Jehova Zui Tlâk Ni Tûrin Mi Dangte Ṭanpui Rawh

“Keini pawhin ṭawngṭai leh dilsak che u kan bâng lo; chutichuan hnathawh tinrênga lo rahin, . . . kawng tinrênga amah tilungawi tûrin Lalpa zui tlâkin in awm thei ang.”​—KOLOSSA 1:​9-12.

1, 2. Eng thil nge hlimna leh lungawina bul ni thei?

“LEILETA motor-a hnuh kal theih inah kan khawsa a. Pângngai taka kan khawsak avângin, mi dangte hnêna chanchin ṭha thlenna hun tam zâwk kan neih theih phah a. Jehova hnêna inpumpêk tûrin mi tam takte ṭanpui theihna chanvo hlu taka malsâwm kan ni.”​—South Africa rama hun bikima rawngbâwltu, nupa tuak khat.

² Mi dangte ṭanpuinain hlimna a thlen tih chu i pawm dâwn lâwm ni? Ṭhenkhat chuan dam lo te, lungngai te, a nih loh leh khawhar thei te chu ṭanpui rengin, chûng aṭang chuan lungawina an dawng a ni. Kristian dikte chuan mi dangte an ṭanpui theihna kawng ṭha ber chu, Pathian Jehova leh Isua Krista hriatna hrilhhriat hi a ni tih an hre chiang a. Hei chauh hian Isua tlanna pawm tûr te, Pathian nêna inlaichînna ṭha nei tûr te, leh chatuan nunna dawng thei tûr tein mi dangte chu a hruai thei a ni.​—Tirhkohte 3:​19-21; 13:​48, NW.

3. Eng ang ṭanpuina hian nge kan ngaihsak phû?

³ Mahse, Pathian rawng lo bâwl reng tawh, “Kawng” zuitute i ṭanpuina chu engtin nge? (Tirhkohte 19:9) Anmahni i ngaihsakna chu a nasa hle a; mahse, ṭanpui reng dân emaw, nasa lehzuala i ṭanpui theih dân emaw chu i hre lo mai thei. A nih loh leh, dinhmun avângin i duh angin i ṭanpui thei lo mai thei a, lungawina i hmuh tûr zât pawh i hmuh loh phah thei a ni. (Tirhkohte 20:35) Chu mi kawng hnih chungchâng chu Kolossa lehkha thawn aṭangin kan zir thei a ni.

4. (a) Eng dinhmun hnuaiah nge Paula’n Kolossa khuaa mite hnêna lehkha a thawn? (b) Epaphra chu tunge ni a, eng nge a tih?

⁴ Kolossa khuaa Kristiante hnêna lehkha a thawn lai khân, Paula chuan in lêng nei thei reng mah se, Rom khuaah ina khuahkhirhin a awm a ni. I beisei ang ngeiin, Paula chuan zalenna a neih chhun chu Pathian Lalram chanchin hrilh nân a hmang ṭangkai a ni. (Tirhkohte 28:​16-31) Kristiante chuan Paula chu an va tlawh thei a, ṭhenkhat phei chuan a ruala tân châng pawh an nei a ni. (Kolossa 1:​6-8; 4:10) Chûng zînga pakhat chu chanchin ṭha puangtu ṭhahnemngai tak, Epaphra a ni a, Asia Minor (tûn lai Turkey ram) Ephesi khawchhak lam hmunsânga ram zâwl zau tak, Phrugia ram Kolossa khuaa mi a ni. Epaphra chu Kolossa khuaa kohhran dinnaah a ṭangkai hle a; tin, chu mi khaw hnaih Laodikei khua leh Heirapoli khuaa kohhrante tân a thawk rim hle a ni. (Kolossa 4:​12, 13) Engvângin nge Epaphra chu Paula hmu tûrin Rom khuaah a zin a, Paula chhânlêt dân aṭangin eng nge kan zir theih?

