Chanchin Ṭha Rawngbâwltute

JEHOVA chuan entawn tûr ṭha famkim—a Fapa, Isua Krista—chu min pe a. (1 Pet. 2:21) Mi tupawh Isua zuitu a lo nih chuan, Pathian rawngbâwltu pakhat angin ani chuan chanchin ṭha a hril a. Chu chuan thlarau lamah mi a tihahdam dâwn tih târ langin, Isua chuan: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang,” tiin a sawi a ni. (Mt. 11:28, 29) Chu sâwmna pawmtu zawng zawngte tân chu thutiam chu a hlawhchham ngai lo!

² Pathian Rawngbâwltu Sâng Ber a nih angin, Isua chuan mi ṭhenkhat chu a hnung zui tûrin a sâwm a. (Mt. 9:9; Joh. 1:43) Anni chu rawngbâwlnaah zirtîrin, a hnathawh ang thawk tûrin a tîr chhuak a ni. (Mt. 10:1–11:1; 20:28; Lk. 4:43) A hnuah mi dang 70 chu Pathian Ram chanchin ṭha hril tûrin a tîr chhuak a. (Lk. 10:1, 8-11) Isua’n chûng zirtîrte a tirh chhuah chuan, an hnênah: “Tupawh nangni thu ngai chu keima thu ngai a ni e; tupawh a duh lo che u chu kei mi duh lo a ni e; tupawh kei mi duh lo chu mi tîrtu duh lo a ni e,” tiin a sawi a ni. (Lk. 10:16) Hetiang hian, Isua chuan a zirtîrte hnêna a pêk mawhphurhna a pawimawhzia chu a sawi uar a. Anni chuan Isua leh Pathian Chungnung Ber ai an awh dâwn a lo ni! Tûn laiah pawh, Isua sâwmna: “Lo kal la, mi zui ang che,” tih pawmtute tân chutiang tho chu a ni. (Lk. 18:22; 2 Kor. 2:17) A pawmtu zawng zawngte chuan Ram chanchin ṭha puang tûr leh zirtîr siam tûrin mawhphurhna an dawng a ni.—Mt. 24:14; 28:19, 20.

³ Isua sâwmna kan pawm tawh avângin, Pathian Jehova leh Isua Krista ‘hriatna’ kan nei a. (Joh. 17:3) Jehova kawngte chu zirtîr kan ni. A ṭanpuinain kan rilru a tharin kan siam thei a, mihring thara inthuamin, Jehova tehna felte milin kan nung thei a ni. (Rom 12:1, 2; Eph. 4:22-24; Kol. 3:9, 10) Thinlung taka kan ngaihhlutna chuan Jehova hnêna inpumpêk tûr leh kan inpumpêkna chu tuia baptisma channa hmanga târ lang tûrin min chêttîr a. Baptisma kan chan khân, rawngbâwltu anga nemnghehin kan awm a ni.

⁴ Pathian rawng chu kut thianghlim leh thinlung thianghlimin kan bawl tûr a ni tih hre reng ang che. (Sâm 24:3, 4; Is. 52:11; 2 Kor. 6:14–7:1) Isua Krista kan rinna aṭangin chhia leh ṭha hriatna thiang kan nei tawh a. (Heb. 10:19-23, 35, 36; Thup. 7:9, 10, 14) Tirhkoh Paula chuan Kristiante chu mi dangte an tih tlûk loh nân engkim Pathian ropuina tûr hlîra ti tûrin a fuih a ni. Tirhkoh Petera chuan ring lotute thutak lama hmin tûr chuan nungchang entawn tlâk neih a ngai tih a sawi. (1 Kor. 10:31-33; 1 Pet. 3:1) Engtin nge mi tuemaw chu chanchin ṭha rawngbâwltu pakhat ni ve tûra i ṭanpui theih ang?

