Mi Mal Taka Sâwmna

1. Inkhâwmpui atân sâwmna campaign chu eng hunah nge kan neih ṭan ang?

¹ Chhûngkua emaw, ṭhiante emaw tân nasa taka thawhrim ngai leh sênso tam ruai ropui tak i buatsaih hian, anni i sâwm hunah pawh i phûr hle ngei ang. Chutiang bawkin, inkhâwmpui lo awm tûra thlarau lam ruai buatsaihnaah tha tam tak sên a ni a. Kan inkhâwmpui neih ṭan hma chawlhkâr thumah, Jehova chuan mi dangte inkhâwma lo tel tûra sâwmna chanvo hlu min pe a ni. Sâwmna chu phûr taka sem chhuak tûrin engin nge min ṭanpui ang?

2. Campaign-a ṭhahnemngai taka tel tûrin engin nge min chêttîr ang?

² Kan inkhâwmpuia Jehova min pêk mi tihahdam thei zirtîrnate kan hlâwkpui dân ngaihtuahna chuan, campaign-a ṭhahnemngai taka tel tûrin min chêttîr ang. (Is. 65:13, 14) Kum tina kan neih inkhâwmpui sâwmna campaign hian rah ṭha a chhuah a ni tih kan hre reng tûr a ni bawk. (“Rah Ṭha A Chhuah” tih bâwm chu en rawh.) Inkhâwmpuiah chuan kan mi sâwm ṭhenkhat an rawn tel ang a, mi dangte erawh an rawn tel lo vang. Mi eng zât pawh lo tel se, campaign-naa theih tâwp chhuaha kan telna chuan Jehova a chawimawiin, a thilphalna a târ lang a ni.—Sâm 145:3, 7; Thup. 22:17.

3. Sâwmna chu eng anga pêk chhuah tûr nge ni ang?

³ Upate chuan sâwmna chu mi awm lohna ina an hnutchhiahtîr dâwn leh dâwn loh te, an bial chhûnga vântlâng hmuna thu hrilhnaa an semtîr dâwn leh dâwn loh te pawh tiamin, a tam thei ang bera sâwmna pêk chhuah theih dân tûr chu an ngaihtuah ang. Chawlhkâr tâwpah chuan, a remchân hunah sâwmna rualin magazine-te chu sem chhuah tûr a ni. Campaign zawhah chuan, phûr takin kan tel tih leh mi tam takin Jehova min pêk thlarau lam ruai ropui tak min kîlpui tih hriatna aṭangin kan va hlim dâwn êm!

Rah Ṭha A Chhuah

Kum tam tak kalta khân unaunu pakhat chu sâwmna campaign-ah a tel a, theih thawp chhuah a phû em tih ngaihtuahin, ‘Mite chuan sâwmna pawmin inkhâwmpuiah an rawn tel tak tak ang em le?’ a ti rilru a. Inkhâwmpuina Irinni zîngah chuan, Sikh pa pakhat chu a bul hnaiah a ṭhu tih a hria a; tichuan, a va inhmêlhriattîr ta a ni. Ani chu sâwmna a dawn vânga rawn inkhâwm a ni a. Zawhna tam tak a neihte chu unaunu chuan a chhânsak a. Chu pa chuan inkhâwm nuam a tihzia leh inkhâwm rawn chhimtute lan dân leh chêtzia chuan a rilru a hneh hle tih a sawi a ni. Chu mi nîah tho chuan, unaunu chuan a bul hnaia ṭhu nupa tuak khat chu a bia a. Anni pawhin sâwmna an dawng a, inkhâwmpuiah bus-in an rawn kal a ni. Inkhâwmpui chu nuam an ti a, Chawlhnî-ah pawh inkhâwm leh an tum ta a. Chutah, unaunu chuan kum tina neih inkhâwmpui sâwmna campaign a pawimawhzia chu a hre thiam ta a ni.
Tûn hnai inkhâwmpuiah, regular pioneer thawk nupa kawp khat chuan an aia upa zâwk nupa dang chu inhmêlhriattîrin an bia a. Anni chuan inkhâwmpuia vawi khat an telna a nih thu an sawi a. Pioneer-te chuan, “Tu nge sâwm che u a?” tiin an zâwt a. Anni chuan, “Ni khat chu inah kan hawin, kan kawngkhâr hnuaia sâwmna awm chu kan hmu a ni,” tiin an chhâng a. Anni chuan sâwmna chu chhiarin, a hnunga coupon pawh chu an ziak khat ta hial a ni. Inkhâwmpui chhimtu mi dangte chuan nupate chu an chhûn chaw kente an eipui a. Inkhâwm chu nuam an tih êm avângin a tûka inkhâwm leh tûrin ruahmanna an siam ta a. Anmahni tlawh a, bawhzui tûrin ruahmanna siam a ni ta a ni.