“Krista Rilru” Hriatna

“Tuin nge Lalpa [Jehova] rilru hre tawha amah chu zirtir thei ang? Keini erawh chuan Krista rilru kan pu a ni”—1 KORINTH 2:16.

1, 2. A thu-ah Jehova chuan Isua chungchâng eng nge laihlan tlâk a tih?

ISUA hmêlhmang chu eng ang nge ni? A sam, a vun, a mit rawng chu eng nge ni? Engtia sâng nge? Engzâta rit nge a nih? Kum zabi engemaw zât chhûnga lemziakthiamte’n Isua lem an ziah chu a inang lo nuai a, ni âwm taka lang a awm laiin, âwm lo tak tak pawh a awm bawk. Ṭhenkhatin chak lo leh dawldâng taka a lem an ziah laiin ṭhenkhat chuan pa tak, leh thahrui ngah hmêl takin an ziak thung a ni.

² Nimahsela, Bible chuan Isua hmêlhmang a chhût ril lêm lo. Jehova chuan chu aia laihlan tûr thil pawimawh zâwk engemaw chu a hria a ni: Isua mizia chu. Chanchin Ṭha ziakte chuan Isua thusawi leh thiltihte chungchâng a pêk mai bâkah, a thusawi leh a thiltihte phêna a ngaihtuahnate leh a lainatnate a târ lang bawk. Hêng thlarauva thâwk khum thuziak palite hian tirhkoh Paula’n “Krista rilru” a tih chu min bihchiantîr thei a ni. (1 Korinth 2:16) Krista ngaihtuahna te, ngaihdân te, leh mizia te kan hriat chian a pawimawh a ni. Engvângin nge? A lo berah pawh a chhan chi hnih a awm vâng a ni.

3. Krista rilru kan hriatchianna chuan eng hriatna nge min pêk theih?

³ Pakhatnaah chuan, Krista rilru chuan Pathian Jehova rilru ngaihruat theihna min pe a ni. Isua chu a pa nên an inṭhian bul êm avângin: “Fapa chu tunge a nih, Pa lo chuan tuman an hre lo; pa pawh chu tunge a nih, Fapa leh an hnêna Fapain a puan duhnate chauh lo chuan tuman an hre lo,” tiin a sawi thei a ni. (Luka 10:22) Chu chu Isua’n ‘Jehova chu eng ang nge a nih in hriat duh chuan, kei min en rawh u,’ a ti ang chiah a ni. (Johana 14:9) Chuvângin, Chanchin Ṭha ziakte’n Isua ngaihtuahna leh ngaihdân an târ lante kan zir hian, dik takin, Jehova ngaihtuah leh ngaihdân te kan zir a ni reng a ni. Chûng hriatna chuan kan Pathian chu min hnaihzualtîr thei a ni.—Jakoba 4:8.

4. Krista thiltih ang ti tak zet tûr chuan, eng nge kan zir hmasak ber ang a, engvângin nge?

⁴ Pahnihnaah chuan, Krista rilru kan hriatna chuan ‘a hniaka zui’ tûrin min ṭanpui a ni. (1 Petera 2:21) Isua zuina chu a thusawite sawi nawn fo leh a thiltihte tih vena mai a ni lo. Thusawi leh thiltihte chu ngaihtuahna leh ngaihdân thununna hnuaia awm a nih avângin, Krista zuina chuan amaha awm a “rilru” ang kan chhawm a phût a ni. (Philippi 2:5) Kawng danga sawi chuan, Krista ang chiaha thil ti tûr chuan, a ngaihtuahna leh a ngaihdânte kan zir hmasa tûr a ni: chu mi awmzia chu ṭha famkim lo mihring tlin tâwk ang zêla theih tâwp chhuaha zir tihna a ni. Chuvângin, Chanchin Ṭha ziaktute ṭanpuina zârah Krista rilru chu i lo bihchiang ang u. A hmasain, Isua ngaihtuahna leh ngaihdân thununtu thilte kan sawiho vang.

