Timothea Hnêna Lehkhathawn Pahnihna
3 Nimahsela, hei hi hre rawh, ni hnuhnûngahte chuan hmachhawn harsa êm êm hun khirh takte a lo awm ang. 2 Mite chu mahni inhmangaihtu te, sum ngainatu te, intivei te, chapo te, Pathian leh mihring sawichhetu te, nu leh pa thuâwih lo te, lâwm nachâng hre lo te, rinawm lo te, 3 hmangaihna pianpui nei lo te, mi dangte nêna inrem duh lo te, sawichhetu te, insûm thei lo te, mi kawlhsen te, thil ṭha hawtu te, 4 phatsantu te, mi luhlul te, chapo te, Pathian hmangaih aia mahni nuam tih zâwng hmangaih zâwktute an ni dâwn si, 5 Pathian rawngbâwl angin an inchhâl a; nimahsela, an nunah an lantîr si lo, chûng mite lak aṭang chuan inthiar fihlîm rawh. 6 Chûng mite zîng aṭang chuan mi bumtute an lo chhuak a, bumna nên hmeichhe chak lote inah lûtin an thinlung an rûksak ṭhîn; chûng hmeichhiate chu an thinlung châkna bâwiha awm, 7 zir fo si a, thutak hriatna dik nei thei ngai lote an ni.
8 Tin, Jannia leh Jambria’n Mosia an dodâl ang khân, chûng mite pawh chuan thutak an dodâl zawm zêl a. Anni chu rilru chhe vek tawh an ni a, rinna mila an nun loh avângin Pathianin a pawm lo a ni. 9 Chu bâkah, Jannia leh Jambria te anga an âtzia mi zawng zawng hmaa chiang taka a lan dâwn avângin, hma an sâwn thei lo vang. 10 Nimahsela, nang erawh chuan ka zirtîrna te, ka nun dân te, ka thiltum te, ka rinna te, ka dawhtheihna te, ka hmangaihna te, ka chhelnate ṭha takin i zui a. 11 Chu bâkah, Antiokei khua te, Ikonion khua te leh, Lustra khuatea tih duhdahna leh hrehawm ka tawrhte kha i hria e. Chûng tihduhdahnate chu chhel takin ka tuar a; tin, chûng zawng zawngah chuan Lalpa’n min chhan chhuak a ni. 12 Rinawm taka Pathian rawngbâwl duh, Krista Isua hnungzuitu zawng zawngte chuan tih duhdahna an tuar tûr a ni rêng si a. 13 Nimahsela, mi sualte leh mi bum nâna lemchangte chuan mite an hruai sual ang a, anmahni pawh hruai suala awmin an sual zual deuh deuh vang.
14 Nang erawh chuan i thil zir tawhte leh i pawm ngheh tlatte kha, tute hnên aṭanga i zir nge tih hriain zâwm tlat rawh. 15 Krista Isua i rin avânga chhandam ni tûra ti fing thei che, lehkha thianghlimte chu i nausên lai aṭangin i hre tawh si a. 16 Pathian Lehkha Thu zawng zawng hi Pathian thâwk khuma ziah a ni a,* mite zirtîr nân te, thil dik lo hriattîr nân te, siam ṭhat nân te, Pathian tehna felte mila thunun nânte a ṭangkai a ni. 17 Tichuan, Pathian mi chu hna ṭha tinrêng thawk tûra kim taka thuama awmin a famkim thei ang.