October

Thuâwih harsa tih châng i nei em? Lal Davida chuan chutiang harsatna a neih avângin Pathian hnênah: “Thlarau tihnuamin mi chelh reng ang che,” tiin a ṭawngṭai a. (Sâm 51:12) Ani chuan Jehova a hmangaih a. Chuti chung chuan keimahni ang bawkin thuawih harsa tih châng a nei a ni. Engvângin nge? Pakhatna, thuawih duh lohna rilru put hmang kan rochun vâng a ni. Pahnihna, Setana chuan amah ang bawka Jehova chunga hel duhna nei tûra min thlêm reng vâng a ni. (2 Kor. 11:3) Pathumna, “tûna âwih lo fate chhûnga thawk mêktu” hel duhna rilru put hmang nei he khawvêl mite hual vêla kan awm vâng a ni. (Eph. 2:2) Thil sual tih duhna kan neih chu kan do mai bâkah, Diabola leh he khawvêlin thuawih lo tûra min nawr luihna chu do tûrin theih tâwp kan chhuah a ngai a. Jehova leh thuneihna engemaw chen a pêkte thu âwih tûrin theih tâwp kan chhuah tûr a ni. w23.10 6 ¶1

Isua’n tui uaina chantîra thilmak a tihna aṭangin eng nge kan zir theih? Inngaihtlâwmna chungchâng kan zir thei a ni. Isua chuan a thilmak tih chu a chhuang lo va; a nihna takah chuan, a thiltih engmah chu a chhuang ngai lo. Chu aiin, inngaitlâwm takin a Pa hnênah ropuina leh chawimawina zawng zawng a pe ziah zâwk. (Joh. 5:19, 30; 8:28) Isua entawna kan inngaihtlâwm reng chuan kan thil hlen chhuahte avânga inchhuanna kan nei lo vang. Jehova rawngbâwlnaah eng chanvo pawh chelh ila, mahni inchhuang lovin a rawng kan bâwl Pathian ropui tak chu i chhuang zâwk ang u. (Jer. 9:23, 24) Ani chu a phû ang ngeiin kan chawimawi tûr a ni. Jehova ṭanpuina tel lo chuan eng thil ṭha nge kan hlen chhuah theih tehlul ang? (1 Kor. 1:26-31) Kan inngaihtlâwm chuan mi dangte tâna thil ṭha kan tihte avângin chawimawina kan dawn a ngai lo. Jehova’n kan thiltihte a hmuin, a ngaihlu a ni tih kan hriat avângin kan lungawi a ni. (Matthaia 6:2-4 nên khaikhin rawh; Heb. 13:16) Inngaihtlâwmna kawnga Isua kan entawn hian Jehova kan tilâwm tih a chiang hle.—1 Pet. 5:6. w23.04 4 ¶9; 5 ¶11-12

Thlarauva thâwk khuma awmin tirhkoh Paula chuan mi dangte ṭhatna tûr zawng tûrin Kristian unaute chu a fuih a. Chu fuihna chu engtin nge inkhâwmnaah kan nunpui theih ang? Mi dangte pawhin, keimahni ang bawkin chhânna pêk an duh tih hriatrengna hmangin a ni. Hetiang hian han ngaihtuah teh. I ṭhiante nêna in tîtî hunah an tâna ṭawng ve theihna hun remchâng awm lo khawpin i ṭawng tam lutuk ang em? Chutiang chuan i ti lo ngei ang! In tîtînaah chuan anni pawh teltîr i duh a ni. Chutiang bawkin, inkhâwmnaah hian mi a tam thei ang berin chhânna an pêk chu kan duh a. A nihna takah chuan, kan unaute kan tihchak theih dân kawng ṭha ber pakhat chu, an rinna sawi chhuah theihna hun remchâng pêk hi a ni. (1 Kor. 10:24) Chuvângin, tâwi têin chhânna kan pe thei a, chu chuan mi tam lehzual chhânna pêk theihna hun a siam a ni. Chhânna tâwi tê i pêk hunah pawh, a thu pawimawh lai zawng zawng sawi suh ang che. Paragraph-a thu zawng zawng i chhâng a nih chuan mi dangte chhân tûr a awm tawh lo vang. w23.04 22-23 ¶11-13

Kan Kristian rawngbâwlna hmanga mi dangte ṭanpui a pawimawhzia kan hre reng tûr a ni. Kan rawngbâwlnaah mi insiamrem thei tak kan nih a ngai a. Rinna, mizia, leh ṭobul hrang hranga mite hnênah thu kan hril a ni. Tirhkoh Paula chu mi insiamrem thei tak a nih avângin, a entawn tûr siam aṭangin kan inzir thei a. Isua’n ani chu “Jentailte tirhkoh” ni tûrin a ruat a ni. (Rom 11:13) Chu chanvo a hlennaah Paula chuan Juda mite, Grik mite, lehkha thiamte, lo neitute, sawrkâr thuneitute leh, lalte hnênah thu a hril a. A thu ngaithlatu mi chi hrang hrangte thinlung a thlen theihna tûrin ani chu “mi zawng zawng hnênah engkim” a lo ni ta a ni. (1 Kor. 9:19-22) A thu ngaithlatute hnam dân, ṭobul leh, an thurinte a zirin a thu hrilh dân a siamrem ṭhîn a. Keini pawh kan rawngbâwlnaah remhre tak kan nih a, kan thu ngaithlatute mamawh azira kan insiamrem a nih chuan kan hlawhtling lehzual ang. w23.07 23 ¶11-12

