Zawhna Bâwm

◼ Coupon leh Internet aṭanga dîlnate chu tuin nge ziak khat ang?

Kan thu leh hla chhuahahte hian lehkhabu dîl nân emaw, Jehova Thuhretute tlawh dîl nân emawa ziak khat a, branch office-a thawn theih tûr coupon a tel fo va. Chu bâkah, kan Web site www.watchtower.org chu Bible zirpui tûra dîl nân a hman theih bawk. Hêng hian mi tam takte chu thutak zir tûrin a ṭanpui a ni. Mahse, thuchhuahtute’n an chhûngte leh mi dangte’n thlarau lam ṭanpuina an dawn theih nâna hêng hmanruate an hman hian buaina a chhuak ṭhîn a ni.

An dîl ni si lova branch office aṭanga thu leh hla chhuah dawng ṭhîn mi ṭhenkhat chuan kan inawpna pâwlin anni chu a tibuai nia an ngaih bâkah, thu leh hla an thawn chhuahte zîngah telh nia inngaiin an sawisêl a ni. Mahnia tlawh dîlna ziak si lote lehkha kenga va tlawhtu thuchhuahtute chu an ninzia tilangtu in neitute an hmuh hian lai deuhvin an awm phah ṭhîn a. Chuvângin, kan Web site emaw coupon emaw hmanga dîlna rêng rêng chu tuina neite ziak khah tûr a ni a, thuchhuahtute’n mi dangte tân an dîlsak tûr a ni lo. Mi dang tâna dîlsak a ni tih hriat a nih hian, chûng chu bawhzui a ni ṭhîn lo.

Chuti chu, engtin nge kan chhûngte emaw, kan hmêlhriatte emaw chu thlarau lama kan ṭanpui theih ang? Thu leh hla chhuahte an dawn i duhsak chuan engvângin nge thilpêk anga nangmah ngeiin i thawn mai loh vang? Tuina an lantîr emaw, Thuhretute tlawh an duh emaw a, an tualchhûng kohhran upate biak pawh dân tûr i hriat si loh chuan, Please Follow Up (S-43) form chu ziak khatin kohhran secetary hnênah i pe ang; ani chuan a ennawn hnuah branch office-ah a thawn ang. Amaherawhchu, tuina neitu chu lung in tâng emaw, jail tâng emaw, a nih loh leh ruihhlo ngaite awmna hmuna awm emaw a nih chuan, a tân branch office i biak pawhsak tûr a ni lo. A awmna hmun tlawhtu unaupate be pawp tûr emaw, mahnia branch office-a lehkha thawn tûr emawin i fuih zâwk tûr a ni.