Jehova Chu Kan Inhumhimna A Ni
“‘Jehova chu ka inhumhimna a ni’ i tih . . . avângin, thil ṭha lo rêng rêngin a tawk lo vang che.”—SAM 91:9, 10, NW.
1. Engvângin nge Jehova chu kan inhumhimna a ni kan tih theih?
JEHOVA chu a mite tân inhumhimna dik tak a ni. A hnêna kan inpêk tak tak chuan, ‘lehlam lehlama nêksâwrin kan awm mai thei, mahse kan thaw a ipik lo; kan mangang mai thei, mahse kan bei a dawng lo; tihduhdah kan ni mai thei, mahse kalsan kan ni lo; vuak thlûk kan ni mai thei, mahse tihboral kan ni lo.’ Engvâng nge? Jehova’n ‘thiltihtheihna nasa tak’ min pêk avângin. (2 Korinth 4:7-9) A ni, kan Pa, vâna mi chuan Pathian duhzâwng nun kawng ûm tûrin min ṭanpui a, fakna hla phuahtu thu: “‘Jehova chu ka inhumhimna a ni’ i tih a, Chungnungbera chu awm nân i hman avângin, thil ṭha lo rêng rêngin a tawk lo vang che,” tih hi rilru-ah kan vawng reng a ni.—Sâm 91:9, 10, NW.
2. Sâm 91 chungchâng chu eng nge kan sawi theih a, chu chuan eng nge min tiam?
2 Sâm 91-na hi Mosia ziah a nih ngei a rinawm. A chhan chu Bible bung chunga thuziak chuan Sâm 90-na chu ama phuah angin a sawi a, ziaktu dang târ lanna awm lovin 91-na hian a zui nghâl si avângin. Tin, Sâm 91-na hi hla inchhâng a nih hmêl hle a; a awmzia chu, mi pakhat a zai hmasa ang a (91:1, 2), chutah zaipâwlin an chhâng lêt thung ang a (91:3-8). Tichuan, mi pakhat chauhvin a sa leh ang a (91:9a) mipui chuan an chhâng lêt leh ang (91:9b-16). Tin, a hnukhârna thute chu mi pakhat chauhvin a sa leh ta thung a nih a rinawm (91:14-16). Engpawh nise, Sâm 91-na chuan hriak thih Kristiante chu ho khat angin thlarau lam himna a tiam a; tin, Pathian hnêna inpumpêk an ṭhiante pawh chu mipui ho khat angin chutiang malsâwmna chu a tiam bawk a ni.a He Sâm hi chutiang Jehova chhiahhlawhte dinhmun aṭang chuan i lo thlîrho vang u.
‘Pathian Bihrûkna Hmuna’ Himna Hmuin
3. (a) ‘Chungnungbera bihrûkna hmun’ chu eng nge ni? (b) ‘Engkimtitheia hlimah awmin,’ eng thil nge kan neih?
3 Fakna hla phuahtu chu: “Chungnungbera bihrûkna hmuna awma chu Engkimtitheia hlimah chuan a awm reng ang. LALPA chung thu-ah chuan, ‘Ani chu ka inhumhimna leh ka kulhpui; ka Pathian, ka rina chu a ni,’ ka ti ang,” tiin a zai a ni. (Sâm 91:1, 2) ‘Chungnungbera bihrûkna hmun’ hi kan tâna inhumhimna hmun sawina a ni a, a bîk taka Diabola beih tum, hriak thihte tân a ni lehzual a ni. (Thu Puan 12:15-17) Pathian thlarau lam mikhualte anga a vênhimna dawng ni lo ilang chuan, Diabola chuan min tiboral phiar tawh ngei ang. ‘Engkimtitheia hlimah awmin,’ Pathian min humhimna, a nih loh leh a hlim chu kan nei a ni. (Sâm 15:1, 2; 121:5) Kan Lal Chungnungber, Jehova aia inhumhimna hmun him zâwk emaw, kulh ṭha zâwk emaw a awm lo.—Thufingte 18:10.
4. “Thang kamtu,” Setana chuan eng thilte nge a hman a, chuta tâ chu engtin nge kan chhuah theih?