Kolossa Mite Tâna Ṭanpuina Ṭangkai Tak

5. Paula chuan Kolossa kohhran mite hnênah engvângin nge chutiang lehkha a thawn?

⁵ Kolossa kohhran dinhmun chungchângah Paula râwn tûrin, Epaphra chu Rom khuaah a va zin ṭâng ṭâng a. Chuta Kristiante rinna te, hmangaihna te, leh chanchin ṭha hrilhna kawnga an thawhrimzia te chu a hriattîr a. (Kolossa 1:​3-8) Tin, Kolossa Kristiante thlarau lam nun tiderthâwngtu thununna ṭha lo takte a ngaihmawhzia pawh a hriattîr tel bawk a ni. Paula chuan thlarauva thâwk khum lehkha hmangin a chhânglêt a, chu a lehkha thawnah chuan zirtîrtu derte theh darh ngaihdân dik lote chu a dodâl a. Tin, Isua Krista dinhmun pawimawh tak chu a thlûr bîk a ni.a A ṭanpuina chu Bible thutak pawimawhte sawi uarna maiah a duh tâwk em? Kolossa Kristiante chu eng kawng dangin nge a ṭanpui theih bawk a, chuta ṭang chuan mi dangte ṭanpuina kawngah eng nge kan zir theih?

6. Kolossa kohhrante hnêna lehkha a thawnnaah Paula’n eng nge a sawi uar?

⁶ A lehkha thawn bul ṭanna lamah chuan, Paula chuan kan hmuhhmaih mai theih inṭanpuina chi khat chungchângah hriatthiamna min pe a ni. Chu chu ram hla tak aṭanga inṭanpui dân ṭha tak a ni, Paula leh Epaphra te chu Kolossa khua aṭanga hla takah an awm si a. Paula chuan: “In tâna ṭawngṭai fovin, Pathian kan Lal Isua Krista Pa hnênah chuan lâwmthu kan hril ṭhîn,” tiin a nem nghet a. A ni, chûng chu Kolossa khuaa Kristiante tân bîka ṭawngṭaina a ni. Tichuan Paula chuan: “Chu mi avâng chuan thlarau lam finna leh hriat theihna zawng zawng kawngah ama duhzâwng hriat famkimnaah chuan in lo khah theih nân, kan hriat nî achin chu keini pawhin ṭawngṭai leh dilsak che u kan bâng lo,” tiin a sawi belh a ni.​—Kolossa 1:​3-5, 9.

7, 8. Mi mala kan ṭawngṭaina leh kohhrana kan ṭawngṭainaahte chuan eng thu nge a tel ṭhin?

⁷ Jehova chu “ṭawngṭaina ngaithlatu” a ni tih kan hria a, chuvângin a duhzâwng mila kan ṭawngṭainate chu a ngaithla ang tih kan ring tlat thei a ni. (Sâm 65:2; 86:6; Thufingte 15:​8, 29; 1 Johana 5:14) Mahse, mi dangte tâna kan ṭawngṭai hian engtin nge kan tih?

⁸ ‘Kan unau khawvêla awmhote’ chu kan ngaihtuahin, an tân kan ṭawngṭai fo thei a. (1 Petera 5:9) A nih loh leh, leilung chhiatna emaw, vânduaina râpthlâk tak emaw tâwktu Kristiante leh mi dangte tân Jehova hnênah kan ṭawngṭai thei bawk. Kum zabi pakhatnaa hmun hrang hranga awm zirtîrte chuan Judai rama ṭâm tlâk an hria a, chhawmdâwlna an thawn chhuah hma aṭang rêngin an unaute tân ṭawngṭaina tam tak an hlân ngei ang. (Tirhkohte 11:​27-30) Kan hunah pawh, mi tinin ngaithla a, “Amen” an tihna Kristian inkhâwmnaahte chuan kan unau zawng zawngte tân emaw, unauho tam takte tân emawa ṭawngṭaina chu hriat a ni fo.​—1 Korinth 14:16.

Ṭawngṭainaah Dîl Bîk Nei Rawh

9, 10. (a) Eng entîrnate hian nge mi mal tâna ṭawngṭaisak bîk chu a âwm tih târ lang? (b) Engtin nge Paula chu ṭawngṭaisak bîk a nih?

