September

Pathianin Isua chu mihringte harsatna zawng zawng chingfel tûrin thiltihtheihna a pe. Isua’n a thilmak tihte hmangin keimahnia kan chinfel theih ngai loh tûr harsatnate a chingfel thei tih a târ lang a. Entîr nân, ani chuan mihringte harsatna thlentu bul ber sual rochunna leh, chumi sawhkhâwk natna leh thihna lak aṭanga min chhuah zalên tûrin thiltihtheihna a nei a ni. (Mt. 9:1-6; Rom 5:12, 18, 19) A thilmak tihte chuan dam lohna “tinrêng” a tidam theiin, mitthite hial pawh a kaitho thei tih a finfiah a. (Mt. 4:23; Joh. 11:43, 44) Chu bâkah, thlipui na tak thunun tûr leh ramhuaite hnawt chhuak tûr pawhin thiltihtheihna a nei bawk. (Mk. 4:37-39; Lk. 8:2) Jehova’n a Fapa kutah chutiang thiltihtheihna a pe tih hriat chu a va thlamuanthlâk tak êm! Pathian Ram rorêlna hnuaia malsâwmna lo thleng tûrte chu a lo thleng ngei ang tih kan ring nghet tlat thei. Leia mihring a nih laia Isua thilmak tihte chuan vâna Pathian Rama Lalber a nih angin, chu aia nasa zâwk chuan a la rawn ti ang tih min hriattîr a ni. w23.04 3-4 ¶5-7

Thuchhuahtu tam tak awmna kohhranah i awm a, chhânna pe tûra kut i phar pawhin koh i ni lo fo a nih chuan, inkhâwmah chhânna pe tawh lova, lo ngaihthlâk tawp i tum pawh a ni thei. Mahse, chhânna pe chhunzawm zêl ang che. Inkhâwm tina chhânna tam tak pe tûra lo inbuatsaih chu ṭangkai i ti viau mai thei. Zirna ṭan tîra chhânna pe tûra koh i ni lo a nih pawhin, inkhâwm chhûng zawngin chhânna pêk theihna hun remchâng dang i la nei reng a ni. Vênnainsâng Zir Tûr atâna i inbuatsaih hunah, paragraph tinte chu thuziak thupui nêna a inthlun zawm dân ngaihtuah ang che. Chutianga i tih chuan, zir chhûng zawngin chhânna ṭha tak pêk theih tûrte i neih ngei a rinawm. Chu bâkah, thutak ril zâwk, hrilhfiah harsa zualte chuanna paragraph-a chhâng tûrin i inbuatsaih thei bawk. Engvângin nge? A chhan chu, chûng paragraph-ah chuan chhâng tûra bân phar an tlêm mai theih vâng a ni. A nih leh, hêng rawtna zawng zawngte hi i zâwm chung pawha inkhâwma chhânna pêk theihna hun remchâng i la nei lo fo a nih chuan, engtin nge ni ang? Inkhâwm hmain, zirna kaihruaitu hnênah zawhna i chhân duh bîk chu i lo hrilh lâwk thei a ni. w23.04 21-22 ¶9-10

Josefa chuan inhuam takin Jehova kaihhruaina a zâwm a, chu chuan pasal ṭha lehzual a nihtîr a ni. A lo berah, ṭum thum lai Pathian Jehova hnên aṭangin a chhûngkaw chungchângah kaihhruainate a dawng a. Chûng dinhmun tinahte chuan inthlâk danglamna lian tak siam ngai mah se, a zâwm nghâl vat a ni. (Mt. 1:20; 2:13-15, 19-21) Pathian kaihhruaina chu zâwmin, Josefa’n Mari chu a vênghim a, a ṭanpuiin a ngaihsak a ni. Josefa thiltihte’n a chunga Mari hmangaihna leh zahna a tihthûk lehzual dân tûr chu han mitthla teh! Pasalte u, in chhûngkua in enkawlnaah Bible ṭanchhan thurâwnte zawngin Josefa in entawn thei a. Inthlâk danglamna siam a ngai chung pawha chûng kaihhruainate in zâwm a nih chuan, in nupuite in hmangaihzia in târ langin, in inneihna in tinghet lehzual a ni. An inneihna kum 20 chuang lai ni tawh unaunu pakhat chuan heti hian a sawi: “Ka pasalin Jehova kaihhruainate a zawna a zawm hian, ani chu ka zah lehzual a. Him nia inhriatna ka neiin a thu tlûkna siamte chu ka ring nghet tlat a ni,” tiin. w23.05 21 ¶5

