Sandug Penjo

◼ Ang’o momiyo dwarore ni otim yiero mowinjore kuom tudo e yor simo jogo maok nyal biro e chokruoge mag kanyakla?

Kanyakla mang’eny osetimo chenro mar tudo e yor simo jogo ma kinde moko ok nyal biro e chokruoge mag kanyakla mitimo e Od Romo nikech midekre, kata nikech gik mamoko maok nyal geng’. Mondo omi joma kuom adier owinjore ema tiyo gi chenro manyiso herani, dwarore ni otim yiero mowinjore kod chenro malong’o. Omiyo jodongo matayo chenroni biro chano kendo neno ni weche duto timore e yo “maber kendo makare.”—1 Kor. 14:40.

Jodongo biro neno ni thuolo mokwongo omi jolendo ma tuwore e kanyaklagi, kata ma chal margi ok oyienegi wuok e utegi. Jalendo mosebedo katuwo kuom kinde matin kata mohinyore, kata japuonjre Muma matimo dongruok manyalo bedo ni ok wuoth, bende nyalo yudo konyruok kuom chenroni kendo inyalo riwogi e kwan mar joma nie chokruok. Kuonde ma simo minyalo tudgo joma kamago ok ng’enyie, inyalo ti gi chenro mamoko kaka mako chokruoge e tep kae to iteronegi.

Kuom adier, onge gima inyalo pim gi ber mayudore ka ng’ato owuon obedo e chokruogewa. Bedo e Od Romo kanyachiel gi owetewa kelo ‘jiwruok e yiewa’ kendo konyo joma nyien mondo one gimomiyo biro e chokruoge en gima dwarore. Ka wan wawegi wabedo e chokruogewa, wapuonjre maber kuom ranyisi ma itimo, jodongo nyalo konyowa ng’ato ka ng’ato, kendo wayudo achiel kachiel hera mogundho mar owete. Weche ma nyaminwa moro ma hike ng’eny nowacho bang’ kane okwake sama owuok e Od Romo gin adier, nowacho kama: “Ok nyal timni kamano e yor simo!”—Rumi 1:11, 12.

Mana kaka Anna ma ne ‘ok a e hekalu,’ e kindegi bende, joma hikgi ng’eny biro e chokruoge mag Jokristo pile kaluwore gi kaka ngimagi kod nyalogi obet. (Luka 2:36, 37) Bedo ni gitiyo gi yor simo e kinde madwarore, ok gine mano kaka yo matiyo negi maber moloyo dhi e chokruoge e Od Romo. Kuom luwo ranyisi margi maber, wadhiuru nyime yudo mor kuom timo kinda mondo wan wawegi wabed e chokruogewa ka walamo Jehova Nyasachwa maduong’.—Zab. 95:1-3, 6; 122:1.