Buh Seng Hnaah Hma Lam Pan Zêl Rawh
“Mittui tla chunga tuhte chuan hlim takin an ât ang.”—SAM 126:5.
1. Tûn laiah hian engvângin nge ‘buh seng tûra thawktu tûrte tîr tûra buh Neitupa hnêna ngen’ a ngaih?
ISUA’N Galilee-a a thu hrilh vawithumna a zawh hnuah chuan a zirtîrte hnênah: “Buh seng tûr a tam hle si a, nimahsela a thawktute an tlêm,” a ti a. (Matthaia 9:37) Judai ramah pawh chutiang bawk chu a ni. (Luka 10:2) Kum 2,000 dâwn lai kalta pawha chutiang a nih tawh chuan, tûn lai dinhmun hi eng nge ni tâ ang le? Aw le, rawngbâwl kum hnuhnung ber khân Jehova Thuhretu mi 6,000,000 chuangte chuan khawvêl mi 6,000,000,000 te zînga entîr nei buhseng hna an thawhnaah hma lam an pan zêl a, hêng mite zînga tam tak hi ‘vêngtu nei lo berâmte anga hrehawm leh darha’ awm te an ni. Tichuan, ‘buh seng tûra thawktu tûrte tîr tûra buh Neitupa hnêna ngên’ tûra Isua fuihna chu kum zabi kaltâte ang bawk khân tûnah pawh a la pawimawh reng a ni.—Matthaia 9:36, 37.
2. Engin nge mite hriat min hlawhtîr?
2 Buh Neitupa, Pathian Jehova chuan hna thawktu tûrte tîr tûra ngenna chu a chhâng a. He Pathian kaihhruai buh seng hnaa tel hi a va hlimawm êm! Hnamte nêna inkhaikhin chuan kan tlêm hle nâ a, Lalram thuhrilhna leh zirtîr siam rawngbâwlnaa taima taka kan thawhna chuan khawvêl mite hriat min hlawhtîr a ni. Ram tam takah chuan chanchin tharah vawi tam tak sawi lan kan ni a. Television lem chana kawngkhâr dâr ri a rawn lan châng lahin, Jehova Thuhretute in tin kal, kawngkhâr dâr hmetri nên tehkhin a ni châwk bawk. Ni e, entîr nei buh sengtute kan nih anga kan Kristian rawngbâwlna chuan kum zabi 21-naa mite hriat a hlawh hle a ni.
3. (a) Kum zabi pakhatnaa Lalram thuhrilh rawngbâwlna khân mite hriat a hlawh hle tih engtin nge kan hriat? (b) Engvângin nge kan rawngbâwlna hi vântirhkohvin min thawhpui kan tih theih?
3 Kum zabi pakhatnaa Lalram thuhrilh rawngbâwlna pawh khân khawvêl mite hriat a hlawh hle a, chanchin ṭha hriltute pawh an tiduhdah a ni. Chuvângin tirhkoh Paula pawhin: “Pathianin keini tirhkohte hi thi tûra ruatsa a hnuhnûng berah min târ chhuakah ka ngai a ni; khawvêlte leh vântirhkohte leh mihringte mithmuha ennawma siamin kan awm hi,” tiin a ziak rêng a ni. (1 Korinth 4:9) Chutiang bawkin tihduhdahna tâwk chung pawha Lalram thuchah puang chhuaktu kan nih ṭâng ṭângna chuan khawvêl mite hriat min hlawhtîr a, vântirhkohte pawhin an ngai pawimawh êm êm a ni. Thu Puan 14:6 chuan: “Leia awmte hnênah leh hnam tinrêng te, chi tinrêng te, ṭawng tinrêng te, mi tinrêng te hnêna tlângaupui tûra chatuana chanchin ṭha nei vântirhkoh dang vanlaizâwla thlâwk ka [tirhkoh Johana] hmu a,” tiin. Ni e, kan rawngbâwlna—kan buh seng hna—hi vântirhkohvin min thawhpui reng a ni!—Hebrai 1:13, 14.
‘Huat Hlawh’
4, 5. (a) Isua’n a zirtîrte hnênah eng vaukhânna nge a pêk? (b) Engvângin nge tûn laia Pathian chhiahhlawhte’n ‘huat an hlawh’?