THUCHHUAHTU THARTE

⁵ Tuina nei mi pakhat Bible i zirpui aṭangin, a thil zirte mi dangte hnêna hrilh tûrin fuih ang che. Chhûngkhatte, ṭhiante, hnathawhpuite, leh mi dangte chu tawnchawpin a sawipui thei a. Hei hi chanchin ṭha rawngbâwltu anga Isua hnung zuitu pakhat ni tûra mi tharte zirtîrnaah rahbi pawimawh tak a ni. (Mt. 9:9; Lk. 6:40) Mi thar chuan thlarau lama hma a sâwn a, tawnchawpa thu hrilh dân a thiam hnuah chuan thlawhhma rawngbâwlnaa tel châkna a neih thu a rawn sawi chhuak ngei ang.

THIL PHUTTE TLIN RAWH

⁶ Mi chu a vawi khatna atâna in tin kal tûra i sâwm hmain, tlin ngai ṭhenkhatte a tlin ngei tih i chian tûr a ni. Kan ruala thlawhhma rawngbâwlnaa lo chhuaktu chu Jehova Thuhretute zînga mi a nihzia vântlâng hmaah a inhriattîr a. Chuvângin, Jehova tehna felte mila nungin, baptisma la chang lo thuchhuahtu a ni thei tawh tihna a ni.

⁷ Mi tuemaw Bible i zirpui a, Bible thu bulte i sawipui hian a dinhmunte chu i hre ngei ang a. A thil zirte milin a nung tih pawh i hria pawh a ni thei. Mahse, i Bible zirpui nuna thil ṭhenkhat chungchângah upate’n in pahniha sawipui duh che u an nei ang.

⁸ Chumi chungchâng nangmah leh i Bible zirpui sawipui tûr chuan upate râwn khâwmtu coordinator chuan upa pahnih (pakhat chu service committee member zînga mi) a ruat ang a. Kohhran upa an tlêmna kohhhranahte chuan, upa pakhat leh kohhranho rawngbâwltu tling tak pakhat chuan an sawipui thei ang. Chutiang atâna ruat unaupate chuan sawihona chu rei rial lova neih an tum tûr a ni. Kohhran inkhâwmah zirlaiin thuchhuahtu nih a duh thu an hriat chuan, inkhâwm bânah nang leh i Bible zirpui chu an kâwm nghâl thei che u a ni. Chutiang inkawmnaah boruak chu a zâng tûr a ni a. Bible zirpui chu baptisma chang lo thuchhuahtua pawm a nih hmain, a chungchângah chuan a hnuaia thute hi a dik tûr a ni:

1. (1) Bible hi Pathian thâwk khum Thu a ni tih a ring.—2 Tim. 3:16.

2. (2) Bible zirtîrna thu bulte hriaa a rin avângin, zawhna zawh a nih hunah Bible nêna inmilin a chhâng ang a, zirtîrna dik lo, a nih loh leh ama ngaih dân angin a chhâng lo vang.—Mt. 7:21-23; 2 Tim. 2:15.

3. (3) A theih chhûng chu, Jehova mite ruala inkhâwm tûra Bible thupêk chu a zâwm.—Sâm 122:1; Heb. 10:24, 25.

4. (4) Uirêna, nupui pakhat aia tam neihna, leh mawngkawhurna pawh tiamin, inngaihna sual chungchânga Bible zirtîrnate chu a hria a, chûng zirtîrnate mil chuan a nung. A chhûngte ni lo, neih inang lo tuemaw a khawsakpui a nih chuan, an pahnihin dân anga ṭha taka innei an ni tûr a ni.—Mt. 19:9; 1 Kor. 6:9, 10; 1 Tim. 3:2, 12; Heb. 13:4.

5. (5) Zû rui lo tûra Bible khapna chu a zâwm a, damdawi atâna hman a nih loh chuan a ngawl vei theih leh rilru la pêng thei chi bâwlhlote engmah a hmang lo.—2 Kor. 7:1; Eph. 5:18; 1 Pet. 4:3, 4.

6. (6) Ṭhian sualte kawm loh a hlutna chu a hria.—1 Kor. 15:33.

