KRISTIANTE ANGIN NUNG RAWH
Nungchang Lama Jehova Tehna Chu Zâwm Rawh
Pathian Jehova chuan mihringte tân nungchang lama tehna a siam a. Entîr nân, mipa leh hmeichhe inkâra inneihna chu a nghet tûr a ni tih thu a pe a ni. (Mt. 19:4-6, 9) Nungchang bawlhhlawhna tawh phawt chu a dem a. (1 Kor. 6:9, 10) A mite hriat hran theih an nihna tûrin silhfên leh inchei dân chungchângah thu bulte a pe bawk a ni.—Deut. 22:5; 1 Tim. 2:9, 10.
Tûn lai khawvêla mi tam tak chuan Jehova tehnate an hnâwl a. (Rom 1:18-32) Silhfên leh inchei dân bâkah, nungchang lama mipui ngaih dân lâr takte chu an pawm a ni. An nungchang bawlhhlawh tak chu an chapopui a, an tih ang ti ve lote chu an sawichhe hial bawk.—1 Pet. 4:3, 4.
Jehova Thuhretute kan nih angin, nungchang lama Pathian tehnate chu huaisen takin kan zâwm tûr a ni. (Rom 12:9) Engtin nge? A pawm zâwngte chu mite hnênah thiam takin kan hriattîr tûr a ni a. Mahse, keimahni ngei pawhin a tehna sâng takte chu kan nunpui a ngai bawk. Entîr nân, silhfên leh inchei dân tûr kan thlan hunah, heti hian kan inzâwt thei a ni: ‘Ka duh thlannate hian Jehova tehna nge a târ lan a, khawvêl tehna zâwk? Ka silhfên leh inchei dân chuan Pathian ṭihtu Kristian pakhat ka ni tih a târ lang em?’ tiin. A nih loh leh, film en tûr kan thlan hunah, heti hian kan inzâwt thei bawk: ‘He film hi Jehova’n a pawm ang em? Nungchang lamah tu tehna nge a chawi lâr? Ka intihhlimna thlan hian nungchang lama ka invênna a tichau ang em? (Sâm 101:3) Ka chhûngte leh mi dangte a titlu thei ang em?’ tiin.—1 Kor. 10:31-33.
Engvângin nge nungchang lama Jehova tehnate zawm chu a pawimawh? Krista Isua chuan hnamte leh mi suaksual zawng zawngte chu a tiboral thuai ang a. (Ezek. 9:4-7) Pathian duhzâwng titute chauh an bâng ang. (1 Joh. 2:15-17) Chuvângin, kan nungchang ṭha hmutute’n Pathian an chawimawi theih nân nungchang lama Jehova tehnate chu i zâwm tlat ang u.—1 Pet. 2:11, 12.
Silhfên leh incheina ka thlan chuan nungchang lama ka tehna chungchâng eng nge a târ lan?
JEHOVA ṬHIAN NI ANG CHE—MIPA PAKHAT TAN HMEICHHE PAKHAT TIH VIDEO I EN HNUAH A HNUAIA ZAWHNATE HI CHHANG ANG CHE:
Engvângin nge Jehova tehnate mila nun chu a finthlâk?
Engvângin nge nu leh pate chuan an fate chu an naupan têt aṭanga nungchang lama Jehova tehnate chu an zirtîr ang?
A pui a pangte chuan mite chu Pathian ṭhatna hlâwkpui tûrin engtin nge an ṭanpui theih?