⁹ Mahse, Bible chuan mi mal tân a bîka inṭawngṭaisakna kawngah entawn tûr min pe a. Luka 22:​31, 32-a Isua thusawi kha ngaihtuah rawh. Chu chu tirhkoh rinawm 11-te zînga a awm laia a thusawi a ni. Hun harsa lo thleng mai tûr atân an zain Pathian ṭanpuina an mamawh a; chuvângin, Isua’n an tân a ṭawngṭaisak rêng a ni. (Johana 17:​9-14) Chutichung chuan, Isua’n a zirtîr Petera tân a bîkin a ṭawngṭaisak bawk a ni. Entawn tûr dangte chu: Elisa chuan a chhiahhlawh tân a dîlsak bîk a. (2 Lalte 6:​15-17) Tirhkoh Johana chuan Gaia chu tisa lam leh thlarau lama a dam theih nân a dîlsak bîk bawk a. (3 Johana 1, 2) Tin, ṭawngṭaina dangte chu mi tuemawte tâna dîlsak bîkna a ni.​—Joba 42:​7, 8; Luka 6:28; Tirhkohte 7:60; 1 Timothea 2:​1, 2.

¹⁰ Paula lehkha thawn chuan ṭawngṭainaa dîlsak bîk neih a sawi pawimawh hle a. Ani chuan a tân leh a ṭhiante tâna ṭawngṭaisak tûrin a ngên a. Kolossa 4:​2, 3-ah chuan heti hian kan chhiar a ni: “Ṭawngṭai fan fan ula, chu miah chuan lâwmthu hril chungin ngaihven rawh u. Mi phuarna chhan Krista thurûk chu hril tûrin Pathianin thu atân kawng min tihkuaksak theih nân keini pawh min ṭawngṭaisak rawh u,” tiin. Hêng entîrna dangte pawh hi han ngaihtuah teh: Rom 15:​30, 31; 1 Thessalonika 5:25; 2 Thessalonika 3:​1, 2; Hebrai 13:18.

11. Rom khuaa a awm laiin, tute tân nge Epaphra chu a ṭawngṭai?

¹¹ Rom khuaa Paula ṭhianpa pawhin chutiang chuan a ti ve a. “Epaphra, nangmahni zînga mi, . . . hian chibai a bûk a che u, ani chuan . . . a ṭawngṭainaahte chuan nangmahni tân a bei fo ṭhîn a ni.” (Kolossa 4:12) “Bei fo” tia lehlin thu mal chuan hmân lai infiamnaa insawizawi miin a “beih ṭâng ṭâng” ang a kâwk thei a ni. Epaphra chu khawvêl pum puia ringtute tân emaw, Asia Minor-a ringtute tân emaw a pâwngpaw ṭawngṭai mai em ni? Epaphra chu Kolossa khuaa ringtute tân a ṭawngṭai bîk a ni tih Paula chuan a sawi a ni. Ani chuan an dinhmun a hria a. Keini chuan an hming kan hre vek lo va, harsatna an tawhte pawh kan hriatpui hek lo; mahse, thil ni thei ṭhenkhat lo ngaihtuah ta ila. Lina chuan khawvêl finna lâr tak thununna chu a do a ni mai thei a, Rufa chuan a lo chîn ṭhin Judate sakhaw biak dân hîpna chu a do theih nân ṭanpuina a mamawh a ni thei. Ring lo mi pasala nei Persi chuan a fate Lalpaa enkawl seilen nân chhelna leh finna a mamawhin, thihna khawp natna tuar Asunkrita chuan thlamuanna nasa tak a mamawh em? A ni, Epaphra chuan a kohhrana mite chu a hria a; tichuan, an tân tih tak zetin a ṭawngṭaisak a ni​—Paula leh ani chuan Kolossa unaute chu Jehova zui tlâk an nih theih an duh avângin.

12. Kan mi mal ṭawngṭainaah engtin nge dîlsak bîk kan neih theih ang?

¹² Kan tih dân tûr​—mi dangte kan ṭanpui dân tûr chu i hmu tawh em? Kan hriat angin, Kristian inkhâwmnaa vântlâng ṭawngṭainaahte chuan mipuite avângin a huap zau fo va. Mahse, kan mi mal ṭawngṭainaah emaw, chhûngkaw ṭawngṭainaah emaw chuan dîlsak bîk kan nei thei ang. Bial kantu zawng zawngte emaw, thlarau lama berâm vêngtu zawng zawngte emaw tâna ṭawngṭai châng kan nei ṭhîn a, chutiang hunah chuan ṭawngṭaisak bîk neih châng a awm thei lâwm ni? Entîr nân, engah nge in bial kantu hming lamin emaw, i Kohhran Lehkhabu Zirna Inkhâwm kaihruaitu hming lamin emaw i ṭawngṭai loh vang? Philippi 2:​25-28 leh 1 Timothea 5:23 chuan Paula’n a mi mala Timothea leh Epaphrodita hrisêlna a ngaihtuahzia a târ lang a ni. Chutiang bawkin, an hming kan hriat dam lote tân ngaihsakna kan lantîr thei ang em?

