A Remchân Hun Apiangah Hmang Rawh
1. Thutak Hriat I Duh Em? tih tract hi eng tih nân nge a ṭangkai?
1 Thutak Hriat I Duh Em? tih tract hi Bible zirpui ṭan thei tûra min puitu atâna siam a ni a. Mahse, thutak thehdarhna hmanraw ṭangkai tak angin kan hmang thei bawk. (Thur. 11:6) Hetah hian ṭha taka kan hman theih dân tûr rawtna ṭhenkhat a awm e.
2. Engtin nge tlawh hmasak ber ṭumah tract kan hman theih?
2 Tlawh Hmasak Ber Ṭumah: In neitu tuizâwng thil engemaw sawiin titina ṭan tum rawh. Thlarau lam thil sawiho a duh chuan tract chu pe la, a kâwma zawhna parukte kawhhmuhin: “Hêng zawhnate zînga a eng ber hi nge i lo ngaihtuah ngai tawh?” tiin zâwt ang che. A chhân hnuah in neitu thlan zawhna atâna chhânna pêk chu tract aṭangin ngaihtuahpui la, Bible châng târ lan pakhat chu chhiar ang che. A phêk tâwp ber chu chhiarsak emaw, kaihtawisak emaw rawh. A chhiar duh a nih chuan tract chu hnutchhiah ang che. Chu chuan thutak chu a thinlungah zung a kaihtîr thei a ni. (Mt. 13:23) Bible zahna dik tak nei nia a lan chuan, tlawhkîr hunah Bible Zirtîrna lehkhabu chu pe chhuak ang che.
3. Ngaithla duh in neitu a buai chuan eng nge kan tih theih?
3 Ngaithla Duh In Neitu A Buai Chuan: Hetiang hian i sawi thei ang: “I buai lai tak niin a lang. He Bible tract hi hnutchhiah che i duh em? Hetah hian mi tam takin kan zawh fo ṭhin zawhna paruk a chuang a, chûng atâna Bible ṭanchhan chhânna fiah tak pêk a ni. Hêng zawhnate zînga pakhat khat hi sawiho i duh chuan, hmuh leh che chu ka châk hle a nia,” tiin.
4. School kalpui emaw, hna thawhpui emaw hnêna tract kan sem chhuah hunah eng nge kan sawi theih?
4 School-ah Emaw, Hna Thawhna Hmunah Emaw: Chhûn chawlh chhûnga ṭhian i titipui laiin, heti hian i sawi thei ang: “Hêng zawhnate zînga a engemaw ber hi i inzâwt tawh ngai em? [A chhânna nghâk rawh. A ngaithla duh a nih chuan sawi chhunzawm rawh.] Hei hian Pathian Thu aṭanga kan hmuh chhânna chiang tak leh lungawithlâk tak a tar lang a ni,” tiin. Miin hun a nei a nih chuan, tract chhûnga chhânna pakhat i sawipui thei ang a, Bible Zirtîrna lehkhabu i sem nghâl thei bawk ang.
5. Thutak Hriat I Duh Em? tih tract hi engin nge thu hrilhna hmanraw ṭangkai tak nihtîr?
5 Thutak Hriat I Duh Em? tih tract chuan thutak hi hriatthiam awlsam tak leh tlang takin a târ lang a. Eng sakhua leh hnam tân pawh thu duhawm tak a pai a ni. Pêk chhuah a awlsam a; naupangte leh thuchhuahtu tharte pawhin an pe chhuak thei ang. He tract hi a remchân hun apiangah i hmang ṭhîn em?
6. Tract kan pêk chhuah hmain, engvângin nge in neitu rilru put hmang chu kan hriatthiam phawt ang?
6 Tract thupui hian dodâltute chu kan thiltih chhan chungchângah ngaih dân dik lo tak a neihtîr theih avângin hriatthiam theihna kan hmang tûr a ni. Kan thu leh hla chhuahte dawng sawng tûrin tumah kan tilui lo va. Chuvângin mite rilru put hmang chu hriatthiam tum phawt la, thutak hriat châkna nei tak takte hnênah chauh tract hi pe chhuak ang che.