Mihring A Nih Hmaa A Awmna

5, 6. (a) Kan ṭhian kawmte’n kan chungah eng nghawng nge an neih theih? (b) He leia a lo kal hmain Pathian Fatîr chuan eng ang ṭhian nge a neih a, chu chuan amahah eng nghawng nge a neih?

⁵ Kan ṭhian bulte chuan keimahni-ah nghawng an nei thei a, kan ngaihtuahna te, kan ngaihdân te an thunun thei a; tin, a ṭha zâwng emaw, a chhe zâwng emawin kan thiltih pawh an thunun thei bawk a ni.a (Thufingte 13:20) Isua’n leia a lo kal hmaa vâna a ṭhian neihte chu han ngaihtuah teh. Chanchin Ṭha Johana ziak chuan “Thu,” a nih loh leh Pathian aia thusawitu anga mihring a nih hmaa Isua awmna chu min ngaihtuahtîr a ni. Ani chuan hetiang hian a sawi a: “Atîrin Thu a awm, Thu chu Pathian hnênah a awm, Thu chu Pathian a ni. Chu mi chu atîrin Pathian hnênah a awm” tiin. (Johana 1:1, 2) Jehova chuan inṭanna a neih loh avângin, Thu chu Pathian hnêna a awmna ‘atîr’ chuan Pathian thil siam inṭanna a kâwk a ni. (Sâm 90:2) Isua chu “thil siam zawng zawnga piang hmasa ber” a ni. Chuvângin, ani chu thlarau thil siam zawng zawngte awm hma, leh vânlâwt a siam hma pawhin a awm tawh a ni.—Kolossa 1:15; Thu Puan 3:14.

⁶ Mi thiam ṭhenkhatte chhût dân chuan, vânlâwt hi a lo berah pawh kum tlûklehdingâwn 12 lai a lo awm tawh a. Chûng chhûtnate a dik dâwn a nih chuan, Pathian Fatîr chuan Adama siam a nih hmain kum chhût phâk loh khawpa rei chu a Pa nên inṭhianna bul tak a nei a ni. (Mika 5:2 khaikhin rawh.) An pahnih inkârah chuan inzawmna thûk tak leh duhawm tak a awm tlat a. Mihring angin finna chuan he Fatîr mihring a nih hmaa awmna chungchâng sawiin: “Chutih lai chuan mi themthiam angin a kiangah ka awm a. Ni tin a lâwmna ka ni a,” a ti a. (Thufingte 8:30) Chiang takin, kum chhût phâk loh khawpa rei chu hmangaihna Hnâr nêna inṭhianna bul tak a nei a, chu chuan Pathian Fapa-ah chuan nghawng thûk tak a nei a ni! (1 Johana 4:8) He Fapa hian tuma hriat theih loh, a Pa ngaihtuahna te, ngaihdân te, leh a kawng te chu a lo hre ta a ni.—Matthaia 11:27.

Lei Lam Nun leh Thununnate

7. Pathian Fatîr leia a lo kal a ngaih chhan tam tak zînga pakhat chu eng nge ni?

⁷ Jehova thiltum chu hmangaihna ngah Puithiam Lalber, “kan chak lohnate min hriatpui thei” ni tûra a Fapa thuam a nih avângin, Pathian Fapa chuan zirtûr dang pawh a nei a ni. (Hebrai 4:15) He chanvo atâna thil phût te tihpuitlin chu Fapa he leia mihring anga a lo kal chhante zînga pakhat a ni. Tichuan, mihring tisa leh thisen neiin, Isua chuan tûn hmaa vân aṭanga a lo thlîr ringawt ṭhin dinhmunte leh thununnate a hmu ta a. Tûnah chuan mihring ngaihdân leh rilru vei zâwngte chu a hmun ngeiah a tawng thei ta a. A châng chuan a chau va, a tuihâl a, a rilṭam ṭhîn a ni. (Matthaia 4:2; Johana 4:6, 7) Isua chuan chu aia nasa harsatna leh hrehawmna zawng zawng pawh a tuar chhuak vek a. Tichuan, “thu âwih a zir” a, Puithiam Lal nih a tling ta a ni.—Hebrai 5:8-10.