4 Fakna hla phuahtu chuan: “[Jehova] chuan thang kamtu thang lakah leh hri ṭha lo tak lakah chuan a chhanhim dâwn che a ni,” tiin a sawi belh a. (Sâm 91:3) Hmân lai Israel rama thang kamtu chuan thang emaw, tâwktarh emaw hmangin sava a man ṭhîn a. “Thang kamtu,” Setana thangte zîngah chuan a inawpna pâwl suaksual tak leh a “thiltih verther takte” a tel a ni. (Ephesi 6:11; NW, footnote) Suahsualna lama min hîp nân leh kan thlarau lam tihchhiat nân, kan kalna kawngah hian a rûkin thang a kam a ni. (Sâm 142:3) Mahse, fel lohna kan hnâwl avângin, “thang ata sava a chhuak angin kan nunna hi a chhuak” a ni. (Sâm 124:7, 8) “Thang kamtu” sual tak kut ata Jehova’n min chhanchhuah avângin kan va lâwm êm!—Matthaia 6:13.
5, 6. Eng “hri ṭha lo tak” hian nge chhiatna min thlen thei a; mahse, engvângin nge Jehova mite chu chu chhiatna lakah chuan an tlâwm mai loh?
5 Fakna hla phuahtu chuan chhiatna min thlen thei “hri ṭha lo tak” chanchin pawh a sawi lang bawk a. Inkaichhâwn theih natna khirh tak ang maiin, mihringte leh Jehova lalchungnunna chawisângtute chunga chhiatna min thlen thei thil engemaw a awm a ni. He mi chungchângah hian thilthleng chanchin ziaktu Arnold Toynbee-a chuan: “Khawvêl Indopui II-na a tâwp aṭangin, hnam hmangaihna chuan tualṭo sawrkâr chu a lêt hnihin a tipung a . . . Tûn lai mihringte rilru put hmang chuan keh chhiatna lam a pan tial tial a ni,” tiin a ziak a ni.
6 Kum zabi engemaw zât chhûng chu, ram awptu tuemawte chuan khawvêl sawrkâr chi hrang hrang inkâra kehchhiatna awmtîr thei buaina chu an chawk tho a ni. Anni chuan anmahni emaw, milim chi hrang hrang emaw, entîr nei thil chi hrang hrang emawte chu chibai bûk tûrin an phût bawk. Mahse, Jehova chuan a mi rinawmte chu chutiang “hri ṭha lo tak” laka an tlâwm a phal ngai lo. (Daniela 3:1, 2, 20-27; 6:7-10, 16-22) Khawvêl pum huap unau inhmangaihna neiin, Jehova hnênah kan inpe pumhlûm a, Pathian Lehkha Thu anga tualdawihin, “hnam tin zîngah tupawh [Pathian] ṭiha fel taka ti apiang a lâwmzâwng mi an ni ṭhîn,” tih chu thlei bîk nei lovin kan pawm a ni. (Tirhkohte 10:34, 35; Exodus 20:4-6; Johana 13:34, 35; 17:16; 1 Petera 5:8, 9) Kristian kan nih angin chhiatna min thlen thei tihduhdahnate tuar mah ila, kan hlimin, ‘Chungnungbera bihrûkna hmunah’ chuan thlarau lam himna kan hmu a ni.
7. Jehova chuan “a thlain” engtin nge min vênhim?
7 Jehova chu kan inhumhimna hmun nihtîrin: “A thlain a khuh ang chia, a thla hnuaiah chuan i tlu lût ang; a thutak chu phaw tê leh phaw lian a ni,” tih thute aṭang hian thlamuanna kan hmu thei a ni. (Sâm 91:4) Savain a notête chunga a thla zâra a vênhim angin Pathian chuan min vênghim a. (Isaia 31:5) ‘A thlain min khuh a ni.’ Sava chuan a thlain a notête chu khuhin, hmêlma lakah a vênghim ṭhîn a. Kristian inawpna pâwl hnuaia kan awm avângin, sava notête ang maiin Jehova vênhimna thlazâr hnuaiah himna kan hmu a ni.—Ruthi 2:12; Sâm 5:1, 11.
