Pathian Thu Zirtîrtute Angin Inthuam Famkim Rawh U
“Pathian . . . chuan . . . rawngbâwltuahte min tlintîr a.”—2 KORINTH 3:5, 6.
1, 2. Thu hril tûrin eng ang tumna nge neih châng a awm a, engvângin nge a hlawhchham ṭhin?
I THIAM LOH thil pakhat siam tûra tirh ni ta la, engtin nge i awm ang? Han ngaihtuah teh: Thil mamawh leh hmanrua zawng zawng i hmaah hman mai theihin a awm vek a. Mahse, a thawh dân tûr engmah i hre si lo. Chu a chhapah, hna hman hmawh thlâk tak a ni leh nghâl. Mite lah chu nangmahah an innghat ringawt mai bawk si nên. A va beidawnthlâk dâwn êm!
2 Chu chu suangtuahna ringawt zawng a ni lo. Entîrna pakhat ngaihtuah ila. A châng chuan, Kristianna rama kohhran pakhat chuan in tin kala rawngbâwlna neih a tum a. Mahse, chûng an tumnate chuan chawlhkâr engemaw zât emaw, thla engemaw zât emaw lek a daih a, a reh leh mai ṭhîn. Engvâng nge? Kristianna ram chuan a mi leh sate chu, chu hna thawk thei tûra a ṭanpui loh vâng a ni. Sakhaw hruaitute meuh pawh, school-ahte leh zirna sângzâwkahte kum tam tak an zir chung pawhin thuhrilh rawngbâwlnaa tel tûrin an tling lo a ni. Chu chu engvângin nge kan sawi theih?
3. 2 Korinth 3:5, 6-ah chuan eng ṭawngkauchheh nge vawi thum lai hman a nih a, chu chuan eng awmzia nge a neih?
3 Pathian Thu chuan Kristian chanchin ṭha hriltu dikte titlingtu chu a sawifiah a. Tirhkoh Paula chu: “Engpawh keimahni aṭanga chhuaka ruat tûrin keimahni ngawtin kan tling tâwk kan ti lo va; kan tlin tâwkna chu Pathian hnên ata a ni zâwk. Amah bawk chuan . . . rawngbâwltu tling tâwk min nihtîr a,” tia ziak tûra thlarauva thâwk khum a ni. (2 Korinth 3:5, 6, NW) Hetah hian ṭawngkauchheh “tling tâwk” tih vawi thum lai a hmang tih lo chhinchhiah la. Chu chu engtihna nge ni? Vine’s Expository Dictionary of Biblical Words chuan heti hian a sawi: “Thil chungchâng sawina a nih chuan [he Greek thumal hian] ‘tâwk’ tihna a kâwk a . . . mihring chungchâng sawina a nih erawh chuan ‘inthuam,’ ‘phu,’ tihna a ni thung” tiin. Tichuan, chutianga “tling tâwk” tupawh chu hna thawk tûrin a inthuam a, chu hna chu a phu a ni. Ni e, chanchin ṭha rawngbâwltu dik takte chu, chu hna thawk tûrin an tling a ni. He hna thawk tûr hian an inthuam a, an tling a, he hna thawh hi an phu bawk a ni.
4. (a) Engtin nge Paula thiltawn chuan Kristian rawngbâwlna atâna tlinna chu thlan bîk mi tlêm tête tân chauh a ni lo tih a târ lan? (b) Jehova’n rawng bâwl tûra min tlintîrna thil pathumte chu eng nge ni?
4 A nih leh chutianga tlinna chu khawi aṭanga lo kal nge? Mi mal thiamna aṭang nge finna chungnung bîk aṭang zâwk? School ṭha hmingthang tak aṭanga zirna aṭangin em ni? Tirhkoh Paula chuan hêng zawng zawng hi a nei kim vek a. (Tirhkohte 22:3; Philippi 3:4, 5) Chutichung pawh chuan, rawng bâwl tûra a tlinna chu school leh zirna sâng aṭang ni lovin, Pathian Jehova hnên aṭanga lo kal a ni tih inngaitlâwm takin a pawm a ni. Chutiang tlinna chu mi thlan bîk, tlêm tête tân chauh em ni? Paula chuan Korinth kohhran mite hnênah “kan tlin tâwkna” tih chungchâng a ziak a. Chu chuan Jehova chuan a chhiahhlawh rinawm zawng zawngte chu a thuamin, hna thawh tûr a pêk chu a thawh theihtîr tih a târ lang a ni. Jehova chuan tûn laiah engtin nge Kristian dikte a tlintîr le? A tlintîr nâna a thil hman pathumte i lo en ho vang u: (1) a Thu, (2) a thlarau thianghlim, leh (3) a lei lam inawpna pâwl te hi.