Thuhnuairawlhna chu chak lohna ni lovin, chakna a ni zâwk a. Dinhmun khirh tak hmachhawn huna rilru dam taka awm tûr chuan chhûngrila chakna kan neih a ngai a. Thuhnuairawlhna chu “thlarau rah” pêng pakhat a ni. (Gal. 5:22, 23) Grik ṭawnga “thuhnuairawlhna” tih thu mal chu ram sakawr khawi ngam tawh sawi nâna hman a ni a. Ram sakawr kawlh tak pakhat chu zaidam hle niin han mitthla teh. Zaidam mah se, a chak reng tho a ni. Keini pawh engtin nge thuhnuairawlh chunga kan chak reng theih? Chu chu mahni chauhva tih theih a ni lo. A pawimawh ber chu, chu mize duhawm tak nei chho tûra min ṭanpui tûrin Pathian thlarau kan dîl tûr a ni. Chutianga an tih avânga thuhnuairawlhna nei tam tak an awm tawh a. Thuhretu tam tak chuan dodâltute hnialkalhna an hmachhawn hunah, thuhnuairawlh takin an chhâng lêt a ni.—2 Tim. 2:25. w23.09 15 ¶3

Tirhkoh Johana chuan inlârna ropui takah upa 24-te’n vâna Jehova chibai an bûk lai chu a hmu a. Anni chuan Pathian chu “ropuina te, chawimawina te, thiltihtheihna te” dawng tlâk a ni tiin an fak a ni. (Thup. 4:10, 11) Vântirhkoh rinawmte pawhin Pathian Jehova fak a, chawimawi nachhan tûr tam tak an nei bawk. Vânah a kianga awmin, ani chu an hre chiang hle a ni. A thiltihtea a mize lang chhuakte chu an hmu a. Jehova thiltihte an hmuhna chuan amah fak tûrin a chêttîr a ni. (Job. 38:4-7) Jehova chungchânga kan ngainat leh kan ngaihhlutte sawiin, keini pawhin ṭawngṭaia amah fak kan duh a. Bible i chhiara i zir hunah, Jehova mizia i ngainat takte chu hriat tum la. (Job. 37:23; Rom 11:33) Tichuan, chûng a mizia i ngainat takte chu Jehova hnênah hrilh ang che. Kan tâna a thiltihte leh kan thlarau lam chhûngte zawng zawng tâna a thiltihte avângin kan fak thei bawk.—1 Sam. 2:1, 2. w23.05 3-4 ¶6-7

Kum 1919-ah Babulon Khaw Ropui chuan Pathian mite chunga a thununna chu a hloh va. Chumi kum chuan “bawi rinawm, fing tak” chuan hna a thawk ṭan a; chuvângin, thinlung ṭha pute chuan “Thianghlimna Kawng” an zawh ṭan thei a ni. (Mt. 24:45-47; Is. 35:8) Chu kawng buatsaih tûra hun kal tawha mi rinawmte hnathawh chuan, chu kawngpui zawh ṭantute chu Pathian Jehova leh a thiltumte tam lehzuala hre tûrin a ṭanpui a. (Thuf. 4:18) Anni chu Jehova thil phûtte milin an nung thei a ni. Pathian Jehova chuan a mite chu vawilehkhata inthlâk danglam nghâl tûrin a beisei lo va. Chu aiin, anni chu zawi zawiin a tithianghlim zâwk a ni. Kan thiltih apianga Jehova kan tihlâwm theih hunah chuan kan va hlim dâwn êm! Kawng rêng rêng hian thawm ṭhat reng a mamawh a. Kum 1919 aṭang khân, mi tam lehzualin Babulon Khaw Ropui an chhuahsan theih nân “Thianghlimna Kawng” buatsaih hna chu thawh chhunzawm zêl a ni. w23.05 17 ¶15; 19 ¶16

Governing Body chuan a mi mal takin, Governing Body committee hrang hranga ṭanpuitute zirtîrna an nei a. Chûng ṭanpuitute chuan an mawhphurhna rit tak chu rinawm takin an hlen a. Anni chu Krista berâmte ngaihsak zawm zêl tûrin ṭha taka zirtîr an ni. Hrehawm nasa tak tâwp dâwn lama hriak thihte vâna lâk chhoh vek an nih hnuah pawh, he leia Jehova mite chuan rinawm takin amah an be chhunzawm zêl ang. Isua Krista chu Pathian mite tân hruaitu a ni chu thil lâwmawm tak a ni. Ni e, chumi hunah chuan Magog rama Goga, hnam insuihkhâwm beihna chu kan tâwk ngei ang. (Ezek. 38:18-20) Mahse, chu beihna hun chhûng tâwi têah chuan a hlawhchham ang a; Pathian mite’n Jehova an biakna chu a titâwp lo vang. Ani chuan a va chhan chhuak chiang dâwn tak êm! Tirhkoh Johana chuan Krista berâm dang “mipui tam tak” chu inlârnaah a hmu a. Ani chuan chûng “mipui tam tak” chu “hrehawm nasa tak” ata dam khawchhuakte an ni tih a sawi a ni. (Thup. 7:9, 14) Ni e, anni chu Jehova’n a chhanhim ang tih a chiang hle! w24.02 5-6 ¶13-14