8. Engtin nge Jehova “thutak” chu phaw lian leh kulh bang nghet tak ang a nih?
8 “Thutak” emaw, rinawmna emaw chu kan rinchhan a. Chu chu hmân laia an hman, phaw lian tak, kawngkhâr ang mai hi a ni a, mi pakhat khuh pumhlûm thei khawpa lian a ni. (Sâm 5:12) Chutiang vênhimna rinchhanna chuan hlauhawm ata min tizalên a ni. (Genesis 15:1; Sâm 84:11) Kan rinna angin, Pathian thutak chu Setana thal alh thei zawng zawng timit thei invênhimna phaw a ni. (Ephesi 6:16) Chu chu phaw lian, a phêna kan din ngheh theihna kulh bang nghet tak ang a ni bawk.
‘Kan Hlau Lo Vang’
9. Engvângin nge zân hun chu hlauhawm tak a nih theih a; mahse, engvângin nge kan hlauh loh?
9 Pathian vênhimna avângin, fakna hla phuahtu chuan: “Zâna thil râpthlâk chu i hlau lo vang a, chhûna thal lo lêng ṭhîn chu i hlau hek lo vang: thim hnuaia hri lêng ṭhîn chu i hlau lo vang a, chhûn laia thil tichhe ṭhîn chhiatna chu i hlau hek lo vang,” a ti a. (Sâm 91:5, 6) Suahsualna tam tak chu thim hnuaia tih a nih avângin, zân chu hun hlauhawm tak a ni thei a. Tûna leilung khuh mêk thlarau lam thim hnuaiah hian, thlarau lam thil kan ngaihtuahnate tichhia a, thuhrilh rawngbâwlna kan bânsanna tûrin kan hmêlmate chuan thiltih verther tak takte chu an ti ṭhîn. Mahse, Jehova’n min vênhim avângin ‘zâna thil râpthlâk chu kan hlau lo.’—Sâm 64:1, 2; 121:4; Isaia 60:2.
10. (a) “Chhûna thal lo lêng” chu eng nge a nih theih a, engtin nge kan do lêt? (b) “Thim hnuaia hri lêng ṭhîn” nih phung chu eng nge ni a, engvângin nge kan hlauh loh?
10 “Chhûna thal lo lêng” tih chu ṭawngkama inbeihna a nih hmêl hle a. (Sâm 64:3-5; 94:20) Mi dangte hnêna thu dik tak kan hriattîr zêl avângin, kan rawngbâwlna thianghlim alang apauva sawichhiatnate chu engmah lo mai a lo ni ṭhîn. Chu bâkah, “thim hnuaia hri lêng ṭhîn” chu kan hlau lo a ni. Hei hi, Setana thuneihna hnuaia awm nungchang lam leh sakhaw lama hri ṭha lo vei khawvêl thim hnuai aṭanga lo piang chhuak tehkhin nei hri lêng a ni. (1 Johana 5:19) Chu hri lêng chuan rilru leh thinlung a tichhia a, mite chu Jehova leh a thil tumte, a hmangaih ruahmannate chungchâng a ngaihthahtîr a ni. (1 Timothea 6:4) Thlarau lam êng kan neih avângin he thim zîngah pawh hian kan hlau chuang lo.—Sâm 43:3.
11. “Chhûn laia thil tichhe ṭhîn” tihchhiata awmte chungah eng thil nge lo thleng?
11 “Chhûn laia thil tichhe ṭhîn” pawh kan hlau hek lo. “Chhûn” chuan khawvêl lama finna a kâwk thei ang. Khawvêl hausakna âtchilhtute chuan thlarau lama chhiatna an tawng ṭhîn. (1 Timothea 6:20, 21) Lalram thuchah huaisen taka kan puan hian, kan hmêlmate chu kan hlau lo; Jehova chu min Vênghimtu a ni si a.—Sâm 64:1; Thufingte 3:25, 26.
12. Tute sîrah nge sâng an “tlûk” a, eng kawngin nge?
12 Fakna hla phuahtu chuan heti hian a chhunzawm a: “I sîrah sâng an tlu ang a, i ding lamah sîng an tlu bawk ang; nimahsela nang chu a hnaih lo vang che. I mitin i en ang a, mi suaksualte rulhna chu a hmuhin i hmu chauh ang,” tiin. (Sâm 91:7, 8) Jehova chu an inhumhimna an nihtîr loh avângin, thlarau lama thihnaah, mi tam tak chu kan “sîrah” an “tlu” a ni. Dik takin, tûn lai thlarau lam Israelte “ding lamah” chuan “sîng” an tlu tawh a ni. (Galatia 6:16) Hriak thih kan ni emaw, Pathian hnêna inpumpêk an ṭhiante kan ni emaw pawh ni se, Pathian ‘bihrûkna hmunah’ chuan kan him a ni. Sumdâwnna lam, sakhaw lam, leh kawng dang danga buaina siamtu, ‘mi suaksualte rulhna chu a hmuhin kan hmu chauh vang.’—Galatia 6:7.
