Thu Hriattîrna Thiltithei Tak Neih A Ni Ang
1. Hriatrengna zâna lo telte chu an thusawi ngaihthlâk bâkah, eng dangin nge an rilru khawih thei? Hrilhfiah rawh.
1 Eng hunah nge? Hriatrengna neih zânah. Min hmanpui tûra mite sâwmnaah tha leh zung tam tak sên a ni. An thu ngaihthlâk chu rawn inkhâwmte rilru khawihtu awmchhun a ni lo thei a. Hriatrengna inkhâwma a tel hnuah, nu pakhat chuan a thil hmuh—inkhâwma tel mi tinte nêlawmna leh tlâwmngaia inpete sak leh enkawl Kingdom Hall mawi tak leh fai tak—chungchâng chu a sawi a. Chuvângin, a thusawitu chauh ni lovin, kan vaiin he kum khat chhûnga hun pawimawh bera thu hriattîrnaah kan tel ṭheuh a ni.—Eph. 4:16.
2. Engtin nge rawn inkhâwmte hnênah thu hriattîrna kan neih ṭheuh theih?
2 Rawn Inkhâwmte Chu Ṭha Takin Lo Lâwm Rawh: Nêlawm taka nui a, phûr taka lo chibaina chuan rawn inkhâwmte chungah thu hriattîrna ṭha tak a nei ang. (Joh. 13:35) Rawn inkhâwm zawng zawngte i be kim vek thei lo a nih pawhin, i kiang hnaia awmte hnênah nêlawm takin i inhmêlhriattîr thei a ni. (Heb. 13:1, 2) Hmêlhriat nei lo anga lang rawn inkhâwmte chu hmuh tum rawh. Campaign neih laia sâwmna lo dawngte pawh an ni thei si a. Anni chu heti hian i zâwt thei ang, “I vawi khat rawn telna em ni?” tiin. Ṭhutpuiah sâwm la, zawhna an neih apiang chhânsak i duhzia hriattîr rawh. Kohhran pakhat aia tamin chu mi hmuna Hriatrengna an hman dâwn avânga in ṭîn nghâl a ngai a nih chuan, heti hian i sawi thei ang: “Inkhâwm chungchânga i ngaih dân hriat ka duh a. Engtin nge ka biak pawh theih ang che?” tiin.
3. Engtin nge rawngbâwlnaa tel tawh lote chu kan lo lawm ang?
3 Rawngbâwlnaa Tel Tawh Lote Chu Lo Lâwm Rawh: Rinhlelh rual lovin, Hriatrengna inkhâwma kum tina tel duhtâwk maite pawh tiamin, rawngbâwlnaa tel tawh lo thuchhuahtute pawh an lo tel ve ngei ang. Anni chu lo lâwm la, an lo tel avânga i lâwm tak zetzia hriattîr ang che. (Rom 15:7) Upate chuan kohhran bêl zêl tûra fuih tûrin in lamah an va tlawh vat thei a. Inkhâwma lo tel tam takte chuan an thu ngaihthlâk vâng mai ni lo va, ‘kan thil tihṭhat an hmuhte’ avâng pawha Pathian an chawimawi chu kan duh tak zet a ni.—1 Pet. 2:12.