Thlarau thianghlim dawng tûrin eng nge kan tih theih? Chumi dawng tûr chuan kan ṭawngṭai thei a, Pathian thlarauva thâwk khum Bible thu zirin, thlarauva kaihhruai a inawpna pâwl kan bêl tlat thei a ni. Chutianga tihna chuan “thlarau rah” nei chho tûrin min ṭanpui ang. (Gal. 5:22, 23) Pathianin a thlarau chu ngaihtuahna leh nungchang thianghlim vawngtute hnênah chauh a pe a ni. Thil thianghlim lote ngaihtuah renga chûngte kan ti a nih chuan, a thlarau chu min pe chhunzawm tawh lo vang. (1 Thes. 4:7, 8) Thlarau thianghlim dawng chhunzawm zêl tûr chuan ‘hrilhlâwknate kan ngainêp’ tûr a ni lo. (1 Thes. 5:20, Baptist Mid-Missions’ Translation) Heta “hrilhlâwknate” hian Jehova nî leh kan hun hmâwr tawhzia tiamin, Jehova’n a thlarau thianghlim hmanga min pêk thuchah eng pawh a kâwk a ni. Armageddon chu kan dam chhûngin a thleng lo vang tia, chu nî ngaihthah chu kan duh lo. Chu aiin, nî tin “Pathian ngaihsak kawngah” buaiin leh, nungchang thianghlim tak vawng rengin chumi nî chu a lo thleng thuai dâwn tih kan beisei, a nih loh leh rilruah kan vawng tlat a ni.—2 Pet. 3:11, 12. w23.06 12 ¶13-14

Kristiante kan nih angin, kan phone leh tablet-a rin loh taka saruak lem leh thuziakte a lo lang a nih chuan eng nge kan tih ang? Chu chu kan en chhunzawm tûr a ni lo. Pathian Jehova nêna kan inlaichînna chu kan thil neih hlu ber a ni tih kan hriat reng chuan, chutianga tih chu a awlsam lehzual ang. A nihna takah chuan, saruak lem leh thuziak anga ngaih ni lo, milem ṭhenkhat pawhin châkna ṭha lo min neihtîr thei a ni. Engvângin nge chûngte chu kan pumpelh ang? Nungchang bawlhhlawhna lam thil min ngaihtuahtîr thei kawng chu chhe tê pawha kan zawh duh loh vâng a ni. (Mt. 5:28, 29) Thailand rama kohhran upa David-a chuan: “‘Ka thil en chu saruak lem leh thuziakte ni chiah lo mah se, ka en reng a nih chuan Jehova a lâwm ang em?’ tiin ka inzâwt ṭhîn a. Chutianga chhûtna chuan fing takin thil min tihtîr a ni,” tiin a sawi. Jehova tihlâwm loh hlauhna chuan fing taka thil ti tûrin min ṭanpui a. Pathian ṭih chu “finna bul,” a nih loh leh “finna” innghahna a ni. w23.06 23 ¶12-13

‘Pindan chhûng’ tih chu kohhran sawina a ni thei a. Hrehawm nasa tak chhûngin unaute nêna kan inpumkhat tlat chuan Jehova thutiam angin vênhim kan ni ang. Chuvângin, kan unaute chungah dawhtheihna kan lantîr mai ni lovin, anni chu hmangaih tak zet tûrin tûn aṭangin theih tâwp kan chhuah tûr a ni. Kan dam khawchhuahna chu chumia innghat a ni thei si a! “LALPA ni ropui tak” chuan mi zawng zawng tân hrehawmna a thlen ang. (Zep.1:14,15) Jehova mite pawhin hrehawm an tuar bawk ang. Mahse, tûna kan inbuatsaih chuan thlamuang takin kan awm thei ang a, mi dangte pawh kan ṭanpui thei ang. Buaina lo thleng eng pawh chu chhel takin kan tuar chhuak ang a. Kan unaute’n hrehawm an tawrh hunah an chungah khawngaihna lantîrin theih tâwp chhuahin kan ṭanpui ang. Chu bâkah, tûn aṭanga unaute hmangaih kan zir chuan nakin hunah pawh hmangaihna kan lantîr thei ang a. Chutianga kan tih chuan, Jehova’n chhiatna leh hrehawm tawrhna zawng zawng awm tawh lohna khawvêlah chatuana nunna pein mal min sâwm ang.—Is. 65:17. w23.07 7 ¶16-17