Babulon aṭanga Juda kîr lehte chu an Pathian tân “hnam thianghlim” an lo ni ang. (Deut. 7:6) Mahse, chu chu Babulon chhuahsantute tân Jehova tilâwm tûrin inthlâk danglamna siam a ngai lo tihna a ni lo. Juda mi a tam zâwkte chu Babulona piang an ni a, an zînga tam tak chuan Babulon mite thil thlîr dân leh an thil ngaihhlutte chu an ṭâwmpui ngei a rinawm. Juda mi Israel rama kîr leh hmasa berte thlen hnu kum sâwm bi têlah, Ram Awptu Nehemia chuan Israel rama piang naupangte’n, Juda ṭawng an thiam lo tih a hriat chuan mak a ti hle. (Deut. 6:6, 7; Neh. 13:23, 24) Chûng naupangte chuan Pathian Thu ziahna atâna ṭawng hman ber, Hebrai ṭawng chu an hre thiam lo a nih chuan, engtin nge Jehova hmangaih leh amah biak dân an zir theih tehlul ang? (Ezr. 10:3, 44) Chuvângin, chûng Juda mite chuan inthlâk danglamna nasa tak an siam a ngai a; mahse, an tân chutianga inthlâk danglamna siam chu zawi zawia biakna thianghlim din thar lehna hmun Israel ramah a awlsam zâwk ngei ang.—Neh. 8:8, 9. w23.05 15 ¶6-7

Lungchhiatthlâk takin, tihchâkna kan neih a, mahni kan inthunun chung pawhin min tiṭhuanawp thei thilte kan la tâwk thei reng a. Entîr nân, “beisei loh thilte” chuan kan thiltum tihhlawhtlinna atâna kan mamawh hun chu a la hêk thei a. (Thur. 9:11, NWT) Kan harsatna tawh chuan lunghnual tak leh chak lo takin min awmtîr thei a ni. (Thuf. 24:10) Kan ṭhat famkim loh avângin kan thiltum hlen tiharsa zual thei thilte kan tipalh thei a. (Rom 7:23) A nih loh leh kan chau hle thei bawk. (Mt. 26:43) Min tiṭhuanawp thei thilte hneh tûrin engin nge min ṭanpui thei? Tihṭhuanawpa i awm avângin i hlawhchham tihna a ni lo tih hre reng rawh. Bible chuan harsatnate chu vawi eng emaw zât kan tâwk thei tih a sawi a. Chutih rualin, kan thiltumte hlen kan tum leh thei tih chiang takin a sawi bawk. Ni e, tiṭhuanawp theitu thilte i tâwk chung pawha hma lam i panna chuan Jehova tihlâwm i duh tih a târ lang a ni. I thiltum tihlawhtling tûra i bei zawm zêl a hmuh hunah Jehova chu a va hlim dâwn êm! w23.05 30 ¶14-15

Pioneer nia rawngbâwlna chuan mi chi hrang hrangte nêna ṭha taka hnathawh dân thiam tûra a ṭanpui bâkah, fing taka sum hman dân thiam tûrin a ṭanpui bawk a ni. (Phil. 4:11-13) Auxiliary pioneer nia rawngbâwlna chu hunbi kima rawngbâwl tûra bul ṭanna ṭha tak a ni a. Chu chuan mi tam tak chu regular pioneer thawk tûrin a ṭanpui a. Pioneer nia rawngbâwlna chuan in sakna leh Bethel-a rawngbâwlna ang chi hunbi kima rawngbâwlna chi hrang hranga thawk thei tûrin kawng a hawng a ni. Kristian unaupate chuan kohhran upa anga an unaute tâna rawngbâwl tûrin tlin an tum tûr a ni a. Bible chuan chutiang mawhphurhna atâna inpete chu ‘hnathawh ṭha duhtute’ tiin a sawi a ni. (1 Tim. 3:1) Kohhran upa nia rawng a bâwl hmain, unaupa chu kohhran rawngbâwltu ni tûra a tlin a ngai a. Kohhran rawngbâwltute chuan kohhran upate chu kawng tam takin an ṭanpui a ni. Kohhran upate leh kohhran rawngbâwltute chuan inngaitlâwm takin an unaute rawng an bâwlsakin, rawngbâwlnaah ṭhahnem an ngai hle a ni. w23.12 28 ¶14-16

Lal Josia chuan tleirâwl a nih lai aṭangin Jehova a zawng ṭan a. Jehova chungchâng zir leh a duh zâwng tih a duh a ni. Mahse, chu lal naupang tak tân chuan nun a awlsam lo hle a. Ani chu biakna dik lo a hluar êm êm laiin, biakna dik tân huaisen takin a ding nghet tlat a. A huaisen tak zet! Josia chuan kum 20 a tlin hmain, biakna dik lote chu ram chhûng aṭangin a nuai bo ṭan a ni. (2 Chro. 34:1, 2) Naupang hle mah la, Jehova leh a mize hlu takte zir chianna hmangin Josia i entawn thei a ni. Chutianga i tihna chuan Pathian hnêna inpumpêk duhna a neihtîr ang che. Chutianga i inpumpêkna chuan nî tina i nunah engtin nge a nghawng ang che? Kum 14 mi nia baptisma changtu Luke-a chuan, “Tûn aṭang chuan, ka nunah Jehova rawngbâwl ka dah hmasa ber ang a, amah tihlâwm ka tum ang,” tiin a sawi. (Mk. 12:30) Chutianga tih ve duhna i nei a nih chuan, i tân malsâwmna a va ni dâwn tak êm! w23.09 11 ¶12-13