13. Mi mal ṭawngṭainaah eng ang thilte nge telh âwm?

¹³ Mi dang mi mal thilah kan inrawlh tûr a ni lo va; mahse, kan hriatte leh kan ngaihsakte chunga ṭawngṭaina hmanga ngaihvenna dik tak kan lantîr chu a âwm a ni. (1 Timothea 5:13; 1 Petera 4:15) Unau tuemaw chuan a hnathawh lai a chân a, hna pêk tûr dang nei ta si lo ila, kan ṭawngṭainaah a hming lamin a harsatna chu kan sawi tel thei a ni. (Sâm 37:25; Thufingte 10:3) ‘Lalpaa awm mi chauh’ neih a tum avânga pasal leh fate nei lo unaunu tar tawh tak hriat kan nei em? (1 Korinth 7:39) I mi mal ṭawngṭainaah chuan engah nge Jehova malsâwmna leh rinawm taka rawngbâwl zêl tûra a ṭanpuina chu i dîlsak loh vang? Entîrna dang atân, upa pahnihte’n thil tisualtu unaupa tuemaw an zilh a nih chuan, engvângin nge an mi mal ṭawngṭainaah chuan a hming lamin telh châng an neih loh vang?

14. Inṭawngṭaisakna chu mi dang ṭanpuina nên engtin nge a inlaichîn?

¹⁴ I mi mal ṭawngṭainaah chuan Jehova ṭanpuina te, hnêmna te, finna te, leh thlarau thianghlim te, a nih loh leh chu miin a rahchhuah thlarau rah mamawhtute chu i telh thei ang. Kâr lam hlat avâng leh dinhmun dangte avângin, khawvêl lam thila inṭanpui chu a theih loh châng a awm thei. Mahse, i nunaute tâna ṭawngṭaisak chu theihnghilh ngai suh. Jehova zui tlâk nih an duh tih i hria a; mahse, chutiang nih reng theih nân ṭanpuina an mamawh tak zet thei a ni. I ṭanpuina pawimawh ber chu i ṭawngṭaisakna hi a ni.​—Sâm 18:2; 20:​1, 2; 34:15; 46:1; 121:​1-3.

Mi Dangte Tichak Tûrin Thawk Rawh

15. Kolossa mite hnêna lehkha thawn tâwpna lam chu engvângin nge kan ngaihven ang?

¹⁵ Mahse, tih tak zeta inṭawngṭaisakna chu mi dangte, a bîk takin i hmangaihte leh i kiang hnaia awmte ṭanpui theihna kawng awm chhun a ni lo tih chu Kolossa mite hnêna lehkha thawn chuan a tichiang hle a ni. Mi thiam tam takte chuan Paula’n a lehkha thawnah thurin lama kaihhruaina leh zilhna chhawrtlâk tak a pêk hnuah, mi mal chibai inbûkna a belhchhah mai mai niah an ngai a ni. (Kolossa 4:​7-18) Mahse, kan hmuh tawh angin, he a lehkha thawn tâwpna lam chuan zir tûr chhinchhiahtlâk tak min pe a, zir belh tûr tam tak a la awm cheu a ni.

16, 17. Kolossa 4:​10, 11-a unaute chungchâng eng nge kan sawi theih?

¹⁶ Paula chuan heti hian a ziak a: “Aristarka, ka tânpuipa hian chibai a bûk a che u; Marka, Barnaba tupa pawhin chibai a bûk a che u, (ama chungchâng thu-ah thupêkte in hmuh kha; in hnêna a lo kal chuan lo lâwm rawh u;) Isua, Justa an tiha hian chibai a bûk bawk a che u. Chûng chu serhtan mi an ni a; chûng chauh chu Pathian ram thu lamah chuan ka thawhpui, mi thlamuantute [“mi tichaktute,” NW] an ni,” tiin.​—Kolossa 4:​10, 11.