7. (7) Tûn hmaa a lo awmna pâwl dik lova member a nihna zawng zawng a titâwp tawh a. An inkhâwmnaahte tel tawh lovin, an thiltihahte a tel tawh lo va, a ṭanpui tawh hek lo.—2 Kor. 6:14-18; Thup. 18:4.

8. (8) Khawvêl politics-ah rêng rêng a tel lo.—Joh. 6:15; 15:19; Jak. 1:27.

9. (9) Isaia 2:4-a hnamte buaina chungchâng a sawi chu ringin, chumi mil chuan a nung.

10. (10) Jehova Thuhretute zînga pakhat nih chu a duh tak zet.—Sâm 110:3.

⁹ Kohhran upate chuan a engemaw berah an chiang lo a nih chuan, zirlai chu an zâwt chiang tûr a ni a, heta târ lan Bible chângte hi sawiho nân an hmang pawh a ni thei. Jehova Thuhretute ruala thu hriltute chuan, hêng Bible thil phûtte mil hian an nung ngei tûr a ni tih a hriat thiam a pawimawh a. A thusawite aṭang chuan a laka thil beiseite chu a hria nge hre lo tih leh thlawhhma rawngbâwlnaa tel tûrin a tling nge tling lo tih upate chuan an rêl thei ang.

¹⁰ Upate chuan Bible zirlai chu thuchhuahtu nih a tlin leh tlin loh an hrilh nghâl tûr a ni a. A tlângpui thuin, sawihona neih tâwp lama hrilh theih a ni ṭhîn. Thuchhuahtu nih a tlin chuan, upate chuan thuchhuahtu pakhat angin an lâwm lût thei a. (Rom 15:7) A theih anga hmaa thlawhhma rawngbâwlnaa tel tûr leh thla tâwpa rawngbâwlna report pe tûra fuih tûr a ni. Bible zirlai chu baptisma chang lo thuchhuahtu nih a tlin a, rawngbâwlna report a vawi khatna atâna a pêk hunah Kohhrana Thuchhuahtute Chhinchhiahna chu a hminga siam a ni ang a, kohhran file-ah dah ṭhat a ni ang tih upate chuan an hrilhfiah thei ang. Upate’n thuchhuahtu hnên aṭanga a mi mal chanchin an lâk chhan chu, inawpna pâwl chuan khawvêl puma Jehova Thuhretute rawngbâwlna an enkawl theih nân leh thuchhuahtuin thlarau lam thiltiha a tel theih a, thlarau lam ṭanpuina a dawn theih nân a ni. Chu bâkah, upate chu thuchhuahtu thar hnênah a mi mal chanchin kan lâkkhâwm rêng rêng chu jw.org-a kan hmuh Global Data Protection Policy of Jehovah’s Witnesses nêna inremin an hmang ang tih an hriatnawntîr thei a ni.

¹¹ Thuchhuahtu thar kan kawm nêlna leh a thiltihte ngaihsakna chuan amahah nghawng ṭha tak a nei thei a. Chu chuan rawngbâwlna report pe ziah tûr leh Jehova rawngbâwlnaa ṭan la lehzual tûrin a chêttîr thei ang.—Phil. 2:4; Heb. 13:2.

¹² Upate’n Bible zirlai chu thlawhhma rawngbâwlnaa tel thei tawh nia an rêl hnuah chuan, ani chuan Jehova Duh Zâwng Ti Tûra Kan Inrêlbâwl Dân tih lehkhabu chu a pualin a dawng thei tawh ang. Rawngbâwlna report a vawi khatna atâna a pêk hnuah, baptisma chang lo thuchhuahtu thar a nih thu kohhranah tawi têa puan a ni ang.

