Kawtthlêra Thu Hrilhna Sâwt Tak Chu
1. Isua kan entawn theih dân kawng khat chu eng nge ni?
1 Isua chuan leia rawng a bâwl lai khân, kawtthlêr leh vântlâng hmuna a mi tawhte hnêna Pathian thu hrilh chu a tîm lo va. (Lk. 9:57-61; Joh. 4:7) Thuchah pawimawh tak a neih chu mi a tam thei ang berte hnêna hrilh a duh a ni. Tûn laiah, kâwtthlêra thu hrilhna neih chu mite’n Pathian lama finna an neih theih nâna ṭanpuitu ṭha tak a ni a. (Thuf. 1:20) Mite kan biak hmasak a; remhriatna kan hman chuan kan hlawhtling lehzual ang.
2. Kawtthlêra thu kan hrilhin engtin nge mite kan biak hmasak theih?
2 Be Hmasa Rawh: A tlângpui thuin kawnga kal vêlte’n an rawn biak che nghâka hmun khata din emaw, ṭhut emaw ai chuan, mite biak hmasak chu a ṭha zâwk a. Nelawm takin nui la, anmahni en chungin bia ang che. Thuchhuahtu dangte nêna thawk tlâng in nih chuan, mite a hranga pan chu a ṭha tlângpui a ni. Tuina nei i hmuhte bawhzui tûra hma lâk pawh a pawimawh bawk. A rem chuan, in inbiak zawhah i biak pawh leh theih dân tûr chu hawihhâwm takin zâwt ang che. Thuchhuahtu ṭhenkhat chuan an mi tawn ngaite an tawn leh a, an inbiakna an chhunzawm leh theih nân, a hmun ngaiah kâwtthlêra thu hrilhna an nei ṭhîn a ni.
3. Engtin nge kawtthlêra thu hrilhna kan neih hunah remhriatna kan hman ang?
3 Remhriatna Hmang Rawh: Kawtthlêra i dinna lai tûr leh i mi biak tûrte thlan chungchângah ngaihruat thiamna hmang rawh. Kawng kal apiangte hnêna thu hrilh vek chu a ṭûl hran lo. Thil awm dân hi chîk hle ang che. Entîr nân, mi chu a hmanhmawh hle a nih chuan, biak loh mai a ṭha zâwk thei a ni. Buaina siam thei tûr âwm mite hre tûrin harhvâng hle ang che. Dâwr kawt vêlah thu i hril a nih chuan, manager tâna ninawm ni lo tûrin fîmkhur hle bawk ang che. Mite dâwra an luh lam aiin an lo chhuah lama thu lo hrilh chu a ṭha zâwk fo va. Mite tithlabâr lo leh timangang lo tûr zâwngin pan ṭhîn ang che. Chu bâkah, thu leh hla pêk hun tûr pawh chhût thiam bawk la. Tuina an lantîr ṭhat vak loh chuan magazine aiin tract chu i pe zâwk thei a ni.
4. Engvângin nge kawtthlêra thu hrilh chu thu hrilhna ṭangkai leh hlimawm tak a nih?
4 Kawtthlêra thu hrilhna chu hun rei lo te chhûnga thutak chi tam tak theh darh theihna hun ṭha tak a ni a. (Thur. 11:6) Chuta kan mi tawh ṭhenkhat phei chu in tin kal huna ina awm lote pawh an ni mai thei a ni. Engvângin nge he thlawhhma rawngbâwlna hlimawm leh ṭangkai tak, kawtthlêra thu hrilhnaah hian tel ve tûrin ruahmanna i siam loh vang?