Thutak Chu I Ta I Nihtîr Tawh Em?

“Pathian duhzâwng, a ṭha leh lawm tlâk leh, ṭhat famkim chu in hriatfiah theih nân, in rilru athara awmin lo danglam zâwk tawh rawh u.”​—ROM 12:2.

1, 2. Engvângin nge tûn laiah Kristian dik nih a awlai loh?

HE NI hnuhnûng​—he “hun khrih takte”​—kâra Kristian dik nih chu a awai lo hle. (2 Timothea 3:1) Krista entawn tûr siam zui tûr chuan miin khawvêl a hneh tûr a ni. (1 Johana 5:4) Kristian kawng chungchânga Isua thusawi hi hre chhuak leh ang che: “Kawngka zîmah chuan lût rawh u; boralnaa kalna kawngka chu a zau va, a kawng pawh a zau bawk a, chu mi lama lût chu tam pawh an tam hle a ni; nunnaa kalna kawngka chu a zîm a, a kawng pawh a chêp bawk a, a hmutute pawh tlêmtê an ni,” tih chu. Tin, amah vêkin: “Tupawhin mi zui a duh chuan mahni hrehawm pawisa lovin, nî tin a nghaisakna ban puin mi zui rawh se,” tiin a sawi bawk.​—Matthaia 7:​13, 14; Luka 9:​23, N.W.

² Nunnaa kalna kawng chêp tak hmuh hnua Kristian tâna chona awm ta chu, chu mi kawnga kal reng chu a ni. Chu chu engvângin nge chona a nih? Inpumpêka baptisma kan channa chuan Setana ngamthlêm duh zâwng min nihtîr vâng a ni. (Ephesi 6:​11) Ani chuan kan chak lohnate a hria a, thlarau lama kan tlâk hniam phah nân, chûng chu a hman theih dân a zawng reng a ni. Tihah chuan, Isua tlûktîr a lo tum tawh a, engah nge min tihtlûk a tum loh bîk ang?​—Matthaia 4:​1-​11.

Setana Mi Ngamthlêm Dânte

3. Engtin nge Setana’n Evi rilruah rinhlehna a tuh?

³ Setana mi ngamthlêm dân pakhat chu kan rilrua rinhlehna tuh ngheh hi a ni. Kan thlarau lam râlthuam chak lohna laite chu a zawng reng a. Chu hmanrua chu Evi lakah a hmang hmasa ber a, heti hian a zâwt a ni: “Pathianin, ‘Huana thing rah rêng rêng hi in ei tûr a ni lo,’ a ti elo maw?” tiin. (Genesis 3:1) Thu danga sawi chuan, Setana chuan: ‘Pathianin in chungah chutiang khapna a dah anga maw? Thil ṭha tak a pe phal dâwn lo che u a? Tih êmah chuan, Pathianin in ei ni apang chuan in mit a lo vâr ang a, a chhia leh a ṭha hriain amah ang in lo ni dâwn tih a hriat reng si!’ a tihna a a ni. Setana chuan Evi rilruah rinhlehna chi chu a tuh a, zung a kaih hun (OR A ṬIAH HUN) tûr a nghâk ta a ni.​—Genesis 3:5.

4. Tûn laiah eng rinhlehnain nge mi ṭhenkhat chawkbuai thei?

⁴ Setana’n chu tih dân chu tûn laiah engtin nge a hman? Kan Bible chhiar te, mi mala inzirna te, ṭawngṭai te, leh Kristian rawngbâwlna leh inkhâwm te kan thlahthlam chuan, mi dangte rinhlehna, entîr nân: “Hei hi Isua zirtîr thutak a ni ngei tih engtin nge kan hriat theih a?” “Kum zabi 21-naah kan awm tawh si a, tûn hi ni hnuhnûng a ni tak zet thei anga maw?” “Armageddon kan hnaih tak zet tawh nge, kan la hlat?” tih ang chi kan neih ve a hlauhawm a ni. Chutiang rinhlelhna kan neih chuan, a tihven nân eng nge kan tih theih?

5, 6. Rinhlelhnate a lo awm chuan eng nge kan tih ang?

