Rah Ṭha Tak Chhuah Campaign

Inkhâwmpui inṭan hma kâr thum vêlah kohhrante chuan an bial chhhûnga tuina neite chu tel ve tûrin an sâwm leh dâwn a. Kum tina hetiang campaign kan neih ṭhin hian chhan ṭha tak a nei a ni. Bible ṭanchhan thusawite, mahni duhthua inpete’n fel taka thil an enkawl te, nungchang mawi leh inpumkhatna kan lantîr te chuan inkhâwmpui chhim tûra sâwmna pawm a, lo telte rilru chu a khawih ṭhîn hle a ni. (Sâm 110:3; 133:1; Is. 65:13, 14) Inkhâwmpui chhim tûra tuina lantîrtute hla taka an zin a ngaihna hmunah pawh kan campaign chuan rah ṭha a chhuah tho ang em?

Kum 2011 district inkhâwmpui hnu khân branch office chuan hmeichhe pakhat a kawngka bula sâwmna chhartu hnên aṭangin lehkhathawn a dawng a. Jehova Thuhretute’n kawngka an kik apiangin a lo biru ṭhîn a. Ani chuan heti hian a ziak a ni: “In mawi tak leh pasal ṭha tak ka nei a, min tihlimtu tûr engkim neiin ka inngai a. Mahse, ka hlim chuang lo, ka nun chuan thiltum rêng a nei lo a ni. Chuvâng chuan Inrinni program-a tel tûrin mêl 200 laia hlaa inkhawm chu ka tum ta a,” tiin. Inkhâwmpuia a han tel chuan nuam a ti ta lutuk a, a pasal chu phone-in Chawlhnia inkhâwm leh tûra a châm tûr thu a hrilh hial a ni. “Thusawite chu ka ngaithla vek a, Jehova Thuhretu tam tak ka hmu bawk a, tâwp mai tûr chuan ka phal lo a ni,” a ti. A haw hnu chuan Bible a zir ta a, thla li hnuah baptisma chang lo thuchhuahtu a ni ta a ni. “Ka nunin awmze dik tak a neih phah avângin kan kawngkaa inkhâwmpui sâwmna ka chhar kha ka va lâwm tak êm!” tiin a sawi zawm a ni.

Sâwmna dawngtute zînga ṭhenkhat chu an rawn inkhâwm ngei ang. Chuvângin, he campaign pawimawh takah hian ṭhahnemngai takin tel la. Sâwmna sem bâng i neihte chu inkhâwmpui neihna tûrah keng vek la, tawn chawpa thu hrilh nân hmang rawh.

[Phêk 2-naa bâwm]

Engtin Nge Sâwmna Chu Kan Sem Ang?

Kan thu hrilhna bial hrût chhuak vek tûr chuan, tawi fel taka kan sawi a ngai a. Hetiang deuh hian kan sawi thei ang: “Chibai. Khawvêl puma he sâwmna sem chhuahnaah hian kan tel a. Hei hi i ta tûr a nia. Sâwmnaah hian kimchang zawkin i hmu thei ang.” tiin. Phûr takin sawi la. Chawlhkâr tâwpa sâwmna sem chhuah hunah, a remchân chuan magazine-te pawh sem chhuah tûr a ni.