NAUPANGTE ṬANPUINA PE RAWH

¹³ Naupangte pawh chanchin ṭha hriltu, thuchhuahtu nih an tling thei a. Isua chuan naupangte chu lâwmin, mal a sâwm a ni. (Mt. 19:13-15; 21:15, 16) Nu leh pate chu an fate chunga mawhphurhna neitu ber ni mah se, kohhrana mi dangte chuan Lalram thu hrilhnaa thinlung taka tel duhna nei naupangte chu an ṭanpui thei a ni. Nu leh pa in nih chuan, thlawhhma rawngbâwlnaa entawn tûr ṭha in siam chuan in fate chu Pathian rawngbâwlnaa taima tûrin nasa takin a fuih ang. Nungchang lama entawn tlâk tak naupang chuan thinlung tak aṭanga a rinna mi dangte a hrilh ṭhin chuan, eng anga ṭanpui belh theih nge ni ang?

¹⁴ Nu leh pate tân an fa chu thuchhuahtu nih a tlin leh tlin loh hriat nâna Kohhran Service Committee zînga mi upa pakhat biak chu thil âwm tak a ni ang. Upate râwn khâwmtu coordinator chuan chu naupang leh thutaka awm a nu leh pa, a nih loh leh anmahni enkawltu chu hmu tûrin upa pahnih a ruat ang (pakhat chu service committee zînga mi a ni tûr a ni). Naupang chuan Bible thutak bulpui hriatna a neih tawh a, thu hrilhnaa tel duhna a nei tih a lan chuan, hmasâwnna ṭha tak a nei tihna a ni a. Hêng thilte leh puitlingte nêna sawiho ngai thilte an ngaihtuah hnuah, naupang chu baptisma la chang lo thuchhuahtu a nih theih leh theih loh chungchângah upa pahnihin thu tlûkna an siam ang. (Lk. 6:45; Rom 10:10) Naupangte sawipui a nih hunah, puitlingte sawipui ṭhin thu ṭhenkhat, naupangte nêna inkûngkaihna nei si lote chu sawipui a ngai lo vang.

¹⁵ Inbiakna an neihpui laiin, upate chuan naupang chu hma a sâwn tawhna chungah fakin, baptisma chan chu thiltuma nei tûrin an fuih tûr a ni a. Nu leh pate chuan an fate thinlungah thutak tuhsak tûra an thawh rim avângin, anni pawhin fak an phû a ni. An fate ṭanpui chhunzawm tûra puih nân, upate chuan phêk 179-181-naa, “Kristian Nu leh Pate Hnêna Thuchah” tih chu an kawhhmuh tûr a ni.

INPUMPEKNA LEH BAPTISMA CHANNA

¹⁶ Pathian thil phûtte tlin a, thlawhhma rawngbâwlnaa telna hmanga Jehova i lo hriat a, i hmangaih tawh chuan, amah nêna in inlaichînna chu i tihngheh a ngai a ni. Engtin nge i tihngheh ang? A hnêna i nun inpumpêkna leh tuia baptisma channa hmangin i tinghet thei a ni.—Mt. 28:19, 20.

¹⁷ Inpumpêkna chuan thiltum thianghlim tak atâna inserh hranna a kâwk a. Pathian hnêna inpumpêkna tih awmzia chu a hnêna ṭawngṭai a, a rawngbâwl nâna i nun hmang tûr leh a kawngte zawh tûra intiamna a ni a. A hnênah chauh chatuanin i inpe bîk tihna a ni. (Deut. 5:9) Hei hi mi mal thil a ni a. Tumahin an tihsak thei lo che.

¹⁸ Amaherawhchu, a ta nih i duh thu Jehova hnêna a mi mala hrilh mai chu a tâwk lo. Pathian hnênah i inpumpêk tawh tih mi dangte hmuha i târ lan a ngai a ni. Chu chu Isua tih anga, tuia baptisma changin i lantîr a ni. (1 Pet. 2:21; 3:21) Jehova rawng bâwl tûra thu tlûkna i siam a, baptisma chan i duh tawh chuan eng nge i tih ang? Kohhran upate râwn khâwmtu coordinator hnênah chuan i hriattîr tûr a ni a. Ani chuan baptisma chang tûra Pathian thil phûtte i tlin ngei tih chian tûrin upa engemaw zât chu nangmah be tûrin a ruahman ang. Hriat belh nân, he lehkhabu phêk 182-184-a, “Baptisma La Chang lo Thuchhuahtu Hnêna Thuchah” tih leh phêk 185-207-naa, “Baptisma Chang Duhte Hnêna Zawh Tûr Zawhnate” tih chu khawngaihin ennawn ang che.