Jehova Thuin Min Tlintîr
5, 6. Pathian Lehkhabu Thianghlim chuan Kristian dikte chungah eng nghawng nge a neih?
5 A hmasa berin, engtin nge Pathian Thu chuan rawngbâwltu tling min nihtîr? Paula chuan: “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân,” tiin a ziak a. (2 Timothea 3:16, 17) Chuvângin, Pathian Lehkha Thu Thianghlim chuan Pathian Thu mite zirtîrna, “hna ṭha” thawk tûrin ‘kim takin min thuamin, min tifamkim’ a ni. Mahse, Kristianna ram kohhrana mi zawng zawngte chungchâng chu eng nge ni ve le? Bible chu an nei ngei mai. A nih leh, lehkhabu pakhat rau rauvin, engtin nge a ṭhen rawngbâwltu tling a nihtîr a, a ṭhen a nihtîr loh? A chhânna chu Bible chunga kan rilru put hmangah a innghat a ni.
6 Biak ina inkhâwm ṭhîn mi tam takin Bible thu hi ‘Pathian thu pawma an pawm’ lo hmuh hi a lungchhiatthlâk hle. (1 Thessalonika 2:13) He mi chungchângah hian Kristianna ram hian chanchin zahpuiawm tak a nei ṭeuh a ni. Bible school-a kum tam tak Pathian thu an zir hnuah pawh, sakhaw hruaitute chu Pathian Thu zirtîrtute angin an inthuam famkim em? Teuh lo mai. Ṭhenkhat phei chu Bible-ah rinna neiin school-ah an lût a; mahse, an zir chhuah meuh chuan Bible rinhlelhna an nei zâwk mah ṭhîn a ni. Tichuan, an rin tawh loh Pathian thu chu hril lovin, an rawngbâwlna chu thil dang nên an kawp ta zâwk ṭhîn a, politics lama inhnialnaah ṭan lam neiin, mihringin mihring buaina a sukiang thei tih ngaih dân an awmtîr a, a nih loh leh an thu sawiahte hian he khawvêl finna lamte hi an sawi uar ṭhîn a ni. (2 Timothea 4:3) Anni ang lovin, Krista hnungzuitu dikte chuan Isua Krista entawn tûr siam chu an zui zâwk a ni.
7, 8. Engtin nge Pathian Thu chungchâng Isua thlîr dân leh a hun laia sakhaw hruaitute thlîr dân a danglam?
7 Isua chuan a rilru chu a hun laia sakhaw hruaitute a thununtîr lo va. Mi tlêm tê—a tirhkohte—a zirtîr emaw, tam tak a zirtîr emaw pawh ni se, Isua chuan Pathian Lehkha Thute chu a hmang ṭeuh zêl a. (Matthaia 13:10-17; 15:1-11) Chu chuan a hun laia sakhaw hruaitute lak aṭangin a tihrang nalh a ni. Sakhaw hruaitute chuan mi narânte chu Pathian thurilte chhui lo tûrin an khap tlat a. Dik tak chuan, chutih hun laia zirtîrtute chuan Bible thu ṭhenkhatte chu a ril lutuk a, an zirlai zînga an duhsak ber chauh zirtîr tûr a ni tih ngaih dân an nei a. Chutianga an duhsak ber an zirtîr hunah pawh, lu khuh chungin, zâwi têin an zirtîr ṭhîn a ni. Chûng sakhaw hruaitute chuan Pathian hming lam an hreh angin, Bible châng engemaw lai mite hrilhfiah chu an hreh tlat a ni!
