“Thununna Chu Ngaithla Ula, Fing Rawh U”

1. Finna chu engtin nge kan neih theih a, chu chuan engtin nge min ṭanpui ang?

FINNA hi Jehova hnên aṭanga lo chhuak a ni a, ani chuan phal takin mite hnênah a pe a ni. Jakoba 1:5-ah: “In zîngah tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se,” tiin kan chhiar a. Finna kan neih theih dân kawng khat chu Pathian thununna pawm hi a ni. Chutianga tihna chuan thil ṭha lo tihna lakah min vêngin, Jehova hnaih reng tûrin min ṭanpui ang. (Thufingte 2:10-12) Chu bâkah, chatuan nun beiseina ropui tak kan nei bawk ang.—Juda 21.

2. Engtin nge Pathian thununna ngaina tûra kan zir theih?

² Mi ṭha famkim lo kan nih avâng leh kan seilen dân avângin thununna chu pawm a, thil ṭha nia ngaih harsa tih châng kan nei thei a. Mahse, Pathian thununna chu kan nuna hlâwkpuina kan neih hunah min hmangaih nasatzia kan hre thiam a ni. Thufingte 3:11, 12 chuan: “Ka fapa, LALPA thununna che ngainêp suh la,” tiin a sawi a. Tichuan: “LALPA chuan a hmangaihte chu a zilhhau ṭhîn a ni,” tiin a sawi belh bawk. Jehova chuan kan tâna ṭha ber tûr a duh tih kan chiang thei a. (Hebrai 12:5-11 chhiar rawh.) Pathian chuan min hriat chian êm avângin a thununna chu englai pawhin a dik a, kan mamawh tak a ni reng ṭhîn. He thuziakah hian, thununna hmêlhmang pali: (1) mahni inthununna, (2) fate hnêna pêk tûr nu leh pate thununna, (3) kohhrana kan dawn thununna, leh (4) thununna aia na zâwkte kan sawiho vang.

ENGVANGIN NGE MAHNI INTHUNUN CHU A FINTHLAK?

3. Engtin nge naupangin mahni inthunun dân a zir theih? Entîrna pe rawh.

³ Mahni inthununna kan neih chuan kan thiltih leh ngaihtuah dânte kan thunun ang. Mahni inthunun saa kan pian loh avângin chutianga inthunun chu kan zir a ngai a ni. Entîr nân, naupangin thîrsakawr khalh a zir hian a tlûk loh nân a nu emaw, a pa emaw chuan an dawm ṭhîn a. Mahse, tlêma a khalh thiam hnu chuan, a nu leh pa chuan dawmsak reng lovin an thlah ta zeuh zeuh va. Nu leh pa chuan an fain a khalh thiam tak tak ta tih an hriat chuan dawmsak tawh lovin, amahin an khalhtîr ta a ni. Chutiang bawkin, nu leh pate chuan an fate chu “Lalpa thununnaah leh zilhnaah” dawhthei taka an zirtîr hian mahni inthunun tûr leh finna nei tûrin an ṭanpui a ni.—Ephesi 6:4.

4, 5. (a) Engvângin nge mahni inthununna chu “mihring thar” pêng pawimawh tak a nih? (b) Engvângin nge thil kan tihsual hunah kan lunghnual mai loh vang?

⁴ An puitlin hnua Jehova rawn hretute pawh chutiang bawk chu an ni a. Engemaw chen chu mahni inthununna nei mah se, Kristian mi puitling an la ni lo. Mahse, “mihring thar” an inthuam ṭan a, Krista ang nih an tum hian zawi zawiin an puitling chho a ni. (Ephesi 4:23, 24) Mahni inthununna chuan ‘Pathian ngaihsak lohna leh khawvêl châknate bânsanin, tûn lai khawvêlah hian insûm leh fel tak leh Pathian ngaihsaka’ awm dân hre tûrin min ṭanpui a ni.—Tita 2:12,13.

