Thu leh Hla Pho Chhuahnate Hmanga Thu Hrilh Dân Tûr

Thu leh hla pho chhuahna nawrlîr emaw, dawhkân emaw hmanga thu hrilhna neih chu mi rilru ṭha pute thutak lama hîp theih dân kawng ṭha tak a ni. (Joh. 6:44) Chuvângin, upate chu kohhran thu hrilhna biala kêa mi veivah tamna hmunah vântlâng hmuna thu hrilhna ruahman tura fuih an ni. Chûng thu leh hla pho chhuahnate chu hmun khata dah ngheh a nih loh avângin, a tlângpui thuin thu neitute hnêna phalna dîl a ngai lo. Chutianga thu hrilhnaah chuan tute nge tel thei ang? Ngaihruat thiamna nei a, zahawm taka lang leh mi biak thiam thuchhuahtute chu an tel thei a ni. A hnuaia târ lan tih tûr leh tih loh tûr ṭhenkhatte chuan thuchhuahtute chu hlawhtling lehzual tûrin a ṭanpui ang.

Tih Tûrte:

Kawnga kalte tân nêlawm tak, mi lawm thiam tak, leh ṭanpui peih tak ni ang che. Thuchhuahtu ṭhenkhat chuan nui sâng leh nêlawm takin an lo chibai ṭhîn a ni. Tuemawin kan thu leh hla pho chhuahte a melh chuan, “I duh chuan a lâk theih a nia,” tiin i sawi thei ang.
Thu leh hla pho chhuahna aṭanga hla vak lo vah ding ang che. Hmun ṭhenkhatah chuan thuchhuahtute chuan thu leh hlate pho chhuahna aṭanga fit tam vak lova an din hian an hlawhtling a ni. Mi dangte erawh chuan hetianga hla vak lova an din hian mite a ti tîm niin an hria a; chuvângin, hla deuh hlekah an ding a, thu leh hlate pho chhuahna hmuna tuemaw a rawn din thlengin an nghâk reng a. Thu leh hla pho chhuah chu miin a rawn pan chuan, biak lo tum la, heti hian i zâwt thei ang: “Tûn hmain he zawhna hi i lo ngaihtuah ngai tawh em?” tiin.
A theih anga tamin Bible hmang rawh.
Tuemawin Bible Zirtîrna bu ang chi, zir tûra siam kan thu leh hla chhuahte a lâk apiangin Bible zirna kan kalpui dân chu hrilh la. Engvângin Nge Bible I Zir Ang? tih video chu i mobile emaw, tablet emaw aṭangin play-sak bawk ang che.
Ngaihventute biak pawh theihna tûr address leh phone number ang chite chu la rawh. In bial chhûnga chêng a nih loh chuan Please Follaw Up (S-43) form chu ziak khat la, a hma thei ang berin secretary chu pe ang che.

Buaina siam tumte lakah fîmkhur la, invêng rawh. Kan rawngbâwlna dodâla buaina chawh chhuah tum a awm chuan chu mi hmun chhuahsan chu a ṭha ber thei ang.