Thawhpui Ngawi Reng Ni Suh
1. Engtin nge rawngbâwlnaa mi dangte nêna kan thawh hunah tirhkoh Paula rilru put hmang chu kan entawn theih?
1 Tirhkoh Paula chuan a rinpuite nêna hun hman chu ‘inthlamuan tawnna,’ a nih loh leh infuih tawnna atâna hun remchângah a thlîr a. (Rom 1:12) Rawngbâwlnaa thuchhuahtu dang nêna in thawh hian, chu hun chu amah ṭanpuina leh fuihna remchângah i hmang em? Thawhpui ngawi reng nih ai chuan, engvângin nge thuchhuahtu hlawhtling tak ni thei tûra ṭanpuitu thilte chu i hrilh loh vang?
2. Thlawhhma rawngbâwlnaa kan thawhpuite inrintâwkna neihtîr tûrin eng nge kan tih theih a, engvângin nge chu chu pawimawh tak a nih?
2 Inrintâwkna Neihtîr Rawh: Thuchhuahtu ṭhenkhatte chuan inrintâwkna an tlachham a, chu chu an hmêl lan dânah emaw, an aw chhuakah emaw a lang chhuak thei a ni. Anni chu tih tak zeta fakin inrintâwkna kan neihtîr thei a. Inrintâwkna neihtîr theih dân kawng ṭhenkhat dangte chu eng nge ni? Bial kantu pakhat chuan a thawhpui hnênah a dawih ṭhin dân chungchâng leh chutiang rilru hneh tûra a ṭawngṭai ṭhin dânte a hrilh a. Unaupa dang leh chuan, inringtâwk taka lang tûra amah ṭanpuitu chungchângah heti hian a sawi a ni: “Nui hmêl hmuh hian a inṭan a. A châng chuan nui hmêl hmuh tûr ringawt pawhin ṭawngṭai a ngai a ni,” tiin. Rawngbâwlnaah inrintâwkna nei lehzual tûrin thil engemaw hian a ṭanpui che em? Rawngbâwlnaa i thawhpui hnênah chuan chu chu hrilh rawh.
3. Kan thawhpui chu rawngbâwlnaa thiam lehzual tûra ṭanpui thei eng thilte nge kan hrilh theih?
3 Thu Hrilh Dânte Hrilh Chhâwng Rawh: Inbiak ṭan nâna hman theih tûr tualchhûnga thilthleng chungchânga kamkeuna thu emaw, zawhna emaw ṭangkai deuh mai hriat i nei em? Thusawi dân tûr entîrnate i siam danglamna aṭangin rah ṭha i hmu em? I thusawi dân chu in neitu dinhmun nêna herh mil tûrin eng nge i tih? Chûng chu i thawhpui hrilh rawh. (Thuf. 27:17) Tlawhkîr nei tûra in kal laiin, i thil tih tum leh tihhlawhtlin i tum dân chu i hrilh thei a. Bible zirna i kaihhruai zawhah chuan zirlai mamawh phuhru tûra thu pawimawh te, Bible châng te, a nih loh leh zirtîr dân te i thlan chhan chu i hrilh thei a ni.
4. Engvângin nge kan chanchin ṭha hriltu kan unaute chu kan ṭanpui ang?
4 Kum zabi khatnaa chanchin ṭha hriltute chuan ring lotute ṭanpui chauh chu an ngaihsak lo. Infuih tawn leh in tihchak tawn hlutzia an hria a ni. (Tirh. 11:23; 15:32) Paula chuan naupang Timothea chu zirtîrin, a thil zirte mi dangte hrilh chhâwng tûrin a fuih a. (2 Tim. 2:2) Rawngbâwlnaa Kristian unaute chunga thil ṭha kan tih hian, an hlimna leh hlawhtlinna kan tipung mai ni lovin, kan Pa vâna mi kan tilâwm bawk a ni.—Heb. 13:15, 16.