8 Isua chu chutiang a ni ve lo. Mi tlêm tê thlan bîkte chauh ni lovin, mipui zawng zawngin “Pathian kaa thu tin chhuak” chu an ngaihtuah a ṭûl tih a ring tlat a ni. Isua chuan Pathian Thu zirlai thlan bîk mi thiam tlêm tête hnênah hriatna pêk bîk a tum lo. A zirtîrte chu hetiang hian a hrilh a ni: “Thima ka hrilh che u hi êngah sawi ang che u; beng bula in hriat hi in chunga chuangin tlângaupui ang che u,” tiin. (Matthaia 4:4; 10:27) Isua chuan Pathian hriatna chu a theih anga tama mite hnêna hrilh a duh a ni.
9. Kristian dikte’n engtin nge Bible an hman?
9 Pathian Thu chu kan zirtîr ber a ni tûr a ni a. Entîr nân, Jehova Thuhretute Kingdom Hall-a thu kan sawi hian Bible châng thlan chhuahte chhiar ringawt chu a tâwk mai lo ṭhîn. Hrilhfiah te, tehkhin thu te, leh Pathian Lehkha Thu chu a hmun azira hman dân te kan sawi a ngai mai thei a ni. Bible thuchah chu lehkhabu aṭanga la chhuak a, kan thusawi ngaithlatute thinlunga tuh chu kan tum ber a ni. (Nehemia 8:8, 12) Mi dang fuih emaw, zilh emaw a ngaih hunah pawh Bible hi hman bawk tûr a ni. Jehova mite chuan, ṭawng chi hrang hrang hmang leh dinhmun chi hrang hrang aṭanga lo kal ni mah sela, lehkhabu zawng zawng zînga ṭha ber—Bible—chu an zah ṭheuh a ni.
10. Pathian thâwk khum Bible thu chuan keimahniah eng nghawng nge a neih theih?
10 Chutiang zahna nêna hman a nih chuan, Pathian Thu chuan thiltihtheihna a nei a ni. (Hebrai 4:12) Mite chu Pathian Lehkha Thu nêna inrem lo chîn dân, inngaihna te, uirêna te, milem biakna te, zu ruihna te, leh rûk rûkna te hawisana inthlâk thleng tûrin a chêttîr a. Mi tam takte chu an mihring hluite hlîp a, mihring thara inthuam tûrin a ṭanpui tawh bawk. (Ephesi 4:20-24) A ni, mihring ngaih dân leh thurochhiahte engpawh aia kan zah zâwk a, fîmkhur taka kan hman chuan, Bible chuan Pathian thu zirtîrtu, kim taka inthuam famkim min nihtîr thei tak zet a ni.
Jehova Thlarauvin Min Tlintîr
11. Engvângin nge Jehova thlarau thianghlim chu inhmeh taka “ṭanpuitu” tia koh a nih?
11 Pahnihnaah chuan, Jehova thlarau thianghlim, a nih loh leh a chakna chevêlin min thuam famkim dân sawi khâwm leh ila. Jehova thlarau chu chakna awm zawng zawng zînga chak ber a ni tih kan theihnghilh ngai tûr a ni lo. Jehova chuan Kristian dik zawng zawngte tâna chu chakna ropui tak chu hmang tûrin a Fapa duh tak chu thuneihna a pe a. Chuvângin, Isua chuan thlarau thianghlim chu “ṭanpuitu” tiin, inhmeh takin a sawi a ni. (Johana 16:7, NW) Chu thlarau chu Jehova hnêna dîl tûrin a hnungzuitute chu a fuih a; tin, Jehova chuan phal takin a pe dâwn tih a tiam bawk a ni.—Luka 11:10-13; Jakoba 1:17.
12, 13. (a) Engvângin nge kan rawngbâwlna min ṭanpui tûra thlarau thianghlim kan dîl chu a pawimawh? (b) Engtin nge Pharisaite chuan anmahniah thlarau thianghlimin hna a thawk lo tih an lantîr?