⁵ Mahse, kan vai hian ṭha famkim kan awm lo va. (Thuhriltu 7:20) A nih leh, thil kan tihsual hian mahni inthununna kan nei tâwk lo emaw, kan nei lo hulhual emaw tihna a ni em? Ni lo ve. Thufingte 24:16-ah: “Mi fel chu vawi sarih tlu mah sela, a tho leh zêl ṭhîn,” tih kan hmu a. “Tho leh zêl ṭhîn” tûrin engin nge min ṭanpui ang? Mahni chakna ni lovin Pathian thlarau ṭanpuinain a ni. (Philippi 4:13 chhiar rawh.) Thlarau rah hmêlhmang zînga tel insûmtheihna chu, mahni inthununna nên a inang hle a ni.

6. Engtin nge Pathian Thu zirlai taima tak kan nih lehzual theih? (A thupui chunga milem en rawh.)

⁶ Ṭawngṭaina te, Bible zirna te, leh chhût ngunnate chuan mahni inthununna nei tûrin min ṭanpui bawk ang. A nih leh, Bible zir chu harsa i ti emaw, inzirna chu nuam i ti lo emaw a nih chuan engtin nge ni ang? Beidawng mai suh. A Thu zir ‘châkna’ nei tûra Jehova ṭanpuina i pawm chuan i hlawhtling thei a ni. (1 Petera 2:2) Bible zirna tûr hun nei tûra mahni inthunun thei tûrin Jehova ṭanpuina dîl ang che. A tîr lamah chuan i inzirna chu hun rei lotê chhûng chauh i hmang thei a. A hnuah, inzirna neih chu zawi zawiin a awlsamin, nuam i ti lehzual ang. Jehova ngaihtuahna hlu takte chhût ngun nâna hun hman chu nuam i ti ang.—1 Timothea 4:15.

7. Engtin nge mahni inthununnain Jehova rawngbâwlnaa kan thiltumte hlen tûra min ṭanpui?

⁷ Mahni inthununna chuan Jehova rawngbâwlnaa kan thiltumte hlen tûrin min ṭanpui a. Entîr nân, pa pakhat chuan a ṭhahnemngaihna hloh nia a inhriat avângin regular pioneer thawh a tum a ni. Engtin nge mahni inthununnain a ṭanpui? Kan magazine-a pioneer thawh dân chungchâng thuziakte chhiarin, a ṭawngṭai a. Chutianga a tihna chuan Jehova nêna an inlaichînna a tinghet lehzual a ni. A theih hunah auxiliary pioneer-te a thawk ṭhîn a. Thil engmahin inlâk pêntîr a phal lo va; a thiltum chu a ngaihven tlat zâwk a ni. Hun engemaw chen hnuah, regular pioneer a ni ta a ni.

I FATE CHU JEHOVA THUNUNNAAH ENKAWL RAWH

8-10. Jehova rawngbâwl tûra an fate enkawlnaah nu leh pate chu engin nge ṭanpui thei? Entîrna pe rawh.

⁸ Jehova chuan nu leh pate chu “Lalpa thununnaah leh zilhnaah” an fate enkawl seilian tûrin mawhphurhna a pe a. (Ephesi 6:4) Chu chu tûn lai khawvêlah thil harsa tak a ni. (2 Timothea 3:1-5) Naupang an rawn pian hian thil dik leh dik lo an hre lo va, an chhia leh ṭha hriatna pawh sawizawi loh a ni. Chuvângin, an chhia leh ṭha hriatna sawizawi tûr chuan thununna an mamawh a ni. (Rom 2:13-16) Bible lama mi thiam pakhatin “thununna” tia lehlin Grik thu mal chuan “naupang ṭhanchhohna,” a nih loh leh mawhphurhna la thei khawpa puitling ni tûra enkawl seilen tih a kâwk thei tiin a hrilhfiah a ni.

