Bible Zirpui Dân I Entîr Em?

Bible zirpui tûra mite kan sâwm hian, ṭhenkhat chuan an ngaihven loh thu emaw, an biak ina an zir ve thu emaw an sawi a. Tûn hmaa Bible an zir dân chauh an hriat avângin, bengvârthlâk tak leh nuam tak a ni thei tih an hre pha lo a ni. Chuvângin, zirpui tûra sâwm mai ai chuan, engvângin nge Bible zirpui dân ruahmanna chu minute hnih khat vêl chhûngin i entîr lawk loh vang? Entîr nân: Ei rawngbâwl thiam tak i nih thu leh nakina temtîr i tum thu hrilh mai suh; temtîr nghâl zâwk rawh! January 2006 chhuak, Kan Lalram Rawngbâwlna phêk 6-naa awm rawtnate ṭanchhanin rei lo te chhûnga temtîr theih dân a awm a ni.

Miin kan thuchah ken a ngaihven tak zet tih i hriat hnu chuan: “Hêng thute thlen famkim hun a awm theih i ring em? [Isaia 33:24 thu chhiarsak la, a chhânna nghâk rawh.] He mi chungchânga thu ngaihvenawm tak ka’n hmuhtîr ang che aw,” tiin i sawi thei a. In neitu hnênah chuan Bible Zirtîrna lehkhabu chu pein, phêk 36-naa paragraph 22-na chu kawhhmuh ang che. A phêk hnuai lama zawhna chu chhiarin, in neitu chu paragraph i chhiar laia a chhânna lo zawng tûrin hrilh rawh. Tichuan, a zawhna chu chhiar leh la, in neitu chhânna pêk chu ngaithla ang che. Bible châng dang pakhat chhiarsak leh la. I tlawhkîr leh huna chhân tûr zawhna siamin, tlawhkîr leh tûrin ruahmanna fel tak siam ang che. Chutianga i tih chuan Bible zirpui i ṭan der tawh tihna a nih chu!