Jehova Ṭih Tûrin I Thinlung Siam Rawh

“Chutiang rilru chu pu ṭhîn sela aw, mi ṭih ang a, ka thupêkte chu an zâwm fo vang.”​—DEUTERONOMY 5:29.

1. Engtin nge mite chu hlauhna ata engtik nîah emaw chuan an la zalên dâwn tih kan chian theih?

HLAUHNA hian mihringte hi kum zabi tam tak chhûng chu a dêng reng a. Ṭâm hlauhna te, natna hlauhna te, dân bawhchhiatna hlauhna te, a nih loh leh indo hlauhna te hian mi maktaduai tam takte chu lungkham takin a awmtîr reng a ni. Hei vâng hian Universal Declaration of Human Rights thuhmahruai chuan mi zawng zawngin hlauhna ata zalenna an neih theihna khawvêl siam a châk thu chu a târ lang a ni.a Lâwmawm tak maiin, chutiang khawvêl chu a lo thleng dâwn tih Pathian chuan min tiam a ni​—mihringte thawhrimna hmang erawh chuan a ni lo. A zâwlnei Mika kaltlangin, Jehova chuan a felna khawvêl tharah chuan ‘a mite chu tumahin an tihlau lovang’ tih min tiam a ni.​—Mika 4:4.

2. (a) Engtin nge Pathian Lehkha Thu chuan Pathian ṭih tûrin min fuih? (b) Pathian kan ṭih a ngaih chhan kan chhût hian eng zawhnate nge lo awm thei?

² Kawng lehlamah chuan, hlauhna chu a ṭangkai thei a. Pathian Lehkha Thu chuan, Pathian chhiahhlawhte chu Jehova hlauhna ṭha, amah ṭihna chu lantîr tûrin a fuih fo va. Mosia chuan Israelte hnênah: “LALPA in Pathian chu in ṭih ang a, ama rawng chu in bâwl ang,” a ti. (Deuteronomy 6:13) Chu mi hnu kum zabi engemaw zâtah Solomona pawhin hetiang hian a ziak bawk: “Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tiin. (Thuhriltu 12:13) Chutiang bawkin, keini pawhin vântirhkoh kaihhruaina hnuaia kan thuhrilh rawngbâwlna hmangin mi tinte chu ‘Pathian chu ṭih a, chawimawi’ tûrin kan fuih ve a ni. (Thu Puan 14:​6, 7) Jehova ṭih mai bâkah, Kristiante chuan an thinlung zawng zawngin an hmangaih bawk tûr a ni. (Matthaia 22:​37, 38) A nih leh engtin nge Pathian chu ṭih chung sia kan hmangaih theih ang? Engvângin nge hmangaihna Pathian chu ṭih a ngaih? Pathian kan ṭihna aṭang chuan eng hlâwkna nge kan seng ang? Hêng zawhnate chhâng tûr chuan, Pathian ṭih awmzia leh chu ṭihna chuan Jehova nêna kan inlaichînna pawimawh ber a siam dân kan hriat hmasak a ngai a ni.

Mak Tihna, Nasa Taka Zahna, leh Ṭihna

3. Pathian ṭih awmzia chu eng nge ni?

³ Pathian ṭihna hi Kristiante’n anmahni Siamtu chunga an neih tûr rilru put hmang a ni a. He ṭihna hrilhfiah dân pakhat chu “Siamtu nasa taka zahna leh mak tihna, leh amah tihlâwm loh hlauhna,” tih hi a ni. Chuvângin, Pathian ṭihna chuan kawng pawimawh tak pahnihah kan nun a thunun a: Pathian laka kan rilru put hmang leh a huat zâwng nungchangte laka kan rilru put hmang chu. Hêng thil pahnihte hian ngun tak leh fîmkhur taka kan ngaihtuah a phu a ni. Vine-a lehkhabu Expository Dictionary of New Testament Words sawi dânin, Kristiante tân chuan he ṭihna ṭha hi ‘thlarau leh nungchang lama nun thununtu rilru put hmang’ a ni.