⁹ Nu leh pate’n hmangaihna nêna an fate an thunun hunah an fate chuan him nia inhriatna an nei a. Zalênna chuan chin tâwk a nei tih leh nuna an thiltih eng pawhin nghawng a nei tih an hria a ni. Chuvângin, Kristian nu leh pate tân an fate enkawlnaah Jehova finna an rinchhan a pawimawh hle. Chênna hmun a zirin fate enkawl dân chungchânga ngaih dânte a inang lo va, chûng ngaih dânte chu a inthlâk rêng ṭhîn. Mahse, Pathian thuâwihtu nu leh pate chuan mahni thiltawn emaw, mihring ngaih dân emaw an rinchhan lo vang.

¹⁰ Nova entawn tûr siam aṭangin kan zir thei a. Jehova’n lawng tuk tûra a hrilh khân Nova chuan tuk dân tûr pawh a hre lo va. Jehova a rinchhan a ngai a, Jehova’n a hrilh “ang ngei chuan” a ti ta tih kan chhiar a ni. (Genesis 6:22) Eng nge a rah chhuah? Lawng chuan Nova leh a chhûngte chu a chhanhim a ni! Nova chu chhûngkhaw kaihruaitu ṭha tak a ni a. Engvângin nge? Pathian finna a rinchhan vâng a ni. Nova chuan a fate chu ṭha takin a zirtîr a, an tân entawn tûr ṭha a siam bawk a, chu chu Tuilêt hmaa khawvêl suaksual takah chuan thil awlsam lo tak a ni.—Genesis 6:5.

11. Engvângin nge nu leh pate chu an fate zirtîr tûra an thawhrim ang?

¹¹ Nu emaw, pa emaw i nih chuan engtin nge Pathian sawi ‘ang ngeia’ i tih theih? Jehova thu ngaithla rawh. I fate enkawlnaah a ṭanpuina pawm ang che. A Thu leh a inawpna pâwl aṭanga lo kal thurâwnte chu hmang bawk ang che. A hnuah, chutianga i tih avângin i fate chu an lâwm ngei ang! Unaupa pakhat chuan: “Ka nu leh pate min enkawl seilen dânah ka lâwm hle a. Ka thinlunga thleng tûrin theih tâwp chhuahin min zirtîr a,” tiin a sawi. Jehova hnaih tûra amah ṭanpuitu chu a nu leh pate an ni tih a sawi bawk. Ni e, nu leh pate’n an fate chu theih tâwp chhuaha an zirtîr chung pawhin an fate chuan Jehova an hawisan pawh a ni thei. Mahse, theih tâwp chhuahtu nu leh pate chuan chhia leh ṭha hriatna thiang tak an nei thei a, an fate chu engtik nîah emaw chuan Jehova hnêna an rawn kîr leh an beisei thei a ni.

12, 13. (a) Fate hnawhchhuah a nih hunah, nu leh pate’n Pathian thu an âwih tih engtin nge an lantîr ang? (b) Nu leh pain Jehova thu an âwih avângin chhûngkaw khat chuan engtin nge an hlâwkpui?

¹² Nu leh pa ṭhenkhat tân thuâwihna lantîr kawnga fiahna harsa ber pakhat chu an fa tuemaw hnawhchhuah a nih hunah a ni a. Hnawhchhuah a fanuin in a chhuahsan hnuah, a nu chuan: “Ka fanu leh ka tunute nêna hun ka hman theih nân tiin kan thu leh hla chhuahahte chuan ṭanchhan tûr engemaw hmuh tumin ka zawng,” tiin a sawi. Mahse, a pasal chuan an fanu chungchânga mawhphurtu an ni tawh lo tih leh Jehova chungah an rinawm a ngai tih hre thiam tûrin ngilnei takin a ṭanpui a ni.

