag miriambo?

Ka gik ma dinde mag miriambo timo miyo iwinjo marach, iparo ni Jehova to winjo nade? Ohero ji, kata kamano, osin gi jotend dinde ma wuondore ni tiyone to gitimo gik maricho ne jolupgi. Osingo ni ibiro keth dinde mag miriambo ‘mi ok ginibedie kendo ngang’.’ (Fweny 18:21) Machiegnini, Nyasaye biro ketho dinde duto mag miriambo.​—Fweny 18:8.

TIM NONRO

4. Be Nyasaye oyie gi dinde duto?

Ji mang’eny paroga ni dinde gin kaka nderni mang’eny ma tero ji ir Nyasaye. Be mano en adier? Som Mathayo 7:13, 14, kae to uwuo e wi penjo ma luwoni:

• Muma wacho ang’o e wi ndara ma tero ji e ngima?

Tug VIDIO, kae to uwuo e wi penjo ma luwo.

VIDIO: Be Nyasaye Oyie gi Dinde Duto?​—En Bath Vidio (3:22)

• Be Muma wacho ni nitie dinde mang’eny ma moro Nyasaye?

5. Dinde mag miriambo ok nyis hera kaka Nyasaye

Dinde oseketho nying Nyasaye e yore mang’eny. Yo achiel ma gisetimogo kamano en riwo lwedo weche mag lweny. Mondo ine ranyisi achiel, tug VIDIO, kae to uwuo e wi penjo ma luwo.

VIDIO: Gik ma Kanise Notimo e Kinde Lweny mar Ariyo mar Piny Ngima (2:22)

• Gin gik mage ma kanise notimo e kinde Lweny mar Ariyo mar Piny Ngima?

• Ineno nade gik ma ne gitimogo?

Som Johana 13:34, 35 kod 17:16, kae to uwuo e wi penjo ma luwogi:

• Iparo ni Jehova winjo nade sama oneno ka dinde riwo lwedo lweny?

• Dinde mag miriambo osetimo gik maricho mang’eny. Gin yore mage ma dinde osenyisogo ni ok gin gi hera kaka Nyasaye?

6. Nyasaye dwaro konyo ji mondo giwuog e dinde mag miriambo

Som Fweny 18:4,a kae to uwuo e wi penjo ma luwoni:

• Ng’eyo ni Nyasaye dwaro konyo joma osewuond gi dinde mag miriambo miyo iwinjo nade?

7. Dhi nyime puonjori e wi Nyasaye madier

Be gik maricho ma dinde mag miriambo wacho kendo timo onego omul yo ma wanenogo Nyasaye? Wawach ni wuoyi moro otamore luwo kaka wuon-gi chike. Owuok dala kendo ochako timo gik maricho. Wuon-gi ok oyie gi gik maricho motimogo. Ang’o momiyo ok nyal bedo gima ber ka wawacho ni wuon-gi e ma omiyo otimo gik marichogo?

• Be nyalo bedo maber ka waweyo puonjore e wi Jehova kendo keto ketho kuome mana nikech gik maricho ma dinde mag miriambo timo?

PUONJ MADUONG’

Dinde mag miriambo oseketho nying Nyasaye kokalo kuom puonjgi kod gik maricho ma gitimo. Nyasaye biro ketho dinde mag miriambo.

Ang’o ma ipuonjori?

• Ineno nade gik ma dinde mag miriambo puonjo kendo timo?

• Jehova neno nade dinde mag miriambo?

• Nyasaye biro timo ang’o ne dinde mag miriambo?

MED TIMO NONRO

Ne ane yore ariyo ma dinde mag miriambo ok morgo Nyasaye.

“Be Dinde Duto Chalre? Be Giduto Gitero Ji Ir Nyasaye?” (Sula ma yudore e jw.org)

Ang’o momiyo Jehova dwaro ni wachokre kanyachiel gi jomamoko?

“Be Ochuno ni Nyaka Abed gi Din ma Alemee?” (Sula ma yudore e jw.org)

Padri moro ne nigi kiawa e wi din ma nolemee. Kata kamano, mano ne ok omone puonjore adiera e wi Nyasaye.

“Gimomiyo Padri Moro Noweyo Kanisane” (Nenuru!, Februar 2015)

Kuom higni mang’eny, dinde osewacho miriambo e wi Nyasaye, to mano miyo ji paro ni Nyasaye en ng’at ma ger kendo ma ok dew dhano. Ne ane miriambo adek ma osewach e wi Nyasaye.

“Miriambo Mosemiyo Hero Nyasaye Obedo Matek ne Jomoko” (Ohinga mar Jarito, Novemba 1, 2013)