Pathian Thu chuan mi rinawmte chu mi chak tak angin a târ lang fo va. Mahse, anni chuan chak niin an inhre reng lo. Entîr nân, Lal Davida chuan dinhmun ṭhenkhatah ‘tlâng din ngheh tawh’ anga inhriat châng a nei a; mahse, dinhmun dangah chuan ‘a mangang’ leh ṭhîn a ni. (Sâm 30:7) Samsona chu Pathian thlarau thianghlima chêttîra a awm chuan chakna danglam tak a nei a; mahse, Pathian hnên aṭanga thiltihtheihna tel lo chuan ‘a chak lo vang a, mi dang ang mai bawk’ a ni ang tih a hria a. (Ro. 14:5, 6; 16:17) Jehova pêk chakna avâng chauhvin chûng mi rinawmte chuan chakna an nei a ni. Tirhkoh Paula pawhin Jehova hnên aṭanga chakna a mamawh tih a hria a. (2 Kor. 12:9, 10) Ani chuan hrisêlna lamah harsatna a nei a ni. (Gal. 4:13, 14) Thil dik tih harsa tih châng a nei bawk a. (Rom 7:18, 19) Mangan châng leh a chunga thilthleng theite ngaihtuaha hlauh châng a nei ṭhîn bawk. (2 Kor. 1:8, 9) Mahse, Paula chuan a chak loh lai pawhin chakna a nei a ni. Engtin nge? Jehova’n a mamawh chakna pein, Paula chu a tichak a ni. w23.10 12 ¶1-2

Hlutna nei lo nia inhriatna kan neih chângin, Jehova chuan a lamah min hîp tih kan hre chhuak leh thei a. (Joh. 6:44) Ṭhatna lai kan neih kan hmuh loh chu hmuin, kan thinlung a hria a ni. ( 2 Chro. 6:30) Chuvângin, kan hlu tia a sawi chu kan ring thei a ni. (1 Joh. 3:19, 20) Kan zînga ṭhenkhat chuan thutak an hriat hmaa an thiltihte avângin inthiam lohna an la nei reng thei a. (1 Pet. 4:3) Kristian mi rinawmte pawhin sual tih châkna chu an do reng a ngai a ni. Chutianga inthiam lohna chu i nei ve ngai em? I nei a nih chuan, Jehova chhiahhlawh rinawmte pawhin chutianga inthiam lohna an nei ve tih hriatna chuan a thlamuan ngei ang che. Entîr nân, tirhkoh Paula chuan a ṭhat famkim lohna a ngaihtuah chângin lunghnualna a nei ṭhîn a. (Rom 7:24) Dik takin, ani chuan a sualte simin, baptisma a chang tawh a ni. Chutichung chuan, “tirhkoh zînga tê ber” leh “mi sual ber” angin a la inngai cheu va ni.—1 Kor. 15:9; 1 Tim. 1:15. w24.03 27 ¶5-6

Joasa’n thu tlûkna ṭha lo a siam aṭanga kan zir theih pakhat chu kan chunga nghawng ṭha tak neitu—Jehova hmangaihtute leh amah tihlâwm duhtute ṭhiana kan thlan a ngai tih hi a ni. Kan rualpuite chauh ṭhianah kan siam kher a ngai lo. Joasa chu a ṭhian Jehoiada aiin a naupang hle tih hre reng ang che. Ṭhian i thlan dân chungchângah heti hian inzâwt ang che: ‘Anni chuan Jehova ka rinna tinghet tûrin min ṭanpui em? Anni chuan Pathian tehnate nunpui tûrin min fuih em? Jehova chungchâng leh thutak hlutnate chu an sawi ṭhîn em? Pathian tehnate zahna an lantîr em? Kawng sual ka zawh hunah ka hriat duhte min hrilh mai nge ni a, min siam ṭhat tumin min fuih zâwk?’ tiin. (Thuf. 27:5, 6, 17) Tlang taka sawi chuan, Jehova hmangaih lotu i ṭhiante chu i mamawh lo a ni. Mahse, Jehova hmangaihtu ṭhian i neih chuan anni chu thlah suh—i tân mi ṭha tak an ni dâwn si a!—Thuf. 13:20. w23.09 9-10 ¶6-7

Alpha leh omega chu Grik hawrawpa hmasa ber leh hnuhnûng ber a ni a. Jehova’n “Alpha leh Omega” tih thu malte a hman hian, thil eng emaw bul a ṭan hian a hlenchhuak ngei ṭhîn tih a târ lang a ni. Jehova’n Evi leh Adama te a siam hnuah, ‘Chi tam tak thlaha lo pungin, leilung hi luah khat ula . . . a ti a,’ tiin a hrilh a. (Gen. 1:28) Chutih lai chuan Jehova chu “Alpha” tia sawi ang a ni. A thiltum chu chiang takin a târ lang a: Evi leh Adama te thlah thuawih leh ṭha famkimte’n leilung hi luah khata Paradis-a an chantîr hun a lo la thleng ang. Chutih hunah chuan Jehova chu “Omega” tia sawi ang a ni dâwn a ni. “Lei leh vân chu an chunga awmho zawng zawngte nên chuan siam zawh” a nih hnuah Jehova chuan a thutiam nemnghehna a pe a. Mihringte leh leilung atâna a thiltum chu a hlen ngei ang tih a nemnghehna a ni. Ni sarih nî a zawh chuan a thiltum zawng zawng chu a thleng famkim vek tawh ang.—Gen. 2:1-3. w23.11 5 ¶13-14