¹³ Kum engemaw zât hnuah, an fanu chu lâk luh leh a ni a. A nu chuan: “Tûnah chuan nî tin deuh thaw min phone-in, SMS te min thawn a! Pathian thu kan âwih tih a hriat avângin kan nupain min zah hle a ni. Tûnah chuan inlaichînna ṭha tak kan nei tawh,” tiin a sawi. I fapa emaw, i fanu emaw hnawhchhuah a nih chuan ‘i thinlung zawng zawngin Jehova i ring’ ang em? ‘Nangma hriatnaah i innghat lo’ tih Pathian i hmuhtîr ang em? (Thufingte 3:5, 6) Jehova thununna chuan a finzia leh min hmangaihzia min hriattîr tih hre reng ang che. Ani chuan i fate pawh tiamin mi zawng zawng tân a Fapa a pe tih chu theihnghilh ngai suh. Pathianin mi zawng zawng chu chatuan nunna nei tûrin a duh a. (2 Petera 3:9 chhiar rawh.) Chuvângin, nu leh pate u, thuâwih a harsat hunah pawh, Jehova thununna leh kaihhruaina chu a dik tih ring tlat ang che u. Pathian thununna chu ngaithla la, dodâl suh.

KOHHRANAH

14. “Sum enkawltu rinawm” hmanga min pêk Jehova kaihhruaina chu engtin nge kan hlâwkpui?

¹⁴ Jehova chuan Kristian kohhran chu a enkawlin, a vênghimin, a zirtîr dâwn tih a tiam a. Kawng tam takin chutiang chuan a ti a ni. Entîr nân, kohhran enkawl tûrin a Fapa chu a ruat a, Isua chuan rinnaa min tichak theitu thlarau lam chaw pe tûrin “sum enkawltu rinawm” a ruat bawk a ni. (Luka 12:42) Chu “sum enkawltu” chuan kaihhruaina ṭha tak takte leh thununnate min pe a. I ngaihtuah dân leh i thiltih dân thlâkthleng tûra ṭanpuitu thusawi i ngaihthlâk hun emaw, kan magazine-a thuziak pakhat i chhiar hun emaw chu i hre chhuak mai thei a ni. Chûng inthlâkthlengna i siamte chuan Jehova i inthununtîr tih a târ lan avângin i lâwm thei a ni.—Thufingte 2:1-5.

15, 16. (a) Upate hnathawh chu engtin nge kan hlâwkpui theih? (b) Upate’n hlim taka hna an thawh theih nân eng nge kan tih theih?

¹⁵ Krista pawhin hmangaih taka kohhran enkawltu tûr upate min pe a. Bible chuan chûng unaupate chu ‘mihringte hnêna thilpêkte’ tiin a sawi a ni. (Ephesi 4:8, 11-13) Engtin nge upate hnathawh chu kan hlâwkpui theih? An rinna leh entawn tûr ṭha an siam chu kan entawn thei a, Bible ṭanchhana min pêk an zilhna chu kan zâwm thei a ni. (Hebrai 13:7, 17 chhiar rawh.) Upate chuan min hmangaih a, Pathian hnaih tûrin min duh a. Inkhâwm loh kan chîng emaw, kan ṭhahnemngaihna a kiam emaw tih an hriat chuan ṭanpui min tum nghâl ang. Anni chuan kan thusawite min ngaihthlâksak hnuah Bible ṭanchhan fuihna duhawm tak leh zilhna ṭha tak takte min pe ang. An ṭanpuinate chu Jehova’n a hmangaihzia che a lantîrna angin i thlîr em?

¹⁶ Upate tân zilhna pêk chu thil awlsam a ni lo tih hre reng ang che. Lal Davida’n a sual lian tak tih thup a tum huna zâwlnei Nathana’n a va biak khân, zâwlnei Nathana chu engtin nge a awm i rin? (2 Samuela 12:1-14) Tirhkoh 12-te zînga pakhat Petera chuan Juda mi ni lote aia Juda Kristiante a biak ṭhat zâwk avânga tirhkoh Paula’n zilhna a pêk khân, Paula chu engtin nge a awm ang? Chutianga ti tûr chuan Paula’n huaisenna a neih a ngai ngei ang. (Galatia 2:11-14) Chuvângin, upate’n tîm lova thununna pe thei tûr chein eng nge i tih theih? Inngaihtlâwmna nei la, lâwm nachâng hria la, biak nuam tak ni ang che. An ṭanpuina chu Pathian hmangaihna lantîrna angin thlîr ang che. Chutiang a nih chuan, i hlâwkpui ang a, upate pawhin hlim takin an hna an thawk thei ang.