4. Engtin nge min siamtu mak tihna leh zahna kan neih theih ang?

⁴ Engtin nge min Siamtu zahna leh mak tihna chu kan neih theih ang? Ram leilung hmêl hmang mawi tak te, tuikhawhthla mak ropui tak te, leh ni tla êng mawi tak mai te kan hmuh hian mak tihnain kan khat a ni. Chutiang thilte chu Pathian kutchhuak a ni tih rinna mita en a, kan han chhût zui chuan chu mak kan tihna chu a zual tawlh tawlh ṭhîn. Chu bâkah, Lal Davida angin, Jehova thil siam mak tak takte nêna kan inkhaikhin chuan kan têt thamzia kan inhre bawk a ni. “I vân, i kut chhuakte, thla leh arsi i ruathote khi, ka ngaihtuah châng chuan, mihring hi eng nge maw a nih a, i hriat reng ṭhin ni?” (Sâm 8:​3, 4) Chutianga nasa taka mak tihna chuan amah zahna a siam a, chu chuan kan tâna a thiltih zawng zawngte avângin Jehova chu fak a, a hnêna lâwmthu hril tûrin min chêttîr a ni. Davida chuan: “I hnênah lâwm thu ka hrilh ang che; hlauhawm tak leh mak taka siam ka ni si a: I thiltihte hi mak tak a ni a; chu chu ka nunna hian a hre chiang hle a ni,” tiin a ziak bawk.​—Sâm 139:14.

5. Engvângin nge Jehova chu kan ṭih ang a, he mi chungchângah hian eng entawn tûr ṭha tak nge kan neih?

⁵ Mak tihna leh zahna chuan Siamtu a nih anga Pathian thiltihtheihna leh lei leh vâna Rorêltu tûr a nih ang taka a thuneihna ṭihna leh zah taka ṭihna a siam a ni. Tirhkoh Johana hmuh inlârnaah chuan, “sakawlh te, a lem te . . . hneha lo chhuakte”​—vâna an dinhmun chang Krista hnungzuitu hriak thihte​—chuan: “Aw Lalpa Pathian, Engkimtithei, i thiltihte chu a ropuiin a mak a; nang, hnam tin Lalber, i kawngte chu a felin a dik a ni. Aw Lalpa, tunge i hming zah lo vang a, chawimawi lo vang?” tih an puang a ni. (Thu Puan 15:​2-4) A ropuina nasa taka zahna aṭanga lo awm Pathian ṭihna chuan, hêng vân lam Lalrama Krista rorêlpui tûrte hi Pathian chu thuneihna sângber changtu angin a chawimawitîr a ni. Jehova thiltih zawng zawngte leh fel taka lei leh vân a awp dân zawng zawngte kan ngaihtuah chuan, amah ṭih nachhan tûr tam tak kan nei a ni lâwm ni?​—Sâm 2:11; Jeremia 10:7.

6. Engvângin nge Jehova tihlâwm loh hlauhna kan neih ang?

⁶ Nimahsela, mak tihna leh zahna bâkah, Pathian ṭihnaah chuan amah tihlâwm loh hlauhna emaw, a thu zawm loh hlauhna emaw pawh a tel tûr a ni. Engvângin nge? Jehova chu ‘thin nel tak, ngilneihna ngah tak’ a nih rualin “thiam lova ruatte chhuah mai mai ngai lo” a nihzia kan hriat avângin. (Exodus 34:​6, 7) Jehova chuan hmangaihna leh ngilneihna nei mah se, fel lohna leh thil sual tihluihna chu a ngai thei lo a ni. (Sâm 5:​4, 5; Habakuka 1:13) Inchhîrna nei hauh lo leh mahni duh thu rênga Jehova mithmuha thil sual tiluitute leh amah dodâl zâwnga awmte chu hrem lova chhuah an ni lo vang. Tirhkoh Paula sawi angin, “Pathian nung kuta tlûk chu thil râpthlâk tak a ni.” Chutiang dinhmuna tlûk luh hlauhna chu kan tân inhumhimna a ni tak zet a ni.​—Hebrai 10:31.

“Amah Chu In Vuan Tlat Tûr A Ni”