Babulon aṭanga Israel panna zin kawng hautak zet chuan thla li vêl a awh thei a; mahse, Jehova chuan an kîr lehna dâl thei anga lang harsatna eng pawh thenfaisak a tiam a ni. Juda mi rinawmte chuan Israel rama kîr leh chu an inpêkna eng pawh aiin a hlu zâwk hle tih an hria a. An malsâwmna dawn tûr ropui ber chu Pathian an biakna hi a ni. Babulonah chuan Jehova biak in erawh pakhat mah a awm lo. Chu hmunah chuan Israel mite tân Mosia Dânin a phût anga, hâlral thil hlanna tûr maichâm a awm lo va, hâlral thil hlân tûra ruat puithiamte pawh an awm lo bawk. Chu bâkah, Jehova leh a tehnate ngaisâng lo, milem betute lakah chuan Jehova mite chu an tlêm hle a. Chuvângin, Juda mi Pathian ṭihtu a sâng têlte chuan biakna dik an tundin leh theihna tûr hmun, an rama kîr leh chu an nghâkhlel hle a ni. w23.05 14-15 ¶3-4

“Eng fate” anga awm reng thei tûr chuan Pathian thlarau thianghlim ṭanpuina kan mamawh bawk a ni. Engvângin nge? He khawvêl bawlhhlawh takah hian thianghlim taka awm reng a awlsam loh vâng a ni. (1 Thes. 4:3-5, 7, 8) Thlarau thianghlim chuan Pathian thlîr dân kalhtu zirtîrnate leh thlîr dânte pawh tiamin, he khawvêl ngaih dân chu do tûrin min ṭanpui thei a. ‘Felna leh thutak zawng zawng’ nei tûrin min ṭanpui thei bawk a ni. (Eph. 5:9) Thlarau thianghlim kan dawn theih dân kawng khat chu ṭawngṭai hi a ni a. Jehova’n “a dîltute chu thlarau thianghlim” a pe dâwn tih Isua’n a sawi a ni. (Lk. 11:13) Chu bâkah, Kristian inkhâwmnaa Jehova kan fak hian a thlarau thianghlim kan dawng bawk. (Eph. 5:19, 20) Chu thlarau thianghlim kaihhruaina chuan Pathian duh zâwng anga nung tûrin min ṭangpui ang. w24.03 23-24 ¶13-15

Dawhtheihna nei lehzual tûrin ṭawngṭai rawh. Dawhtheihna chu thlarau rah pêng pakhat a ni a. (Gal. 5:22, 23) Chuvângin, Jehova hnênah thlarau thianghlim dîlin kan ṭawngṭai theih bâkah, chu thlarau rah nei tûra min ṭanpui tûrin kan dîl thei a ni. Kan dawhtheihna fiah a nih hunah dawhthei taka awm tûrin thlarau thianghlim ṭanpuina kan “dîl” thei a. (Lk. 11:13) Jehova thlîr anga dinhmunte thlîr thiam tûrin a ṭanpuina kan dîl thei bawk. Chutianga kan ṭawngṭai hnuah nî tin dawhthei taka awm tûrin theih tâwp kan chhuah a ngai a ni. Dawhtheihna dîla kan ṭawngṭai a, dawhtheih kan tum poh leh chu mizia chuan kan thinlungah zung kaiin kan mize pêng pakhat a lo ni ang. Dawhtheihna chuan Bible-a entîrnate chu chhût ngun tûrin min ṭanpui bawk. Bible chuan dawhtheihna neitu mi tam tak chungchâng a târ lang a. Chûng mite chungchâng chhût ngunna aṭangin dawhtheihna lantîr dân kawngte kan hre thei a ni. w23.08 22 ¶10-11

Isua’n tirhkoh Petera chu Jehova’n a ngaihsak ang tih a hriat chiantîr a. Tholeh Isua chuan Petera leh tirhkoh dangte chu thilmak tihna hmangin sangha a mantîr leh a ni. (Joh. 21:4-6) Chu thilmak tih chuan Petera chu a tisa lam mamawhte Jehova’n awlsam takin a pe thei tih a rinnghehtîr ngei ang. Ani chuan Jehova’n ‘a ram zawng hmasatute’ a ṭanpui ang tih Isua sawi chu a hre chhuak mai thei. (Mt. 6:33) Chuvângin, Petera chuan a nunah sangha mana sumdâwnna aiin rawngbâwlna chu a dah hmasa ber a ni. C.E. 33, Pentikost nîah huaisen taka thu hrilin mi a sâng telte chu thutak pawm tûrin a ṭanpui a. (Tirh. 2:14, 37-41) Chumi hnuah, Samari mite leh Jentailte chu Krista hnungzui tûrin a ṭanpui bawk. (Tirh. 8:14-17; 10:44-48) Jehova’n Petera chu hnam chi hrang hranga mite kohhrana hruai lût tûrin a hmang tih a chiang hle. w23.09 20 ¶1; 23 ¶11