‘Thil Ṭha Lo Rêng Rêngin Min Tawk Lo Vang’
13. Eng thil ṭha lote’n nge min tawh loh va, engvâng nge?
13 He khawvêl himna hi tlu chhe mah se, Pathian kan ngai pawimawh hmasa ber a, fakna hla phuahtu thu: “‘Jehova chu ka inhumhimna a ni’ i tih a, Chungnungbera chu awm nân i hman avângin, thil ṭha lo rêng rêngin a tawk lo vang che a; hri rêng rêng pawhin i puan in a rawn hnaih hek lo vang,” tih aṭangin huaina kan nei a ni. (Sâm 91:9, 10, NW) A ni, Jehova chu kan inhumhimna a ni. Chu bâkah, Pathian Chungnungbera chu him taka kan awm theihna, ‘awmna hmun atân’ kan hmang bawk a ni. Jehova chu Lei leh Vâna Lalchungnungber angin kan chawimawi a, himna min Petu a nih angin amahah kan “awm” a, a Lalram chanchin ṭha chu kan puang a ni. (Matthaia 24:14) Chuvângin, ‘thil ṭha lo rêng rêngin min tawk lo vang’—he fakna hlaa sawi tawh thil ṭha lo rêng rêngte chuan. Mi dangte tawn ang hêng thil ṭha lo tak: lîrnghîng te, thlipui te, tuilian te, ṭâm te, leh indona sawhkhâwk ṭha lo tak te kan tawn ve pawhin, chûng thilte chuan kan rinna leh kan thlarau lam himna chu a tichhe ve lo.
14. Jehova chhiahhlawhte kan nih avângin, engvângin nge hri hlauhawm tak takte kan vei ve loh?
14 Hriak thih Kristiante chu puan ina khawsa mikhual ang an ni a, he thil kalhmangte nên hian inhnamhnawihna an nei lo. (1 Petera 2:11) ‘Hri rêng rêng pawhin an puan in a rawn hnaih lo.’ Vân lam beiseina nei kan ni emaw, lei lam beiseina nei kan ni emaw pawh nise, he khawvêla mi hi kan ni lo va; tin, thlarau lama chhiatna min thlen thei hri lêng: nungchang bawlhhlawhna te, sakhaw dik lo te, leh “sakawlh” leh a “lem,” United Nations chibai bûkna ang hrite chu kan vei ve lo a ni.—Thu Puan 9:20, 21; 13:1-18; Johana 17:16.
15. Eng kawngin nge vântirhkoh ṭanpuina kan neih?
15 Humhimna kan neih chungchângah fakna hla phuahtu chuan: “I kawng tinrênga humhim tûr chein, i chung thu-ah zawng a vântirhkohte chu [Jehova’n] thu a pe dâwn si a. An kutin an dâwm ang chia, chutilochuan i kein lung i chhuih dah ang e,” tiin a sawi belh a. (Sâm 91:11, 12) Vântirhkohte chu min vênghim tûra thiltihtheihna pêk an ni a. (2 Lalte 6:17; Sâm 34:7-9; 104:4; Matthaia 26:53; Luka 1:19) Anni chuan ‘kawng tinrêngah’ min vênghim a ni. (Matthaia 18:10) Lalram thuchah kengtu kan nih avângin, vântirhkoh kaihhruaina leh vênhimna kan dawng a, thlarau lamah kan tlu chhe lo a ni. (Thu Puan 14:6, 7) “Lung” ang mai kan hnathawhna khuahkhirhnate chuan min titlu lo va, Pathian duhsakna min chântîr hek lo.