Tirhkoh Paula’n he lehkha thawn a ziah lai hian, Thessalonika khuaa kohhran din a nihna chu kum khat pawh a la tling lo va. Chu kohhrana upate chuan tawnhriat an ngah lovin, thil tihsualte pawh an nei mai thei. Chuti chung pawhin, anni chuan zah an phû a ni. Hrehawm nasa tak kan hnaih zêl rual hian, tûn hma zawng aiin tualchhûng upate kaihhruainaa kan innghah lehzual a ngai mai thei a. World headquarters leh branch office kan biak pawh theih loh hun pawh a la awm thei a; chuvângin, tûn aṭanga upate hmangaih leh zah kan zir chu a pawimawh hle. Eng pawh thleng se, an ṭhat famkim lohna ni lovin, Jehova’n Krista hmanga hêng mipa rinawmte a kaihhruai dân hi ngaihtuah tlatin, i ngaihven chhunzawm zêl ang u. Lukhumin sipai lû a vênghim angin, chhandam nih kan beiseina chuan kan ngaihtuahna a vênghim a. He khawvêlin min pêk theih thilte chu eng mah lo mai a ni tih kan hria. (Phil. 3:8) Kan beiseina chuan rilru fîm tak nei tûr leh nghet taka awm tûrin min ṭanpui a ni. w23.06 11-12 ¶11-12

“Hmeichhe â” sâwmna dawngtute chuan a sâwmna chu an pawm dâwn nge, an hnâwl dâwn tihah duhthlanna an siam a ngai a: Nungchang bawlhhlawhna kan pumpelh chhan tûr ṭha takte a awm a. “Hmeichhe â” chuan “rûk tui chu a thlum” tia sawi anga târ lan a ni (Thuf. 9:17) “Rûk tui” chu eng nge ni? Bible chuan nupa inkâra mipat hmeichhiatna hman chu tui thar lâm nên a tehkhin a. (Thuf. 5:15-18) Dân ang taka inneite chuan hlim takin nupa nun an hmang thei a. Mahse, “rûk tui” chu a danglam hle. Chu chuan nungchang bawlhhlawhna a kâwk thei a. Chutiang thil chu rûkruin thil a rû angin, a rûka tih a ni fo ṭhîn. Chutiang thil titute chuan an thiltih chu mite’n an hre dâwn lo nia an ngaih chuan “rûk tui” chu thil thlum tak angin a lang thei a ni. Inbumna lungchhiatthlâk tak a va ni êm! Jehova’n engkim a hmu vek si a. A duhsakna chân tluka thil lungchhiatthlâk a awm thei lo va; chuvângin, chumi chânna chuan “thlumna” rêng a nei lo.—1 Kor. 6:9, 10. w23.06 22 ¶7-9

Hun eng emawti chhûng chu thinlung takin i ṭawngṭai thei tawh lo emaw, tûn hma angin rawngbâwlnaah i phûr thei tawh lo emaw a nih chuan engtin nge ni ang? Pathian thlarau dawng lo niin inngai mai suh. Ṭha famkim lo i nih avângin i rilru vei zâwng chu a inthlâk danglam thei a. I ṭhahnemngaihna a kiam ṭan a nih chuan, tirhkoh Paula entawn tûr siam hi ngaihtuah ang che. Ani chuan Isua entawn a tum nachungin, a tih ngaite ti tûra phûrna neih tâwk loh châng a nei tih a hria a ni. Paula chuan a rilru awm dân chu eng pawh ni se, Paula chuan a rawngbâwlna hlen chu a tum tlat a ni. Chutiang bawkin, i rilru vei zâwng ṭanchhanin thu tlûkna siam suh. I rilru awm dân chu eng pawh ni se, thil dik tih tum tlat rawh. Thil dik i tih tlatna chuan i rilru awm dân chu a ṭha zâwngin a nghawng thei a ni.—1 Kor. 9:16. w24.03 11-12 ¶12-13

Keini pawhin unaute chu ṭhiana siama hunte hmanpuiin hmangaihna kan lantîr ve thei a. (2 Kor. 6:11-13) Kan zînga tam tak chu ṭobul hrang hrang aṭanga lo kal, mize chi hrang hrang nei unaute nên kohhran khatah kan awmho va. An mize ṭha laite ngaihven tlatin anmahni kan hmangaihna chu kan tinghet lehzual thei a ni. Jehova’n mi dangte a thlîr anga kan thlîr hian anni chu kan hmangaihzia kan lantîr a ni. Hrehawm nasa tak chhûnga unaute hmangaih chu thil pawimawh tak a ni ang. Hrehawm nasa tak a inṭan hunah, khawi aṭangin nge vênhimna kan hmuh ang? Hmân lai Babulon khawpui beih a nih khân, Jehova’n a mite hnênah: “Hawh u, ka mite u, in pindan chhûngahte lût ula, in kawngte chu inkhâr khum rawh u; lungnih lohna hi a kian hmâ loh chu, mitkhapkâr lek pawh ni se, biru rawh u,” tiin kaihhruaina a pe a. (Is. 26:20) Hrehawm nasa tak chhûngin chutiang kaihhruaina chu kan dawn ve ngei a rinawm. w23.07 6-7 ¶14-16