7. Eng nge Jehova chhanchhuah theihna kan rinchhan theih chhante chu?

⁷ Pathian ṭihna leh a thiltihtheihna nasa tak hriatfiahna chu Jehova rinchhanna leh rintâwkna hmahruaitu a ni a. Naupangin a bula a pa a awm chuan him ṭhaa a inhriat ang chiahin, Jehova kaihhruaina hnuaiah chuan kan thlamuangin, kan him a ni. Jehova’n Israel-ho Aigupta ata a hruai chhuah hnua an chhân lêt dân hi lo chhinchhiah teh: “Israel-hote chuan LALPAN Aigupta mite chunga thil ropui tak a tih chu an hmu a, tin, mipuite chuan LALPA chu an ṭih a, tichuan LALPA . . . chu an ring ta a,” tih chu. (Exodus 14:31) Elisa thiltawn pawh chuan “amah ṭihtute chu, an vêlah LALPA vântirhkoh chuan a awm chilh a, a chhamhim ṭhin” tih a tichiang a ni. (Sâm 34:7; 2 Lalte 6:​15-17) Tûn laia Jehova mite chanchin leh keimahni mi mal thiltawnte ngei pawh hian, Pathianin a rawngbâwltute tân a thiltihtheihna a lantîr tih a nemnghet bawk. (2 Chronicles 16:9) Chuvângin, “LALPA ṭihnaah chuan rinna chak tak a awm,” tih kan lo hre thei a ni.​—Thufingte 14:26.

8. (a) Engvângin nge Pathian ṭihna chuan a kawnga kal tûrin min chêttîr? (b) Jehova kan ‘vawn tlat’ dân tûr hrilhfiah rawh.

⁸ Pathian ṭihna chuan amah rinchhanna leh rinngamna min siam mai bâkah, a kawnga kal tûrin min chêttîr bawk a ni. Solomona’n biak in thar a hlan khân, Jehova hnênah heti hian a ṭawngṭai a: “Kan pi leh pute i pêk rama an awm chhûng zawnga i kawng zawh theihna tûra [Israelte’n] an ṭihna tûr chein.” tiin. (2 Chronicles 6:31) Chu mi hma pawh chuan Mosia’n Israel mite chu: “LALPA in Pathian chu in zui ang a, amah chu in ṭih ang a, a thupêkte chu in zâwm ang a, a thusawite chu in pawm ang a, a rawng te in bâwl ang a, amah chu in vuan tlat tûr a ni,” tiin a lo fuih tawh bawk a ni. (Deuteronomy 13:4) Hêng chângte’n fiah taka a târ lan ang hian, Jehova kawnga kal duhna leh amah ‘vawn tlat’ duhna chu Pathian rinchhanna leh rinngamna aṭanga lo awm a ni. Ni e, Pathian ṭihna chuan, Jehova thu awih tûr te, a rawng bâwl tûr te, leh naupangin a rin êm êm, a pa a vuan tlat ang maia amah vuan tlat tûrtein min chêttîr a ni.​—Sâm 63:8; Isaia 41:13.

Pathian Hmangaih Awmzia Chu Amah Ṭih Hi A Ni

9. Eng nge Pathian hmangaihna leh Pathian ṭihna inlaichîn dân chu?

⁹ Pathian Lehkha Thu thlîrna aṭang chuan, Pathian ṭihna chuan amah hmangaihna chu engti kawng mahin a dang lo. Chutih ahnêkin, Israel mite chu ‘a kawng zawng zawng chu zawh a, amah an hmangaih nâna Jehova ṭih’ tûra zirtîr an ni. (Deuteronomy 10:12) Hetiang hian Pathian ṭihna leh Pathian hmangaihna chu a inzawm tlat a ni. Pathian ṭihna chuan a kawnga kal tûrin min chêttîr ang a, chu chuan amah kan hmangaihzia a târ lang dâwn a ni. (1 Johana 5:3) Hei hi a dik êm êm a ni. A chhan chu tuemaw kan hmangaih chuan, amah tihlungngaih kan hlauh êm ṭhin avângin. Israelte chuan thlalêra an helna avângin Jehova chu an tilungngai ṭhîn a. Keini erawh chuan kan Pa, vâna mi chunga chutiang lungngaihna thlen thei thil engmah kan ti duh hauh lo vang. (Sâm 78:​40, 41) A lehlamah chuan, “LALPA chuan amah ṭihtute chungah chuan lâwmna a nei ṭhîn” a, kan thuâwihna leh rinawmna chuan a thinlung a tilâwm ṭhîn a ni. (Sâm 147:11; Thufingte 27:11) Pathian hmangaihna chuan amah tilâwm tûrin min chêttîr a, Pathian ṭihna chuan amah tilungngai lo tûrin min vêng thung a ni. Hêng mize pahnihte hi a inkalh lo va, a ṭang dûn zâwk a ni.

