Chanchin Ṭha Hril Tûrin Ka Tling Em?
1. Engvângin nge chanchin ṭha hril tûra tling lo niah kan inngaih loh vang?
1 Hetiang zawhna hi i inzâwt ngai a nih chuan lungngai suh! Rawngbâwltu nih min tlintîrtu chu lehkha zir thiamna lam emaw, pianpui thiamna lam emaw a ni lo. Zirtîr hmasate zînga ṭhenkhat phei chu “lehkha thiam lo, mi mâwl tak” anga sawi an ni a. Mahse, Isua tihhmuhna zui an tum tlat avângin chanchin ṭha hriltu hlawhtling tak an ni.—Tirh. 4:13; 1 Pet. 2:21.
2. Isua zirtîr dân ṭhenkhat chu engte nge ni?
2 Isua Zirtîr Dan: A zirtîrna chu tluangtlam tak, mipui vântlâng tâna chhawr tlâk, leh hriatthiam awlsam tak a ni. A zawhna siam te, tehkhin thu sawi te, leh thuhmahruai fiah takte chuan ngaithlatute beng a verh hle ṭhîn. (Mt. 6:26) Mite hmakhua chu tih tak zetin a ngaihsak bawk. (Mt. 14:14) Chu bâkah, Isua chuan Pathian Jehova tirh leh tihchak a ni tih inhriain, inrintâwkna leh thu neihna nên thu a sawi bawk a ni.—Lk. 4:18.
3. Engtin nge Pathian Jehova chuan kan rawngbâwlna hlen tûra min ṭanpui?
3 Pathian Jehova’n Min Ṭanpui: Min Zirtîrtu Ropui chuan a Thu leh a inawpna pâwl hmangin chanchin ṭha hlawhtling taka kan hrilh theih nâna kan mamawh zirtîrna chu min pe a. (Is. 54:13) Pathian Jehova chuan Isua zirtîr dân chanchin chu ziaka a lo chhinchhiahtîr avângin, a tih dân chu kan bih chiangin, kan entawn thei a ni. Ani chuan a thlarau thianghlim min pêk bâkah, kohhran inkhâwmte kaltlangin min zirtîr bawk. (Joh. 14:26) Chu bâkah, thu hriltu thiam lehzual min nihtîr thei thiltawn ngah tak thuchhuahtute pawh min pe bawk a ni.
4. Engvângin nge chanchin tha hril tûra tling nia inhriatna kan neih ang?
4 “Kan tlin theihna chu Pathian hnên ata” a ni a, chuvângin thu hril tûra tling nia inhriat chhan tûr kan nei tak meuh a ni. (2 Kor. 3:5) Pathian Jehova rinchhan tlat a, a ruahmanna siamte kan hman ṭangkai chuan, “hna ṭha tinrêng thawk tûra kim taka inthuamin” kan awm thei ang.—2 Tim. 3:17.