A âwm tâwk i hriatzia mi zawng zawng hriattîr rawh. Heti hian kan inzâwt thei a: ‘Mite’n a âwm tâwk hria, nunnêm leh dawhthei tak angin min hria em? Nge ni a, mi tawh khirh tak, vîn tak leh luhlul tak angin min hre zâwk? Ka duh anga thil ti tûrin mi dangte ka tilui ṭhîn em? Nge ni a, a rem phawt chuan mi dangte thusawi ngaithlain an duh angin thil ka ti ṭhîn zâwk?’ tiin. A âwm tâwk kan hriatthiam poh leh Jehova leh Isua kan entawn lehzual tihna a ni. A âwm tâwk hriatnaah chuan dinhmun inthlâk danglam dân azira insiamrem theihna a tel a. Chutiang inthlâk danglamna chuan kan beisei loh harsatna tam tak min thlen thei a ni. Hrisêlna chungchângah rîkrum thil kan tâwk thei a. A nih loh leh, kan chênna rama sum leh pai dinhmun inthlâk danglamna emaw, sawrkâr inthlâk danglamna emaw chuan nasa takin kan nun a tiharsa thei bawk. (Thur. 9:11) Theocratic chanvo inthlâk danglamna pawhin harsatna min thlen thei bawk a ni. Hêng rahbi palite hi kan zawh a nih chuan kan dinhmun thar milin kan insiamrem thei ang: (1) tûna i dinhmun chu pawm rawh, (2) hma lam hun thlîr rawh, (3) a êng zâwngin thil thlîr tlat rawh leh, (4) mi dangte thil tihsak rawh, tihte hi. w23.07 21-22 ¶7-8

Zâwlnei Daniela chu a pianna Jerusalem aṭanga hla tak Babulona hruai a nih khân, tleirâwl mai a la ni a. Mahse, Daniela chuan Babulon thuneitute mit a la hle a ni. Anni chuan “pâwn lama lan dân” chu enin—Daniela chu “demna awm lo, hmêl ṭha tak” leh chhûngkaw pawimawh tak aṭanga lo kal a ni tih an hria a. (1 Sam. 16:7) Chuvângin, Babulon mite chuan ani chu lal ina rawngbâwltu zînga mi ni tûrin an zirtîr a ni. (Dan. 1:3, 4, 6) Jehova chuan Daniela chu a hmangaih a; Pathian hmangaih zâwng mi ni tûra a duhthlanna vâng a ni. Dik tak chuan, Jehova’n Daniela chu kum tam tak chhûng Pathian hmaa hming ṭhatna vawngtu Nova leh Jobate anga mi fel tak nia a târ lan lai khân, kum 20 vêl chauh a la ni a. (Gen. 5:32; 6:9, 10; Job. 42:16, 17; Ezek. 14:14) Chu bâkah, ani chuan a dam chhûngin Pathian Jehova hmangaih a hlawh a ni.—Dan. 10:11, 19. w23.08 2 ¶1-2

In pakhat i lei dâwn leh dâwn loh chungchângah thu tlûkna i siam hunah, mahni ngeiin va en a, a chhûng zawng zawng va fan kual chu i duh zâwk ngei ang. Bible kan chhiara kan zir hunah pawh chutiang chuan kan ti thei a. I chhiar liam puat a nih chuan “Pathian thu bul ber A AW B” te ang chi thutak bul puite chauh i hre thei ang. (Heb. 5:12) I in lei tûr a chhûng i en kim vek angin, Bible chu chipchiar takin zir ang che. Bible zir dân kawng ṭha tak pakhat chu a chhûng thute inzawm dân hriat hi a ni. Chuvângin eng thutakte nge i rin tih chauh ni lovin, chûng thutakte i rin nachhan pawh hriatthiam tum ang che. Pathian thu chipchiar taka hriat kan duh chuan ngun takin kan zir tûr a ni. Tirhkoh Paula chuan a Kristian unaute chu thutak ‘zauzia te, seizia te, sânzia te, thûkzia te an hriat chian theih nân’ Pathian thu taima taka zir tûrin a fuih a. Chutianga an tih chuan an rinnaah “zung kai leh nghah chhan” neiin an awm thei ang. (Eph. 3:14-19) Keini pawhin chutianga kan tih a ngai a ni. w23.10 18 ¶1-3