Babulon mite’n Jerusalem an tihchhiat hnu kum hnih vêlah, Babulon Lal Nebukadnezzara chuan milim hrawl tak chungchâng mumang ṭihbaiawm tak a nei a ni. A mumang chungchângte leh chumi awmziate chu an hrilhfiah theih loh chuan Daniela pawh telin, a mi fing zawng zawngte chu tihlum vek tûrin a vau va. (Dan. 2:3-4) Chuvângin, Daniela’n hma a lâk vat loh chuan an nun an chân vek dâwn a ni. Daniela chu lal inah “a lût a, lal chu a hrilhfiahna a entîr theih nân hun kian tûrin a ngên a.” (Dan. 2:16) Chu chuan Daniela huaisenna leh rinna a târ lang a ni. Chumi hma chuan Daniela’n mumang a hrilhfiah tawh tih târ lanna a awm lo. Ani chuan a ṭhiante chu ‘chu thu inthup chungchângah vân Pathian khawngaihna dîl tûrin’ a ngên a. (Dan. 2:18) Jehova chuan an dîlna chu a chhâng a ni. Pathian ṭanpuinain, Daniela chuan Nebukadnezzara mumang chu a hrilhfiah a. Tichuan, Daniela leh a ṭhian pathumte nunna chu chhanhim a ni ta a ni. w23.08 3 ¶4

Dawhtheihna kan neih avânga hlâwknate chu han ngaihtuah teh. Dawhtheihna kan neih hian, kan hlim lehzualin, kan rilru a hahdam a. Chuvângin, dawhtheihna chuan rilru lam leh tisa lamah hrisêlna ṭha min neihtîr thei a ni. Mi dangte chunga kan dawhtheih hian, anmahni nêna kan inlaichînna a ṭha lehzual a. Kohhran pawh a inpumkhat lehzual a ni. Tu emawin min tithinur a nih chuan, kan thinnelna chuan dinhmunte chu chhe zual lo tûrin a vêng thei a. (Sâm 37:8; Thuf. 14:29) A pawimawh berah chuan dawhtheihna kan neih hian, kan Pa vâna mi kan entawn a, amah kan hnaih lehzual a ni. Dawhtheihna chu mize duhawm tak leh ṭha tak a va ni êm! Chu mizia lantîr chu awlsam reng lo mah se, Jehova ṭanpuinain dawhtheihna chu kan nei chhunzawm zêl thei a ni. Dawhthei taka khawvêl thar kan nghah rualin, “LALPA mit chu amah ṭihtute chungah chuan a fu reng ṭhîn a, a ngilneihna beiseitute chungah chuan,” tih chu kan ring tlat thei a ni. (Sâm 33:18) Kan za vai hian dawhtheihnaa inthuam chhun zawm zêl i tum ṭheuh vang u. w23.08 22 ¶7; 25 ¶16-17

Jakoba chuan chutiang mi chu rinna nei niin inchhâl mah se, a thiltih chuan rinna a neih lohzia a târ lang tih a sawi. (Jak. 2:1-5, 9) Jakoba chuan ‘unaupa emaw, unaunu emaw, silh tûr nei lo leh, ei tûr tlachhama awm’ chu hmu reng si a, ṭanpui lotu tu emaw chungchâng a târ lang a ni. Chu mi chuan rinna nei niin inchhâl mah se, a thiltihin rinna a neih lohzia a târ lang a. (Jak. 2:14-16) Jakoba chuan rinna thiltiha lantîrtu Rahabi entawn tûr ṭha siam chu a târ lang a. (Jak. 2:25, 26) Rahabi chuan Jehova chungchâng leh Israel mite a ṭanpui dân pawh a hria a ni. (Jos. 2:9-11) Chu bâkah, dinhmun hlauhawma awm Israel enthlatu pahnihte chu humhimin, a rinna chu thiltihin a lantîr a. Chuvângin, ani chu ṭha famkim lo leh Israel mi ni lo mah se, Abrahama anga mi fela târ lan a ni a. Rahabi entawn tûr siam chuan rinna chu thiltiha lantîr a pawimawhzia a târ lang a ni. w23.12 5-6 ¶12-13

Kristiante kan nih angin Bible zirtîrnate a pâwnlâng chauhva hriat chu kan duh tâwk lo va. Pathian thlarau thianghlim ṭanpuinain “Pathian thuril pawh” zir kan duh a ni. (1 Kor. 2:9, 10) Engvângin nge Jehova hnaih lehzualtîr theitu thute chu mi mal inzirnaa i hman loh vang? Entîr nân, hmân laia a chhiahhlawhte a hmangaihzia a lantîr dânte leh chûngte chuan nang pawh a hmangaih che tih a târ lan dân i zir thei a. Chu bâkah, Jehova’n Israelte tâna biakna chungchânga ruahmanna a siamte leh tûn laia Kristiante tâna ruahmanna a siamte chu i khaikhin thei bawk. A nih loh leh, Isua’n leia rawng a bâwl chhûnga Bible hrilh lâwkna a thlen famkimtîrnate chu ngun takin i zir thei bawk. Chûng thupuite zir tûra Jehova Thuhretute Tâna Zir Bingna Hmanrua i hman chuan i hlâwkpui hle ang. Bible thute thûk taka zirna chuan i rinna a tinghetin ‘Pathian hriatna chhar chhuak’ tûrin a ṭanpui ang che.—Thuf. 2:4, 5. w23.10 18-19 ¶3-5

