Vântlâng Hmuna Thu Hrilh Dân Thar Phûrawm Tak
1. Mipui veivah tamna hmun nei kohhrante chu eng ti tûra fuih nge an nih?
1 Mipui veivah tamna hmun nei kohhrante chu lehkhabu pho chhuahna dawhkân emaw, nawrlîr emaw hmanga vântlâng hmuna thu hrilhna huaihawt tûra fuih an ni a. Nawrlîr hman a nih chuan, thuchhuahtu pakhat tal chu nawrlîr kiangah chuan a ding emaw, a ṭhu emaw tûr a ni. Mahse, dawhkân hman a nih chuan thuchhuahtu pahnihin an vil tûr a ni. Chûng lehkhabu pho chhuahna hmuna awmte chuan hawihhâwm tak, nêlawm tak, leh pan châkawm tak nih an tum ang. Tuemawin thu leh hla pho chhuahte a melh chuan thuchhuahtu pakhat chuan a lo be ṭan thei a ni, “He mi chungchângah Pathianin eng nge a sawi tih i ngaihtuah ngai em?” tiin. Thuchhuahtu dang pakhat emaw, pahnih emaw chuan lehkhabu pho chhuah hmuh phâkna hmunah tawn chawpa thu hrilhna an nei thei ang.
2. Thu leh hla pho chhuaka vântlâng hmuna thu hrilh a hlawhtlinzia târ langtu thiltawn pakhat sawi rawh.
2 He tih dân hian Bible zirpui thar tam tak a hring chhuak a. College zirlai hmeichhe pakhat chuan Jehova Thuhretute chanchin ziah a duh a, mahse, an Kingdom Hall chu a hmu zo lo va. Chawlhkâr lehah chuan college hung chhûnga dawhkâna thu leh hla inpho chhuak chu a hmu ta a. Tichuan, Bible a zir ṭan a, tûnah chuan ani chu baptisma chang tawh thuchhuahtu niin hetiang thu hrilhnaah hian a tel ve tawh a ni.
3. Mi ṭhenkhatin hetianga vântlâng hmuna thu hrilhna hi engtin nge an ngaih?
3 Vântlâng hmuna thu hrilh nuam ti tak unaunu pakhat chuan: “Mi ṭhenkhat chu magazine chhuak tharte la tûrin lehkhabu pho chhuahna kiangah an rawn ding a. Mi dangte chuan Jehova Thuhretute chu an la hre ngai miah lo. He tih dân aṭangin mi tam takte hnênah thu kan hrilh thei tih ka hria a ni,” tiin a sawi a. Unaunu dang leh chuan, “Hei hi thu hrilh dân thar phûrawm tak a ni, a chhan chu mite chuan an ngaihven êm êm loh pawhin, hriat châkna neiin an rawn pan si a,” tiin.
4. Engvângin nge chawlhkâr tinin a hun pângngai leh a hmun pângngaia thu leh hlate pho chhuah chu a ṭangkai?
4 Thu leh hla pho chhuahna chu chawlhkâr tinin a hmun pângngai, a ni pângngai, leh a hun pângngaia pho chhuah a nih chuan a ṭangkai hle thei a. Chutianga an tih avângin mite chuan thu leh hla pho chhuahte chu hmu ṭhangin, a tâwpah hrehna nei lovin an rawn pan a, zawhnate an zâwt a, a nih loh leh thu leh hla chhuahte chu an la a ni. In kohhran hian vântlâng hmuna thu hrilhna a huaihawt em? A huaihawt a nih chuan, ‘Pathian Ram thu hrilhna’ he thiltih hlimawm leh hlawhtling takah i tel thei a ni.—Lk. 9:60.