Tlai Lama Thu Hrilhnaah I Tel Thei Ang Em?
1. Mi thiam pakhat sawi angin, eng hunah nge tirhkoh Paula’n in tina thu a hrilh?
1 Bible hun lai nun chanchin ziakna Daily Life in Bible Times lehkhabuin a sawi dân chuan tirhkoh Paula chu tlai dâr 4 aṭanga zan rei thlengin in tin a kal ṭhîn. Hei hi Paula rawngbâwl dân dik tak a nih leh nih loh hre lo mah ila, ani chuan “chanchin ṭha avângin engkim” tih a inhuam tih erawh kan hria a ni. (1 Korinth 9:19-23) Chutianga ti tûr chuan, mi tam takte a biak theih huna in tin kal tûrin a mi mal thilte a insiam rem a ngai ngei ang.
2. Engvângin nge tlai lam chu thu hrilh nâna hun ṭha tak a nih?
2 Hmun tam taka thuchhuahtute chuan chhawlhkâr chhûnga in tin kalna chu zîng lamah an nei ṭhîn a. Mahse, chu chu in bial chhûng atân thu hrilhna hun ṭha ber a la ni zêl em? Pioneer pakhat chuan a thu hrilhna bial chungchâng chu heti hian a sawi a ni: “Chhûnah chuan ina hmuh tûr an vâng hle a. Mahse, tlai lamah chuan an awm deuh vek ṭhîn,” tiin. Tlai lam emaw, chawhnu lam emawa thu hrilh chu a bîk takin, mipate hnêna chanchin ṭha hrilh theihna hun ṭha tak a ni thei a ni—in neitute buai lutuk loh hun a nih avânga inbiak an inpeih hun a ni si a. Tlai lama thu hrilhna neih a sâwt dâwn a nih chuan, upate’n ruahmanna an siam tûr a ni.
3. Engtin nge tlai lama thu hrilh hunah remhriatna kan lantîr theih?
3 Remhriatna Hmang Rawh: Tlai lam thu hrilhnaa i tel hunah remhriatna neih a pawimawh hle. Entîr nân, mi ṭhenkhatin tlai chaw ei lai ang chi remchân lohna an neih chuan, a hnua kal leh tûra hrilh mai chu a ṭha ber a ni. Khua a thim tawh chuan in neituin a hmuh theihna tûr hmunah ding la, i hming leh i va lên chhan chu hriattîr nghâl ang che. Thawhpui neih emaw, unau thawk ve dangte kianga thawh emaw chu a finthlâk a, hmun fianrial ni lo, kawng ên ṭhatna laia kal pawh chu a finthlâk bawk a ni. In neitu mut hun tûr âwm vêla tlawh chu pumpelh rawh. (2 Kor. 6:3) Vêng ṭhenkhat chu thim hnuah a him lo a nih chuan, khaw thim hmain chûng hmunahte chuan thu hril ang che.—Thuf. 22:3.
4. Tlai lama thu hrilhna aṭangin eng malsâwmna nge kan dawn ang?
4 Malsâwmnate: In tin kalnaa mite kan biak theih hian nuam kan ti lehzual ṭhîn a ni. Chu bâkah, thu kan hrilh tam theih poh leh mite ‘chhandama awm tûr leh thutak hre’ tûra ṭanpui theihna hun remchâng tam zâwk kan nei thei ang. (1 Tim. 2:3, 4) Tlai lama thu hril tûrin i hun duan i siam rem thei ang em?