¹⁷ Paula chuan unau, a bîka chhinchhiahtlâkte chanchin a sawi a ni. Anni chu Juda mi, serhtan an ni tih a sawi a. Rom khuaah chuan Juda mi, serhtan tam tak an awm a, a ṭhen chu Kristianah an inlet tawh a ni. Mahse, Paula sawi unaute chuan amah an ṭanpui a ni. Anni chuan Jentail mi saphunte kawm chu an hreh lo a nih a rinawm a; tin, Paula nên Jentailte hnênah lâwm taka chanchin ṭha an hril a rinawm bawk a ni.​—Rom 11:​13, 14; Galatia 1:16; 2:​11-14.

18. A awmpui ṭhenkhatte chu Paula’n engtin nge a fak?

¹⁸ Paula’n “mi tichaktute an ni,” tia anmahni a fakna hi chhinchhiah teh. Hemi thu a sawi ṭum hian, Bible-a ṭum khat chauh lang Grik thu mal a hmang a ni. He thu mal hi Bible letlingtu tamtak chuan “thlamuan” tiin an let mai a. Amaherawhchu, “thlamuan” tih nâna hman lâr tak Grik thu mal chu (pa·ra·ka·le’o) a ni a. Paula chuan he thu mal hi hmun dang tam takah hmang mah se, Kolossa 4:​11-ah chuan a hmang lo.​—Matthaia 5:4; Tirhkohte 4:36; 9:31; 2 Korinth 1:4; Kolossa 2:​2, 3; 4:8.

19, 20. (a) Rom khuaa amah ṭanpuitu unaute chungchânga Paula hman thu mal chuan eng awmzia nge a neih? (b) Chu unaute chuan eng kawngin nge Paula chu an ṭanpui?

¹⁹ Paula’n an hming a lamte chuan ṭawngkama hnemna mai aia tam an ti a ni ngei ang. “Mi tichaktute” tia lehlin Grik thu mal, Kolossa 4:​11-a hman chu khawvêl lam thuziakah a châng chuan lungngaihna tikiang thei damdawi sawi nâna hman a ni. New Life Version-ah: “Ka tân an va ṭangkai tehrêng êm!” tia lehlin a ni a. Today’s English Version chuan: “Anni chu ka tân an ṭangkai hle a ni,” tih ṭawngkauchheh a hmang bawk. Paula kianga awm chûng Kristiante chuan amah ṭanpui nân eng nge an tihsak ang le?

²⁰ Paula chuan inlêng a nei thei a; mahse, tih theih loh tam tak a nei a ni, a mamawh bulte​—chaw leh thlasik atâna kawrlumte a lei thei lo va. A thu zir nâna lehkha zialte emaw, a ziakna tûr ziakfungte emaw chu engtin nge a neih theih zâwk? (2 Timothea 4:13) Chûng a mamawh châkkhaite chu unaute chuan leisakin emaw, tihsak zawkin emaw, Paula chu an ṭanpui a ni tih i hre thei mai lâwm ni? Kohhran khawi emaw ber chu enfiahin, fuih a duh thei ang a. Tâng a nih avângin a duh ang chu a ti thei lo va, chûng unaute chuan Paula aiawha kohhrante tlawhin, a thute kensakin, chanchin an va thlen leh ṭhîn ngei ang. Thlamuanna a va ni êm!

21, 22. (a) Engvângin nge Kolossa 4:​11-a thu chu kan ngaihven ang? (b) Paula awmpuite kan entawn theih dân kawng ṭhenkhat chu eng nge ni?

²¹ Amah “tichaktute” chungchâng Paula thu ziak chuan mi dangte kan ṭanpui dân tûr kawngah hriatthiamna min pe a. Anni chu Jehova zui tlâkin, a nungchang tehnate milin an nung a, Kristian inkhâwmnaahte telin, thuhrilhnaahte pawh an tel a ni thei. Chutiang mite chuan kan fak an phû a ni. Mahse, Paula awmpuite anga “mi tichaktute” ni tûrin, ṭan kan la lehzual thei ang em?

