Pathian Ram—Ei Rûkna Laka Fihlîm Sawrkâr

Mihringte hi ei rûkna laka an fihlîm loh chuan, mihring sawrkârna engpawh chu a fihlîm thei lo vang tih i pawm dâwn lâwm ni? Chutiang a nih chuan, ei rûkna laka fihlîm sawrkârna chu mihring pâwn lam aṭanga lo chhuak a nih a ngai ngei ang. Bible chuan chutiang sawrkârna chungchâng a sawi a—chu chu Pathian Ram, Isua’n a hnungzuite hnêna dîl tûra a zirtîra chu a ni.—Matthaia 6:9, 10.

Pathian Ram chu sawrkâr tak tak a ni a, vân aṭangin ro a rêl a. Chu chuan mihring sawrkârna zawng zawng chu a rawn thlâk vek ang. (Sâm 2:8, 9; Thu Puan 16:14; 19:19-21) Chu Lalramin mihringte tâna malsâwmna a rawn thlen tûrte zîngah chuan sawrkâr ei rûkna nuaibo pawh a tel a. A nuaibo ngei ang tih nemnghettu Lalram hmêlhmang parukte hi han ngaihtuah teh.

1. THU NEIHNA

BUAINA AWM CHU: Mihring sawrkârte chuan an khua leh tuite hnên aṭangin sum an hmu a, a tam zâwkah chuan chhiah chi hrang hrang chawina hmangin a ni. Chutianga sum lo lûtte chu sawrkâr mi lian ṭhenkhat chuan an lo ei rûk laiin, a dangte chuan mite chhiah chawi tûr tihtlêmsak tûrin thamna an lo la bawk a ni. Chutiang chuan tâwp nei lo tûr thil râwng tak chu a rah chhuak thei a ni—an sum hlohte phuhrûk nân sawrkârin chhiah an phût sâng lehzual a, chu chuan ei rûkna a tinasa lehzual a ni. Chutiang dinhmuna a tuartu ber chu mi rinawmte an ni duh ṭhîn.

A CHINFELNA: Pathian Ram chuan a thu neihna chu engkimtithei Pathian, Jehovah hnên aṭangin a dawng a.a (Thu Puan 11:15) Hna a thawh theih nân chhiah a khawn a ngai ve lo. Chu aimah chuan, Pathian chu “thiltihtheihna lama a chak” avâng leh a thil phalna avângin chu Lalram chuan a khua leh tuite mamawh zawng zawng chu a pe ang tih a chiang a ni.—Isaia 40:26; Sâm 145:16.

2. RORELTU

BUAINA AWM CHU: Thuziak hmasaa târ lan tâk Susan Rose-Ackerman-i chuan ei rûkna nuai bo tûr chuan “a lû ber aṭanga ṭan tûr a ni,” tiin a sawi a. Sawrkâr mi liante ei rûkna a pawmzam laia police leh custom officer-te ei rûkna nuai bo a tum hian sawrkâr chuan rin a hlawh lo a ni. Tin, mi ṭha ber rorêlna pawh pianpui ṭhat famkim lohnain a nghawng tho va. Bible sawi angin, “thil ṭha titu, thil sual ti hauh lo khawpa mi fel chu lei chungah hian an awm lo tak zet a ni.”—Thuhriltu 7:20.

A CHINFELNA: Mihring ṭha famkim lote nêna inang lo takin, Pathianin a Lalrama rorêl tûra a thlan Isua Krista chu thil sual ti tûra thlêm thlûk theih rual a ni lo. Isua chuan thamna zawng zawnga lian ber—“khawvêl ram zawng zawng leh a ropuina”—pêk tiamna chu hnâwlin thlêm theih a nih lohzia a lantîr a ni; khawvêl lal, Diabola vawi khat biaka chûng thil zawng zawngte neih theihna chu. (Matthaia 4:8-10; Joh. 14:30) Thi khawp hiala nghaisaka a awm laiin, Isua chuan a rinawmna vawn tlat a tum avângin a na tawrh chhâwk thei mah se, a hriatna zawng zawng ṭha taka thununtîr lo thei uain thûr chu a in duh lo. (Matthaia 27:34) Pathianin vân nunna neia a kaihthawh tâk avângin Isua chuan Lalrama rorêl tûra a tlinzia a târ lang a ni.—Philippi 2:8-11.

