Bible Ṭanchhan Zawhnate Chhânna

Pathian Hming Chu Eng Nge Ni?

Kan chhûngkuaa mi tinte hian hming kan nei ṭheuh va. Ina kan ran vulhte takngial pawhin hming an nei bawk! Chuvângin, Pathian tân hming neih hi a âwm hle a ni lâwm ni? Bible-ah hian, Pathian chuan nihna tam tak a nei a, Pathian Engkimtitheia, Lal Chungnungber, leh Siamtu tihte a nei a ni. Mahse, hming pawh a nei bawk a ni.—Exodus 6:3 chhiar rawh.

Bible lehlin tam takah chuan Sâm 83:18-ah Pathian hming a chuang a. Entîr nân, Mizo Bible chuan he chângah hian: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin a sawi a ni.

Engvângin nge Pathian hming kan hman ang?

Pathian chuan a hming hmang tûrin min duh a. Kan ṭhian ṭha leh kan hmangaih takte kan biak hian an hming kan hmang ṭhîn. Pathian kan biak hunah pawh chutiang chuan kan ti ve tûr a ni dâwn lâwm ni? Chu bâkah, Isua Krista chuan Pathian hming hmang tûrin min fuih bawk a ni.—Matthaia 6:9; Johana 17:26 chhiar rawh.

Amaherawhchu, Pathian ṭhian ni tûr chuan a hming hriat mai bâkah, a chanchin tam lehzual kan hriat a ngai a. Entîr nân, Pathian chu eng ang mi nge a nih? Pathian chu hnaih theih a ni tak zet em? tihte hi. Hêng zawhnate chhânna hi Bible-ah i hmu thei a ni. (w13-E 01/01)