Tirhkoh Petera hman “uar” tih thu mal hian “tipharh” tih a kâwk thei a ni. Chu châng tâwp lamah chuan mi dangte chunga hmangaihna nasa tak kan neih huna kan tih tûrte a târ lang a. Chu chuan kan unaute sualna a khuh a ni. Chu chu hetiang kawng hian kan ngaihtuah thei a ni: Hmangaihna chu puanthân fân thei angin han mitthla teh, chu chu sual pakhat emaw, pahnih emaw pawh ni lo, “sual tam tak” a khuh thlengin kan tipharh thei a ni. “Khuh” tih chu ngaidam tih sawi nâna hman a ni a. Puanthânin thil bâl a khuh thei ang mai hian, hmangaihnain mi dangte chak lohna leh ṭhat famkim lohnate pawh a khuh thei a ni. Mi dangte kan hmangaihna chu unaute ṭhat famkim lohna ngaihdam harsa kan tih hunah pawh ngaidam thei tûr khawpin a nghet tâwk tûr a ni. (Kol. 3:13) Mi dangte kan ngaihdam hian kan hmangaihna a nghet tih leh Jehova tihlâwm kan duh tih kan târ lang a ni. w23.11 11-12 ¶13-15

A lo puitlin chhoh chuan Lal Josia chuan biak in hlui chu a thuam ṭha ṭan a. An hnathawh lai chuan, “Mosia hmanga pêk LALPA dân bu chu” hmuh chhuah a ni a. Lalin chu dân thute a han hriat chuan dânin a sawite chu zâwmin hma a la nghâl a ni. (2 Chro. 34:14, 19-21) Bible chhiar ziah i duh em? Nî tin i chhiar ṭhîn a nih chuan nuam i ti em? Mi mal taka ṭanpui thei che Bible chângte i chhinchhiah em? Josia chu kum 39 mi a nih chuan, thil a tisual a, a nun a chân phah ta a ni. Ani chuan Jehova kaihhruaina zawng lovin, mahni a inrinchhan a. (2 Chro. 35:20-25) Zir tûr kan nei a ni. Kan kum upat lam emaw, Bible kan zir rei zâwng emaw chu eng ang pawh ni se, Jehova kaihhruaina kan zawng zêl tûr a ni. Chutah chuan a kaihhruaina zawnga ṭawngṭaina te, a Thu zirna te, leh Kristian puitlingte thurâwn pêk hlâwkpuinate pawh a tel a ni. Tichuan, thilsual lian tak tihnate kan pumpelh ang a, kan hlim lehzual ang.—Jak. 1:25. w23.09 12 ¶15-16

Bible chuan Jehova hmangaih a, a rawngbâwltu entawn tlâk hmeichhe tam tak a târ lang a. Chûng hmeichhiate chu “insûm thei” leh “engkima rinawm” an ni a. (1 Tim. 3:11) Chu bâkah, ṭhalai unaunute chuan anmahni kohhran chhûng ngeiah entawn tûr ṭha siamtu Kristian mi puitling unaunute chu an hmu thei bawk a ni. Ṭhalai unaunute u, in entawn theih Kristian mi puitling unaunute hriat in nei em? An mize duhawm takte chu chhinchhiah ula, chûng miziate in lantîr theih dân ngaihtuah bawk ang che u. Inngaihtlâwmna chu Kristian mi puitling ni tûra mize pawimawh tak a ni a. Hmeichhiate chuan inngaihtlâwmna an neih hian Jehova leh mi dangte nên inlaichînna ṭha tak an nei ang. Entîr nân, Jehova hmangaihtu hmeichhia chuan a Pa vâna miin lû nihna chungchânga ruahmanna a siam chu inngaitlâwm takin a thlâwp a. (1 Kor. 11:3) Chu ruahmanna chu kohhranah leh chhungkaw inrêlbâwlnaah a bîk taka zawm tûr a ni. w23.12 18-19 ¶3-5

Jehova chuan pasal chu a nupui hmangaih a, a tisa lam, rilru lam leh thlarau lam mamawhte ngaihsak tûrin a phût a ni. Ngaihtuah thiamna, hmeichhiate zahna leh, rinchhan tlâk nihna thiamnate chuan pasal ṭha tak ni tûrin a ṭanpui ang che. Jehova hnên aṭangin pa ṭha tak nih dân chungchâng eng nge i zir theih? (Eph. 6:4) Ani chuan a Fapa Isua chu a hmangaih tih leh a pawm tih tlang takin a hrilh a. (Mt. 3:17) Pa i nih chuan i fate chu i hmangaih tih hrilh ṭhîn ang che. An thiltih ṭhatte avângin fak ṭhîn bawk ang che. Jehova entawntu pate chuan an fate chu Kristian mi puitling ni tûrin an ṭanpui a ni. Tûn aṭangin i chhûngkuaah leh kohhranah mi dangte chunga hmangaih taka ngaihsakna lantîrin leh anni chu i hmangaihin, i ngaihlu tih lantîr dânte zirin, chûng mawhphurhnate atân i inbuatsaih thei a.—Joh. 15:9. w23.12 28-29 ¶17-18

