Kristiante’n Easter hi an lâwm tûr a ni em?

Encyclopædia Britannica chuan Easter hi “Isua Krista Thawhlehna lawmna Kristian kût ropui tak” niin a târ lang a. Mahse, chu chu Kristiante lawm tûr a ni em?

Thil pakhat hi hmân lai thil hlui hlutna nei dik tak a ni tih finfiah tûrin, ngun taka en fiah a ngai a. Chutiang bawkin, Easter chu Kristiante ni lawm tûr a nih leh ni loh hre tûr chuan Easter nêna inkûngkaih thilte chu ngun taka kan enfiah a ngai a ni.

A hmasa berin, Isua chuan a hnungzuite chu a thawhlehna ni lovin a thih hriatrengna chu hmang tûrin a hrilh a. Tirhkoh Paula chuan, chu mi nî chu “Lalpa zanriah” tiin a ko a ni.—1 Korinth 11:20; Luka 22:19, 20.

Chu bâkah, the Britannica sawi dân chuan Easter hman huna thiltih tam tak chuan Isua thawhlehna nên “inkûngkaihna a nei meuh lo,” chûng chu, “hmân lai pi pute thiltih ṭhin dân aṭanga lâk a ni.” Entîr nân, Easter chhinchhiahna artui leh sazupui chungchângah The Encyclopedia of Religion chuan: “Artui chu nun thar lo pian chhuahna chhinchhiahna a ni a, inthlah pung chak tak nia hriat sazupui chu nipui a lo thleng dâwn tih chhinchhiahna a ni,” tiin a sawi.

Kum 1500 hma lama thu leh hla tihchhuahte zirtu mi thiam Philippe Walter-a chuan chutiang tih dânte Easter lawmnaa hman a lo nih dân chungchângah “milem betute a huhova Kristiana inlehtîr tumna lamah” an kût nî ‘thlasik tâwpa thlai leh thingte chawra lo nun leh hun nipui lo thlen’ lawmna chu Isua thawhlehna lawmnaa chantîr a nih thu a sawi a. Hetianga milem betute calendar-a “Kristian kût nîte” telhna chuan a huhova sakhaw inlehna chu a tiawlsam hle niin a sawi belh a ni.

“Kristiana inlehtîrna” chu tirhkohte dam lai chuan a la thleng lo, anni chu milem bia sakhua laka “khaptu” anga an ṭan avângin. (2 Thessalonika 2:7) Tirhkoh Paula chuan a ‘kal hnuin zirtîrhote an hnêna pakaitîr tûra thu hran sawi an awm’ tûr thu a sawi a ni. (Tirhkohte 20:29, 30) Tirhkoh Johana chuan kum zabi khatna tâwp dâwn lamah mi ṭhenkhatin Kristiante an hruai bo tih a ziak a. (1 Johana 2:18, 26) A tâwpah chuan milem betute thil chînte lâk luhna kawng a lo inhawng ta a ni.

Mahse, mi ṭhenkhat chuan “milem betute” hnêna Isua thawhlehna chungchâng hriatthiamna a pêk avângin Easter thiltih ṭhenkhat pawm chu a pawi lêm lo tûrah an ngai mai thei a. Nimahsela, Paula tân chuan pawm theih a ni ngai lo vang. Rom Ram chhûnga a zin kualnaah milem betute thil chîn tam tak hmu mah se, chûng thilte chu Isua an hriatthiam lehzual nân a hmang ngai lo. Chu ai mahin, Kristiante chu: “Ring lo mite nên rual lo taka nghâwngkawl bât dûnin awm suh u; suahsualna leh felnain engnge inṭâwmna an neih? a nih loh leh thim leh êngin engnge inpâwlna an neih? Chuvângin, ‘An zîng ata lo chhuak ula, Ahrangin awm rawh u, Thil bawlhhlawh rêng rêng pawh dek suh u.’ Lalpa a ti,” tiin a vaukhân zâwk a ni.—2 Korinth 6:14, 17.

Ngun taka kan enfiahna chuan eng nge a târ lan? Easter hi Kristiante lawm tûr a ni lo tih chiang takin a lang a ni. (wp15-E 03/01)