RAWNGBAWLNAA HMASAWNNA CHUNGCHANG REPORT PEKNA

¹⁹ Kum tam tak chhûng chu, khawvêl puma biakna thianghlim punna report chuan Jehova mite hnênah chakna a lo pe tawh ṭhîn a. Khawvêl pumah chanchin ṭha hrilh a nih tûr thu Isua’n a zirtîrte a hrilh hmasak ber ṭum aṭangin, Kristian dikte chuan he rawngbâwlna thawh zawh a nih dân tûr chu an ngaihven hle a ni.—Mt. 28:19, 20; Mk. 13:10; Tirh. 1:8.

²⁰ Isua zuitu hmasate khân, thu hrilh rawngbâwlna hlawhtlinnate chanchin hriat chu nuam an ti hle a. (Mk. 6:30) Bible-a Tirhkohte bu chuan, C.E. 33 Pentikost nîa thlarau thianghlim zirtîrte chunga leih a nih lai khân, mi 120 vêl an awm tih min hrilh a. Zirtîrte chu 3,000 an lo tling chho ta thuai a, tichuan 5,000 vêl an rawn ni chho va. “Chhandam mêk apiangte chu Lalpain ni tin an hnênah a teltîr zêl ṭhîn,” tih leh “Puithiamte zîngah pawh mi tam takin rinna chu an âwih ta a,” tih thu dawn a ni. (Tirh. 1:15; 2:5-11, 41, 47; 4:4; 6:7) Hêng punna thu an hriatte hian zirtîrte chu a tichak ngei ang le! Juda sakhaw hruaitute’n tihduhdahna nasa tak chawk chhuak mah se, hêng report phûrawm takte hian Pathian pêk rawngbâwlna chu thawk zawm zêl tûrin anni chu a va chêttîr nasa dâwn êm!

²¹ C.E. 60-61 vêlah khân, Paula chuan Kolossa mite hnêna a lehkha thawnah chanchin ṭha chu “khawvêl zawng zawngah rahin a pung zêl” tih leh “vân hnuaia thil siam zawng zawngte zînga tlângaupui” a ni tawh tih a sawi a. (Kol. 1:5, 6, 23) Kristian hmasate chuan Pathian Thu an âwih a, C.E. 70-a Judate kalhmang a tâwp hma khân, thlarau thianghlim chuan thu hrilh rawngbâwlna nasa tak thawk zo tûrin a tichak a ni. Rawngbâwlnaa an thawh zawhte chungchâng report an dawnte chuan chûng mi rinawmte chu a va tichak dâwn êm!

²² Chutiang bawkin, tûn laia Jehova chhiahhlawhte chuan Matthaia 24:14-a: “He ram Chanchin Ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih thlen famkim nâna an hnathawh dân chu ṭha taka chhinchhiah an tum tlat a ni. Pathian chhiahhlawh inpumpêkte kan nih angin, hnathawh tûr hmanhmawhthlâk tak kan nei a. Tâwpna a lo thlen hmain thu hrilh rawngbâwlna ṭha taka thawh zawh a ni chu a mi mal taka hmuh kan duh ṭheuh ngei ang a. Jehova chuan he hna hi thawh zawh a ni tih a chian ang a, chu hnaa kan tel ve chuan Jehova lawm kan hlawh ang.—Ezek. 3:18-21.

I MI MAL THLAWHHMA RAWNGBAWLNA REPORT

²³ Eng nge kan report ang? Inawpna pâwl min pêk Thlawhhma Rawngbâwlna Report ziahna tûrah hian kan ziah tûr chu a chuang a. Mahse, hêng thu ṭhenkhatte hi ṭangkai i ti thei bawk ang.