4 Isua tirhkohte buh seng tûra tirh chhuah an nih khân, anni chuan ‘rul ang fing a, ṭhuro anga pawikhawih lova awm’ tûra zirtîrna chu an ngai pawimawh a. Isua chuan anni chu hetiang hian a zirtîr bawk a: “Mihring lakah chuan fîmkhur rawh u; rorêltute an mantîr dâwn si che u a, inkhâwmna inahte an vua ang che u a; a ni, keimah avângin hotute leh lalte hmaah anmahni leh Jentailte hriattîrna tûrin an la hruai ang che u. . . . Keima hming avângin mi zawng zawng huat in ni ang; nimahsela a tâwp thlenga tuar peih apiang chu, chu mi ngei chu chhandamin a awm ang,” tiin.—Matthaia 10:16-22.
5 ‘Khawvêl pumhlûm hi mi sual thu thua a awm’ avângin tûn laiah hian ‘huat kan hlawh’ a ni. (1 Johana 5:19) Kan hmêlmate chuan thlarau lama kan hnianghnârzia an hmu a; mahse, Jehova hnên a mi a ni tih erawh an pawm duh lo. Min dodâltute chuan hlim taka buh seng hna kan thawk chunga kan hlim leh lâwm hmêlte chu an hmu a. Kan inpumkhatzia hi mak an ti a ni. A dik tak chuan Ram danga an zin pawh a, an zinna ram aping maia an rama an tih ang bawka Jehova Thuhretute’n chanchin ṭha an hrilh an hmuh chuan mak an ti a ni. Ni e, a hun takah chuan min ṭanpuitu, leh kan inlungrualna hnâr Jehova chu kan hmêlmate zîngah pawh hriattîr a ni dâwn tih kan hria a ni.—Ezekiela 38:10-12, 23.
6. Buh seng hnaa kan tel hian eng nge tiam kan nih a; mahse, eng zawhnate nge lo awm?
6 Buh Neitupa chuan a Fapa, Isua Krista chu, “Lei leh vâna thuneihna zawng zawng” a pe tawh a. (Matthaia 28:18) Jehova chuan Isua chu vâna vântirhkohte leh hriak thih “bâwi rinawm, fing tak” kal tlanga buh seng hna chu enkawl tûrin a hmang a ni. (Matthaia 24:45-47; Thu Puan 14:6, 7) A nih leh buh seng hnaa hma lam kan pan zêl lai hian, hmêlmate dodâlna hi hlim chung siin engtin nge kan tuar chhuah theih ang?
7. Dodâlna emaw, tihduhdahna emaw kan tawh hunin eng ang rilru put hmang nge neih tlat kan tum tûr?
7 Dodâlna emaw, tihduhdahna emaw kan tawh châng chuan, Paula rilru ang kha kan put ve theih nân Pathian ṭanpuina i dîl ang u. Paula chuan tihian a ziak: “Miin min hauvin mal kan sâwmsak ṭhîn a; miin min tihduhdahin kan tuar hrâm hrâm ṭhîn a, miin min hêkin kan thlêm ṭhîn,” tiin. (1 Korinth 4:12, 13) Hetiang rilru put hmang leh, rem hre taka vântlâng rawng kan bâwlna hian a châng chuan min dodâltute rilru a tidanglam ṭhîn a ni.
8. Matthaia 10:28-a chhinchhiah Isua thu aṭang hian eng tiamna thlamuanawm tak nge i hmuh?
8 Thi tûra vauna meuh pawhin buh sengtu taima kan nihna chu a tikiam chuang lo. Huaisen takin Lalram thuchah chu a langsâr thei ang berin kan puang chhuak a ni. Isua chuan: “Taksa tihluma thlarau tihlum thei lotute chu hlau suh ula, Gehena-a thlarau leh taksa tiboral theitu erawh chu hlau zâwk ang che u,” a ti a, he Isua thu aṭang hian thlamuanna kan nei a ni. (Matthaia 10:28) Kan Pa vâna mi chu nunna Petu a ni tih kan hria a. A laka rinawm nghehna vawngtu leh rinawm taka buh seng hnaa hma lam pan zêlte chu lâwmman a pe ṭhîn.
