Pathian Rawng I Bâwl Chhan Chu Eng Nge Ni?

Pathian ṭih êm êm Lal pakhat chuan ṭum khat chu a fapa hnênah heti hian thurâwn a pe a: “I pa Pathian hi hria la, thinlung ṭha famkim leh rilru phûr takin a rawng bâwl ang che,” tiin. (1 Chronicles 28:9) A dik a ni, Jehova chuan a chhiahhlawhte chu hlim leh lâwm chunga a rawng bâwl tûrin a duh a ni.

JEHOVA Thuhretute kan nih angin, Bible thutiamte hrilhfiah a nih velêh kan pawm nghâl a, kan thinlung chu lâwmnain a khat liam a ni. Nî tinin Pathian thil tum chungchâng thu thar engemaw tak kan zir belh zêl a. Jehova chanchin kan zir tam poh leh ‘thinlung ṭha famkim leh rilru phûr taka’ a rawng bâwl kan châkna chu a pûng zual zêl a ni.

Jehova Thuhretu tam takte chuan an dam chhûngin Jehova rawng chu hlim takin an bâwl a. Kristian ṭhenkhatte chuan ṭha takin bul ṭan mah sela, hun a lo kal zêl chuan Pathian rawng kan bâwl chhante chu an hre chang ta ṭhîn lo a ni. Chutiang chu i ni ve em? I lo nih pawhin beidawng suh. Hlimna kan hloh tawh pawh a hmuh lêt leh theih a ni. Engtin nge?

Malsâwmna I Dawnte Chu Ngaihtuah Rawh

A hmasain nî tina Pathian hnên aṭanga mâlsâwmna i dawnte chu ngaihtuah ṭhîn ang che. Jehova thilpêk ṭha takte: a thil siam tam tak​—mi chi tin chi tangte hmuh theih​—ei leh in te, i hriselna te, Bible thutak i hriat te, leh a pawimawh berah chuan a Fapa min pêknate chu ngaihtuah ang che. A thihna chuan chhia leh ṭha hriatna thiang neia Pathian rawng i bâwlna tûrin kawng a sial a ni. (Johana 3:​16; Jakoba 1:​17) Pathian ṭhatna i chhût nasat poh leh amah i ngaihsânna chu a pung zêl ang. Tichuan, i thinlung chuan a thiltih zawng zawnga lâwmna avânga a rawng bâwl tûrin a chêttîr ang che. Rinhlelh rual lovin, “Aw LALPA ka Pathian, nangin thilmak i tihte leh, keimahni lam i ngaihtuahnate hi a tam êm êm mai a, chûng chu i hmâa tihlan sên rual a lo va . . . Chhiar sên rual a ni lo vang,” tih fakna hla phuahtu ang hian i ngaihtuahnawn leh ngei ang.​—Sâm 40:5.

Hêng thute hi Davida ziah a ni a, a nun chu buainain a tlâkbuak reng a. Lal sual tak Saula leh a hote’n thah tuma an zawn reng avângin Davida chuan a ṭhat lai hun tam tak chu tlân chhiat nân a hmang ral a ni. (1 Samuela 23:​7, 8, 19-​23) Davida ngei pawhin mi mal chak lohna do lêt tûr a nei tho va. Chu chu a hriat chianzia Sâm 40-naah heti hian a sawi a ni: “Thil ṭha lo chhiar sên loh chuan mi hual vêl si a, ka khawlohnate chuan mi ûmphâk a, chutichuan ka dâk thei ta lo va; chûng chu ka samzaite ai hian a tam zâwk a,” tiin. (Sâm 40:12) Ni e, Davida chuan buaina tam tak a tâwk a; mahse, chûng avâng chuan a mangang lo. Buainate’n a thlâkbuak chung pawhin Jehova hnên ata malsâwmna a dawnte chu a ngaihtuah reng a, chûng malsâwmnate chu a lungngaihnate ai chuan a nasa zâwk hle tih a hria a ni.

Mi mal harsatna leh tling lo nia inngaihna i neih chuan, chutianga inngai tawh lo va, Davida ang bawka malsâwmna i dawnte ngaihtuah ṭhîn a ṭha a ni. Rinhleh rual lohvin, chûng malsâwmnate ngaihhlutna chuan Jehova hnêna inpûmpêk tûrin a chêttîr ang che a; tin, hlimna i hloh tawh chu hmu kîrleh tûr leh lâwm chunga Pathian rawngbâwl tûrin a ṭanpui thei bawk che a ni.

