Zawhna Bâwm
◼ Tuemaw hnêna thu leh hla chhuah kan hnutchhiah dâwn leh dâwn loh chu engah nge a innghah?
Ngaihtuah tûr pawimawh ber chu tuina a neih dân hi a ni. Tuina dik tak a lantîr chuan magazine pahnih emaw, brochure pakhat emaw, lehkhabu pakhat emaw, a nih loh leh thu leh hla chhuah dang kan sem mêkte emaw chu kan hnutchhiah thei ang. Khawvêl pum huap rawngbâwlna atân thawhlâwm thawh tûr a nei emaw, nei lo emaw pawh ni se, kan hnutchhiah tho tûr a ni. (Job. 34:19; Thup. 22:17) Kawng leh lamah chuan, a ngaihlu lote hnênah chuan kan thu leh hla chhuah hlu takte hi kan pe chhuak tûr a ni lo.—Mt. 7:6.
In neitu chuan engtin nge tuina a lantîr tlângpui ṭhin? Min tîtîpui duhna chu a tuizia hriltu a ni thei. Thu kan sawi lai a ngaihthlâk a, kan zawhnate a chhân bawk a; tin, a ngaih dânte a sawi chhuah chuan a rilru a pe tihna a ni. Bible kan chhiar lai a lo ngaihsak chuan Pathian Thu zahna a nei tihna a ni bawk. Thu leh hla pêk chhuahte a chhiar duh leh duh loh zawh chu thil ṭangkai tak a ni fo bawk. Thuchhuahtute chuan tuina a neih leh neih loh hre tûrin remhriatna an hmang tûr a ni. Entîr nân, kawtthlêra thu hrilhna kan neih hunah min kalpêltu apiangte hnêna magazine emaw, brochure emaw, lehkhabu emawte pêk tum chu thil tihâwm a ni lo vang. Miin a ngaihven leh ven loh kan hriat theih loh chuan handbill emaw, tract emaw pêk chu a ṭha zâwk ang.
Chutiang bawkin, thuchhuahtuin kohhrana thu leh hla chhuah a lâk chhuah zât chu, thawhlâwm a thawh theih zât a zir ni lovin, rawngbâwl nâna a mamawh dân a zir a ni tûr a ni a. Thawhlâwmte chu thu leh hla chhuah man atân ni lovin, khawvêl pum huap thu hrilh rawngbâwlna pêng zawng zawng chhawmdâwl nân a ni. Sum leh pai lama kan dinhmun chu eng ang pawh ni se, Jehova leh a inawpna pâwl ngaihhlutna chuan kan neih chuang bâng ni lovin, kan neih chhun pawh Lalram hmakhua atâna phal taka pe tûrin min chêttîr ang. (Mk. 12:41-44; 2 Kor. 9:7) Tin, theocratic ro sumte khawhral loh nâna kan mamawh thu leh hla chhuahte chauh la tûrin min chêttîr bawk ang.
[Phêk 2-naa thu lâk chhuah]
Miin tuina a neih leh neih loh hriat nân thuchhuahtute chuan hriatthiamna an hmang tûr a ni