Engvângin Nge Bible Zir A Ṭul?

BILL-a chu la ṭha lai tak, pian ṭha tak, lehkha thiam, leh hausa bawk si a ni a. Mahse, a dinhmunah chuan a lungawi thei tlat lo. A nun chuan awmzia a nei tlat lo va, chu chuan a tibuai êm êm mai a ni. Nun awmze nei hmuhchhuah tumin sakhaw hrang hrangah a tel lâwr a; mahse, a zawn chu a hmu thei chuang lo. Kum 1991-ah chuan Jehova Thuhretute zînga pakhat a tawng a, chu chuan nun awmzia chungchânga Bible thusawi chuanna lehkhabu a hnutchhiah a. Tichuan, Bill-a’n nun awmze nei chungchâng leh thil dang chungchâng pawh a hriatthiam theih nân Bible zirna chu an ruahman ta a ni.

Bill-a chuan tihian a sawileh a: “Kan zir ṭan phat aṭang chuan Bible kan râwn ngun êm avângin, ka zawn ngei chu hei hi a ni tih ka hre nghâl mai a. Bible-a a chhânnate chu a ngaihnawm hlâwm êm êm a ni. Chu mi kan zir zawh chuan, ka truck-in tlângah ka inkhalh chhuak a, truck aṭang chuan ka chhuak a, lâwm lutukin ka’n au chhuak a. A tâwp atâwpa ka zawhnate chhânna ka hre ta chu ka hlim êm êm mai a ni,” tiin.

Bible thutak hmu zawng zawngte hi an lâwm avângin an au chhuak vek kher lo va. Mahse, nun chungchânga zawhna pawimawh tak tak chhânnate hmuh chu mi tam tak tân chuan hlimna a ni a. Isua tehkhin thua mi pakhat, lova ro phûm rûk hmu chhuaktu ang mai khân an hlim a ni. Chu mi chungchâng chu ti hian Isua’n a sawi: “A lâwm avângin a neih zawng zawng chu a va hralh a, chu lo chu a lei ta a,” tiin.​—Matthaia 13:44.

Nun Awmze Neihna Chahbi Chu

Bill-a chuan, Nun hian eng nge a tum? tih hi a ngaihtuah ṭhîn a. Mi fing te, Pathian thu lam thiam mi te, science thiam mi te pawhin he zawhna hi kum sâng tam tak an lo buaipui tawh a. Chu mi chungchâng chhân tumin mi tam takin lehkhabu chhiarsên loh an lo ziak tawh bawk a. Mahse, an thawhrimna chu engmah lo mai a ni a, mi tam tak chuan a chhânna hmuh theih a ni lo an ti hial a ni. Nimahsela, a chhânna chu a awm si. Thil ril tak a ni nâ a, a harsa lo. A chhan chu Bible-ah sawifiah vek a nih vâng a ni. Hlimna, leh nun awmze neihna chabi chu hei hi a ni: Min Siamtu kan Pa vâna mi, Jehova nêna inlaichînna ṭha neih hi. Chu chu engtin nge kan neih theih?

Pathian hnaih theihna kawng, inkalh ni ang taka lang si kawng chi hnih a awm a. Chutianga Pathian hnaihtute chuan amah chu an ṭih a, an hmangaih bawk a ni. Chu mi thu tichiang tûr chuan Bible châng pahnih chauh lo chhiar ta ila. Hun rei tak kal tawhah khân, Lal fing Solomona chuan mihring chanchin hi ngun takin a zir a, chuta a thil hmuh chhuahte chu Bible-a Thuhriltu bu-ah a chhinchhiah a ni. A thil chhût chhuah chungchâng sawifiah in Solomona chuan hetiang hian a ziak a: “Hêng thu zawng zawng khaikhâwmna hi i ngaithla teh ang: Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tiin. (Thuhriltu 12:13) A hnu kum zabi engemaw zâtah chuan, Mosia hnêna Dân pêk zawng zawng zînga ropui ber engnge tih zawhna chhângin Isua chuan: “‘Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni,’ tih hi,” tiin a chhâng a. (Matthaia 22:37) Pathian ṭih bawk a, hmangaih bawk chu mak i ti em? Tûnah chuan ṭih leh hmangaih pawimawhzia leh Pathian nêna inlaichînna ṭha neih nâna an ṭan dun tlat dân i lo zir ho ang u.

Pathian Ṭih Awmzia

Pawm tlâka Pathian chibai bûk tûr chuan amah zah taka ṭih a ngai a. Bible chuan: “LALPA ṭihna chu finna bul a ni,” a ti. (Sâm 111:10) Tirhkoh Paula pawhin: “Khawngaihna i nei ang u, chu mi zârah chuan zah leh ṭih dêk chungin Pathian lâwmzâwng rawng kan bâwl thei dâwn zuk nia,” tiin a ziak bawk a ni. (Hebrai 12:28) Chutiang bawkin, tirhkoh Johana’n inlârnaa a hmuh vanlaizâwla vântirhkoh pawh khân ram chanchin ṭha a puanchhuahna chu: “Pathian chu hlau [ṭih] ula, chawimawi rawh u,” tiin a ṭan bawk a ni.​—Thu Puan 14:​6, 7.

