Rawngbâwlnaah Thiamna Tihmasâwn Rawh—Thawhpui Ṭangkai Tak Niin

A Pawimawh Chhan: Isua chuan thawhpui neia thu hrilh a hlutzia chu a hria a. Chuvângin, thu hril tûrin a zirtîr 70-te chu pahnih zêlin a tîr chhuak a. (Lk. 10:1) Miin dinhmun harsa a tawh hunah emaw, in neitu chhân dân tûr a hriat loh hunah emaw a thawhpui chuan a lo ṭanpui thei a ni. (Thur. 4:9, 10) Ani chuan a thiltawnte hrilhin, a châng chuan rawtnate a pe thei a, chu chuan a thawhpui chu chanchin ṭha hriltu thiam tak ni tûrin a ṭanpui thei a. (Thuf. 27:17) In danga an luh leh hmain, mi tichak thei tak thute sawipuiin a fuih thei bawk.—Phil. 4:8.

A Tih Dân Tûr:

I thawhpuiin thu a hrilh laiin lo ngaihthlâksak la. (Jak. 1:19) Bible châng a chhiar hunah i Bible lo keu ve ang che. Hei hian a ṭûl huna ṭanpui thei tûrin a inpeihtîr ang che. In tina rawngbâwl laiin, i thawhpui thusawi lai tibuai chuang si lovin i chhehvêla thil awmte chu ngaihven reng rawh. (Mt. 10:16) Mi ṭhenkhat min en dân a dik loh va, min en reng chunga mobile phone a hmang i hmuh chuan i thawhpui chu a inbiakna titâwp tûrin ṭanpui la, in thawhna bial chu ngawi rengin chhuahsan nghâl ang che u.—Thuf. 17:14.
Inbiaknaa tel tûr a nih leh nih loh, leh tel hun tûr chungchânga thu tlûkna siam nân remhriatna hmang rawh. (Thuf. 25:11) Bible zirpuinaah thuchhuahtu dang i zui a nih chuan, a khât tâwka i lo sawipui ve chu ngaihhlut a ni ngei ang. Mahse, in tin kal hunah i thawhpui chuan a sawi ve huna i lo inrawlh loh chu a duh mai thei. Ani chu thuchhuahtu thar a nih emaw, zawhna leh hnialkalhna chhân ngaihna a hriat loh emaw chuan i ṭanpuina chu a hlut ngei ang. Mahse, in tinah te, tlawhkîrah te, a nih loh leh Bible zirpuinaah te thuchhuahtu tuemaw i zui a nih chuan, a thusawi lai tihbuai te, chhuhsak te, a nih loh leh thu dang hmêlhriattîrte chu tih miah loh tûr a ni.
I thiltawn hrilh rawh. A châng chuan, i thawhpui tuemaw chu rawngbâwlnaa thiam lehzual tûra rawtna i pe thei a nih chuan pe hreh suh ang che. (Thuf. 3:27) A remchân hunah: “I thusawi dân kha eng nge ang i tih?” emaw, “Rawtna ka pe thei che ang em?” emaw, a nih loh leh “Hei hi ka tihchhin dân chu a nia,” tiin i sawi ṭan thei a ni. Mite chuan a châng chânga rawtna dawn chu ngaihlu mah se, thil an tih sual a pianga hriattîr ziahna chuan a tilunghnual thei tih hre reng ang che.

Tûn Thla Chhûng Hian Ti Chhin Rawh:

I thawhpui nêna rawngbâwlnaa in tel hnuah, thawhpui nuam tak nihtîrtu a thusawi emaw, a thiltih emaw chu hrilh ang che.