Nun Chhanhimna Thuchah
9. Engtin nge mi ṭhenkhatin Ezekiela thute an dawnsawn a, tûn laia thil thleng nên engtin nge a inan?
9 Zâwlnei Ezekiela’n “helhmang hnam”—Israel leh Juda lalramte—hnêna huaisen taka Jehova thuchah a puan chhuah khân, mi ṭhenkhatte chuan ṭha takin an ngaithla a. (Ezekiela 2:3) “Ngai teh, nang chu an tân chuan hmangaihna hla, mawi taka sak leh tum ang i ni ang,” tiin Jehova chuan a hrilh a ni. (Ezekiela 33:32) Ezekiela thusawite chu an duh nâ a, chûngte mil chuan an nung lo a ni. Tûn laiah hian eng nge thleng ve le? Hriak thih la bângte leh an thawhpuite’n huaisen taka Jehova thuchah an puan chhuah hian, ṭhenkhatte chuan Lalramin malsâwmna a rawn thlen tûrte chungchâng chu an ngaihthla duh a; mahse, an ngaihlu lo va, zirtîr an rawn ni lo va; tin, buh sengnaah min rawn zawm hek lo.
10, 11. Kum zabi 20-na tîr lamah chuan kan nun chhanhimna thuchah chu mipui hnêna puang chhuak tûrin eng nge tih a nih a, chu chuan eng rah nge a chhuah?
10 A lehlam pang thlîr chuan, mi tam takin buh seng hna chu duh takin an chhâng lêt a, Pathian thuchah puan chhuahnaa an rawn tel ve a ni. Entîr nân, 1922 aṭanga 1928 thlenga Kristian inkhâwmpuiah chuan, Setana inawpna suaksual chunga rorêlna chungchâng chu fiah taka puan chhuah a ni a. Chûng inkhâwmpuia thu puan chhuahte chu Radio station-ahte tihchhuah a ni. Chu mi hnuah, Pathian mite chuan chûng thute chu khâwla chhu chhuakin mi maktaduai tam takte hnênah an sem chhuak ta chur chur mai a ni.
11 Kum 1930 tâwp lam chuan kawng danga thu hrilh dân—thu ziak kenga kawng zawh—chu hman a ni leh ta a. Atîrah chuan Jehova mite chuan vântlâng thusawi ziah chhuahna chu taksaah an bel a. Chu mi hnuah, “Sakhuana hi thang leh inbumna hmanrua a ni” tih leh “Pathian leh Lal Krista rawng bâwl rawh” tih thusawi ziahna chu a kenin an keng leh ta thung a. Kawtthlêra an kal tlang lai chuan anmahni kal tlang apiangte ngaihsak an hlawh a. England ram, London kawtthlêr lûn laia hetiang rawngbâwlnaa tel zat zat unaupa pakhat chuan hetiang hian a sawi: ‘Hei hian Jehova Thuhretute chu intichakzual tûr leh mite hriat hlawh an nih theih nân kawngro a su êm êm a ni’ tiin.
12. Kan rawngbâwlnaah hian Pathian rorêlna thuchah mai bâkah eng nge kan sawi lan bawk a, tûnah hian chanchin ṭha hrilhnaah tute nge lungrual taka thawk ho?
12 Pathian rorêlna thuchah kan puan chhuah rual hian, Lalram thuchahin malsâwmna a rawn thlen tûrte chu kan sawi lang bawk a ni. Huaisen taka mite hnêna thu kan hrilhna chuan a thleng tlâk mite zawng chhuak tûrin min ṭanpui a ni. (Matthaia 10:11) Hriak thih pâwl hnuhnung lama mi tam zâwkte chuan kum 1920 leh 1930 chho bâwr vêla buh seng tûra tih tak zeta kohna chu an chhânglêt a. Tichuan, kum 1935 inkhâwmpuiah chuan “berâm dang”, “mipui tam tak” tâna he lei paradis-a malsâwmna an dawn tûr thu chanchin thar ropui tak chu puan chhuah a ni leh a ni. (Thu Puan 7:9; Johana 10:16) Anni chuan Pathian rorêlna thuchah chu an ngai pawimawh a, nun chhanhimna chanchin ṭha puan chhuahnaah chuan hriak thihte nên lungrual takin an thawkho a ni.