He Pathian ṭihna hi nun awmze nei neih nân a pawimawh êm êm a, thil kan hlauh nên hian a inang lo a ni. Mi nunrâwng tak leh sual takin min vau chuan kan hlau êm êm a ni thei. Mahse, Pathian ṭihna erawh chu Siamtu zahna thûk tak nei tihna a ni. Chubâkah, Pathian Rorêltu Lû leh Chungnung ber, a thu awi lotute hrem tûra thiltihtheihna leh thuneihna neitu a nih avânga amah tihlâwm loh hlauhna pawh a tel bawk a ni.

Ṭihna leh Hmangaihna An Thawkho

Mahse, Jehova chuan amah an ṭih avâng chauhva a rawngbâwl tûrin mite chu a duh lo. Jehova chu Hmangaihna ngah chungchuang a ni. Tirhkoh Johana pawh: “Pathian chu hmangaihna a ni” tia ziak tûra chêttîr hial a ni. (1 Johana 4:8) Pathian Jehova chuan mihringte chu hmangaihnain a dâwr a, mite pawh hmangaihna bawka chhânglêt ve tûrin a duh a ni. A nih chuan, chutiang hmangaihna chu engtin nge Pathian ṭihna nên chuan a inrem theih? An pahnih hian a inzawm tlat a ni. Fakna hla phuahtu chuan heti hian a lo ziak a: “Jehova nêna inṭhianna chu amah ṭihtute hnênah a awm,” tiin.​—Sâm 25:​14, NW.

Naupangin a pa chak tak leh fing tak mai zahna leh ṭihna a neih chu han ngaihtuah ta la. Chutiangin zah hle mah se, chu naupang chuan pa hmangaihna chu a chhânglêt bawk ang. Naupang chuan a pa chu a ring tlat ang a, a kaihhruaina a beisei ang, chu a kaihhruaina chuan hlâwkna a thlen dâwn tih a rin tlat avângin. Chutiang bawkin, Jehova kan ṭih chuan a kaihhruaina kan zâwm ang a, chu chuan hlâwkna min thlen ang. Heta Israel mite chungchânga Jehova thusawi hi ngaihtuah teh: “Chutiang rilru chu pu ṭhîn sela aw, mi ṭih ang a, ka thupêkte chu an zâwm fo vang a, anmahni leh an fate pawh kumkhuain an hmuingîl hle tûr!” tih hi.​—Deuteronomy 5:29.

Ni e, Pathian ṭihna chuan phuarna ni lovin, zalenna a thlen a, lungngaihna ni lovin hlimna a thlen a ni. Isaia chuan Isua chungchâng chu tihian a lo hrilh lâwk a: “A lâwmna chu LALPA ṭihnaah a ni ang,” tiin. (Isaia 11:3) Tin, fakna hla phuahtu pawhin: “LALPA ṭih mi chu a eng a thâwl e, a thupêkahte nasa taka lâwm mi chu,” tiin a lo ziak bawk a ni.​—Sâm 112:1.

Amah kan hriat loh chuan Pathian chu kan ṭih thei lo va, kan hmangaih thei hek lo. Chuvângin Bible zir chu a pawimawh êm êm a ni. Chutianga zirna chuan Pathian miziate hre thiam tûr leh a kaihhruainate zawm chu a fin thlâkzia hre thiam tûrin min ṭanpui a ni. Pathian chu kan hnaih poh leh a duhzâwng tih kan duh a, a thupêkte zawm kan duh zual sawt ṭhîn, chûngte chu kan hlâwlkna tûr a ni tih kan hriat tlat avângin.​—1 Johana 5:3.

Mi nunna kawng dikah a kal a ni tih hriat chu a hlimawm a. Hei hi atîra a chanchin kan sawi tâk Bill-a chungah a thleng dik a ni. Tûn hnai mai khân ani chuan tihian a sawi a: “Bible ka zir tirh aṭang chuan kum kua lai a ral ta a, Jehova nêna kan inlaichînna chu a pung deuh deuh a ni. Atîra hlimna nasa tak mai ka tawn khân nunna kawng hlimawm takah min thlen ta a. A ṭha zâwnga nun thlîr dân chu ka nei reng tawh a ni. Ka nî tin hun chu nawmsakna awmze nei lo zawn nâna hmang lovin, thil ṭha tak tih nân ka hmang khat tlat tawh a ni. Jehova chu ka tân mi tak tak a ni a, ka ṭhatna duh tak zettu a ni tih ka hria a ni,” tiin.

Thuziak dawtlehah chuan, an nuna ataka hmangtute tâna Jehova hriatnain hlimna leh hlâwkna a thlen dân kimchang zâwkin kan zir ang. (w01 7/1)

[Phêk 5-naa thu lâk chhuah]

Pathian hnaih awmzia chu amah kan hmangaih a kan ṭih bawk hi a ni

[Phêk 6-naa milem]

Isua chu Jehova a ṭih avângin a lâwm