12 Thlarau thianghlim dîla nî tin kan ṭawngṭai a ngai a, a bîk takin kan rawngbâwlnaa min ṭanpui tûrin kan dîl a ngai a ni. Chu chakna chevêl chuan kan chungah eng nghawng nge a neih theih? Inthlâk danglam tûr te, thlarau lama ṭhang tûr te, mihring hlui chu mihring thara thlâk tûrtein kan rilru leh thinlungah hna a thawk thei a ni. (Kolossa 3:9, 10) Tin, mize hlu tak, Krista mizia ang chu nei ve tûrin min ṭanpui thei bawk. Kan zînga tam tak hian Galatia 5:22, 23 thu hi en kher ngai lovin kan sawi thei âwm e. Chûng chângah chuan Pathian thlarau rahte chu a indawta sawi den den a ni a. A hmasa ber chu hmangaihna a ni. Chu mizia chu kan rawngbâwlnaah a pawimawh êm êm a ni. Engvângin nge?
13 Hmangaihna chu min chêttîrtu bul ber a ni. Jehova leh ṭhenawmte hmangaihna chuan Kristian dikte chu chanchin ṭha hril tûrin a chêttîr ṭhîn. (Marka 12:28-31) Chu hmangaihna tel lo chuan Pathian thu zirtîrtu tling tak kan ni thei lo vang. Isua leh Pharisaite danglamna hi lo chhinchhiah teh. Matthaia 9:36 chuan Isua chungchâng heti hian a sawi a: “Chutichuan, mipuite chu ahmuhin, vêngtu nei lo berâmte anga hrehawm leh darha an awm avângin a khawngaih ta êm êm a,” tiin. Engtin nge Pharisaite chuan mipui vântlângte chu an ngaih? “Hêng Dân hre lo mipuite tehchai hi ânchhe dawng an ni asin,” an ti. (Johana 7:49) Chûng Pharisaite chuan mipuite an hmangaih lo va, an hmusit hle zâwk a ni. Jehova thlarau chuan an chungah hna a thawk lo tih a chiang hle.
14. Engtin nge rawngbâwlnaa hmangaihna lantîr chungchânga Isua entawn tûr siam chuan min chêttîr ang?
14 Isua chuan mipuite chu a khawngaih êm êm a. An na tawrhte a hriatpui a. Anni chu tihnat, leh vêngtu nei lo berâmte anga hrehawm leh darh an ni tih a hria a ni. Johana 2:25 chuan, Isua’n ‘mihring chhûnga awm apiang chu a hria’ tih min hrilh a. Thil siam chhûng zawng zawngin Jehova Mi Themthiam a nih avângin, Isua chuan mihring nihphung hriatthiamna thûk tak a nei a ni. (Thufingte 8:30, 31) Chu hriatthiamna chuan a hmangaihna chu a tizual bawk a. Chutiang hmangaihna chu kan thu hrilhnaa min chêttîrtu bul ber ni reng rawh se! He mi chungchânga hmasâwn ngai nia kan inhriat chuan, Jehova thlarau thianghlim dîlin ṭawngṭai ila, chu kan ṭawngṭaina mil chuan i thawk ang u. Jehova chuan min chhâng ngei dâwn a ni. Chanchin ṭha hril tûra mi tling ber, Krista kan an deuh deuh theih nân he chakna duhawm tak chu a rawn tîr ngei ang.
15. Eng angin nge Isaia 61:1-3 thu chu Isuaah hmehbel a nih a, eng angin nge lehkhaziaktu leh Pharisaite nihphung a laih lan?
15 Isua tlinna chu khawi aṭanga lo kal nge ni ta le? Ani chuan “Lalpa Thlarau chu ka chungah a awm,” a ti a. (Luka 4:17-21) A dik a ni, Jehova ngei chuan thlarau thianghlim hmangin Isua chu a ruat a ni. Isua chuan nemnghehna dang engmah a mamawh lo. A nih leh, a hun laia sakhaw hruaitute kha thlarau thianghlim ruat an ni ve em? Ni ve lo. Isua’n a chhiar a, amaha a inhmehbêl Isaia 61:1-3-a hrilh lâwkna thu tithleng famkim tûrin an inthuam hek lo. Khawngaihin chûng Bible chângte chu nangmah ngeiin chhiar la, lehkhaziaktu leh Pharisai vervêk takte tlin lohzia chu i hre mai ang. Anni chuan riangvaite hnêna hrilh tûr chanchin ṭha an nei lo va. Engtin nge saltângte chhuahna thu leh mitdelte mitvârna thu chu an hrilh theih tehlul ang? Thlarau lama thlîr chuan, anmahni ngei mit chu a del a, mihring siam thurochhiahte salah an tâng tlat si a! Mahse, anni ang ni lovin, keini chu mipuite zirtîr tûrin kan tling êm êm a ni.