8. He leia Isua naupan lai nun chungchâng eng nge kan hriat?

⁸ A lei nun inṭanna lamah Isua’n eng thilte nge a tawn? A naupan lai chanchin chhinchhiah hi a tawi hle a. Dik tak chuan, Matthaia leh Luka chauhvin a pian lai vêla thil thlengte an ziak a ni. Chanchin Ṭha ziaktute chuan Isua chu leia a lo kal hmain vânah a awm tawh tih an hria a. Thil dang zawng aiin, mihring a nih hmaa a awmna chuan eng ang mi nge a nih a sawifiah zâwk a ni. Nimahsela, Isua chu mihring a ni tak zet a. Ṭha famkim ni mah sela, nausên aṭangin naupang; tleirawl aṭanga puitling thlenga a ṭhan chhoh a ngai a, engkim a zîr chawp reng a ngai a ni. (Luka 2:51, 52) Bible chuan Isua lei lam nun chungchâng eng engemaw a târ lang a, chûng chuan a nun a khawih a ni tih rinhlelhna tûr a awm lo.

9. (a) Isua chu chhûngkaw rethei takah a piang tih tihchianna eng nge awm? (b) Eng ang dinhmunah nge Isua chu seilian nia a lan?

⁹ Hriat theih chinah chuan, Isua chu rethei chhûngkuaa piang a ni a. Hei hi a pian hnu ni 40 vêla Josefa leh Mari ten biak ina an hruaia an thil hlan khân a lantîr a ni. Halral thil hlan atâna berâm no leh sual thawi nân ṭhuro emaw, pârva no emaw ken aiin, “ṭhuro tuak khat emaw, pârva no emaw,” a engemaw zâwk zâwk chu an keng ta zâwk a ni. (Luka 2:22-24) Mosia dânah chuan, he thil hlan hi retheite tâna ruahman a ni. (Leviticus 12:6-8) Chu mi hnu chuan chu chhûngkaw tlâwm tak chu an lo pung a. Mak taka Isua piantîr a nih hnuah Josefa leh Mari chuan a tlêm berah pawh fa dang paruk lai an nei leh a ni. (Matthaia 13:55, 56) Chuvângin, Isua chu chhûngkaw hung tak, dinhmun tlâwm takah a seilian a ni.

10. Josefa leh Mari chu Pathian ṭih mi an ni tih engin nge tilang?

¹⁰ Isua chu Pathian ṭihna nei nu leh pa enkawl seilenin a awm a. A nu, Mari chu hmeichhe challang tak a ni. Vântirhkoh Gabriela’n chibai a bûk laia: “Chibai, Vohbîk! Lalpa i hnênah a awm,” tia a sawi kha hre chhuak leh la. (Luka 1:28) Josefa pawh Pathian ngaihsak mi a ni a. Kum tinin Kalhlên Kût hmang tûrin kilometer 150-a hla Jerusalemah a kal ziah a. Mipa chauh kal tûra phût ni mah se, Mari pawh a kal ve ṭhîn a ni. (Exodus 23:17; Luka 2:41) Ṭum khat chu chutianga an kalnaah, Josefa leh Mari chuan nasa taka an zawn hnuin kum 12 leka upa Isua chu biak in-ah zirtîrtuho zîngah an hmu a. A nu leh pa lungngai tak hnênah Isua chuan: “Ka pa inah ka awm tûr in hre lo vem ni?” tiin a sawi a ni. (Luka 2:49) “Pa”—he thumal hian naupang Isua tân nêlawm leh a tak tak a ni tih a hril ngei ang. Pakhatah chuan, Jehova chu a Pa tak tak a ni tih hrilh a ni tawh ngei ang a. Chu mai bâkah, Josefa pawh Isua tân pahrawn ṭha tak a ni ngei bawk ang. Jehova chuan A Fapa duh tak enkawl seilian tûr chuan mi khirh leh nunrâwng chu a thlang lo ngei ang le!