⁵ Jakoba chuan heti hian fuihna thu ṭangkai tak a ziak a ni: “In zîngah tupawh in finna a tlâkchham chuan mi zawng zawng hêna hau lo leh ui lova pe ṭhîn tu Pathian chu dîl rawh se, chutichuan a hnênah pêk a ni ang. Nimahsela ringhlel hauh lovin rinna neiin dîl rawh se, ringhleltu chu tuifinriat fâwn thli chhêm len leh vawrh ang a ni si a. Chutiang mi, rilru bulbâl nei lo, a thil tih zawng zawnga nghet lo mi chuan Lalpa hnênah engmah hmuh inring suh se,” tiin.​—Jakoba 1:​5-8.

⁶ A nih leh, eng nge kan tih tûr ni ta ang? Rinna leh hriatthiamna chu ṭawngṭaina hmangin ‘Pathian kan dîl reng’ tûr a ni a, rinhlelhna emaw, zawhna emaw chungchânga mi mal Bible zirnaah kan thawk rim sauh tûr a ni. Tin, rinna lama chakte hnên aṭang pawhin ṭanpuina kan dîl thei bawk a, kan mamawh ṭanpuina chu Jehova’n min pe dâwn tih ringhlel ngai suh. Jakoba pawhin heti hian a sawi a: “Chutichuan Pathian thu thuin awm rawh u; amaherawhchu Diabola dodâl rawh u, tichuan a tlân bosan ang che u. Pathian hnaih rawh u, tichuan anin a hnaih ang che u,” tiin. Ni e, Bible zirna leh ṭawngṭaina hmanga Pathian kan hnaih chuan, kan rinhlelhnate chu hnawhbovin a awm ang.​—Jakoba 4:​7, 8.

7, 8. Isua zirtîr biakna kalphung hriat theihna tehkhâwng ṭhenkhatte chu engte nge ni a, chûng tehkhâwngte chu tute’n nge zâwm?

⁷ Entîr nân, he zawhna hi ngaihtuah ila: “Isua lo zirtîr biakna kalphung ang chiahin kan kal tih engtin nge kan hriat? tih hi. He zawhna hi chhâng tûrin, eng tehkhâwng nge ngaihtuah ngai? Bible chuan Kristian dikte chuan inhmangaih tawnna dik tak an nei tûr a ni, tih a sawi lang a. (Johana 13:​34, 35) Pathian Jehova hming chu an tithianghlim tûr a ni. (Isaia 12:​4, 5; Matthaia 6:9) Tin, a hming chu an hriattîr bawk tûr a ni.​—Exodus 3:​15; Johana 17:26.

⁸ Biakna dik hriat chian theihna ze dang chu Pathian Thu Bible zahna hi a ni a. Bible hi Pathian mizia leh a thil tumte puan chhuahna lehkhabu awm chhun a ni. (Johana 17:17; 2 Timothea 3:​16, 17) Chu bâkah, Kristian dikte chuan mihring beisei tûr awm chhun, lei paradis-a chatuan nunna thlentu tûr Pathian Ram chanchin chu an puang chhuak bawk. (Marka 13:10; Thu Puan 21:​1-4) Anni chu khawvêl politics leh khawvêl nun kawng bawlhhlawh tak ata an inthiarfihlim a ni. (Johana 15:19; Jakoba 1:​27; 4:4) Tûn laiah tute’n nge hêng tehkhâwngte zâwm? Thu dik chuan chhânna pakhat chauh min pe a ni​—Jehova Thuhretute tiin.

Rinhlelhna Châm Reng Ta Se Engtin Nge Ni Ang?

9, 10. Rinhlelhna châm rengte chu hneh tûrin eng nge kan tih theih?

⁹ Rinhlelhna hlîra khat nia kan inhriat chuan engtin nge ni ang? Eng nge kan tih tâk ang? Chu mi chhânna chu Lal fing Solomona’n a sawi a ni: “Ka fapa, ka thute i dawn a, ka thupêkte i khâwl khâwm a, finna lama i beng i chhit a, i thinlung hriatna lam atân i pêk chuan; a ni, hriatna i auh va, hriat thiam theihna pawh i auh chuan, tangkarua anga i zawn a, ro phûm rûk anga i zawn chuan, LALPA ṭih nachâng i lo hria ang a, Pathian hriatna chu i chhar chhuak ang,” tiin.​—Thufingte 2:​1-5.