16. Tûn laia Jehova mite chuan rawngbâwltu ni tûra an tlinnaah eng rintâwkna nge an neih?
16 Kristianna ram zirna sângah chuan kan zir chhuak lo ngei mai. Pathian thu zirna Bible school aṭanga zirtîrtu ni tûra ruatna kan nei hek lo. Chuti a nih chuan, thu hril tûrin kan tling ta lo tihna em ni ang? Ni teh suh e! A Thuhretute ni tûra min ruattu chu Jehova a ni. (Isaia 43:10-12) A thlarau kan dîla, chu dîlna mila thil kan tih bawk chuan kan tling ber a ni mai. Mahse, ṭha famkim lo kan nih avângin, Zirtîrtu Ropui, Isua Krista entawn tûr siam chu kan zâwm famkim thei lo ṭhîn a. Chutichung pawh chuan, Jehova’n a Thu zirtîrtute ni tûra min tlintîr tûrin leh min thuam tûrin a thlarau a hmang a, chuvângin a chungah kan lâwm hle a ni lâwm ni?
Jehova Inawpna Pâwlin Min Tlintîr
17-19. Engtin nge Jehova inawpna pâwl buatsaih chawlhkâr tina inkhâwm chi ngate chuan rawngbâwltu tling ni tûra min ṭanpui?
17 Tûnah chuan, Jehova’n a thu zirtîrtu ni tûra kim taka min thuamna thil a pathumna hi lo sawikhâwm leh ila—rawngbâwltu ni tûra min zirtîrtu a lei lam kohhran, a nih loh leh inawpna pâwl chungchâng chu. Chu chuan engtin nge min zirtîr? Kaihhruaina kan dawnte hi han ngaihtuah teh! Chawlhkâr khatah Kristian inkhâwmna chi nga kan nei tlângpui a. (Hebrai 10:24, 25) Jehova inawpna pâwl buatsaih zirlaibu hmanga Bible thuril zir tûrin, Kohhran Lehkhabu Zirna inkhâwm chu mi tlêm têa inṭhendarhin kan nei a. Chuta ngaihthlâkna leh chhânna pein, kan infuih tawnin, kan inzir tawn a ni. Lehkhabu Zirna enkawltu hnên aṭangin mi mal kaihhruaina leh ngaihsakna kan dawng bawk a ni. Tin, Vântlâng Inkhâwmna leh Vênnainsâng Zirna aṭangin, thlarau lam chaw hnianghnâr takin kan dawng bawk.
18 Theocratic Rawngbâwlna School kan neih hi zirtîr thiam dân min zirtîr tûra ruahman a ni a. Zirlai thusawi tûrte inbuatsaihna hmangin, thu chi hrang hrang chungchânga mi dangte zirtîr tûra Pathian Thu hman dân kan zir a ni. (1 Petera 3:15) Hre hneh hle nia kan inhriat engemaw chungchâng sawi tûra kan inpuahchah hian thu thar hriat belh kan nei fo ṭhîn a; chutiang thil chu i tawng tawh ngai em? Chu chu thil tawn tlânglâwn tak a ni. Mi dangte kan zirtîrna tluka kan hriatna tipung thei thil dang a awm lo. Thusawi tûr kan chang lo a nih pawhin, zirtîrtu thiam zâwk nih dân kan zir tho a ni. Zirlai tinte thusawiah, an thiamna kan hmu a, chûng an thiamnate chu entawn dân kan ngaihtuah theih ṭhîn avângin.