13, 14. (a) Sâm 126:5, 6 aṭang hian eng thlamuanna thu nge kan hmuh theih? (b) Kan tuh a, tui kan pêk chhunzawm zêl chuan eng nge lo thleng ang?
13 Pathian buh sengtute, a bîk takin tihduhdahna tâwkte thlamuantu ber chu Sâm 126:5, 6 thu: “Mittui tla chunga tuhte chuan hlim takin an ât ang. Ṭap chungin buh chi feh chhuahpui mah sela, a buh phalte kengin hlim takin a lo haw leh ang,” tih hi a ni. Tuh leh seng chungchânga sâm ziaktu thusawi hian hmân lai Babulon sala tâng lo kîrlehte chu Jehova’n mal a sâwmin a ṭanpui tih a a târ lang a ni. Anni chu chhuah an nih avângin an hlim êm êm a; mahse, kum 70 chhûnga an vahvaihna, rah chhuah lohna rama chi an tuh lai chuan an ṭap ngei ang. Nimahsela, tupawh tuh zawm zêltute chuan a tâwpah an thawhrimna rah chu an seng a, lungawina an seng a ni.
14 Fiahna kan tawh emaw, felna hming avânga keimahni’n emaw, kan rin puite’n emaw an tawrh chuan kan mittui a tla mai thei. (1 Petera 3:14) Kan buh sengnaah, kan thawh rim rah chu hmuh tûr a awm loh avângin atîrah chuan harsa kan ti mai thei. Mahse, kan chîn a, tuia kan châwm zêl chuan, kan beisei phâk bâk piah lamin Pathianin a tiṭhang mai dâwn a ni. (1 Korinth 3:6) Hei hi Bible leh Bible ṭanchhan thu leh hla kan semte rah chhuah hian a lantîr chiang êm êm a ni.
15. Buh sengnaa Kristian thu leh hla chhuahte ṭangkaizia entîrna pe rawh.
15 Jim-a entawn tûr siam hi lo ngaihtuah ta ila. A nu a thih chuan a nu thawmhnaw zîngah chuan Life—How Did It Get Here? By Evolution or by Creation? tih lehkhabu chu a chhar hlauh mai a.a A chhiar a, ngaihnawn a ti hle mai a. Kawtthlêra a tawn Thuhretu pakhat nêna an sawidun hnuah, Jim-a chuan tlawhkîr chu a remti a, tichuan Bible a zir ta bawk a ni. Jima chuan thlarau lamah chak takin hma a sâwn a, Jehova hnêna inpumpêkin baptisma a chang ta a ni. Tichuan, a thil zirte chu a chhûngte hnênah a hrilh chhâwng ve a. A unaunu leh unaupa chu Jehova Thuhretu an lo nih phah ta a; tin, Jim-a chu a hnuah London Bethel-ah rawngbâwlin a awm ta a ni.
Tihduhdah Tuar Chung Pawha Hlim
16. (a) Engvângin nge buh sengnaah hlawhlin zêl a nih? (b) Chanchin ṭha-in a ngawng chungchângah eng vaukhânna nge Isua’n a pêk a; mahse, eng rilru pu chungin nge mite chanchin ṭha kan hrilh?