¹⁰ Chu chu a mak hle lo maw? Tih tak zeta Pathian finna kan ngaihtuah chuan ‘Pathian hriatna chu kan chhar chhuak ang.’ Ni e, vânlâwta Lalchungnungbera hriatna chu kan neih phâk a ni reng a ni​—a thute dawn kan duh a, kan khâwl khâwm phawt chuan. A awmzia chu ṭawngṭaina leh mahnia Bible zirna hmanga Jehova lam hawi hi a ni. A Thu-a ro inphûm chuan rinhlelna eng pawh a hnawtbo thei a, thutak êng hmu tûrin min ṭanpui thei a ni.

11. Engtin nge Elisa chhiahhlawh chu rinhlelhnain a chawhbuai?

¹¹ Ṭawngṭainain hlauhna leh rinhlelhnaa khat Pathian chhaihhlawh a ṭanpui dân entîrna fiah tak chu 2 Lalte 6:​11-​18-ah a hmuh theih a. Elisa chhiahhlawh chuan thlarau lam hriat thiamna a tlachham a. Suria sipaite hual beha awm Pathian zâwlnei chu vân lam sipai rualin an ṭanpui ang tih a hre thei lo a ni. Tichuan, chhihhlawh hlau lutuk chuan: “E khai aw, ka pu! engtin nge kan tih tâk ang le?” tiin a au chhuak a. Engtin nge Elisa’n a chhân lêt? “Hlau mata che; an lama ṭang ai chuan kan lama ṭang an tam zâwk alâwm,” tiin a chhâng a ni. A nih leh, chhiahhlawh chuan engtin nge a rin theih ang? Ani chuan vân lam sipai rual chu a hmu thei si lo va.

12. (a) Engtin nge chhiahhlawhpa rinhlelhna chu lâk bosak a nih? (b) Rinhlelhnate kan neih reng reng chu engtin nge kan lâk bo theih?

¹² “Elisa chuan a ṭawngṭai a, ‘LALPA, a hmuh theihna tûrin a mit han tihmensak teh ang che’ a ti a. Tin, LALPAN chu tlangvâl mit chu a han tihmensak a; tichuan a hmu ve ta a; tin, ngai teh, Elisa vêlah chuan tlâng chu mei tawlailîr leh sakawrin a khat mup mai a.” Chu mi ṭum chuan, Jehova chuan chhiahhlawhpa chu Elisa vênghimtu van lam sipai rualte a hmuhtîr a ni. Mahse, tûn laiah chutiang Pathian ṭanpuina chu kan beisei tûr a ni lo. Zâwlnei chhiahhlawh chuan a rinna tihchak nâna zir tûr, Bible a bu pumin a nei lo tih hria ang che. Keini erawh chuan kan nei a. Kan hman nasat phawt chuan, kan rinna pawh tihchakin a awm ve ang. Entîr nân, vân lam rorêlna hmuna Jehova awm chanchin sawina tam tak chu kan ngaihtuah thei a ni. Chûng chuan Jehova’n tûn lai khawvêl pum zirtîr rawngbâwlnaa a chhiahhlawhte ṭanpuitu vân lam inawpna pâwl a nei ngei a ni tih rinhlelhna tûr a tibo a ni.​—Isaia 6:​1-4; Ezekiela 1:​4-​28; Daniela 7:​9, 10; Thu Puan 4:​1-​11; 14:​6, 7.

Setana Ngamthlêmnate Lakah Fîmkhur Rawh!

13. Eng hmangin nge Setana’n thutak kan chelhna chu tihchauh a tum?

¹³ Kan thlarau lam leh thutak kan chelhna tichau tûra Setana kawng hman ṭhenkhatte chu engte nge ni? Chûng zînga pakhat chu chi hrang hranga lang chhuak, nungchang bawlhhlawhna hi a ni. Nawmsip bâwlna dah pawimawh tûn lai chhuan chuan, a rah chhuah chu eng pawh nise, tisa lam nawmna an ûm tlat avângin, tûn lai mipat hmeichhiatna âtchilhna khawvêlah inngaihzâwnna (uirena atâna thu khuhna) emaw, zan khat inkawlna (inngaihna pawlawh tak) emaw chu nî tina thilthleng a lo ni ta. Cinema te, TV te, leh video te chuan chûng nun dân chu a tipung a ni. Chanchin hriatna engkim chu zahmawh lam thilin a fan chhuak a, a bîkin Internet-ah a nasa zual a ni. Thlêmna chuan chutiang thil hriat châkna neite chu a châng reng a ni.​—1 Thessalonika 4:​3-5; Jakoba 1:​13-​15.