Jehova chhiahhlawh rinawmte ni mah ila, mi dangte ang bawkin harsatnate leh hrisêl lohnate chu kan la tâwk reng a. Chu bâkah, Pathian mite hawtute hnên aṭangin dodâlnate leh tihduhdahnate kan tuar thei bawk. Jehova’n chûng harsatnate tâwk lo tûrin min vênghim lo mah se, ṭanpui min tiam a ni. (Is. 41:10) Hun harsa ber ber kârah pawh a ṭanpuina hmangin hlimna kan nei thei a, thu tlûkna ṭhate kan siam theiin a chungah kan rinawm reng thei a ni. Jehova chuan Bible-in “Pathian thlamuanna,” tia a koh chu pêk min tiam a. (Phil. 4:6, 7) He thlamuanna hian amah nêna inlaichînna hlu tak kan neihna aṭanga lo awm rilru hahdamna a kâwk a. Chu chu “rilru rêng rênga hriat sên loh” a nih avângin kan rin phâk bâkin thil a tithei a ni. Jehova hnêna tih tak zeta i ṭawngṭai hnuah hahdam ta huaiin i inhre ngai em? Chutianga inhriatna chu “Pathian thlamuanna” a ni. w24.01 20 ¶2; 21 ¶4

Pathian an hmangaihnain mi rinawmte chu thinlung zawng zawnga a hming fak tûrin a chêttîr a. Lal Davida chuan Pathian hming fakna chu amah fakna a ni tih a hre thiam a. Jehova hmingah chuan a hming ṭhatna a tel a, chu chuan a mize duhawm takte leh a thiltih ropui takte chu min hriat chhuahtîr a ni. Davida chuan a Pa hming chu tihthianghlima chawimawi a duh a. Chu chu ‘a kawchhûnga awm zawng zawng’—a thinlung zawng zawnga tih a duh a ni. Chutiang bawkin, Levi hote chuan Jehova faknaah hma an hruai a. Chutih rualin, anni chuan Pathian hmingin a phu ang ngeiin an fak thei ngai lo vang tih inngaitlâwm takin an pawm a ni. (Neh. 9:5) Chutianga inngaitlâwm tak leh thinlung taka amah fakna chuan Jehova a tilâwm ang tih a chiang hle. w24.02 9 ¶6

I tihhlawhtlin theih loh thiltum i hlen loh avângin, Jehova chuan hlawhchham angin a thlîr lo vang che. (2 Kor. 8:12) Min tiṭhuanawp thei thilte chu inzirna angin thlîr la. I tihhlawhtlin tawhte chu i rilruah vawng reng rawh. Bible-in “in hnathawh . . . chu theihnghilh tûrin Pathian chu mi fel lo a ni si lo,” tiin a sawi a. (Heb. 6:10) Chuvângin, nang pawhin i theihnghilh tûr a ni lo. I thil lo hlen chhuah tawh—Jehova nêna in inṭhianna te, a chungchâng mi dangte hnêna i hrilh te, a nih loh leh i baptisma chante—chu ngaihtuah ṭhîn ang che. Hun kal tawha hma i lo sâwn tawh ang leh thlarau lam thiltumte i lo hlen tawh ang khân, tûna i thiltumah pawh hma i sâwn zawm zêl thei a ni. Jehova ṭanpuinain i thiltum i hlen thei a. I thlarau lam thiltum tihlawhtling tûra hma i lâk zêl rualin, i tum ram i pan laia Jehova’n a ṭanpui dân che leh mal a sâwm dân che chu hmuh tum ziah ṭhîn ang che. (2 Kor. 4:7) Beidawng lova i beih hrâm hrâm chuan, malsâwmna nasa zâwk i dawng ang.—Gal. 6:9. w23.05 31 ¶16-18

Jehova chuan a hmangaihte chungah a lâwmzia a lantîr ṭhîn a. Isua hnênah A Fapa duh tak, a lawm êm êm a ni tih a hrilhna ṭum hnih lai Bible-ah târ lan a ni. (Mt. 3:17; 17:5) Nang pawhin, Jehova’n a lawmzia che a hrilh che chu i duh ve em? Jehova chuan ṭawngkain min be lo va. Mahse, a Bible Thu hmangin min bia a ni. Chanchin Ṭha Ziaka Isua thusawite kan chhiar hian Jehova’n min lawmzia a sawi chu kan “hre” thei a ni. Isua chuan a Pa mizia chu ṭha famkimin a lantîr a. Chuvângin, Isua’n ṭha famkim lo a hnungzuitu rinawmte a lawmzia a hrilh khân, chûng thute chu Jehova’n kan hnêna sawi angin kan mitthla thei a ni. (Joh. 15:9, 15) Harsatnate kan tawh hian, Pathian lawm kan hlawh lo tihna a ni lo. Chûngte chuan Pathian kan hmangaihzia leh kan rinchhanzia târ lanna hun remchâng min pe zâwk a ni.—Jak. 1:12. w24.03 28 ¶10-11