16 Engvângin nge chutiang khawpa buh senga hlawhtlinna chu a awm le? A chhan chu Kristian hriak thihte leh an thawhpuite’n Isua zirtîrna: “Thima ka hrilh che u hi êngah sawi ang che u; beng bula in hriat hi in chunga chuangin tlângaupui ang che u,” tih hi an zawm vâng a ni. (Matthaia 10:27) Nimahsela, Isua’n: “Tihhlum tûrin unaupa leh unaupa an inmantîr ang a, pa pawhin a fa a mantîr bawng ang; fate pawhin an nu leh pate an do vang a, an tihhlumtîr bawk ang,” tia a lo sawi lâwk diam tawh avâng hian harsatnate chu kan beisei rêng a ni. Isua chuan tiang hian a sawi zâwm a: “Khawvêlah hian rem lentîr tûra lo kal emaw mi ti suh u; rem lêntîr tûra lo kal ka ni lo va, khandaih lêntîr tûra lo kal ka ni zâwk,” tiin. (Matthaia 10:21) Isua chu chhûngkaw ṭhendarhtîr tum hrim hrima lo kal a ni lo va. Nimahsela chanchin ṭha chuan chutiang thlentîr châng chu a nei a ni. Tûn laia Pathian chhiahhlawhte chungah pawh chutiang bawk a ni. Chhûngkua kan tlawh a, chanchin ṭha kan hrilh hian chhûngkaw tihdarh chu kan tum a ni lo. Mi tinte chanchin ṭha pawmtîr chu kan tum ber a ni. Chuvângin, “chatuana nun duhna rilru dik tak nei apiangte” hîp thei tûr zâwngin, ngilnei leh hriatthiamna nên chhûngkuaa mi tinte hrilh chu kan tum a ni.—Tirhkohte 13:48, NW.
17. Pathian lal chungnunnna chawisângtute chu engtia tihhran nge an nih a, chu mi entîrna pakhat chu eng nge ni?
17 Lalram thuchah chuan Pathian Lal chungnunna chawisângtute chu a tihrang a. Entîr nân, kan rin puite’n German rama National Socialism hun laia ‘Kaisara thil chu Kaisara hnêna pe a, Pathian thilte chu Pathian hnêna an pêk’ avânga an danglam bîkzia chungchâng kha ngaihtuah teh. (Luka 20:25) Sakhaw hruaitu dangte leh Kristian derte ang lo takin, Jehova chhiahhlawhte chu nghet takin an ding a, Bible dân bulte bawhchhiat chu an hnial tlat a ni. (Isaia 2:4; Matthaia 4:10; Johana 17:16) The Nazi State and the New Religions tih lehkhabu ziaktu, Professor Christine King chuan hetiang hian a sawi: “[Nazi] sawrkâr hlawhchhamna awm chhun chu Thuhretute a dodâlna kawnga a hlawhchhamna hi a ni. Mi sâng tam tak that mah sela, an hna a tâwp chuang lo va, National Socialism mang tawh hnu May 1945-ah pawh Jehova Thuhretute hna chu a la awm chhunzawm reng a ni,” tiin.
18. Tihduhdah an tuar chung pawhin Jehova mite chuan eng rilru put hmang nge an lantîr?
18 Thil pawimawh êm êm pakhat chu tihduhdahna an tawrh laia pawha Jehova mite rilru put hmang târ lan hi a ni. Sawrkâr thuneitute chu kan rinna hian a hneh hle a, inhuatna laka kan fihlîmna phei hi chu mak an tilehzual a, mak an tihzia an sawi chhuak hial a ni. Entîr nân, Holocaust-a dam khawchhuak Thuhretute chuan an thil tawnte an thlîr kîr châng apiangin an hlimzia leh an lungawizia an sawi châmchî ṭhîn. ‘Thiltihtheihna nasa tak’ Jehova’n a pe tih an hria a ni. (2 Korinth 4:7) Kan zînga hriak thih awmte chuan ‘vânah an hming ziak a ni tih’ hriat chianna an nei a. (Luka 10:20) An chhelna chuan beiseina a siam a, chu chuan lunghnualna a thlen ngai lo; tin, lei lam beiseina nei buh sengtu rinawm takte pawhin chutiang bawk rinna chu an nei a ni.—Rom 5:4, 5.