14. Engvângin nge Kristian ṭhenkhatte’n Setana ngamthlêmna an tuar?

¹⁴ Kristian ṭhenkhatte chuan an thil hriat châkna chu an inhnehtîr a, zahmawh lem chuanna satliah emaw, a ngial a ngana chuanna emawte thlenga enin an rilru leh an thinlung chu an tibawlhhlawh a ni. Tichuan, Setana mi hîpna thangah anmahni leh anmahni an inbarhlût a. Chutianga tihna chuan thlarau lam lawng kehchhiatna a thlen fo a ni. Chûng mite chu ‘sual kawngah nausên angin’ an awm reng thei lo va. ‘Rilru lamah puitling’ an ni lo a ni. (1 Korinth 14:20) Kum tinin, sâng tam takte chuan Pathian Thu tehnate leh a dân bulte an zawm tlat loh avângin a sawhkhâwk chu an tuar ṭhîn. Anni chuan ‘Pathian râl thuam famkima’ intuam reng chu an thlahthlam a ni.​—Ephesi 6:​10-​13; Kolossa 3:​5-​10; 1 Timothea 1:​18, 19.

Kan Thilneih Chu Roh Rawh

15. Engvângin nge ṭhenkhatte chuan an thlarau lam ro chu hlut thiam har an tih?

¹⁵ “Thutak in hria ang a, thutak chuan bâwih a bân ang che u,” tiin Isua’n a sawi a. (Johana 8:​32) Thuhretu tam takte chuan an tûn hma nun dân leh sakhaw vawnte chu an bânsan a ngai a. Chuvângin, thutakin a ken tel zalênna chu an hre nghâl thei a ni. Kawng leh lamah chuan, nu leh pa thutaka awmte enkawl seilen ṭhalai ṭhenkhat chuan an thlarau lam ro chu hlut thiam har an ti mai thei. Anni chu sakhaw dik lo emaw, he khawvêl nawmsip bâwl ûmna te, ruihhlo ngaihna te, leh nungchang bawlhhlawhnaah te emaw an tel ngai lo a ni. Chuvângin, kan thlarau lam paradis leh Setana sualna khawvêl inkalh chianzia an hmuh hmaih thei a ni. Ṭhenkhatte erawh chuan an neih loh thilte neih theih nân khawvêl tûr tem chhin tûra thlêmnaah an inpe hial ṭhîn bawk.​—1 Johana 2:​15-​17; Thu Puan 18:​1-5.

16. (a) Eng zawhnate nge kan inzawh ang? (b) Engti tûra zirtîr leh fuih nge kan nih?

¹⁶ A nih leh, na leh hrehawm hriat nân, kan kut ṭangte chu tihkan ker a ngai em? Mi dangte thiltawn ṭha lo takte aṭangin kan inzir thei lo vem ni? Engemaw hmaih kan neih leh neih loh hriat nân, he khawvêl ‘chirhdiak’ hi kan pan a ngai em ni? (2 Petera 2:​20-​22) Setana khawvêla tûn hmaa lo awm tawh, kum zabi pakhatna Kristiante chu, Petera chuan: “Jentailte duhzâwng tih nân leh hurnaah te, taksa châknaah te, uain hehnaah te, zu hmun hlimnaah te, zu inhonaah te, milem biakna tenawm takah te awm nân tûn hma kha a tâwk tawh ang,” tiin a hriattîr a ni. Chuvângin, nun bawlhhlawh tak hre tûrin khawvêl ‘nawmsak bâwl luattuknaah’ kan zuan luh kher a ngai lo tih a chiang hle. (1 Petera 4:​3, 4) Chutiang lo takin, Bible zirtîrna hmun ber Kingdom Hall-ah Jehova nungchang tehna sâng takte zirtîrna kan dawng thung a ni. Tin, thutak kan nei a, kan ta kan nihtîrzia târ lan nân kan hriatthiam theihna hmang tûra fuih kan ni.​—Josua 1:8; Rom 12:​1, 2; 2 Timothea 3:​14-​17.