Bible-ah hian dawhtheihna lantîrtu entîrna tam tak a chuang a. Engvângin nge chûngte chu inzirna atâna i hman loh vang? Entîr nân, Davida chu naupang tê a nih laiin Israel lal ni tûra hriak thih a ni a, lalna a chan hmain kum tam tak a nghah a ngai a ni. Sumeona leh Anni te chuan thutiam Messia lo lan hun tûr an nghah laiin rinawm takin Jehova rawng an bâwl a. (Lk. 2:25, 36-38) Chûng chanchinte i zir hunah, hêng zawhnate chhânna hi hmuh tum ang che: Engin nge ani chu dawhtheihna lantîr tûra ṭanpui? Engtin nge dawhtheihna chu a hlâwkpui? Engtin nge ani chu ka entawn theih? Chu bâkah, dawhtheihna lantîr lotute chungchâng zirna pawh i hlâwkpui thei bawk. (1 Sam. 13:8-14) Heti hian inzâwt rawh: ‘Dawhtheihna an tlâkchham chhan chu eng nge ni? Dawhtheihna an neih loh avângin eng thil ṭha lo nge an tawrh?’ tiin. w23.08 25 ¶15

Tirhkoh Petera chu a rinawm a; beidawng lo tûrin eng thil mah indâltîr a phal lo. Ṭum khat chu, Isua’n a zirtîrte hriatthiam loh tûr thu a sawi khân ani chuan a rinawmna a lantîr a ni. (Joh. 6:68) Isua hnungzuitu tam tak chuan a hrilhfiah hun nghâk lo leh a hrilhfiahna zâwt lovin an kalsan ta mai a. Mahse, Petera chuan chutiang chuan a ti ve lo. Ani chuan Isua hnênah chauh “chatuana nunna thu” a awm tih a hria a ni. Isua’n Petera leh tirhkoh dangte’n an thlahthlam dâwn tih a hria a ni. Chuti chung chuan, Petera chu rawn kîr lehin a rinawm reng dâwn tih a rinzia a sawi a. (Lk. 22:31, 32) Ani chuan “thlarau zawngin a peih a, tisa erawh chu a chak lo” tih a hria a ni. (Mk. 14:38) Chuvângin, Petera’n a hriat thu a phat hnunah pawh Isua chu a chungah a beidawng lo. A thawhleh hnuah, Petera chu amah chauhva a awm laiin a hnênah a inlâr a ni. (Mk. 16:7; Lk. 24:34; 1 Kor. 15:5) Chu chuan tirhkoh lungngai tak chu a va tichak dâwn êm! w23.09 22 ¶9-10

Pathian chuan amaha rinna nghattute chu an sualnaah a ngaidam a. Anni chu a ngaidam pumhlûm, a nih loh leh an sualnate a hriat sak tawh lo a ni. (Sâm 32:1, 2) Mi tinte chu an rinna ṭanchhanin sualna nei lo leh mi fel angin a thlîr a ni. Abrahama, Davida, leh rinawm taka Pathian betu dangte chu mi fel anga târ lan ni mah se, ṭha famkim lo sual faa piang an ni tho va. Mahse, an rinna avângin Pathianin sawisêlbo angin a thlîr a; a bîk takin, amah be lotute nêna khaikhin an nih hian a ni lehzual a ni. (Eph. 2:12) Tirhkoh Paula chuan Rom mite hnêna a lehkha thawnah Pathian ṭhian ni tûr chuan rinna kan neih a ngai tih a sawi a. Abrahama leh Davida pawh an rinna avângin Pathian ṭhiana vuah an ni a, keini pawh Pathian ṭhian kan ni ve thei a ni. w23.12 3 ¶6-7

Tûn laiah, Kristian zawng zawngte’n an hun te, tha leh zung te, leh an thil neihte hmangin Pathian Lalram tân inpêk theihna chanvo an nei a. Pathian Jehova hnênah kan neih ṭha ber hlânin, amah kan biak theihna chanvo kan ngaihhlutzia kan lantîr thei a ni. Tirhkoh Paula chuan kan biaknaa kan ngaihthah ngai loh tûr thil chi hrang hrang a târ lang a. (Heb. 10:22-25) Chûng zîngah chuan Jehova hnêna kan ṭawngṭainate, vân tlâng hmaa kan beiseina puan chhuahna te, kohhrana inkhâwmnate leh ‘[Jehova] nî chu a lo hnai telh telha kan hriat avânga nasa lehzuala’ kan infuih tawnnate a tel a ni. Thu Puan bu tâwp lamah Pathian Jehova vântirhkoh chuan: “Pathian chibai bûk zâwk rawh,” tia vawi hnih lai sawiin chumi pawimawhzia chu a târ lang a. (Thup. 19:10; 22:9) Kan Pathian ropui tak Jehova thlarau lam biak in ropui tak chungchânga he thutak ril tak leh amah kan biak theihna chanvo hlu chu i theihnghilh ngai lo vang u! w23.10 29 ¶17-18