11. Isua’n eng themthiamna nge a zir a; tin Bible hun laiin, he hna thawhnaah hian eng hnate nge tel?

¹¹ Nazareth-a a awm chhûngin, Isua chuan mistiri hna a zir a, a pa hrawn Josefa hnên aṭangin a nih a rinawm hle. Isua chu a themthiam hle a, chuvângin “thingrem siamtu,” tia koh a ni. (Marka 6:3) Bible huna mistiri-te chuan in an sa a, inchhûng bungrua te (dawhkân, ṭhutthleng, leh ṭhuthlengsei te), leh leilehna hmanruate an siam ṭhîn a. C.E. kum zabi pahniha Justin Martyr-a chuan a lehkhabu Dialogue With Trypho tihah chuan Isua chungchâng chu: “Mihring zînga a awm lai chuan mistiri-ah a ṭang a, leilehna hmanruate leh nghâwngkawlte a siam ṭhîn,” tiin a ziak a. Chûng chu hna awlai a ni lo, hmân lai mistiri te chuan thingzai an lei thei âwm si lo va. Amah ngei kal chhuakin thing te a thlang ang a, a kitin, inah a pu haw ṭhîn a ni ngei ang. Chuvângin, Isua chuan eichawp zawn harsatna te, mi dâwr dân te, leh chhûngkaw enkawl harsatna te chu a hre ngei ang.

12. Josefa chu Isua aiin a thi hmasa tih engin nge tichiang a, hei hian Isua chu engtin nge a nghawng?

¹² Fapa upa ber a nih angin, Isua chuan chhûngkaw enkawlnaah ṭanpuina a pe ngei ang, a bîk takin Isua thih hmaa Josefa thi nia a lan avângin.b Zion Watch Tower January ni 1, 1900 chhuak chuan: “Isua naupan laiin Josefa chu a thi a; tichuan, mistiri hna thawkin chhûngkua a châwm a ni tih thurochhiah chanchin chuan a puang a. He ngaihdân hi Isua chu thingrem siamtu anga an kohna leh a nu leh a unaute an sawi lan laia Josefa an sawi si lohna Bible chângte hian a thlâwp a ni. (Marka 6:3) . . . Chuvângin, kan Lalpa nun kum 18 chhûng, [Luka 2:41-49 a chhinchhiah] thil thlen hun aṭanga baptisma a chan thleng chu nuna thil tih tûr pângngaite tiin a nun a hmang liam a ni tia ngaihdân neih chu a âwm hle a ni,” tiin a sawi a ni. Isua tiamin Mari leh a fate chuan, hmangaih tak pasal leh pa ber a borala a hrehawm dân chu an hre ngei ang.

13. Isua’n a rawngbâwlna a ṭan khân, engvângin nge mi dangte neih theih loh hriatna, ngaihtuah thiamna, leh lainatna thûk tak nên a ṭan theih?

¹³ Isua chu khawsa thei chhûngkua aṭanga lo piang a ni lo ngei mai. Mi pângngaite nun chu a hmun ngeiah a tawng zâwk a ni. Tichuan, C.E. 29-ah chuan Isua tân Pathian chanvopêk hlen chhuah hun a lo thleng ta a. Chu mi kum tâwp lamah chuan tuiah baptis a ni a, Pathian thlarau lam Fa anga hrin a lo ni a. ‘A tân vân a lo inhawng a,’ chu chuan, tûnah chuan mihring a nih hmaa a nun leh tûn hmaa a neih a ngaihtuahnate leh a ngaihdânte chu a hre chhuak lehthei tih a lantîr a ni. (Luka 3:21, 22) Chuvângin, Isua’n a rawngbâwlna a thawh ṭanin, mi dangte neih theih loh hriatna, ngaihtuah thiamna, leh lainatna thûk tak chu a nei a ni. Chhan ṭha tak neiin, Chanchin Ṭha ziaktute chuan Isua rawngbâwlna chungchâng an ziak tam ber a ni. Chutichung pawhin, a thiltih leh a thusawi zawng zawng chu an chhinchhiah vek thei lo. (Johana 21:25) Mahse, thlarau thâwk khuma an ziahte chuan nung dam tawh zinga mi ropui ber rilru chu min bihchiantîr thei a ni.