19 Rawngbâwlna Inkhâwm pawh hi Pathian Thu zirtîrtu ni tûra min thuamtu atâna ruahman a ni bawk. Chawlhkâr tinin, thusawi ngaihnawm tak tak te leh titi te kan ngaithla a; tin, kan rawngbâwlnaa hman tûr entîrtu lemchan hmuhnawm tak tak te pawh kan hmu ṭhîn bawk a ni. Eng ang thusawi dân nge kan hman ang? Kan vântlâng rawngbâwlna kawnga harsatna bîk awmte chu engtin nge kan hmachhawn theih ang? Hma kan sâwn lehzual nân, eng ang thuhrilhna pêng dang nge kan hman theih? Tlawhkîr leh Bible zirna kan kaihhruai hunah engin nge zirtîrtu hlawhtling lehzual min nihtîr thei ang? (1 Korinth 9:19-22) Chutiang zawhnate chu Rawngbâwlna Inkhâwmah chipchiar taka sawi chhuah a ni ṭhîn. Chu inkhâwma thusawi tam tak chu Kan Lalram Rawngbâwlna thuziak ṭanchhana neih a ni a; chu chu kan hna pawimawh tak thawk thei tûra min thuamtu atâna ruahman hmanraw dang pakhat a ni.
20. Engtin nge inkhâwmte leh inkhâwmpuite kan hlâwkpui famkim theih ang?
20 Inkhâwm tûra inbuatsaih leh inkhâwmna, leh chuta kan thu zirte nunpuina hmangin, nasa taka zirtîrna kan dawng a ni. Mahse, zirtîrna kan dawn chu chu mai a la ni lo. Pathian Thu zirtîrtute anga min thuam tûra buatsaih inkhâwm lian zâwk—inkhâwmpuite—pawh kan nei bawk a ni. Chuta fuihna kan dawnte a taka hman leh ngun taka ngaihthlâk chu kan va nghâkhlel tak êm!—Luka 8:18.
21. Engin nge zirtîrna kan dawn chu a sâwt a ni tih târ lang a, tu hnênah nge hmingṭhatna a kal?
21 Jehova zirtîrna pêk chu a hlawhtling em? Thil thlengte hian târ lang zâwk teh se. Kum tinin, mipui sâng za têlte chu Bible thu bulte hre tûr leh Pathianin anmahni a phûtte anga nung tûra zirtîr an ni a. Kan pung deuh deuh va; mahse, tumahin keimah avânga pung a ni an ti thei lo. Isua thlîr ang chiahin, thil chu a nihna ang takin kan thlîr tûr a ni. Ani chuan tihian a sawi: “Pa mi tîrtuin a hîp loh chuan tumah ka hnênah an lo kal thei lo vang,” tiin. Hmân lai tirhkohte angin, kan zînga mi tam zâwk chu lehkha thiam lo leh mi mâwl tak kan ni hlawm a ni. (Johana 6:44; Tirhkohte 4:13) Kan hlawhtlinna chu mi thinlung ṭhate thutak lama hîp ṭhîntu Jehova chungah a innghat zâwk a ni. Paula chuan nalh takin hetiang hian a lo sawi a: “Keiin ka phun a, Apollovan tuiin a châwm a, nimahsela Pathianin a ṭhantîr a ni,” tiin.—1 Korinth 3:6.
22. Engvângin nge Kristian rawngbâwlnaa kim taka tel chungchângah hian kan lunghnual ngai loh vang?
22 A dik a ni, a Thu zirtîrtu kan nihnaah hian Pathian Jehova chu phûr takin a tel reng a. Mahse, zirtîrtu tling lo tak nia inhriat châng pawh kan nei mai thei. Chuti a nih chuan, amah leh a Fapa lama mite hîptu chu Jehova a ni tih hre reng ang che. A Thu, a thlarau thianghlim, leh a lei lam inawpna pâwl hmanga rawngbâwltu tlinga min siamtu chu Jehova a ni. Chuvângin, Pathian Thu zirtîrtu inthuam famkim ni tûra thil ṭha min pêkte hi a taka hmangin Jehova zirtîrna chu i chhâng lêt ṭheuh vang u! (w02 2/15)
Engtin Nge I Chhân Ang?
• Engtin nge Bible-in thuhrilh rawngbâwlnaa tel tûra min thuam?
• Rawngbâwltu tling min nihtîrna kawngah thlarau thianghlimin eng chanvo nge a chelh?
• Eng kawngin nge Jehova lei lam inawpna pâwl chuan chanchin ṭha hriltu ni tûrin a tlintîr che?
• Engvângin nge rawngbâwlnaa kan tel hunah kan inrintâwk ang?
[Phêk 29-naa milem]
Pathian Thu zirtîrtu a nih angin, Isua chuan mite hmangaihna a lantîr