Ṭhang Tûr Chuan Tuia Châwm A Ngai
1. Ṭhang chho tûra tuia kan châwm tûr chu eng nge ni?
1 Huana thlai chi tuhte chu a ṭhan theih nân tuia châwm a ngai ṭhîn a. Kan bial chhûnga mite thinlunga thutak chi tuhnaah pawh chutiang bawk chu a ni. (1 Kor. 3:6) Anni chu zung kai a, ṭhang chho va, duah hluah hluah tûra kan duh chuan kan tlawhkîrin, chûng entîr nei thlai chîte chu Pathian Thu-in kan châwm tûr a ni.
2. Tlawhkîr thei tûrin engtin nge hma kan lâk theih?
2 Zawhna Zâwt Rawh: Thusawi dân tûr i inbuatsaih hunah, i tlawhkîr huna i chhân tûr tuina chawk tho thei zawhna pakhat engvângin nge i inbuatsaih tel loh vang? Chu chu in tîtîna tâwp dâwnah zâwtin, tlawhkîr leh tûrin ruahmanna nghet siam ang che. Mi tam tak chuan Bible zir dân entîr nâna hman theih tûr, Bible Zirtîrna lehkhabu aṭanga chhân theih tûr zawhna siam chu ṭangkai an ti hle a ni.
3. Tuina neite chanchin i chhinchhiahnaah eng thute nge i telh theih?
3 Chhinchhiah Rawh: In inbiakna i tihtâwp veleh, hun lain chhinchhiahna ziak ang che. A hming leh a address chu ziak la. In inbiak nî leh hunte, in thusawi te, thu leh hla chhuah i pêk te, leh thil dang dangte chhinchhiah tel chu a ṭha bawk. Eng sakhua nge a vawn? Nupui fanau nei a ni em? A tui zâwng leh a ngaihven zâwngte a sawi lang em? Chûng thute chuan tlawhkîr hunah a tui zâwng thute sawi thei tûrin a ṭanpui ang che. Tin, tlawhkîr a rem tih hun leh chu mi huna i chhân tûr zawhna pawh ziak tel bawk ang che.
4. Tuina neite bawhzui chungchângah engvângin nge kan beih ṭâng ṭâng ang?
4 Bei Ṭâng Ṭâng Rawh: Setana chuan mi thinlunga kan tuh thu chu “lâksak” tûrin a bei reng dâwn a. (Mk. 4:14, 15) Chuvângin, tuina nei chu a ina tawn fuh leh a harsat pawhin beidawng mai suh. Lehkha i thawn emaw, kawngka-ah thuziak i hnutchhiah emaw thei ang em? Pioneer pakhat chuan nu pakhat chu Bible zirna a neihpui ṭan a, mahse, a ina a hmuh leh theih tâk loh avângin lehkha a thawn ta zâwk a ni. Unaunu chuan a tâwpa a va hmuh chuan, chu nu chuan a chunga lantîr mi mal ngaihsaknain a rilru a hnehzia a lo hrilh a ni. Thutak chi tuia kan châwm hian, a lo ṭiah a, ṭhan len chhoh va, “a leh sawmthum te, a leh sawmruk te, a leh za tea” a rah han hmuhna aṭangin hlimna nasa tak kan hmu thei a ni.—Mk. 4:20.