16. Engtin nge “sakeibaknei” leh “rûlrial” min beihna chu a danglam a, engtin nge kan do lêt?
16 Fakna hla phuahtu chuan: “Sakeibaknei leh rûlrial chu i rap ang a: sakeibaknei vânglai leh rûlpui chu i chîl nek ang,” tih a sawi belh a. (Sâm 91:13) Sakeibakneiin hmaichhana mi a beih angin, kan hmêlma ṭhenkhatte chuan kan thuhrilh rawngbâwlna titâwp tûr dânte siamin min dodâlna chu tlâng hriatah an lantîr a ni. Chu bâkah, a tawmrûkna hmun aṭanga mi bei ṭhîn rûlrial angin, rin lohna lam aṭanga beihna kan tuar bawk. Sakhaw hruaitute lah chuan dân siamtute, rorêltute, leh mi dangte hmangin a rûk a râla mi beih châng an nei bawk nên. Mahse, Jehova ṭanpuina zârah, thubuai remnaahte ṭha taka pulûtin, ‘chanchin ṭha thiamna thu sawiin, kan tinghet’ a ni.—Philippi 1:7; Sâm 94:14, 20-22.
17. “Sakeibaknei vânglai” chu engtin nge kan chîl nek?
17 Fakna hla phuahtu chuan “sakeibaknei vânglai leh rûlpui” chîl nek chungchâng a sawi bawk a. Sakeibaknei vânglai chu kawlh thei tak a ni a, rûlpui pawh a lian thei hle. (Isaia 31:4) Sakeibaknei vânglai chu hmaichhana min beih lai chuan eng ang pawhin kawlh mah se, sakeibaknei ang mihringte leh inawpna pâwlte thu aia Pathian thuawih zâwkna hmangin chu sakeibaknei kawlh chu kan chîl nek a tih theih a ni. (Tirhkohte 5:29) Chuvângin, “sakeibaknei” hlauhawm tak chuan thlarau lam chhiatna min thlen thei lo.
18. “Rûlpui” chuan eng nge min hriatchhuahtîr a, a beihna kan tuar a nih chuan eng nge kan tih ngai?
18 Grik Septuagint Bible chuan, “rûlpui” chu “drakon” tiin a hmang a. Hei hian “drakon lian pui, rûlpui tar Diabola leh Setana” chu min hriatchhuahtîr a ni. (Thu Puan 12:7-9; Genesis 3:15) Ani chu rûl lian hlauhawm tak a ni a, a sa man chu a tisawmin, a dawlh daih thei a ni. (Jeremia 51:34) Setana’n a meia mi zial beh tlat a tum hun te, he khawvêl nêksâwrnate hmanga min tihchhiat, leh min dawlh a tum hunah te chuan, chutatâ chu inthiarfihlîmin chu “rûlpui” chu i chîl nek ang u. (1 Petera 5:8) Rom 16:20 thlen famkimnaa tel tûr chuan hriak thih labângte chuan chutiang chuan an ti ngei tûr a ni.
Jehova—Kan Chhandamna Hnâr Chu
19. Engvângin nge Jehova hnênah inhumhimna kan zawn?
19 Fakna hla phuahtu chuan Pathian chibai bûktu dik tak te chungchâng thu-ah, Pathianin: “Ka chungah a hmangaihna a nghah tlat avângin ka chhanhim ang a: ka hming a hriat avângin hmun sângah ka hlâng ang,” a ti tih a sawi a. (Sâm 91:14) “Hmun sângah ka hlâng ang,” tih chu ban phâk lohvah ka dah ang tihna a ni. Jehova chibai bûktu kan nih angin amahah inhumhimna kan zawng a ni; a bîk takin ‘amah kan hmangaih’ avângin. (Marka 12:29, 30; 1 Johana 4:19) Ani chuan kan hmêlmate kut ata ‘min chhanhim’ ve thung a, tihboral kan ni ngai lo vang. Chutih ahnêkin, Pathian hming kan hria a, rinnaa kan lam avângin chhandam kan ni zâwk ang. (Rom 10:11-13) Tin, ‘Jehova kan Pathian chu kumkhuaa biak’ kan tum tlat bawk a ni.—Mika 4:5; Isaia 43:10-12.
