Thiltawn Nei Tam Zâwk Thuchhuahtute Hnên Aṭangin Inzîr Rawh

Kohhrana thiltawn nei thuchhuahtute chu kan hlut tak zet a ni. Mi ṭhenkhat chuan rinawm takin kum tam tak chhûng Jehova rawng an lo bâwl tawh a. Mi dangte erawh chuan rawngbâwlna lama thiamna chu tûn hnai maiah an nei ṭan chauh pawh a ni thei. Hêng thuchhuahtute hian Isua’n thu hrilhna leh zirtîr siam rawngbâwlna zauhva Kristian kohhran a kaihhruai dân chu an hmu tawh a ni. (Mt. 28:19, 20) He rawngbâwlnaa an telna aṭangin, mi mal harsatna leh fiahnate an tawh hunah ‘thiltihtheihna nasa tak’ chu an dawng a ni. (2 Kor. 4:7) Hêng thiltawn nei thuchhuahtute hnên aṭangin zir tûr tam tak kan nei a. Hun remchâng pêk an nih chuan, an thil hriatte mi dangte zirtîr chhâwn chu nuam an ti hle. (Sâm 71:18) Chuvângin, an hnên aṭanga inzir tûrin hun remchâng kan insiam tûr a ni. Engtin nge kan insiam theih?

Rawngbâwlnaah. Rawngbâwlnaa hlawhtling thei tûr chuan, mi tharte leh thiltawn la nei tlêm thuchhuahtute tân zirtîrna dawn a ngai a. Thuchhuhtu puitling takte rawngbâwl dân enna aṭangin thil tam tak kan zir thei a ni. (February 1, 2015, Vênnainsâng, “Rawngbâwlnaah Ṭhahnemngaihna Nei Reng Rawh,” tih thuziak, “Thiltawn La Nei Tlêmte Ṭanpui Rawh” tih thupuitê hnuaia paragraph 3-na en ang che.) Chutiang mite nêna rawngbâwlnaa thawhhona chu engtin nge i hlâwkpui?

Thuchhuahtu thiam tak leh ṭha tak chu rawngbâwlnaa thawhpui tûr chein i sâwm thei ang em? Thiltawn nei thuchhuahtu chu a dam vak lo a nih chuan, i Bible zirpui chu sâwmin a inah a khât tâwkin Bible zirna i nei thei mai thei a ni. Zirna i kaihhruai zawhah, a hnênah chuan a hmuh dân leh thurâwnte pe tûr chein ngên ang che.

Hun Dangah Pawh Anni Chu Kâwm Rawh: Thiltawn nei thuchhuahtute chu hun dangah pawh kâwmin hmêlhriat ang che. An zînga pakhat chu in chhûngkuaa Pathian biaknaah sâwmin biangbiakna nei rawh. Thiltawn nei thuchhuahtu chu a dam ṭha lo a nih chuan, chhûngkuaa Pathian biakna chu a ina nei tûrin ruahmanna siam theih a ni ang em? Thutaka a lo luh dân chu zâwt chhuak rawh. Eng ang malsâwmnate nge a lo dawn tawh? Tualchhûngah eng ang pun chhohna nge a hmuh? Jehova rawngbâwlnaah eng ang hlimna nge a neih?

Thiltawn nei thuchhuahtute chungah hriatthiamna neiin beisei sâng lutuk suh. Mi dang zawngte ang bawkin, hun rei tak chhûng thuchhuahtu ni tawhte chuan rawngbâwlnaah chem kalna bîk an nei ṭheuh va. (Rom 12:6-8) Ṭhenkhat chu an upat tawh avângin, thu hrilhna leh thil dangahte hian tihtheih an nei tlêm tawh pawh a ni thei. Mahse, Jehova rawng rinawm taka bâwlna kawngah thiltawn an neih avângin, an hnên aṭangin thil tam tak kan zir thei a ni.