²⁴ “Sem Chhuahte (A Buin leh Electronic-in),” tihnaah hian baptisma chang Thuhretu la ni lote hnêna kan thu leh hla chhuah a bu emaw, electronic emawa i pêk chhuah zât belhkhâwm chu ziak rawh. “Video Chhuahna,” tihah hian video i chhuahsak zât chu ziak ang che.

²⁵ “Tlawhkîr,” tihnaah hian tuina lantîrtu, baptisma chang tawh Thuhretu la ni lo zawng zawngte i tlawh zât chu ziak ang che. Tlawhkîrna chu mi an ina va tlawh bâkah, lehkha thawn te, phone-a biakte, message thawnte, a nih loh leh e-mail thawnte, thu leh hla chhuah ṭhenkhat pêkna hmangtein a neih theih a. In lama Bible zirna i kaihhruai apiangin tlawhkîr pakhat nei anga chhiar tûr a ni bawk. Nu ber emaw, pa ber emaw chuan a fa baptisma la chang lo chu kâr tina chhûngkuaa Pathian biakna a neihpui hunah tlawhkîrah a chhiar thei ang.

²⁶ Bible zirna chu chawlhkâr tina neihpui ṭhin ni mah se, thla tinin zirna pakhat nei anga report a ni a. Thuchhuahtute chuan thla khat chhûnga Bible zirna hrang hrang an neihte belhkhâwm zât chu Bible zirpuiah an ziak tûr a ni. Chutiang report-te zîngah chuan inpumpêka baptisma chang Thuhretute la ni lote chu telh theih vek an ni ang. Chu bâkah, service committee zînga tuemaw ber kaihhruaina anga i zirpui, kohhran thiltiha tel tawh lo unau emaw, Chatuanin I Hlim Thei! bu la zir zo lo baptisma chang tharte emaw chu Bible zirpuiah i chhiar thei bawk ang.

²⁷ Dik taka “Dârkâr” pêk chu a pawimawh a. Hei hi, a bul berah chuan in tina thu hrilhna, tlawhkîr neihna, Bible zirpuina, a nih loh leh dân pângngai emaw, tawn chawp emawa baptisma chang Thuhretu la ni lote hnêna thu hrilh nâna i hun hman chu a ni a. Thuchhuahtu pahnih an kal dûn a nih chuan, an pahnihin dârkâr an chhiar thei ang; mahse, pakhat chauhvin tlawhkîr, a nih loh leh Bible zirpui an neih chu a chhiar tûr a ni. Chhûngkuaa Pathian Biakna neih zâna an fate zirtîrna pe dûntu nu leh pate chuan kâr tin dârkâr khat thleng an chhiar thei ang. Unaupate chuan vantlâng thusawi an pêk hun chhûng chu an chhiar thei ang a, ṭawng lettute pawhin an chhiar thei ang. Thlawhhma rawngbâwlna atâna insiam hun chhûngte, inhmuhkhâwmna inkhâwm neih chhûngte, thil pawimawh dang tihkual hunte, leh chutiang chi thil dangte atâna hun hmante chu thiltih pawimawh tak mah ni se, chhiar tel tûr a ni lo.

²⁸ Thuchhuahtu tinte chuan thu hrilh nâna an hun hman zât an chhût hian Bible hmanga sâwizawi an chhia leh ṭha hriatna chu an hmang tûr a ni. Thuchhuahtu ṭhenkhat chuan mi tam tak awmna hmunah thu an hrilh laiin, mi dangte chuan mi an tam lohna hmun leh rei tak kal a ngaihna hmunahte thu an hrilh a. Thu hrilhna bial a inang lova; thuchhuahtute’n rawngbâwlna an thlîr dân pawh a inang lo. Governing Body chuan thlawhhma rawngbâwlnaa hun hman zât chhiar dân tûrah a chhia leh ṭha hriatna min zuitîr a tum lo va, hemi chungchâng endik tûrin mi ruat lah a nei hek lo.—Mt. 6:1; 7:1; 1 Tim. 1:5.