²² Nupui pasal nei lo tûra Bible thu bulte a zawmna avânga tûna chhûng khat hnaite kianga awm lo unaunu hriat i neih chuan, ani chu chhûngkaw thiltihna ang chi, chaw eiin emaw, ṭhiante leh chhûngkhatte nêna intihhlimnaah emaw i sâwm thei ang em? In chhûngkuaa inkhâwmpuia kalnaah emaw, hun âwla zin chhuahnaah emaw i sâwm thei ang em? A nih loh leh a remchân hunah ei tûr lei tûra bazar-puiah sâwm ang che. Chutiang bawkin, hmeithaite emaw, nupui sûnte emaw, a nih loh leh lîrthei khalh thei tawh lote emaw chu i ṭanpui thei ang. An thiltawnte hriat emaw, thil pângngai tak, theirah thlan thiam dân emaw, naupangte thawmhnaw thlan dân emaw hriat chu a manhla i ti ngei ang. (Leviticus 19:32; Thufingte 16:31) Chu chuan inṭhian ṭhat lehzualna a thlen ang. Tichuan damdawi, leh chutiang chi thil dangte pawh leisak an mamawh pawhin i ṭanpuina dîl chu an hreh lo sawt ang. Rom khuaa Paula hnêna awm unaute chu thiltihin, mi tichaktute an lo ni a, nang pawh i ni ve thei a ni. Chûng inṭanpuinate chuan hmân lai hun leh tûn lai hunah pawh malsâwmna dang a thlen a; chu chu hmangaihnaa inpumkhatna tihngheh chu a ni. Tin, chu chuan rinawm taka Jehova rawngbâwl tlâng tûrin tum ruhna min siam a ni.

23. Kan zînga mi tin hian eng tih nân nge hun hmang ila ṭha ang?

²³ Kan zînga mi tinin, he thuziaka dinhmunte hi kan ngaihtuah thei a. Anni chu entîrna mai an ni a; mahse, kan unaute tâna “mi tichaktute” kan nih theih dân dinhmun tak takte min hriattîr a ni. Mahse, tlâwmngai pâwlte rilru put hmang kan nei tûr tihna erawh a ni lo. Chu chu Kolossa 4:​10, 11-a unaute thil tum a ni lo. Anni chu ‘Pathian ram tâna Paula thawhpuite’ an ni. Mi tichaktu an nihna chu, chu mi nên a inzawm tlat a ni. Keini pawhin chutiang chuan i ti ve ang u.

24. Mi dangte tihchak dân kawng kan zawnna leh tihchak nâna kan ṭawngṭainain a tum ber chu eng nge ni?

²⁴ Kan unaute chuan ‘kawng tinrênga Jehova tilungawiin, amah zui tlâka awm’ an duh tih kan ring a. He mi avâng hian, kan mi mal ṭawngṭainaah an hming kan lam a, anmahni tihchak nân kan thawk rim a ni. (Kolossa 1:​10-12) He thu hi Epaphra’n Kolossaa unaute tâna a ṭawngṭai chungchâng a ziah laia Paula sawi lan thu nên pawh a inzawm a ni. Ani chu Kolossa unaute ‘Pathian duhzâwng apianga puitling leh rin tlatna neia an din theihna tûrin’ a ṭawngṭai a ni. (Kolossa 4:12) Chu chu mi malin engtin nge kan tih theih ang. I bihchiang ang u. (w00 12/15)

[Footnote-te]

I Lo Chhinchhiah Em?

• Kan mi mal ṭawngṭainaah engtin nge mi kan ṭanpui theih zâwk ang?

• Eng kawngin nge Kristian ṭhenkhat chu Paula “tichaktute” an nih?

• Eng ang dinhmunah nge “mi tichaktute” kan nih theih?

• Mi dangte tihchak dân kawng kan zawnna leh tihchak nâna kan ṭawngṭaina phêna kan tum ber chu eng nge ni?

[Phêk 24-naa milemte]

Chhûngkuaa chhuah vahnaah Kristian dang i sâwm thei ang em?

[Milem Hawhtîrtu]

Courtesy of Green Chimney’s Farm