Chatuana Nung Tura Siam Kan Ni

Chatuana nun neih châkna chu thil pângngai lo a ni em? Ni lo ve! Bible chuan Pathianin keimahniah chutiang châkna chu a dah tih min hrilh a. (Thuhriltu 3:11) “Pathian chu hmangaihna a ni si a,” tiin a sawi bawk. (1 Joh. 4:8) Hmangaihna nei tak Pathianin chatuana nun duhna neiin min siam a; mahse, chutianga nun duhna kan neih chu a tihhlawhtlin leh si loh chuan thil inâwm a ni ang em?

Thihna chu ṭhian a ni lo tih a chiang a. Dik tak chuan, Bible chuan thihna chu “hmêlma” duhawm lo tak niin a sawi. (1 Korinth 15:26) Thihna chu mi ṭhenkhat chungah a thleng hma deuh va, mi dang chungah erawh a thleng har thung. Mahse, a tâwpah chuan, kan thi vek a. Mi tam tak chuan, thihna chungchâng ngaihtuah chu nuam lo an tiin, an hlau va. Chu hmêlma chu hneh a ni ngai ang em? Chu chu thil theih a ni em?

BEISEINA ATANA FINFIAHNA

Mihringte kan thi hi Pathian thiltum a ni lo rêng rêng tih i hriat chuan mak i ti ang em? Bible-a Genesis bu chuan mihringte tâna Pathian thiltum chu leia chatuana nun hi a ni tih fiah takin a târ lang a. Pathian Jehova chuan leilunghi mihringte chênna atân uluk takin a siam a ni. Tichuan, mihring hmasa ber Adama chu a siam a, Eden huan nuam takah a dah a. Chumi hnuah, “Pathianin a thil siam tinrêng chu a en a, ngai teh, ṭha a ti êm êm a.”—Genesis 1:26, 31.

Adama chu ṭha famkim, Pathian anpuia siam a ni a. (Deuteronomy 32:4) Adama nupui Evi pawh, sawisêl tûr awm lo, tisa leh rilru ṭha famkima siam a ni bawk. Jehova chuan an hnênah: “Chi tam tak thlaha lo pungin, leilung hi luah khat ula, in thû thûin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,” tiin a hrilh a ni.—Genesis 1:28.

Fate neia leilung luah khat tûr chuan hunte a liam a ngai a. Pathian thiltum ang chuan Evi’n fate a nei ang a, tichuan, an fate pawhin leilung a khah thlengin fate an nei zawm zêl dâwn a ni. (Isaia 45:18) Adama leh Evi te chu an tû leh fate an hmuh thleng chauh dam a, chumi hnu lam engmah hre lo tûr an nih chuan, Pathianin an hnêna chatuan hmabâk a pe chu thil inâwm a ni ang em?

An thuhnuaia ramsate awmtîr tûra thupêk pawh hi han ngaihtuah teh. Adama chu ramsate hming vuah tûra hrilh a ni a, chutiang ti tûr chuan hun rei tak a ngai ang. (Genesis 2:19) Chu bâkah, ramsate thunun thei tûr chuan an miziate a zir a, a enkawl dânte a hriat chian a ngai dâwn tihna a ni. Chutianga ti tûr chuan hun rei lehzual a ngai ngei ang.

Chuvângin, leilung luah khat tûr leh an thu hnuaia ramsate dah tûra Pathian pêk kaihhruaina chuan nupa tuak hmasa berte chu hun rei tak chhûng dam tûrin a siam tih a târ lang a. Dik tak chuan, Adama chu hun rei tak chhûng a dam rêng a ni.

HUN REI TAK AN DAM

Bible chuan mihringte chu tûn laia kan dam chen aia rei zâwkin an lo dam tawh ṭhîn tih a sawi a. “Adama dam chhûng zawng zawng chu kum 930 a ni,” tih a sawi a. Chumi hnuah, kum 900 aia rei dam, mi dang paruk pawh a târ lang bawk! Chûng mite chu Setha, Enosa, Kenana, Jareda, Methusela, leh Nova te an ni. An zain Nova hun lai Tui lêt hmaa dam an ni a, Nova chu Tui lêt hmain kum 600 a ni tawh a. (Genesis 5:5-27; 7:6; 9:29) Engtin nge chutianga rei chu an dam theih?

Chûng mite dam rei chhan chu mihringte ṭhat famkim hun lai nêna an la inhnaih vâng a ni. Chu chu an dam rei chhan ber niin a lang. A nih leh, engtin nge ṭhat famkimna chuan dam reina nên inkûngkaihna a neih? Engtin nge thihna chu hneh a nih ang? A chhânna hre tûr chuan kan tar a, kan thih chhan hriat hmasak a ngai a ni.