Kan vai hian “inhmangaih tawn ṭheuh” chu kan duh a. Mahse, “mi tam zâwk hmangaihna chu a la dai ang,” tia Isua vaukhânna hi kan tân hriat reng a pawimawh a ni. (Mt. 24:12) Hei hi a zirtîr tam zâwkte inhmangaih tawnna a dai ang a tihna a ni lo. Mahse, kan chheh vêla awm khawvêl mite hmangaihna tlâk chhamnain min thunun loh nân kan fîmkhur reng tûr a ni. Chu chu rilruah vawng rengin, he zawhna pawimawh tak hi i lo ngaihtuah ang u: Kan unaute kan hmangaihna chu a ngheh leh ngheh loh finfiah dân kawng a awm em? Kawng khat chu nuna thilthleng ṭhenkhat kan chhân lêt dân bih chian hi a ni a. (2 Kor. 8:8) Chutiang dinhmun pakhat chu tirhkoh Petera’n a târ lang a ni: “Eng dang zawng aiin inhmangaih tawn uar rawh u; hmangaihnain sual tam tak a khuh si ṭhîn a,” tiin. (1 Pet. 4:8) Chuvângin, mi dangte chak lohna leh ṭhat famkim lohna chuan kan hmangaihna a ngheh leh ngheh loh a fiah thei a ni. w23.11 10-11 ¶12-13

Kohhrana unau ṭhenkhat chungah chauh hmangaihna kan lantîr a nih chuan, hmangaihna chungchânga Isua thupêk zâwm kan ni thei lo vang. Ni e, Isua angin ṭhian ngainat bîk kan nei ngei ang. (Joh. 13:23; 20:2) Mahse, tirhkoh Petera chuan unau zawng zawngte chu kan chhûngkaw zînga mite an nih avângin hmangaih vek tûrin min hriat nawntîr a ni. (1 Pet. 2:17) Petera chuan kan unaute chu kan “hmangaih tak tak” tûr a ni tiin a sawi a. (1 Pet. 1:22) He thuziaka “ṭhahnem ngai taka” hmangaih tihah hian hmangaihna lantîr harsa kan tih tu emaw chungah pawh theih tâwp chhuaha hmangaihna lantîrna a tel a ni. Entîr nân, unau pakhat chuan kawng eng emaw takin min tilungni lo emaw, kan rilru a tina emaw a nih chuan engtin nge ni ang? A tîrah chuan hmangaihna lantîr aiin thungrulh kan duh mai thei. Mahse, Petera chuan thungrulhnain Pathian a tilâwm lo tih Isua hnên aṭangin a zir a ni. (Joh. 18:10, 11) Ani chuan: “Sual, sualin thungrûl suh ula, hauna haunain thungrûl hek suh ula, malsâwm hlauh zâwk rawh u,” tiin a ziak a ni. (1 Pet. 3:9) Hmangaihna nasa tak kan neih chuan kan rilru tinatute pawh ngilnei tak leh ṭha takin kan cheibâwl ang. w23.09 28-29 ¶9-11

Naupangte an puitlin chakzia kan hmuh hian mak kan ti a. Ṭan lâkna pawh awm lova puitling nghâl mai niin an lang ṭhîn a ni. Mahse, Kristian mi puitling nihna chu awlsam taka neih nghâl mai theih a ni lo. (1 Kor. 13:11; Heb. 6:1) Kristian mi puitling ni tûr chuan Pathian Jehova nêna inlaichînna nghet tak kan neih a ngai a. Pathian miziate neih chhoh nân te, thiamna ṭangkai tak neih theih nân te leh, nakin huna kan neih mai theih mawhphurhnate atâna kan inbuatsaih theih nânte a thlarau thianghlim ṭanpuina kan mamawh a ni. (Thuf. 1:5) Jehova chuan mihringte chu mipaah leh hmeichhiaah a siam a. (Gen. 1:27) Mipa leh hmeichhia te chu tisa pianhmang inang lo mai ni lovin, kawng dang pawhin inan lohna an nei a ni. Entîr nân, Jehova chuan mipa leh hmeichhia chu an hlen tûr chanvo bîk a pêk avângin, chûng chanvote hlen thei tûra an mamawh miziate leh thiamnate an neih a ngai a ni.—Gen. 2:18. w23.12 18 ¶1-2

Isua’n mite chu a Pa hming lam tûrin a duh em? Duh teh meuh mai. Chûng hun laia sakhaw hruaitu ṭhenkhat chuan Pathian hming chu a thianghlim êm avânga lam thian loh angin an ngai a; mahse, Isua’n chûng Pathian thu ṭanchhan ni lo hnam dânte chu a Pa hming a chawimawina a indâltîr lo. Gerasin khuaa ramhuai man pakhat a tihdam lai kha han ngaituah teh. Mite chuan an hlauh êm avângin Isua chu kal bo tûrin an ngên a; chuvângin, an bial chu a chhuahsan ta a ni. (Mk. 5:16, 17) Chutichung chuan, chuta mite’n Pathian hming an hriat chu Isua’n a la duh tho va. Chuvângin, a tihdama chu ama thiltihte ni lovin, Jehova thiltihte mite hnêna hrilh tûrin a tîr ta a ni. (Mk. 5:19) Tûn laiah pawh khawvêl zawng zawnga a Pa hming hriattîr tûrin min duh a. (Mt. 24:14; 28:20) Chutianga kan tih chuan, kan Lal Isua chu kan tilâwm ang. w24.02 10 ¶10