Mihring Isua Mizia Chu

14. Chanchin Ṭha ziaktute’n Isua chu nêlawm tak leh lainatna thûk tak nei angin engtin nge an lanchhuahtîr?

¹⁴ Chanchin Ṭha ziak aṭangin Isua chu nêlawm tak leh lainatna thûk tak nei a ni tih a lang a. Rilrua a vei zâwngte nasa takin a lanchhuahtîr a: phâr a khawngaih a (Marka 1:40, 41); thinlung sakte avângin a lungngai a (Luka 19:41, 42); tangka thlengtu mi duhâmte chungah thinurna fel a lantîr bawk. (Johana 2:13-17) Mite dinhmun hre thiam tak Isua chuan a rilrua a veite a thup bo lo va, a ṭap a ni. A ṭhian ngainat êm êm Lazara a thih khân, a unaunu Mari ṭap chuan Isua thinlung a khawih nasa hle a, mite mithmuhah a ṭap hial a ni.—Johana 11:32-36.

15. Mi dangte a cheibâwl dân leh a thlîr dânah Isua mi khawngaih theihna chu engtin nge lantîr a nih?

¹⁵ Isua mi khawngaih theihzia chu mi dangte a cheibâwl dânah hian a lang chiang bîk a. Mi hnuaihnung leh retheite ṭhianin, ‘an thlarau tâna chawlhna hmu’ tûrin a ṭanpui ṭhîn. (Matthaia 11:4, 5, 28-30) Hrehawm tuarte mamawh ṭanpuina pe tûrin a buai lutuk ngai lo; a rûk têa a puan hmawr dektu thipût nei hmeichhia leh ngawi mai duh lo kutdawh mitdel chu a ṭanpui a ni. (Matthaia 9:20-22; Marka 10:46-52) Isua chuan mi dangte ṭhatna a zawng a, a fak bawk; chutichung pawhin, a ṭûl hunah mi dangte zilh a inhuam tho bawk a ni. (Matthaia 16:23; Johana 1:47; 8:44) Hmeichhiate hnuaichhiah an nih lai pawhin, Isua chuan a âwmtâwk chawimawina leh zahna nên a cheibâwl a. (Johana 4:9, 27) Hmeichheho chuan an thil neihin châk taka rawng an bâwlsak pawh hi hriatthiam theih tak a ni.—Luka 8:3.

16. Isua’n nunna leh khawvêl thilte inbûktâwkin a thlîr tih engin nge lantîr?

¹⁶ Isua chuan nun thlîr dân inbûktâwk tak a nei a. Khawvêl thilte hi atân chuan thil pawimawh ber a ni lo. Khawvêl lam thilah chuan a rethei hle ni âwm tak a ni. Ama’n “lu nghahna a nei lo” tih a sawi si a. (Matthaia 8:20) Chutih rual chuan, Isua chuan mi dangte hlimna a belhchhah a ni. Rimawi te, zai te, leh hlimhlawp te telna inneih ruaiṭhehnaa a tel khân chûng hlimnate tihtâwp tuma tel a ni lo tih a chiang hle a ni. Dik takin, Isua chuan a thil mak tih hmasak ber chu, chu mi hmunah chuan a ti a. Uain a zawh chuan tui chu “mihring thinlung tihlâwmna uain” tha takah a chantîr a. (Sâm 104:15; Johana 2:1-11) Ruai chu chhunzawm theih a ni a, mo leh a neitu chu an hrilhhai loh phah ta a ni. A inbûktâwkna chu a hnua râwngbâwlnaa rei tak leh rim taka a thawhna chungchâng sawite chuan a tilang bawk a ni.—Johana 4:34.