3. NGELNGHEHNA

BUAINA AWM CHU: Ram tam tak chuan a hun takah inthlanpui an buatsaih ṭhîn a, chu chu a thu phungah chuan ei rûk chîng sawrkâr mi liante thlâktîr theihna a ni. Mahse, a nihna takah chuan, campaign-te leh inthlannate chu ei rûkna lam a thlêk deuh vek a, ram changkâng tia an sawiahte pawh chutiang tho chu a ni. Campaign nâna thawhlâwmte leh thiltih dangte hmangin mi hausate chuan tûna sawrkâr mi liante leh nakina lo la ni tûrte chu nasa takin an thunun thei a ni.

U.S. Supreme Court-a rorêltu John Paul Stevens-a chuan chutiang thununnain “Sawrkâr dikna leh ṭhat zâwng mai ni lovin, chu mia mipuite rinna pawh” a nghawng tel niin a ziak a. Chuvângin, khawvêl pum puia mi tam takin politic party-te hi mihring pâwl zawng zawng zînga ei ru nasa ber nia an hria pawh hi a mak lo ve.

A CHINFELNA: Pathian Ram chu rorêlna ngelnghet tak leh awm reng a nih avângin, campaign-na leh inthlanna lama inbumnate a paih bo va. (Daniela 7:13, 14) A Rorêltu tûr chu Pathian thlan a nih avângin, Lalram chu inthlanna hmanga nemngheh theih emaw, paihthlâk theih emaw a ni ve lo. A ngelnghehna chuan a thiltihte chu a mite chatuan hamṭhatna tûr ni tûrin a ṭanpui a ni.

4. DANTE

BUAINA AWM CHU: Atîrah chuan, dân tharte siamna chuan dinhmun a tihṭhat i beisei mai thei a. Mahse, mi thiamte chuan hmun tam takah chuan dân zam a tam zawh poh leh ei rûkna hun remchâng a tam lehzual tih an hmu chhuak a ni. Chu bâkah, ei rûkna dona tûra siam dân tharte hman chu a man a to theih hle laiin, rah chhuah a nei tlêm hle thung ṭhîn.

A CHINFELNA: Lalram dân chu mihring sawrkârte dân siam aiin a ṭha zâwk hle. Entîr nân, tih tûr leh tih loh tûrte kim chang taka ziak chhuah aiin, Isua chuan Dân Rangkachak tia koh fo chu a pe a ni: “Thil engkim miin in chunga an tiha in duh tur ang apiang chu, mi chungah pawh ti ve rawh u,” tiin. (Matthaia 7:12) Chu aia langsâr zâwk chu, Lalram dânte chuan mi rilru put hmang leh a thiltihte a ngai pawimawh hi a ni a. Isua chuan: “Nangmah i inhmangaih angin i vêngte pawh i hmangaih tûr a ni,” tiin a sawi. (Matthaia 22:39) Dik takin, thinlung hre theitu Pathian chuan chûng thupêkte chu a kengkawh thei a ni.—1 Samuela 16:7.

5. RILRU PUT HMANG

BUAINA AWM CHU: Ei rûkna phêna awm chu duhâmna leh mahni hma sialna a ni a. Sawrkâr thu neitute leh mipuite chuan chûng mize ṭha lote chu an lantîr fo ṭhîn. Thuziak hmasaa kan sawi tâk Seoul dâwr lian chim chungchângah, sawrkâr thu neitute chuan in sakna hmanraw dik hman leh sak dân pângngai zui aiin a tlâwm zâwk dâwn tih hretu in satute hnên aṭangin thamna an la a ni.