He hun hnuhnûng khirh tak chhûnga Jehova inawpna pâwla kan tel thei hi malsâwmna a ni tak zet a. Khawvêl dinhmunte a chhiat zêl rualin, Jehova chuan min ṭanpui tûrin thlarau lam unau inlungrual takte min pe a ni. (Sâm 133:1) Chhûngkaw hlim tak nei tûrin min ṭanpui bawk a. (Eph. 5:33–6:1) Chu bâkah, chhûngrila thlamuanna dik tak nei tûra kan mamawh hriatthiamna leh finna min pe bawk a ni. Eng pawh ni se, rinawm taka Jehova rawng bâwl zawm zêl tûra theih tâwp kan chhuah a ngai a. Engvângin nge? Mi dangte ṭhat famkim lohna avângin lunghnual châng kan neih theih vâng a ni. Chu bâkah, thil pakhat kan tihsual nawn fo hian mahni tlin lohna avângin lunghnualna kan nei thei bawk. Hêng dinhmun pathumahte hian Jehova rawng rinawm taka kan bâwl zawm zêl a ngai a, chûngte chu: (1) unaute’n min tihlungnih loh hunah, (2) kan kawppuite’n min tihlunghnual hunah leh, (3) mahni tlin lohna avânga kan lunghnual hunah a ni. w24.03 14 ¶1-2

An rawngbâwlna zauh tûra hma latu unaute thiltawn chu i hre ṭhîn ngei ang. Anni chu Lalram Chanchin Ṭha Puangtute School-a kal emaw, mamawh zualna hmuna rawngbâwl emaw an ni thei a. I dinhmunin azir chuan chutiang thiltum neih chu thil ṭha tak a ni. Jehova mite chuan an rawngbâwlna zauh chu an duh hle a. (Tirh. 16:9) Mahse, tûnah i la ti thei lo a nih chuan engtin nge ni ang? A ti theite aia hnuaihnung zâwkah inngai suh. I beih ṭâng ṭângna chu thil pawimawh tak a ni zâwk. (Mt. 10:22) Jehova chuan i theihna leh i dinhmun azira a rawng i bâwlna chu a ngaihlu tih hre reng ang che. Chu chu baptisma i chan hnua Isua hnung i zui tlat theih dân kawng pawimawh tak a ni.—Sâm 26:1. w24.03 10 ¶11

Kan Pa vâna mi chuan inchhîrna kan neih chuan ngaihdam min tiam a. (Sâm 86:5) Chuvângin, thil sual kan tih avânga pawi kan ti tak zet a nih chuan min ngaidam tawh tia a sawi chu kan ring thei a ni. Jehova chu khirh tak a ni lo tih hre reng ang che. Ani chuan, kan tih theih aia tam min phût ngai lo. A tâna theih tâwp kan chhuah chhûng chuan kan thiltihte chu min hlutsak a. Chu bâkah, Bible-a an thinlung zawng zawnga Jehova rawngbâwltute chungchâng chu ngaihtuah bawk ang che. Entîr nân, tirhkoh Paula chungchâng hi lo ngaihtuah ta ila. Ani chuan kum tam tak chhûng mêl sâng tam tak hlaa zinin, kohhrante dinin ṭhahnemngai takin rawng a bâwl a. Mahse, a dinhmun avânga, tûn hma anga tama rawngbâwlnaa a inhman theih loh tâkah chuan, Pathian lawm hlawh lovin a awm em? Awm lo ve. A tih theihte a tih chhunzawm zêl avângin Jehova’n mal a sâwm a ni. (Tirh. 28:30, 31) Chutiang bawkin, a châng chuan Jehova tâna kan tih theih chu a tlêm hle thei a. Mahse, kan tih chhan chu a tân a pawimawh ber zâwk a ni. w24.03 27 ¶7, 9

Pathian Jehova hnêna a ṭawngṭainate hmangin, Isua chuan a zirtîrte tân entawn tûr a siam a. A rawngbâwl chhûngin vawi tam tak a ṭawngṭai a ni. A buai êm ṭhin avâng leh mi tam takin an bâwr luih luih ṭhin avângin ṭawngṭai nân hun a insiam a ngai a. (Mk. 6:31, 45, 46) A fâla ṭawngṭaina hun a neih theih nân zîng hma takah a tho a ni. Ṭum khat chu, thu tlûkna pawimawh tak a siam hmain a ṭawngṭai zankhua ṭhak a. (Lk. 6:12, 13) Chu bâkah, leia a chanvo harsa ber a hlen chhuah theih nân, a thih hma zânah nasa takin a ṭawngṭai a ni. (Mt. 26:39, 42, 44) Isua entawn tûr siam chuan, buai hle mah ila, ṭawngṭai tûrin hun kan insiam a ngai tih min zirtîr a. Isua angin zîng hma taka thovin emaw, zâna meng rei deuh hlekin emaw ṭawngṭaina atân hun kan insiam a ngai thei a ni. Chutianga kan tih chuan, Jehova hnênah he thilpêk hlu tak hi kan ngaihlu tih kan lantîr a ni ang. w23.05 3 ¶4-5

