Ṭhen 4

Pathianin A Thiltum Chungchâng Min Hriattîr

1, 2. Pathianin tihtakzeta zâwttute hi chhânna a pe ṭhîn tih engtin nge kan hriat?

HMANGAIHNA Pathian chuan amah zawng tak taktute hnênah chuan a thiltum a târlang ngei rêng a ni. Thil chîk tak tak mihringte hnênah chuan engvânga tuarna awmtîr hi phal nge a nih tih zawhna chhânnate hi a pe bawk a ni.

² Bible chuan: “[Pathian] i zawn chuan i hmu ang.” “Thil inthupte Puangtu Pathian chu vânah a awm a.” “Jehova Pathian chuan a rawngbâwltu, a zâwlneite hnênah a thurûk hrilh lovin engmah a ti lo vang,” ti tein a lo sawi a ni.—1 Chronicles 28:9; Daniela 2:28; Amosa 3:7.

Chhânnate Chu Khawiahnge?

3. Pathianin tuarna awm a phalna chhan hi khawiah nge kan zawn chhuah theih ang?

³ Engvânga Pathianin tuarna hi awm phal nge a nih leh engtin nge a tih dâwn tih zawhna chhânnate chu, kan hlâwkpuina tûra thâwk khuma pêk ziaka chhinchhiahnaah hian a hmuh theih a ni. Chu ziaka chhinchhiahna chu a Thu, Bible Thianghlim hi a ni. “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a ṭangkai a ni; Pathian mi chu hna ṭha tinrêng thawk tûra kim taka inthuamin a famkim theih nân.”—2 Timothea 3:16, 17.

4, 5. Engin nge Bible hi lehkhabu danglam bîkah siam?

⁴ Bible hi lehkhabu danglam tak chu a ni ngei mai. Mihringte chanchin chhinchhiahna dik ber a keng a, mihringte siam hun piah lam daih a thleng hial a ni. A tûnlai hle bawk a, a chhan chu a hrilhlâwkna thute hi kan tûnlai hun nên a inmilin kan hma lawka thil lo thleng mai tûrte a sawi tel bawk avâng a ni.

⁵ Eng lehkhabu dang mah chutianga hmân lai chanchin rintlâk keng a awm lo. Entîr nân, kutziak lehkha ṭha tâwk hmasâng mite sûlhnu chu tlêm tê chauh a awm a. Bible chungchângah erawh chuan kutziak lehkha tam tak, kim lo deuh leh kimchang taka ziak a awm ṭeuh mai: Hebrai Pathian Lehkhathu (“Thuthlung Hlui” bu 39) 6,000 vêl leh Kristian Grik Pathian Lehkhathu (“Thuthlung Thar” bu 27) 13,000 vêl a la awm a ni.

6. Engvângin nge tûnlaia Bible hi Pathianin a thâwk khum lai ami nên a bulbâla inang a ni tih kan chian theih?

⁶ Pathian Ropuiber, Bible hi thâwk khumtu chuan, chûng kutziak lehkhabu lâkchhâwnah chuan a thu chângte chu kim tak leh dik takin a vawn himtîr zêl a ni. Tichuan tûnlaia kan Bible-te hi atîrtêa thâwk khuma ziakte nên khân a la inang ta zêl a ni. He thil min ngaihhluttîrtu dang leh chu Kristian Grik Pathian Lehkha Thu kutziak lâkchhâwn ṭhenkhat a ziak hmasa berte ziak hun lai kum zabi thuhmuna ziak chhâwnte a ni. Hmânlai khawvêl lam thil ziaktute kutziak lâkchhâwn ṭhenkhat tûn thlenga hmuh tûr la awmte hi chu a ziak hmasa bertute ziak hun lai nên chuan kum zabi eng emaw zâta inhlat a ni.

Pathian Thilthlâwnpêk

7. Bible hi engtianga darh zau nge a nih?

⁷ Bible hi lehkhabu sem darh zau ber a ni a. Bu vaibêlchhe 300 lai chhut a ni tawh a. Chutiang zât han hnaih deuhtu eng lehkhabu dang mah a awm lo a ni. Tin, Bible hi a kimin emaw, a ṭhen lai chauh emaw hi ṭawng hrang sâng hnih laiin lehlin a ni bawk a. Tichuan, Bible chu kan lei mihring za zela 98-te hmuh ṭheuh theih khawpa tam chhut a ni.

8-10. Bible-in fiah a phûna chhan ṭhenkhatte kha engte nge?

⁸ Pathian hnêna mi nia inchhâl lehkhabu, a pâwn lam leh chhûng lam thute pawh a dikzia tilang chiang hian kan enfiah a phû takmeuh a ni.a Nunnain a tum te, khawvêl dinhmun awmzia te, leh kan hmaa thil lo thleng tûrte a hrilhfiah a. Eng lehkhabu dang mah hian chutiang chu an ti ve thei lo a ni.

⁹ Ni e, Bible hi mihring chhûngkuate Pathianin a biakpawhna a ni. A ziak hi a thiltihtheihna emaw a thlarau emawa kaihhruaiin, mi 40 laiin an lo ziak a ni. Tichuan Pathian chuan a Thu, Bible Thianghlim hmangin min rawn bia a ni. Tirhkoh Paula chuan: “Pathian thu kan hnên aṭanga in hriat, in pawm lai khân, mihring thu pawmin in pawm lo va, Pathian thu pawmin in pawm zâwk avâng khân; chu chu Pathian thu a ni rêng a,” tiin a ziak a ni.—1 Thessalonika 2:13.

¹⁰ Abraham Lincoln, United States-a an President 16-na khân Bible hi “mihringte hnêna Pathian thilthlâwnpêkah chuan a la ṭha ber a ni. . . A tello chuan a dik leh dik lo pawh kan hre hrang thei lo vang,” tiin a vuah a ni. Chuti chu, he thilthlâwnpêk ropui ber mai hian tuarna lo inṭan dân, Pathianin awm a phalna chhan, leh a la tih dân tûr chungchângte eng nge min hrilh le?

[Footnote-te]

[Phêk 10-naa milem]

Pathian thâwk khuma pêk Bible hi mihring chhûngkua a biakpawhna a ni