Chuti chu, ei rûkna nuai bo tûr chuan mite chu rilru put hmang nghet duhâmna leh mahni hma sialna ang chite do hneh theih dân zirtîr phawt tûr a ni ang. Mahse, mihring sawrkâr chuan hetiang zirtîrna bawhzui duhna leh theihna chu a tlachham a ni.

A CHINFELNA: Pathian Ram chuan ei rûkna thlentu rilru put hmang ṭha lote hneh theih dân zirtîrin, ei rûkna chu a zung chawpin a pho ro vang.b He zirtîrna hian anni chu ‘an rilru thlarauva [rilru put hmang] a thara awm tûrin,’ a ṭanpui ang. (Ephesi 4:23) Anni chuan duhâmna leh mahni hma sialna chu lungâwina leh mi dangte ngaihsaknaa thlâk dân an zir a ni.—Philippi 2:4; 1 Timothea 6:6.

6. KHUA LEH TUITE

BUAINA AWM CHU: Dinhmun ṭha ber leh nungchang lama zirna ṭha ber hnuaiah pawh mi ṭhenkhat chuan rinawm loh leh ei rûk chu an thlang tho vang. Mi thiamte chuan hei hi mihring sawrkârte’n ei rûkna an nuai bo theih loh chhan niin an sawi. Sawrkârte chuan ei rûkna chu an tihtlêm theih an inbeisei bâkah a sawhkhâwk ṭha lote tihnêp theih an inbeisei bawk a ni.

A CHINFELNA: United Nations-a Ei Rûkna Dotu Pâwl chuan ei rûkna do tûr chuan, sawrkârin “dikna, rinawmna, leh mawhphurhna,” a chawilâr tûr a ni tiin a sawi a. Hei hi thiltum ropui tak a nih rualin, Pathian Ram chuan hêng miziate chawilâr mai aia tam a ti a—a khua leh tuite hnênah chûng miziate neih chu a phût a ni. Bible chuan “mi duhâmte” leh “dawtheite” chuan Lalram an luah lo vang tih a sawi a ni.—1 Korinth 6:9-11; Thu Puan 21:8.

Kristian hmasate’n an târ lan tawh angin, mite chuan nungchang lama hêng tehna sâng takte zawm dân an zir thei a ni. Entîr nân, Simona’n tirhkohte hnên aṭanga thlarau thianghlim lei a tum khân, anni chuan a thamna chu an hnâwl a, heti hian an hrilh a ni: “I sual hi sim . . . rawh,” tiin. Simona chuan a awhna dik lo chu a hlauhawm tih a hriat chuan a hneh theih nâna ṭawngṭaisak tûrin tirhkohte chu a ngên a ni.—Tirhkohte 8:18-24.

LALRAM KHUA LEH TUI NIH THEIH DAN

Eng ram mi pawh ni la, Pathian Ram khua leh tui nih theihna hun remchâng i nei a. (Tirhkohte 10:34, 35) Khawvêl puma tûna neih mêk Lalram pêk chhuah zirtîrna hian Pathian ram khua leh tui i nih theih dân a kawhhmuh ang che.Jehova Thuhretute chuan in lama a thlâwna Bible an zirpui dân entîr che chu an duh a, chu chu chawlhkâr khatah minute 10 lek pawhin a neih theih a ni. Thil dang tam tak bâkah, “Pathian Ram chanchin ṭha” leh chu miin sawrkâr ei rûkna a nuai bo dân tûr pawh i zir thei ang. (Luka 4:43) I vêng chhûnga awm Jehova Thuhretute chu be pawh tûrin kan sâwm che a, a nih loh leh kan Web site, jw.org/lus chu tlawh ang che. (w15-E 01/01)