10. Engtin nge Isua’n Jehova ṭihnaah lâwmna a hmu tih a lantîr?

¹⁰ Isua Krista nun kawng chuan Pathian ṭih chunga kan hmangaih theih dân chiang takin a târ lang a ni. A chungchâng chu zâwlnei Isaia chuan hetiang hian a ziak a: “LALPA thlarau​—finna leh hriat theihna thlarau, remruatna leh chakna thlarau, hriatna leh LALPA ṭihna thlarau chu​—a chungah a fu ang: tichuan a lâwmna chu LALPA ṭihnaah a ni ang,” tiin. (Isaia 11:​2, 3)He hrilh lâwknain a sawi angin, Pathian thlarau chuan Isua chu a Pa, vâna mi ṭih tûrin a chêttîr a ni. Chu bakah, he ṭihna hi a khirh lo mai ni lovin, lungawina bul a ni zâwk tih kan hria a ni. Isua chuan dinhmun hrehawm ber hnuaiah pawh Pathian duhzâwng tih leh amah tihlâwm chu nuam a ti êm êm a ni. Nghaisakna bana khenbeh a nih dâwn ṭêpah pawh, Jehova hnênah: “Keima thu nivin, nangma thu thu ni zâwk rawh se,” a ti. (Matthaia 26:39) He Pathian ṭihna avâng hian, Jehova chuan a Fapa dîlna chu a ngaithla a, a tichak a, thihna ata a chhanchhuak ta a ni.​—Hebrai 5:7.

Jehova Ṭih Dân Zirin

11, 12. (a) Engvângin nge Pathian ṭih dân kan zir ang? (b) Engtin nge Isua’n Jehova ṭih dân min zirtîr?

¹¹ Leilung pianphung ropui leh mak tak takte kan thlîr hian mak tihna kan nei nghâl mai ṭhîn; Pathian ṭihna erawh chu chutiang a ni ve lova; amahin a rawn awm mai lo. Chuvângin, Davida Ropui Zâwk, Isua Krista’n hrilh lâwk thuin hetiang hian min sâwm a ni: “Hawh u, naupangte u, ka thu ngaithla rawh u: LALPA ṭih dân ka lo zirtîr ang che u,” tiin. (Sâm 34:11) Engtin nge Isua hnên aṭangin Jehova ṭih dân kan zir theih ang?

¹² Isua chuan kan Pa, vâna mi nungchang ropui tak takte hre thiam tûra min ṭanpuiin, Jehova ṭih dân min zirtîr a. (Johana 1:18) Amah Isua entîrna siamte chuan Pathian ngaihtuahnate leh mi dangte a dâwr dân chu a târ lang; Isua chuan a Pa mizia ang chiah chu a lantîr avângin. (Johana 14:​9, 10) Chu bâkah, Isua inthawina kal tlanga kan sualte ngaihdam dîla ṭawngṭaina hmangin, Jehova kan pawh a ni. He Pathian zahngaihna lantîrna langsâr tak mai ringawt pawh hi, amah ṭihna tûr chhan ṭha tak a ni. Fakna hla phuahtu chuan: “I hnênah ngaihdamna a awm a ni, ṭiha i awm theih nân,” tiin a lo ziak a ni.​—Sâm 120:4.

13. Thufingte buah hian Jehova ṭih tûra min ṭanpuitu eng rahbite nge târ chhuah a nih?

¹³ Thufingte bu chuan Pathian ṭihna min neihtîr thei rahbi inzawm engemaw zât a târ chhuak a. “Ka fapa, ka thute i dawn a, ka thupêkte i khâwl khâwm a, finna lama i beng i chhit a, i thinlung hriatna lam atân i pêk chuan; a ni, hriatna i auh va, hriat thiam theihna pawh i auh chuan, . . . LALPA ṭih nachâng i lo hria ang a, Pathian hriatna chu i chhar chhuak ang.” (Thufingte 2:​1-5) Chuvângin, Pathian ṭih tûr chuan, a Thu kan zir ngei tûr a ni a, a zirtîrnate chu hriatthiam tumin theihtâwp kan chhuah tûr a ni bawk a; tin, a zilhna thute chu fîmkhur takin kan ngaihsak tûr a ni.

14. Engtin nge Israel lalte hnêna fuihna pêk chu kan zui ve theih?

¹⁴ Hmân lai Israel lalte chu hetiang thu hi pêk an ni. Dân thupêk ziak chhâwngin, “a dam chhûng zawng a chhiar ṭhîn tûr a ni, hêng dân leh hêng thuruat zawng zawngte hi pawm a, zâwma ti tûra LALPA an Pathian ṭih dân an zir theih” nân. (Deuteronomy 17:​18, 19) Keini tân pawh Jehova ṭih dân zir tûr chuan Bible chhiar leh zir chu a pawimawh a ni. Bible thu bulte kan nunpui chuan, zawi zawiin Pathian finna leh hriatna chu kan nei ang. Tichuan, kan nuna a rah ṭhate kan hmuh avângin, “LALPA ṭih nachâng” kan lo hria a, Pathian nêna kan inlaichînna chu kan hlut a ni. Chu mai bâkah, kan rinpui, a pui a pangte nêna inkhâwmho ziahin, Pathian zirtîrna kan ngaithla thei a, Pathian ṭih dân leh a kawnga kal dân kan zir thei bawk a ni.​—Deuteronomy 31:12.

