Lote Chu Seng Tûrin A Eng
1. Eng hna pawimawh tak nge thawh mêk a nih?
1 Samari hmeichhia hnêna thu a hrilh hnuah, Isua chuan a zirtîrte hnênah: “Dâk ulang lote en rawh u, tûn apangin seng tûrin a êng a ni,” tiin a sawi a. (Joh. 4:35, 36) Thlarau lam buh seng hna chu thawh ṭan a ni tawh a, Isua’n chu hna chu khawvêl pum huapa thawh a nih dân tûr a hmu lâwk thei a ni. Isua chu vânah awm tawh mah se, buh sengnaah a la tel reng a. (Mt. 28:19, 20) He rawngbâwlna hi a vawrtâwp lam a pan ruala nasa tak leh hmanhmawh taka thawh chhoh a ni tih engin nge târ lang?
2. Khawvêl pum huapa buh sengna hna chu thawh nasat a ni tih engin nge târ lang?
2 Khawvêl Pum Huapa Buh Sengna: Kum 2009 rawngbâwlna kum chhûng hian khawvêl pum huapa thuchhuahtute chu za zêlah 3.2-in kan pung a. Zalên taka thu kan hrilh theih lohna ramahte pawh za zêlah 14-in kan pung a ni. Thla tina in lama Bible zirpui neih report zât chu 76,19,000 chuang a ni—chu chu thuchhuahtu tam lai ber aiin a tam zâwk a, ni kuma Bible zirpui zât aiin maktaduai chanve deuhthawin a tam zâwk bawk a ni. Hmun tam takah he hna hi tihzauh zêl a nih avângin, pioneer zir chhuakte thawn tûra dîlna tam tak dawn a ni a. Ram tam takah hnam dang ṭawng hmang thlawhhma chuan rah ṭha a chhuah hle a ni. Hei hian buh seng hun tâwpna lamah Pathian Jehova’n chak takin hma a la a ni tih a tichiang hle. (Is. 60:22) In “lote,” a nih loh leh in thu hrilhna bialte chungah thlîr dân dik i nei em?
3. Tualchhûng buh sengna chungchângah eng thu tâwp nge ṭhenkhatin an siam mai theih?
3 Tualchhûnga I Buh Sengna: Mi ṭhenkhat chuan: “Ka rawngbâwlna bial chuan rah a chhuah ṭha lo,” an ti mai thei. Bial ṭhenkhat chuan hmun dang aiin rah a chhuah ṭha lo emaw, tûn hma angin a chhuah ṭha tawh lo emaw ngei mai. Chuvângin, Thuhretu ṭhenkhat chuan buh sengna chu an thawk zo tawh a, a ṭo zawn khâwm chiah an hmabâk tawh niin thu tawp an siam mai thei. Mahse, chutiang chu a ni chiah em?
4. Kan rawngbâwlna chungchângah eng rilru put hmang dik nge kan neih ang a, engvângin nge?
4 Buh seng hun hi atîr aṭanga a tâwp thlenga ṭhahnemngai taka thawh hun a ni a. Isua ṭawngkam chhuak: “Buh seng tûr a tam hle si a, nimahsela a thawktute an tlêm; chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u,” tiha lang a hmanhmawhna chu chhinchhiah ang che. (Mt. 9:37, 38) Buh Neitupa Jehova chuan buh seng hun leh a hmun chungchângah mawh a phur a ni. (Joh. 6:44; 1 Kor. 3:6-8) A nih leh kan tih tûr chu eng nge ni ta ang? Bible chuan: “Zîngah i chi tuh la, tlaiah i kut sûm suh,” tiin min hrilh a ni. (Thur. 11:4-6) Ni e, buh seng hun vâwrtâwp chu kut sûm hun a ni hauh lo!
5. Engvângin nge ngaithla duh an tam lohna bialah pawh ṭhahnemngai taka thu kan hrilh zêl ang?
5 Buh Seng Reng Rawh: Kan thu hrilhna bialte chu kan tlawh chhuak zingin, ngaithla duh an awm lo a nih pawhin, hmanhmawh tak leh ṭhahnemngai taka thawh chhan tûr a awm a ni. (2 Tim. 4:2) Khawvêl awm dân inthlâkthleng thut ṭhînte chuan mite rilru put hmang a thlâkthleng bâkah, an nakin hun tûr ngun lehzualin a ngaihtuahtîr a. Ṭhalaite an lo upat chuan himna leh rilru thlamuanna mamawh nia inhriatna an nei thei a. Tin, kan thawh ṭâng ṭângna chuan mi dangte rilru a la thei bawk. Ni e, a hmaa ngaithla duh lotute pawhin an ngaithla duh leh thei a ni. Kan thuchah hnâwl luitute pawh kan vaukhân a ngai a ni. Amaherawhchu, kan thu hrilhna biala mi tam tak chuan an ngaihven lo mai ni lo va, chanchin ṭha an hua a nih chuan, fîmkhur hle a ngai ang.—Ezek. 2:4, 5; 3:19.
6. Kan biala rawngbâwl a harsat chuan ṭhahnemngaihna neih reng tûrin engin nge min ṭanpui ang?
6 Kan biala rawngbâwl a harsat chuan ṭhahnemngaihna nei reng tûrin engin nge min ṭanpui ang? In tina thu kan hrilh mai bâkah, mite hna thawhna hmuna thu hrilh emaw, telephone hmanga thu hrilh emaw pawhin kan ti thei a. A nih loh leh, a thara ṭan lâk nân thusawi dân chi hrang kan hmang thei bawk. “Chatuana nun duhna rilru dik tak” neite zawn chhuahna kawngah remhriatna leh hriatthiamna kan lantîr thei a ni. (Tirh. 13:48, NW) Kan hun duan chu tidanglamin, mite ina an awm hun tûr tlai lam emaw, hun dang emawah thu kan hrilh thei a ni. Mi tam takte hnêna chanchin ṭha hrilh theih nân ṭawng tharte pawh kan zir thei bawk ang. Regular pioneer thawkin kan rawngbâwlna chu kan zauh thei bawk a. A nih loh leh buh sengtu tlêmna hmunah kan in sawn thei bawk. Buh sengna chunga rilru put hmang dik tak kan neih chuan, he hna pawimawh tak thawhnaah hian theih tâwp kan chhuah ang.
7. Eng hun thlengin nge buh seng hna chu kan thawh zêl dâwn?
7 Lo neitute chuan buh seng nân hun an nei tam lo va, chuvângin an thawh zawh hma loh zawng an châwlin, an inthlahdul mai mai ngai lo. Thlarau lam buh sengna pawh chutiang bawka hmanhmawhthlâk a ni. Eng hun thlengin nge buh seng hna chu kan thawh zêl dâwn? ‘Khawvêl tâwpna’ hun chhûng zawng leh ‘tâwpna’ a lo thlen thlengin kan thawk zêl ang. (Mt. 24:14; 28:20) Jehova Rawngbâwltu lian ber angin, kawltîr kan nih rawngbâwlna hna thawh zawh chu kan duh a ni. (Joh. 4:34; 17:4) Chuvângin, kan rawngbâwlna chu ṭhahnemngai tak, hlim tak, leh rilru dik tak puin a tâwp thlengin i thawk zêl ang u. (Mt. 24:13) Buh sengna hi a la tâwp si lo va!
[Phêk 2-naa Thu Lâk Chhuah]
Buh seng hun hi atîr aṭanga a tâwp thlenga ṭhahnemngai taka thawh hun a ni