17. Engtin nge upate’n unaunu pakhat chu an ṭanpui?

¹⁷ Unaunu pakhat chuan a tûn hma nuna thilthlengin Jehova hmangaih a tiharsain, chu chuan rilru hahna nasa tak a neihtîr tih a sawi a. “Upate ka biak a ṭûl tih ka hria a. Anni chuan min hau lova, min sawisêl lo bawk a, chu aiin min fuihin min tichak zâwk a ni. Buai thei hle ṭhîn mah se, inkhâwm bân apiangin an zînga pakhat talin eng nge ka an tih min zâwt ṭhîn a. Ka tûn hma nun avângin Pathian hmangaihna dawng tlâk lovah ka inngai a. Mahse, Jehova chuan min hmangaihzia ka hriatfiah theih nân kohhran leh upate chu vawi tam tak a hmang a. Amah hnâwl ngai lo tûrin ka ṭawngṭai a ni,” tiin a sawi.

THUNUNNA AIA NA ZAWK CHU ENG NGE NI?

18, 19. Thununna aia tawrh hrehawm zâwk chu eng nge ni? Entîrna pe rawh.

¹⁸ Thununna chu a na mai thei a; mahse, Pathian thununna hnâwlnain a rah chhuah chu, chu aiin a na zâwk a ni. (Hebrai 12:11) Kaina leh Lal Zedekia te entawn tûr ṭha lo tak siam aṭangin kan inzir thei a. Kaina’n a unaupa a hua a, thah a duh tih Pathianin a hriat chuan, a hnênah: “Engati nge i thin a ur? Engati nge i hmêl a lo dur tâk? Thil i tih ṭhat chuan lawm i hlawh dâwn lo vem ni? I tih ṭhat loh erawh chuan sual chu kawngka bulah a bawk reng a ni: a duhzâwng chu nangma hnên lam a ni ang a, a chungah thu i nei tûr a ni,” tiin a vaukhân a. (Genesis 4:6, 7) Kaina chuan Jehova thununna hnâwlin, a unaupa a that a, a sawhkhâwk râpthlâk takte chu a dam chhûngin a tuar a ni. (Genesis 4:11, 12) Kaina’n Pathian thu ngaithla ta se chuan chutianga râpthlâk chu a tuar lo vang.

¹⁹ Zedekia chu lal chak lo tak leh suaksual tak a ni a. A rorêl lai chuan Jerusalem mite chu dinhmun ṭha lo takah an awm a. Zâwlnei Jeremia’n Zedekia chu a inthlâk danglam a ngai tih vawi tam tak a vaukhân a. Mahse, lal chuan Jehova thununna chu a hnâwl avângin a rah chhuah chu a lungchhiatthlâk hle a ni. (Jeremia 52:8-11) Jehova chuan ṭûl lo taka chutianga kan tawrh chu a duh lo a ni!—Isaia 48:17, 18 chhiar rawh.

20. Pathian thununna pawmtute leh hnâwltute chungah eng thil nge thleng ang?

²⁰ Tûn lai khawvêla mi tam tak chuan Pathian thununna chu an nuihzatin, an ngainêp a. Mahse, Pathian thununna hnâwltu apiang chuan a sawhkhâwk râpthlâk tak chu an tuar thuai ang. (Thufingte 1:24-31) Chuvângin, ‘thununna ngaithlain, i fing’ ang u. Thufingte 4:13 chuan: “Zirtîrna [thununna, NW] chu vuan tlat la, chhuah suh; vawng tlat rawh, i nunna a ni si a,” tiin a sawi a ni.