²⁹ Thlawhhma rawngbâwlnaa hun hman zât chu dârkâr bi kima ziah tûr a ni a. Mahse, thuchhuahtu chu tarna avânga tihtheih a neih tlêm emaw, pâwn chhuak thei lova a awm emaw, dam lo enkawlna hmuna a awm emaw, a nih loh leh ramtuileilova a awm emaw hian ngaihhnathiam theih a ni. Chutiang thuchhuahtute chuan thlawhhma rawngbâwlna atâna report chu minute 15 bi zêlin an pe thei a. Thla khat chhûngin minute 15 chauh pawh thu hrilh nân hmang mah se, chu chu a report tûr a ni. Lalram thuchhuahtu phusate zînga chhiar a ni ang. He ruahmanna hi thla khat emaw, a aia tam emaw chhûng natna khirh tak, a nih loh leh inhliamna nasa tak a tawh avânga pâwn chhuak thei lo thuchhuahtute tân pawh a hman theih a ni. Hei hi tih theih nei mang meuh lote tân chauh a ni a. Thuchhuahtu chu he ruahmannaah hian a tel theih leh theih loh chungchângah service committee chuan thu tlûkna a siam ang.

KOHHRANA THUCHHUAHTUTE CHHINCHHIAHNA

³⁰ Thla tina i report pêk chu Kohhrana Thuchhuahtute Chhinchhiahna-ah chhinchhiah a ni a. Hêng chhinchhiahnate hi Kohhran ta a ni. Kohhran danga insawn i tum chuan, upate chu hrilh ngei ngei ang che. Secretary chuan i chanchin chhinchhiahna chu i kohhran tharah thawn a ni ngei a ni tih a chian ang. Chutiang chuan, upate chuan ṭha zâwkin an lo lâwm thei ang che a, i mamawh ang thlarau lama ṭanpuina pawh an pe thei ang che. Thla thum aia tam lo hmun dangah i awm dâwn a nih chuan, khawngaihin i awmna kohhranah field service report pe zawm zêl ang che.

THLAWHHMA RAWNGBAWLNA REPORT KAN PEK CHHAN

³¹ Thlawhhma rawngbâwlna report pêk theihnghilh châng i nei em? Kan vai hian, a chânga hriatnawntîr kan ngai a. Mahse, report pêk chungchânga rilru put hmang dik kan neih a, a pawimawh chhan kan hriatthiamna chuan, pêk theihnghilh lo tûrin min ṭanpui ang.

³² Ṭhenkhat chuan heti hian an zâwt a: “Jehova’n a rawngbâwlnaa ka thiltih a hre tho si a, engvângin nge kohhrana report ka pêk a ngaih?” tiin. Jehova’n kan thiltih a hre ngei mai a, kan rawngbâwlna chu thinlung zawng zawnga thawh nge, theih tâwp chhuahin kan thawk lo tih pawh a hria a ni. Amaherawhchu, Jehova chuan Nova’n lawngah ni eng zât nge a hman a, Israel mite kum eng zât nge thlalêra an kal, tihte chu a chhinchhiah tih hre reng rawh. Pathian chuan mi rinawm zât leh thuâwih lo zât chu a chhinchhiah a ni. Kanaan ram an hneh chhoh zêl dân leh Israel rama rorêltute hlawhtlinnate pawh a chhinchhiah bawk. Ni e, a chhiahhlawhte thiltihte chu kimchang takin a chhinchhiah a ni. Thilthlengte ziak tûra thlarauva a thâwk khumna aṭangin, dik taka chhinchhiahna neih chungchânga a thlîr dân chu chiang takin kan hre thei a ni.

³³ Bible-a hmân lai thilthleng chhinchhiahte chuan Jehova mite’n thil nih dân dik taka an chhinchhiah dân a târ lang a. Tam takah chuan, a zât chiah chiah târ lanna a awm loh chuan Bible-a thilthlengte chuan nghawng a nei tam tâwk lo vang. Hêng entîrnate hi han ngaihtuah teh: Genesis 46:27; Exodus 12:37; Rorêltute 7:7; 2 Lalte 19:35; 2 Chronicles 14:9-13; Johana 6:10; 21:11; Tirhkohte 2:41; 19:19.