Jehova Ṭih Apiang Chu An Eng A Thâwl E

15. Eng kawngin nge Pathian ṭihna leh amah chibai kan bûkna chu a inlaichîn?

¹⁵ Kan zir tâkte aṭangin, Pathian ṭih chu amah chibai kan bûkna pêng pawimawh tak a nih avângin, kan zaa kan neih tûr rilru put hmang ṭha a ni tih kan hmu thei a ni. Chu chuan amah rinchhan tlat tûr te, a kawnga kal tûr te, leh amah vuan tlat tûr tein min hruai a ni. Isua Krista ang bawkin, Pathian ṭihna chuan tûn atân leh chatuan atâna kan inpumpêkna thutiamte chu hlen chhuak tûrin min chêttîr ve thei a ni.

16. Engvângin nge Jehova’n amah ṭih tûra min fuih?

¹⁶ Pathian ṭihna chu thil hrehawm emaw, âwm lo taka inkhuahkhirhna emaw a ni ngai lo. Bible chuan: “LALPA ṭih apiang chu an eng a thâwl e, a kawng zawhtute chu,” tih min hrilh si a. (Sâm 128:1) Amah ṭihna chuan min vênghim dâwn tih a hriat tlat avângin, Jehova chuan amah ṭih tûrin min fuih a ni. Mosia hnêna a thusawiah mi a ngaihsakzia chu kan hmu a ni: “Chutiang rilru chu [Israel mite chuan] pu ṭhîn sela aw, mi ṭih ang a, ka thupêkte chu an zâwm fo vang a, anmahni leh an fate pawh kumkhuain an hmuingîl hle tûr!” tih chu.​—Deuteronomy 5:29.

17. (a) Pathian ṭihna aṭangin eng hlâwkna nge kan neih? (b) Eng Pathian ṭihna hmêl hmang dang nge a dawta thuziakah ngaihtuahho ni dâwn?

¹⁷ Chutiang bawkin, Pathian ṭihna thinlung kan neih phawt chuan, kan hmuingîl hle ang. Eng kawngin nge? A pakhatnaah chuan, chutiang rilru put hmang chuan Pathian a tilâwm ang a, amah min hnaihtîr ang. Davida chuan ama thiltawn ngei aṭangin “amah ṭihtute duh chu a hlawhtlintîr ang a; an au thâwm a hria ang a, anni chu a chhandam ang,” tih a hria a ni. (Sâm 145:19) A pahnihnaah chuan, Pathian ṭihna chuan thil ṭha lo lama kan rilru put hmang a nghawng dâwn avângin, kan hlâwkpui dâwn a ni. (Thufingte 3:7) A dawta thuziak chuan, he ṭihna hian thlarau lam hlauhawm laka min vênhim dân a bihchiang ang a; tin, Pathian Lehkha Thua entawn tûr siam mi ṭhenkhat, Pathian ṭih a, sual kalsantute chungchâng a ennawn bawk ang. (w01 12/01)

[Footnote]

A Hnuaia Thute Hi I Chhâng Thei Em?

• Eng nge Pathian ṭih tih awmzia chu ni a, chu chuan engtin nge min nghawng?

• Eng nge Pathian ṭih leh Pathian nêna lên dun inzawmna chu?

• Engtin nge Isua entawn tûr siam chuan Pathian ṭihna leh Pathian hmangaihna chu a inlaichîn tlat tih a târ lan?

• Eng kawngin nge Jehova ṭih tûrin kan thinlung kan siam theih?

[Phêk 11-naa milem]

Israel lalte chu Dân thu ziak chhâwng tûr leh nî tina chhiar tûra thu pêk an ni

[Phêk 12-naa milem]

Jehova ṭihna chuan fain a pa a rinchhan anga amah rinchhanna min neihtîr

[Phêk 15-naa Milem Hawhtîrtu]

Arsi: Photo by Malin, © IAC/RGO 1991