Kan Hming Chu Chhinchhiahna Lek A Ni Lo

17. Engtin nge Jehova Thuhretu hlawhtling tak kan nih theih ang?

¹⁷ Thutak chu kan ta kan nihtîr chuan, hun remchâng apiangah mi dangte hrilh kan tum ang. Tuina nei lote chu tihluihnain kan hrilh ang tihna a ni lo. (Matthaia 7:6) Chu ai mahin, Jehova Thuhretu kan nihzia kan sawi hreh lo vang a; miin zawhna emaw, Bible thu leh hla chhuahte dawnna emawa tuina chhe tê a lantîr chuan, kan beisei chanchin hrilh tûrin kan inringin kan inpeih reng tûr a ni zâwk a ni. Ni e, chutianga ti thei tûr chuan inah te, hnathawhnaah te, dâwrah te, a nih loh leh intihhlimna hmunah te, khawi hmunah pawh awm ila thu leh hla chhuah ṭhenkhat kan neih reng a ngai a ni.​—1 Petera 3:​15.

18. Kristian kan nihzia chiang taka târ lanna chuan engtin nge kan nunah thil ṭha a thlen theih?

¹⁸ Kristian kan nihzia mite kan hriattîr hian, Setana min dona hlauhawm tak ata kan inhumna chu kan tichak sawt a ni. Pian cham emaw, Krismas emaw lawmna, a nih loh leh office-a pawisa inkhelhna thil emawah kan thawhpuite chuan, “Ani chu va tibuai suh u, Jehova Thuhretute zînga mi a nih kha” an ti ṭhîn ang. Chu mi avâng vêk chuan, kan awm laiin fiamthu bawlhhlawh an thawh loh phah deuh vang. Chuvângin, tirhkoh Petera’n: “Thil ṭha lama ṭhahnam in ngaih chuan in pawi khawihtu tûr tunge awm ang? Nimahsela felna avânga lo tûar ta ang in nih chuan in eng a thâwl ang,” tih a sawi ang khân, kan Kristianna dinhmun kan hriattîrna chuan kan nunah hlâwkna nasa tak a thlen a ni.​—1 Petera 3:​13, 14.

19. Ni hnuhnûngah kan lût thûk hle tawh tih engtin nge kan hriat theih?

¹⁹ Thutak kan ta nihtîr hlâwkna dang leh chu tûn hi he thilte kalhmang tân ni hnuhnûng a ni tih kan ring tak zet dâwn a. Bible hrilh lâwkna tam tak chu kan tûn hun ngeiah a vawr tâwp a thleng mêk tih kan hre bawk ang.a Paula vaukhânna “ni hnuhnûngahte chuan hun khirh takte a lo awm ang” tih chu kum zabi liam taa thil thleng hlauhawm tak takte hian a finfiah a ni. (2 Timothea 3:​1-5; Marka 13:​3-​37) Tûn hnai lâwka chanchinbu pakhata chuang kum zabi 20-na chungchâng thuziakah chuan “Nunrâwnna Hun Anga Hriat Reng A Ni Ang” tih thupui hman a ni. Chu thuziak chuan: “Kum 1999 hi nunrâwnna sosân ber kum zabi chan ve tâwp lama nunrâwnna sosân ber kum a lo ni,” tiin a sawi bawk.

20. Tûn hi eng tih hun nge ni?

²⁰ Tûn hi rilru phîra awm hun a ni tawh lo. Jehova malsâwmna chu Bible zirtîrna hna thawh tawh zawng zawnga la ropui ber, khawvêl pum puia hnamte hnêna hriattîrnaah hian a lang chiang hle a ni. (Matthaia 24:14) Thutak chu i ta nihtîr la, mi dangte hrilh bawk ang che. I chatuan hma lam hun chu tûna i thil tihah a innghat a ni. Dâwngdahna chuan Jehova malsâwmna a phu lo vang. (Luka 9:​62) Chu ai chuan, tûn hi ‘nghet takin, tihchêt rual lohvin Lalpa hna ṭhahnemngai taka thawh’ hun a ni, “[kan] thawhrimna chu Lalpaah chuan a thlâwn ngai lo tih [kan] hre si a.”​—1 Korinth 15:58. (w01 2/1)

[Footnote-te]

I Hre Chhuak Em?

• Engtin nge rinhlelhna kan hnawhbo theih?

• Elisa chhiahhlawh hnên aṭangin eng nge kan zir theih?

• Eng nungchang lama thlêmnate nge kan do reng tûr?

• Engvângin nge Jehova Thuhretute kan nihzia chiang taka kan lantîr ang?

[Phêk 9-naa milem]

Elisa chhiahhlawh rinhlelhna chu a thil hmuhin a tiveng

[Phêk 10-naa milem]

Bible zir ziahna leh ṭawngṭai ziahna chuan rinhlelhna hnawtbo tûrin min ṭanpui thei