Tita Hnêna Lehkhathawn
1 Kei Paula hi Pathian bâwih leh Isua Krista tirhkoh ka ni a. Tirhkoh ka nih anga ka rinna leh ka hnathawh hi Pathian mi thlante rinna leh Pathian ngaihsakna nêna inmil thutak hriatna dik nên a inrem a ni. 2 Chûngte chu chatuana nun beiseinaa innghat Pathian dâwt sawi thei lova’n hmân aṭanga a lo tiam tawh a ni a. 3 Nimahsela, min Chhandamtu Pathian thupêk ang zêla ka hnêna kawltîr thuhrilhna hmangin, ama hun takah a thu chu a hriattîr a ni. 4 Rinnaa ka fa dik tak Tita hnênah:
Pa Pathian leh min Chhandamtu Krista Isua hnên aṭanga khawngaihna nasa tak leh thlamuanna* i hnênah awm rawh se.
5 Thil chinfel ngaite chingfel tûr leh, kaihhruaina ka pêk ang chea khaw tina upate ruat tûrin Kret thliarkârah khân ka kalsan che a ni. 6 Kohhran upa* chu sawisêl kai lo, nupui pakhat nei, a fate pawh nawmsip bâwl leh helna kawnga sawisêl kai lo ringtu an ni tûr a ni. 7 Pathianin enkawltua a ruat angin, kohhran upa chu sawisêl kai, mahni thu duh, thinram, zu ruih chîng, tharum thawh chîng, hlêpna bawlhhlawha duhâm a ni tûr a ni lo va, 8 khualchhâwn thiam, ṭhatna ngaina mi, mi rilru fîm,* mi fel, mi rinawm, insûmthei mi, 9 thiam taka a zirtîr huna Pathian thu rinawm* vuan tlat mi a ni zâwk tûr a ni; chutiang chuan, ṭha taka zirtîrna hmangin mi dangte a fuih thei ang a, chu zirtîrna kalh zâwnga thusawitute chu a zilh thei bawk ang.
10 A bîk takin, serh tan phût tlattu hel hmang te, hlâwkna awm lo thu sawitu te leh, bumtute tam tak an awm si a. 11 Chûng mite kâ chu i hup tûr a ni; anmahni ngei chu hlêpna bawlhhlawh duh vânga an zirtîr loh tûr zirtîr a, mite a chhûng chhûnga hruai sual ṭhînte an ni si a. 12 An zînga pakhat, anmahni zâwlnei ngei pawhin: “Kret thliarkâra mite chu dâwt sawi hrât tak te, ramsa kawlh te, thatchhe chaw hehte an ni,” tia a sawi kha.
13 Chu thu chu a dik a ni. Chuvâng chuan, anni chu na takin zilh zêl rawh; tichuan, rinnaah nghet takin an awm thei ang a, 14 Judate thawnthu mai maite leh thutak hawisantute thupêkte chu an ngaihven lo vang. 15 Mi thianghlimte tân chuan engkim a thianghlim a, mi bawlhhlawh leh rinna nei lote tân erawh chuan eng mah thianghlim rêng a awm lo, an rilru leh an chhia leh ṭha hriatna a bawlhhlawh si a. 16 Anni chu mi tenawm, thuâwih lo leh, eng hna ṭha mah thawk tûra tlâktlai lote an nih avângin, vântlâng hmaah Pathian hria angin inchhâl mah se, an thil tihin ani chu an phat a ni.