Vawiin ni chânga “leih” tih thu mal hi chhinchhiah ang che. Zir chianna pakhat chuan chu thu mal chu “lui tui angin kan chungah a leih,” tiin a hrilhfiah a ni. Hriak thihte chunga Jehova hmangaihna târ lanna ropui tak a va ni êm! Chûng hriak thihte chuan ‘Pathianin a hmangaih’ tih an hria a. (Jud. 1) Tirhkoh Johana chuan an rilru awm dân chu: “Ngai teh u, Pain min hmangaihna chu a va nasa êm! ‘Pathian faahte’ min vuah tâk hi,” tiin a ziak a ni. (1 Joh. 3:1) Jehova chuan hriak thihte chauh a hmangaih tihna a ni em? Ni lo ve, kan zavaia chungah a hmangaihna a lantîr a ni. Jehova hmangaihna finfiahna ropui ber chu eng nge? Tlanna—lei leh vâna hmangaihna thiltih ropui ber chu!—Joh. 3:16; Rom 5:8. w24.01 28 ¶9-10

Vawiin ni châng hian Davida’n hlauhna a hneh dân a târ lang a: A nun chu dinhmun hlauhawmah awm mah se, Jehova’n a tâna a la tih tûrte a ngaihtuah a. Ani chuan Jehova’n a hun takah a chhanchhuak ang tih a hria a ni. A nihna takah chuan, Jehova’n Israel lal ni tûrin a puang tawh a. (1 Sam. 16:1, 13) Ani chuan Jehova thutiam eng pawh chu a thleng famkim ngei ang tih a ring tlat a ni. Eng nge Jehova’n a tiam che? Harsatna zawng zawng laka min humhim chu kan beisei lo. Mahse, he khawvêla kan tawh harsatna eng pawh chu, Jehova’n khawvêl thar lo awm tûrah chuan a nuai bo vek tawh ang. (Is. 25:7-9) Min Siamtu chu mitthite kaitho tûr te, natnate tidam tûr te leh, dodâltu zawng zawng tiboral vek tûrtein thiltihtheihna a neiin a chak tâwk si a.—1 Joh. 4:4. w24.01 6 ¶12-13

Inpumpêka, baptisma i channa kha ngaihtuah lêt rawh. Jehova lama ṭan i duh avângin baptisma changin i inpumpêk a. Thutak i hmu tih rinna nei tûra ṭanpuitu che kha ngaihtuah lêt ang che. Pathian Jehova chungchâng hriatna dik i rawn nei a, i Pa vâna mi a nih anga zahna thûk tak neiin, i hmangaih lehzual a. Rinna i nei chho va, chu chuan inchhîrna nei tûrin a chêttîr che a. I thil chîn dân ṭha lote bânsan tûr leh Pathian duh zâwng mila nung tûrin a chêttîr che a ni. Pathianin ngaidam che nia i inhriat avângin i hahdam huai bawk. (Sâm 32:2) Inkhâwmah i tel a, i thu hriat ṭha tak takte chu mi dangte i hrilh ṭan bawk. Tûnah chuan, Kristian inpumpêka baptisma chang tawh i nih angin, nunna kawngah i kal a, chu kawng chu theih tâwp chhuaha zawh i tum tlat a ni. (Mt. 7:13, 14) Jehova hnêna kan inpumpêknaah leh a thupêkte kan zawmnaah tihchêt rual lohvin i ding nghet tlat ang u. w23.07 17 ¶14; 19 ¶19

Jehova hnêna ṭawngṭaia i inpumpêkna ngaihtuahna chuan thlêmna eng pawh do thei tûrin a tichak ang che. Entîr nân, pawm lai nei tu emaw chu i chhai der ang em? Chhai der lo ngei ang! Chutianga ti lo tûrin Jehova hnênah i tiam tawh a ni. Châkna ṭha lo i neih chu i ṭhan lentîr loh chuan, a hnuah chumi paih bo tûra nasa taka i beih a ngai lo vang a. Tichuan, ‘mi suaksual kawng’ chu i “hawisan” thei ang (Thuf. 4:14, 15) Isua’n a Pa tihlâwm a tum tlatna chu hre chhuakin, i inpumpêkna Pathian duh loh zâwng eng thil pawh rang tak leh khauh takin i hnâwl ngei ang. (Mt. 4:10; Joh. 8:29) A nihna takah chuan, harsatnate leh thlêmnate chuan Isua hnung i “zui” tlat tih lantîrna hun remchâng a pe che a. Chutianga ti tûrin Jehova’n a ṭanpui ang che tih i chiang thei a ni. w24.03 9-10 ¶8-10