Rawngbâwlnaah I Hun A Ṭha Thei Ang Berin Hmang Rawh
Kum 2014 rawngbâwl kum chhûng hian, Jehova Thuhretute chuan rawngbâwlna atân dârkâr 1,945,487,604 an hmang a, hei hian Jehova rawngbâwlnaah kan buai hle tih a târ lang chiang hle! (Sâm 110:3; 1 Kor. 15:58) ‘Hun hi tihtawia a awm’ avângin, mi a tam thei ang berte biak pawh nân rawngbâwlnaah kan hun neih hlu takte chu kan hmang thei ang em?—1 Kor. 7:29-31.
Rawngbâwlnaa kan hun a ṭha thei ang bera hmang tûr chuan insiamrem theih a ngai a. Entîr nân, rawngbâwlna engemaw berah hian dârkâr khat emaw, a aia tam emaw tumah be lo va, i tel ṭhîn a nih chuan, mi tam zâwkte hmu a, be tûrin i insiamrem thei ang em? A hmun azirin dinhmun pawh a danglam zêl a. Mahse, ‘boruak mai hnek’ lova ṭha lehzuala hun i hman theihna tûrin a hnuaia rawtnate hian a ṭanpui thei ang che.—1 Kor. 9:26.
In Tina Thu Hrilhna: Kum sâwmbi tam tak chhûng chu thuchhuahtute chuan in tina thu hrilhna hmangin rawngbâwlna an ṭan ṭhîn a. Mahse, mite chu chhûn lama ina hmuh an harsa a nih chuan, engvângin nge ina an awm tam hun leh an chawlh hahdam hun tlai lamah emaw, thimhlimah emaw in tina thu hrilh chu i tum loh vang? Mite hnathawh lai chuan, kawtthlêr emaw, sumdâwnna hmun emawa thu hrilhna chuan rah ṭha zâwk a chhuah thei ang.
Vântlâng Hmuna Thu Hrilhna: Thu leh hla pho chhuahna dawhkân emaw, nawrlîr emawte chu kohhran thu hrilhna bial chhûnga mi veivah tamna hmunah hûn tûr a ni. (June 2014 Kan Lalram Rawngbâwlna, p. 3-na en rawh.) Vântlâng hmuna thu hrilhna tûr hmunah kêa kal mi an tlêm telh telh a nih chuan, an kal tamna hmuna thu leh hla pho chhuahna dawhkân leh nawrlîrte hûng sawn tûrin Kohhrana Service Committee chuan thu tlûkna a siam thei a ni.
Tlawhkîr leh Bible Zîrpuite: Rawngbâwlna pêng dangte’n rah ṭha a chhuah loh laia tlawhkîr leh Bible zirpuina nei tûrin ruahmanna i siam thei ang em? Entîr nân, Inrinni zînga in tin kal rawngbâwlna chuan rah ṭha a chhuah chuan chaw hnu lam emaw, tlai lam emawah Bible zirpui i nei thei ang em?
Rawngbâwlnaa kan tel apiangin dârkâr chhiar thei mah ila, rah ṭha kan chhuah hian kan hlim lehzual a ni. Engtik hun emawa rawngbâwlna pêng pakhata i telna chuan rah ṭha a chhuah lo nia i hriat chuan, rawngbâwlna pêng dangah tel chhin rawh. Rawngbâwlnaa i hun a ṭha thei ang bera i hman theih nân, a kaihhruaina dîlin “Buh Neitupa” Jehova hnênah ṭawngṭai ang che!—Mt. 9:38.