20. Sâm 91-na tâwpnaah, eng nge Jehova chuan a chhiahhlawh rinawmte a tiam?
20 Sâm 91-na tâwpnaah, Jehova chuan a chhiahhlawh rinawmte chungchâng chu heti hian a sawi a ni: “Ani chuan mi ko vang a, tichuan ka chhâng ang; kei chu a mangan lai chuan a hnênah ka awm ang a: amah chu ka chhanhimin ka chawimawi ang. Dam reinain ka tilungawi ang a, ka chhandamna chu ka hmuhtîr bawk ang,” tiin. (Sâm 91:15, 16) A duhzâwng anga ṭawngṭaia Pathian hming kan lam chuan, ani chuan min chhâng ṭhîn a ni. (1 Johana 5:13-15) Setana siam inhmêlmâkna avânga lo awm hrehawmna tam tak chu kan paltlang tawh a. Mahse, “kei chu a mangan lai chuan a hnênah ka awm ang,” tih thu chuan lo la thleng tûr fiahnate atâna min buatsaih bâkah, he kalhmang suaksual tihchhiat hunah Pathianin min awmpui dâwn a ni tih min tiam a ni.
21. Hriak thihte chu eng anga chawimawi nge an nih tawh?
21 Thinur taka Setana beihna hnuaiah pawh, kan zînga hriak thih awm zawng zawngte chu Jehova hun tiamah chuan vânah chawimawi an ni ang—he leia an ‘dam rei’ hnuah chuan. Tûn ngeiah pawh hian, Pathian chhanhimna mak tak chuan hriak thihte chu thlarau lamah a chawimawi reng tawh a ni. Tin, he ni hnuhnûnga Jehova Thuhretu anga hma an hruai thei chu chawimawina a va ni êm! (Isaia 43:10-12) Jehova’n a mite a chhanhimna ropui ber chu, a lalchungnunna thiam a chantîr hun leh a hming a tihthianghlim hun, Armageddon indona ropuiah a lo thleng ang.—Sâm 83:18; Ezekiela 38:23; Thu Puan 16:14, 16.
22. Tute’n nge ‘Jehova chhandamna’ chu hmu dâwn?
22 Hriak thih Kristian kan ni emaw, an ṭhian inpumpêkte kan ni emaw pawh ni se, Pathian chhandamna chu kan beisei a ni. Jehova “ni ropui tak leh râpthlâk tak” a lo thlen hunah chuan, Pathian rawng rinawm taka lo bâwltute chu chhanhim an ni ang. (Joela 2:30-32) “Mipui tam tak” zînga mi ni tûr, Pathian khawvêl thara dam khawchhuakte leh fiahna hnuhnûng bera rinawm kan zînga mite chu ‘dam reinaa tihlungawi’ an ni ang—tâwp nei lo nun chu changin. Pathian chuan mitthi tam tak a kaitho bawk ang. (Thu Puan 7:9; 20:7-15) Jehova chuan Isua Krista hmanga ‘chhandamna min hmuhtîr’ chu a duh hle ang. (Sâm 3:8) Chutiang beiseina ropui tak chu kan neih avângin, amah chawimawina tûra kan damchhûng nîte kan chhiarnaah Pathian ṭanpuina i beisei zêl ang u. Kan ṭawngkam leh thiltih hmangin, Jehova hi kan inhumhimna a nihzia i finfiah zêl ang u. (w01 11/15)
[Footnote]
a Kristian Grik Pathian Lehkha Thu ziaktute chuan Sâm 91-na chu Messia hrilh lâwkna angin an ngai lo nâ a, Jehova chu he ‘tâwpna huna’ Isua hnungzuitu hriak thihte leh an ṭhian inpumpêkte tâna inhumhimna a nih ang bawkin, mihring Isua Krista tân pawh inhumhimna leh kulhpui a ni.—Daniela 12:4.
Engtin Nge I Chhân Dâwn?
• ‘Chungnungbera bihrûkna hmun’ chu eng nge ni?
• Engvângin nge kan hlauh loh?
• Engtin nge ‘chhiatna engmahin min hnaih loh vang’?
• Engvângin nge Jehova chu kan chhandamna hnâr kan tih theih?
[Phêk 27-naa milem]
Jehova thutak chu kan tâna phaw lian a nih dân i hria em?
[Phêk 28-naa milemte]
Jehova chuan a chhiahhlawhte chu hmaichhana beihna leh arûka beihnate tuar chung pawha an rawngbâwlna chhunzawm thei tûrin a ṭanpui
[Milem Hawhtîrtu]
Chawngkawr: A. N. Jagannatha Rao, Trustee, Madras Snake Park Trust