Buh Seng Hna Thawk Ṭâng Ṭâng Rawh
19. Kristian rawngbâwlnaah eng tihdân ṭangkai tak nge hman a nih?
19 He entîr nei buh seng hnaa kan tel theih hun hi eng chen nge Jehovan a hawn dâwn tih chu la hriat tûr chauh a ni a. Chutih chhûng chuan, buh sengtute chuan an hna thawh dânah tih dân bîk an nei tih kan hre reng tûr a ni. Chutiang bawkin, fiahna tuar chunga rinawm taka kan thu hrilna chuan rah ṭha a chhuah ang tih kan chiang thei a ni. Paula chuan a Kristianpuite hnênah: “Mi zîr tûrin ka ngên a che u,” a ti. (1 Korinth 4:16) Paula’n Meliti-a Ephisi kohhran upate a kawm khân, ‘vântlâng zîngah te, in tinah te’ zirtîr a tîm ngai lohzia a hrilh nawn a. (Tirhkohte 20:20) Paula ṭhian Timothea chuan Paula tihdân chu a zir a; chuvâng chuan chûng thute chu Korinth mite hnênah a hriattîr thei a ni. (1 Korinth 4:17) Pathianin Paula zirtîr dân chu mal a sâwm a, keini pawh vângtlâng zîngah te, in tinah te, tlâwhkîrah te, ina Bible zirpuinaah te, leh mite kan tawhna apianga chanchin ṭha kan hrilh ṭâng ṭângna chu Pathianin mal min sâwm ve dâwn a ni.—Tirhkohte 17:17.
20. Engtin nge Isua’n thlarau lam buh seng tûr tam tak a awm tih a lan tîr a, chu chu a dikzia engtin nge tûn hnai kuma thil thlengte’n a lantîr?
20 C.E., 30-a Sukar kianga Samari hmeichhia thu a hrilh hnuah Isua chuan thlarau lam buh seng chungchâng a sawi a. Hetiang hian a zirtîrte a hrilh: “Dâk ulang lote en rawh u, tûn apangin seng tûrin a êng a ni. A âttuin hlawh a hmu ṭhîn a, chatuana nun thlenga awm tûrin rah a seng ṭhîn, a tuhtu leh a âttu an lâwm dun theih nân,” tiin. (Johana 4:34-36) Isua chuan Samari hmeichhia hnêna thu a hrilhin a rah chhuah tûr a hmu lâwk pawh a ni mai thei, chu hmeichhe thusawi avâng chuan mi tam takin Isua an lo rin phah ta si a. (Johana 4:39) Tûn hnai kum khân ram hrang hrangte chuan Jehova Thuhretute an khuahkhirhna chu hlîpin, zalên taka rawng bâwl phalna dân an pe a, chu chuan bu seng tûr thlawhhma thar a siam a. Tichuan, thlarau lam buh sengna hnianghnâr tak chu neih a ni ta a ni. A dik tak chuan, khawvêl pum puiah, thlarau lama buh sengnaah hlim taka kan tel chhunzawm zêl hian malsâwmna nasa tak kan dawng a ni.
21. Engvângin nge buh sengtu hlim nia hma lam pan zêlna tûr chhan kan neih?
21 Buh chu a hmin a, seng a lo hun chuan, buh sengtute chu muangchâng lovin, buh seng tûra an thawh chhuah vat a ngai a ni. Tûn laiah pawh, “tâwpna hunah” kan awm tawh avângin hmanhmawh leh taima taka kan thawh a ngai a ni. (Daniela 12:4) Ni e, fiahna kan tawng ṭhîn; mahse, Jehova chibai bûktute buh sengna chu tûn hma zawng aiin a nasa zâwk a ni. Chuvângin tûn hi lâwmna hun a ni. (Isaia 9:3) Tichuan, hna thawktu hlim tak niin, buh sengna hnaah hian hma lam i pan zêl ang u! (w01 7/15)
[Footnote]
a Jehova Thuhretute chhuah leh sem chhuah.
Engtin Nge I Chhân Ang?
• Buh Neitu chuan thawktu tûr tam zâwk ngenna chu engtin nge a chhân?
• ‘Huat hlawh’ mah ila, eng rilru puthmang nge kan neih tlat?
• Engvângin nge tihduhdah kan ni chung pawha kan hlim?
• Engvângin nge buh seng hnaah hian hmanhmawh taka kan thawh ṭâng ṭâng ang?
[Phêk 24, 25-naa milemte]
Thlarau lam buh sengnaa telte chuan vântirhkoh ṭanpuina an dawng
[Phêk 26-naa milem]
Thuziak kenga kawng zawh chuan tam takte chu Lalram thuchah a ngaihsaktîr
[Phêk 26-naa milem]
Kan tuh a, tuiin kan châwm a; mahse, Pathianin a ṭhantîr