Zawhna Bâwm
◼ Thuchhuahtu chu baptisma chang tûra pawm a nih hmain, kohhran inkhâwmna leh rawngbâwlnaah eng ang takin nge a tel ang?
Miin thu tlûkna a siam tûr pawimawh ber chu baptisma channa hi a ni. Chuvângin, baptisma chang tûra pawm a nih hmain Pathian thil phûtte chu engemaw chen a hre thiam tûr a ni a. Chu bâkah, chûng thil phûtte chu nunpui a tum tih a lantîr tawh tûr a ni bawk.
Kristiante chu inkhâwmte bânsan lo tûra thupêk kan ni a; chuvângin, baptisma la chang lo thuchhuahtu chu kohhran inkhâwmahte taima takin a tel ṭhîn tawh tûr a ni. (Heb. 10:24, 25) Inkhâwmnaah chhânnate a pe tûr a ni a. Thil phût ni lo mah se, Theocratic Ministry School-a tel pawh a duh ngei ang.
Kristiante chu chanchin ṭha hril tûr leh zirtîra siam hna thawk tûra thupêk an nih avângin, thuchhuahtu chu baptisma a chan hmain rawngbâwlnaah a têl ziah ṭhîn tûr a ni bawk. (Mt. 24:14; 28:19, 20) Baptisma a chan hmain thla eng zât nge thuchhuahtu a nih ang? Thla tinin rawngbâwlnaah ṭhahnemngai taka kal ziahin chutianga tih zawm zêl a inhuamzia hun engmaw chen a lantîr chu thil inâwm tak a ni. (Sâm 78:37) Mahse, thuchhuahtu a nih ṭan aṭanga baptisma chang tûra a tlin hun chu rei tak a nih kher a ngai lo, thla tlêmte pawh a ni thei. Thlawhhma rawngbâwlnaah dârkâr engzât nge a pêk ngai? Chu chu bituk zât a awm lo. Thuchhuahtu tinte dinhmun chu ngaihtuahin, upate chu inâwm tâwk leh inbûk tâwk tak an ni tûr a ni.—Lk. 21:1-4.
Baptisma chan tum kâwmtu upate (a nih loh leh kohhrana rawngbâwltute leh upa tlêmtê) chuan mi tin hi kan danglam vek tih hre rengin, baptisma chang tûra a tlin leh tlin loh hriat nân thutlûkna fing tak an siam tûr a ni. Jehova Thuhretute zînga mi nih a duh tak zetin, Jehova inawpna pâwla tel theihna leh rawngbâwlnaa tel theihna chanvo a neih chu a hlutzia a târ lang bawk tûr a ni. Baptisma chang tûr chu thlarau lamah a la puitling tâwk lo deuh emaw, baptisma chang thuchhuahtu tûr atân a la tling tâwk lo deuh emaw a nih chuan upate chuan an hre thiam a. Baptisma chang tumtu chu la tling tâwk lo nia an hriat chuan upate chuan chutianga thutlûkna an siam chhan chu Bible aṭangin ngilnei takin an hrilhfiah ang a, thlarau lama ṭanpuina a dawn theih nân an ṭanpui tûr a ni.