³⁴ Kan report pêkah chuan Jehova kan biaknaa kan thiltih zawng zawng tel kim lo mah se, Jehova inawpna pâwl chhûngah thiltum pakhat a hlen a ni. Kum zabi khatnaah khân, thu hrilh rawngbâwlna beihpui neihna aṭanga tirhkohte an lo haw chuan, Isua hnênah “engkim, an thiltih apiang leh an zirtîr apiang” an hrilh a. (Mk. 6:30) A châng chuan, kan report chuan kan rawngbâwlna pêng ṭhenkhat chuan ngaihsak bîk a ngai tih a târ lang thei a. A zât chhinchhiahte chuan rawngbâwlna ṭhenkhatah hma kan sâwn laiin, thuchhuahtute punna ang chi kawng dangah chuan hma kan sâwn lo tih a târ lang thei bawk. Fuihna kan mamawh a ni thei a, a nih loh leh harsatna chinfel ngai a awm pawh a ni thei. Mawhphurhna nei upate chuan report-te chu lo chhinchhiahin, mi mal hmasâwnna tûr, a nih loh leh a kohhran pum hmasâwnna tûr dâltu apiang chu chinfel an tum ang.

³⁵ Report pêkte chu inawpna pâwlin hna thawktu mamawh zualna hmunte a hriat theih nân a ṭangkai bawk. Khawi lai hmunah nge kan pun? Khawi hmunah nge kan pun vak loh? Mite thutak zirtîr nân eng thu leh hla chhuahte nge mamawh a nih? Report kan pêkte chuan khawvêl hmun hrang hranga thu hrilh rawngbâwlnaa mamawh thu leh hla chhuahte mamawhna hre tûr leh a ṭûl anga tichhuak tûrtein inawpna pâwl chu a ṭanpui a ni.

³⁶ Kan zînga a tam zâwkte tân report chuan min tichak a. Khawvêl puma thu hrilhnaa kan unaute thawh dân kan hriatna chuan min tiphûr a ni lâwm ni? Kan punzia târ langtu report-te chuan Jehova inawpna pâwl hmasâwn dân hre thiam tûrin min ṭanpui a. Thiltawnte chuan kan thinlung a tihlim a, ṭhahnemngaihna min pe a, thu hrilhnaa theih tâwp chhuah lehzual tûrin min ṭanpui a ni. (Tirh. 15:3) Thlawhhma rawngbâwlna report ṭha taka kan pêk chu a pawimawh a, chu chuan hmun tina awm unaute kan ngaihtuahzia a târ lang. Hetiang kawng hian, Jehova inawpna pâwl ruahmanna hnuaia kan intukluhzia chu kan târ lang a ni.—Lk. 16:10; Heb. 13:17.

MI MAL THILTUMTE INSIAMNA

³⁷ Kan thlawhhma rawngbâwlna chu mi dangte rawngbâwlna nêna khaikhin chhan tûr kan nei lo. (Gal. 5:26; 6:4) Mi mal dinhmun chu a inang lo va. Kawng lehlamah chuan, mi mal thiltum inâwm tâwk takte neihna chu rawngbâwlnaa hma kan sâwnna in teh nân a ṭangkai thei hle. Chutiang thiltumte hlenna chuan lungâwina min neihtîr thei a ni.

³⁸ Jehova chuan “hrehawm nasa tak” chhûnga a vênhim tûrte lâkkhâwmna chu chak takin a kalpui tih a lang a. Isaia hrilh lâwkna: “In zînga hnam tê ber pawh hnam ropui tak an ni ang a, hnam tlêmte pawh hnam chak tak an ni ang: kei LALPA hian a hun hunah chuan ka thlentîr thuai ang,” tih thlen famkimna hunah kan awm mêk a ni. (Thup. 7:9, 14; Is. 60:22) He ni hnuhnûng chhinchhiah tlâk taka chanchin ṭha rawngbâwltu kan ni thei hi chanvo hlu a va ni êm!—Mt. 24:14.