Kohhran Inkhâwmte’n Min Ṭanpui Thei

Jehova ṭhatnate mahnia ngaihtuah mai bâkah Kristianpuite nêna kan inkawmho a ngai a ni. Pathian hmangaih a, a rawngbâwl tum tlat a hmei a pa, a pui a pangte nêna inhmuhkhâwm ziah chu a phûrawm hle. An entawn tûr siamte chuan thlarau zawng zawnga Jehova rawng bâwl tûrin mi a chawkphûr thei a ni. Tin, Kingdom Hall-a kan inkhâwm hian anni pawh kan chawkphûr ve thei bawk a ni.

A nihna takah chuan, chau hnêpa hna kan thawh zawha in kan thlenin emaw, buaina leh chak lohna avânga lunghnualna kan nei emaw a nih chuan Kingdom Hall-a inkhâwm chu a peihawm lo viau mai thei a ni. Mahsela, chutiang hunah chuan, Kristianpuite nêna inhmukhâwm tûra thupêk awm chu zâwm tûrin ‘kan taksa kan tihchhel a,’ kan inthunun tlat a ngai a ni.​—1 Korinth 9:​26, 27; Hebrai 10:​23-​25.

Chutianga tih a ngaih châng chuan, Jehova kan hmangaih tak tak lo a ni tiin thutâwp kan siam mai dâwn em ni? Hnai lo ve. Tûn hmaa Kristian puitling Pathian hmangaih êm êmtute pawhin Pathian duhzâwng ti tûra an beih hrâm hrâm a ngai tho a ni. (Luka 13:24) Chûng Kristian zînga pakhat chu Paula a ni. Ani chuan a rilrua awm chu heti hian a sawi chhuak a: “Keimahah (chu chu ka tisaah tihna a ni) thil ṭha rêng a awm lo tih ka hria; thil ṭha tih duhna chu keimahah a awm na a, thil ṭha tihna erawh chu a awm si lo,” tiin. (Rom 7:​18, 19) Tin, Korinth khuaa a lehkha thawnah pawh: “Chanchin ṭha hril mah ila, chhuan tûr rêng rêng ka nei si lo, tih mâkmawh ka chungah a innghat a ni si a . . . Chu chu mahni thu thuin ka tih chuan lâwmman ka nei a ni; nimahsela mahni thu thuin a nih si loh chuan chanchin ṭha enkawlna hna mi kawltîr mai a ni ang,” tiin a sawi a ni.​—1 Korinth 9:​16, 17.

Keimahni ang bawkin Paula pawhin thil ṭha a tihduhna dâltu, sual tihchâkna a nei ve tho va. Mahse, chûng sual tihchâknate chu a do ṭâng ṭâng a, a tam zâwk chu a hneh thei a ni. Mahsela, Paula chuan ama chaknaa hneh a ni lo. Amah ngeiin heti hian a ziak a: “Mi tichaktuah chuan engkim ka ti thei a ni,” tiin. (Philippi 4:​13) Paula hnêna thiltihtheihna petu Jehova chuan thil ṭha ti tûra ṭanpuina i dîl phawt chuan nangpawh a tichâk ngei ngei ang che. (Philippi 4:​6, 7) Chuvângin, ‘rinna atân ṭhahnemngai takin bei’ zêl la, Jehova’n mal a sâwm ngei ngei ang che.​—Juda 3.

Chu beihnaah chuan nangmah chauhva i ṭan a ngai lo. Jehova Thuhretute Kohhrana Kristian upa puitling, mahnia ‘rinna a tâna bei’ rengtute chuan ṭanpui che an inpeih reng a ni. Upa ṭanpuina i dîl phawt chuan ani’n a lo “fuih” ang che. (1 Thessalonika 5:​14) Ani chuan “thlipui laka bîkna hmun ang leh thlihrâng laka inhmunhimna ang” nih hi a tum reng tûr a ni.​—Isaia 32:2.

“Pathian chu hmangaihna a ni” a, chuvângin, a chhiahhlawhte’n amah an hmangaih avângin a rawng bâwl se a duh a ni. (1 Johana 4:8) Pathian i hmangaihna tihthâr leh a ngai a nih chuan a chunga sawi tâk ang khian tih tûr ṭul apiang ti ang che. Tichuan, i thiltihah chuan i hlim ngei ngei ang. (w00 12/15)