17. Isua chu Zirtîrtu Thiam a ni tih chu engvângin nge thil mak a nih loh va; tin, a zirtîrnate chuan eng nge a târ lan?

¹⁷ Isua chu Zirtîrtu Thiam a ni. A zirtîrna tam takah chuan nî tin nuna thil thleng dik tak, a hriat chian êm êmte a târ lang ṭhîn a. (Matthaia 13:33; Luka 15:8) A zirtîr dân chu tehkhin rual a ni lo—chiang tak, tluangmâwl tak, leh hmantlâk tak a ni. A zirtîr dân aia la pawimawh lehzual chu a zirtîra chu a ni. A zirtîrnate chuan a ngaithlatute chu Jehova ngaihtuahna te, a ngaihdân te, leh a kawngte hriat beltîr a duhzia a târ lang a ni.—Johana 17:6-8.

18, 19. (a) Eng tehkhin thu fiah tak leh nung tak hmangin nge Isua’n a Pa chanchin a hrilhfiah? (b) A dawtleha thuziakah eng nge sawiho a nih dâwn?

¹⁸ Tehkhin thu hmang fovin, Isua chuan awlsam taka theihnghilh mai theih loh tûr tehkhin thu fiah tak leh nung tak hmangin a Pa chanchin a hrilhfiah ṭhîn. Pathian zahngaihna chungchâng sawi mai mai chu thu dang a ni a. Jehova chu ngaidamtu, pain a fapa lo kîr leh hmu a, ‘tlâna a ir chuktuah a, fâwp ngawih ngawihtu’ nêna tehkhin chu a dang zak mai a ni. (Luka 15:11-24) Sakhaw hruaitute’n mi pângngaite an hmuhsitna hnam dân khirh tak chu hnâwlin, Isua chuan a Pa chu nêlawm tak, Pharisai chapo takte ṭawngṭaina aia chhiahkhawntu inngaitlâwm takte ngenna duh zâwktu a ni tih a hrilhfiah bawk a ni. (Luka 18:9-14) Isua chuan Jehova chu chawngzawng leia tla takngial pawh hretu ngaihsaktu Pathian a ni tih a sawi a. “Hlau suh u; chawngzawng tam tak aiin in hlu zâwk a ni,” tiin a zirtîrte a tiam a ni. (Matthaia 10:29, 31) Mipuite chuan Isua ‘zirtîr dân’ chu mak an ti a, a lama hîpin an awm a ni. (Matthaia 7:28, 29) Chuvâng chuan alâwm ṭum khat phei chu “mipui tam tak” chu ni thum ngawt chaw pawh ei lova a bulah an awm tlat ni!—Marka 8:1, 2.

¹⁹ Jehova’n Krista rilru chu a Thu-ah a lantîr avângin a va lâwmawm êm! Mahse, mi dangte nêna kan indâwrnaah engtin nge Krista rilru kan neiin kan lantîr theih ang? Chu chu a dawtleha thuziakah sawiho a ni ang. (w00 2/15)

[Footnote-te]

I Hre Chhuak Em?

• “Krista rilru” hriat chu engvângin nge a pawimawh?

• Mihring a nih hmain Isua’n eng ang ṭhian nge a neih?

• A lei lam nun chhûngin eng dinhmun leh thununnate nge Isua’n a hmun ngeia a tawn?

• Isua mizia chungchâng Chanchin Ṭha ziakte chuan eng nge a târ lan?

[Phêk 20-naa milem]

Isua chu chhûngkaw hung tak, dinhmun tlâwm takah a seilian

[Phêk 22-naa milemte]

Zirtîrtute chuan kum 12 leka upa Isua hriatthiamna leh chhânnate chu mak an ti hle