Thu Hril Tûra Mi Tharte Zirtîr Dân
1. In tin i kal hmasak ber ṭum khân engtin nge i awm?
1 In tin i kal hmasak ber ṭum chu i hre chhuak thei em? I zâm hle pawh a ni thei a. Bible zirpuitu che emaw, thuchhuahtu dang emaw i thawhpui a nih chuan, an ṭanpuina lâwm takin i dawn ang tih chu rinhlelh rual a ni lo. Tûnah chuan thiltawn i nei tawh a, thu hril tûra mi tharte ṭanpui thei tûr dinhmunah i ding tawh a ni.
2. Thuchhuahtu tharte chuan eng nge an zir ngai?
2 Thuchhuahtu tharte chuan in neitu biak ṭan dân te, kawtkaia Bible hman dân te, tlawhkîr neih dân te, leh Bible zirpui nei ṭan a, kaihhruai chhoh dân te an zir a ngai a. Kawtthlêra thu hrilhna leh mite hnathawhna hmuna thu hrilh dân ang chi, thu hrilh dân chi hrangte pawh an zir a ngai bawk a ni. In neitute sakhaw lama rilru put hmang zahsak dân leh remhre tak leh fîmkhur taka mi dangte hnêna chanchin ṭha hrilh dân chu an zir a ngai a. (Kol. 4:6) Entawn tûr siamin leh rawtnate pein hmasâwn tûrin anni chu i ṭanpui thei a ni.
3. Engtin nge entawn tûr siamin mi dangte kan ṭanpui ang?
3 Entawn Tûr Siamin Zirtîr Rawh: Isua chuan a zirtîrte hnênah thu an hrilh dân tûr a entîr a. (Lk. 8:1; 1 Pet. 2:21) Thuchhuahtu thar thawhpui tûra ruahmanna i siam chuan, kan thu leh hla chhuaha rawtna pêk emaw chu hmangin, a entawn theih tûr thusawi dân awlsam tak chu inpuahchah ang che. Tichuan, thuchhuahtuin i thusawi dân a lo hriat theih nân in hnih khatah chuan han sawi hmasa la. In danga in luh leh hmain, thuchhuahtu chu i thusawi a lo hmuh dân chu i zâwt thei a ni. Chu chuan rawngbâwlnaa mi dangte thawhpui a hlutna hmu thiam tûrin a ṭanpui ang a, a sawi ve hnua rawtna i pêk engpawh chu pawm awlsam a ti lehzual ang.
4. Thuchhuahtu thar chu a thusawi dân kan ngaihthlâk hnuah engtin nge kan ṭanpui ang?
4 Rawtna Pe Rawh: Isua pawhin thu hrilh dân tûr chungchângah a zirtîrte chu kaihhruaina a pe a. (Mt. 10:5-14) Chutiang chuan mi thar chu i ṭanpui thei a ni. A sawi ve hun a thlen hunah ṭha takin ngaihthlâksak rawh. In in chhuahsan hnu chuan a thusawiah hmasâwn a ngai a nih pawhin, a thusawi a ṭhatna laite chu tih tak zetin fak mawlh mawlh ang che. Rawtna i pêk hmain, in dangah hma a sâwn em, tih i ngaichâng rih thei a ni. A zâm deuh vâng mai pawh a ni thei a. Tin, thuchhuahtute chu an thiam dân a inang vek lo va, thil engemaw tân tih dân dik kawng khat chauh a awm ṭhîn hek lo tih chhinchhiah bawk ang che.—1 Kor. 12:4-7.
5. Rawtna pe tûra hma kan lâk hian eng nge kan sawi theih?
5 A châng chuan thuchhuahtu thar chuan rawtna an dîl mai thei che a. Mahse, a zawh loh che chuan, ṭanpui tûrin hma la rawh. Chu chu engtin nge remhre takin i tih theih ang? Thuchhuahtu thiltawn ngah ṭhenkhat chuan tlang takin, “Rawtna ka pe thei che ang em?” tiin emaw, “I thu sawi dân kha ṭha i ti em?” tiin emaw an zâwt thei a. Tih theih dân dang leh chu, “Thuchhuahtu ka nih hlim chuan . . . chu harsa ka ti hle a; mahse, . . . hian nasa takin min ṭanpui a ni,” tiin i sawi thei a ni. A châng chuan Reasoning bu emaw, Kan Lalram Rawngbâwlna chhuak tawh emawa lang rawtnate râwn tlân chu a ṭangkai thei hle. Thiam lo ta lutuka a inhriat loh nân, a thusawi dân hmêlhmang pakhat tân chauh rawtna pe ang che.
6. Rawngbâwlna chungchângah, engtin nge ‘thîrin thîr a tihhriam’?
6 Thîrin Thîr A Tihriam: Chanchin ṭha hriltu thiltawn ngah tak Timothea chu Paula’n a sâwtna a lan theih nâna thu hrilhna lam bei uar tûrin a fuih a. (1 Tim. 4:13, 15) Rawngbâwla i chhuah ṭanna chu rei tawh hle mah se, i thiamna chu tihmasâwn tum zêl ang che. Rawngbâwlnaa thiltawn la nei tlêmte pawh tiamin, thu hrilhnaa i thawhpui thuchhuahtute hnên aṭangin inzir la, mi dangte a bîk takin mi tharte chu chanchin ṭha hriltu thiam tak ni tûrin ngilnei takin ṭanpui ang che.—Thuf. 27:17.