Jehova Fak Theihna Hun Remchâng Tam Lehzual
1. Eng ruahmanna tharin nge ‘nasa taka Jehova fak’ tûrin min ṭanpui ang?
1 March thla kal ta aṭang khân, thuchhuahtute tân kum tina March leh April thla bâkah bialkantu tlawh thlaa dârkâr 30 hmua auxiliary pioneer thawk thei tûra ruahmanna thar chu hman ṭan a ni a. Bialkan chawlhkâr chuan thla thar a kai pha a nih chuan dârkâr 30 hmua thawh tum thuchhuahtute chuan an thawh duh zâwkna thla chu an thlang thei a ni. Auxiliary pioneer thawk zawng zawng chuan regular leh special pioneer thawkte rualin inkhâwmnaah a tâwp thlengin an tel thei ang. Chumi awmzia chu dârkâr 50 kan tlin thei lo a nih pawhin, dârkâr 30 thawkin kum khatah vawi li lai auxiliary pioneer thawkin ‘nasa takin Jehova kan fak’ thei tihna a nih chu!—Sâm 109:30; 119:171.
2. Bialkan chhûngin auxiliary pioneer thawkte chuan eng hun remchâng nge an neih ang?
2 Bialkan Chhûngin: Bialkan chhûngin mi tam lehzualte chuan auxiliary pioneer an thawk theiin, rawngbâwlnaah bialkantu thawhpuina aṭanga lo awm intihchak tawnna an nei thei tawh dâwn a ni. (Rom 1:11, 12) Auxiliary pioneer thawk tam tak chuan chawlhkâr chhûnga ni khat chu bialkantu an thawhpui theihna tûrin chawlh an la duh mai thei a. Chawlhkâr chhûnga hna thawk auxiliary pioneer-te chuan bialkantu hnênah Inrinni emaw, Chawlhni emawa anmahni a thawhpui theih dâwn leh dâwn loh chu an zâwt thei a ni. Chu bâkah, auxiliary pioneer thawkte tân regular leh special pioneer thawkte ruala inkhâwma tel chu a va phûrawm dâwn êm!
3. Engvângin nge Hriatrengna hun lai chu auxiliary pioneer thawh nâna hun ṭha tak a nih?
3 March leh April Thla Chhûngin: Hriatrengna hun laia dârkâr 30 hmua auxiliary pioneer thawk tûra ruahmanna hlui hmang ṭangkaia thla khat atâna thawk ṭhînte chuan “faka inthawina” an neih chu a lêt hnihin an tipung thei tawh dâwn si a! (Heb. 13:15) March leh April thlate chu auxiliary pioneer anga kan rawngbâwlna zauh nân hun ṭha tak a ni a. Kum tinin hêng thla chhûngte hian mi dangte chu Hriatrengna inkhâwma tel ve tûra sâwmna campaign nuam takah kan tel ṭhîn a ni. Chu bâkah, Hriatrengna hun lai hian mi tam takin rawngbâwlna an zauh avângin, thuchhuahtu hrang hrangte chu kan thawhpui thei a. Hriatrengna zawhah chuan, chu inkhâwma lo tel a, special vântlâng thusawi atâna phûrna hmanga ngaihsakna lantîrtute chu kan bawhzui ṭhîn a ni. Auxiliary pioneer thawh theihna hun remchângte hi hmang ṭangkai tûrin i thinlung chuan a chêttîr dâwn che em?—Lk. 6:45.