Governing Body Hnên Aṭanga Lehkha Thawn

Kan Ṭhian Jehova Thuhretute U:

Lei leh Vâna Lalchungnung Ber, Pathian Jehova hming kan put avângin kan chanvo a va sâng tak êm! Chu hming chu chatuana awm, chhe thei lo, leh tlukpui nei lo a ni. Kan put atâna he hming min petu chu Pathian Jehova a ni a, a bîk takin kum 1931 aṭangin chu hming danglam bîk tak hmanga hriat kan lo ni ta. (Is. 43:10) Jehova Thuhretu anga kan insawi thei hi kan inchhuang hle a ni.

Diabola chuan Pathian hming chu paih bo a tum char char a. A thununna avângin mite chuan Pathian Jehova hming chu an hnâwl a ni. Khawvêl sakhaw dik lo lalram, Babulon Khaw Ropui chuan Pathian hming chu a haw êm êm a, an Bible lehlinte aṭangin chu hming chu an paih bo a ni. Chu mi nêna inkalh takin, Isua chuan a Pa hming chu a chawimawi a, a zirtîrte hnêna Lal Ṭawngṭaina a zirtîrah pawh khân a dah pawimawh ber a ni: “Chutichuan nangni chuan hetiang hian ṭawngṭai rawh u:—‘Kan Pa vâna mi, i hming zahawm rawh se,’” tia sawiin. (Mt. 6:9) A hnua tih tak zeta a Pa hnêna a ṭawngṭainaah: “Nangin khawvêl zînga chhuak mite kei mi pêk hnênah khân i hming ka tilang ta,” tiin a sawi. (Joh. 17:6) Isua entawn tûr siam ṭha tak chu zuiin, leilung zawng zawnga Pathian Jehova hming puan chhuah chu kan tum lehzual sauh a ni.

Kum 2009 tâna kum châng, ‘Chanchin ṭha hriattîr hna thawk zo rawh,’ tih chuan kan rawngbâwlna hlen tûrin min chêttîr a. (Tirh. 20:24) Pathian Jehova chuan rawngbâwl kum kalta chhûnga ṭan kan lâkna mal a sâwm tih rinhlelhrual a ni lo. Pathian Jehova hming ropui nân leh chawimawi nân thu hriattîrna nasa tak neih a ni a. Thuchhuahtu 7,313,173 chu mi tinte hnêna thu hrilhna kawnga an inhman bâkah, nî tina harsatna an hmachhawn tam takte chinfel dân zawngtu mi rilru ṭhate zirtîrna kawngah an inhmang bawk a ni. Krista thih Hriatrengna inkhâwma lo tel mi 18,168,323-te chuan he khawvêl suaksual tak hi a tâwp hmain mi tam takin Pathian Jehova hming an la lam mai thei tih min hriattîr a ni.

Pathian Jehova’n rem a tih chhûng chu ṭhahnemngai takin Lalram chanchin ṭha kan hril zêl ang a, kan thu hrilhna bial chhûnga mite hnêna kan hrilh theih nân kawng awm thei apiang kan hmang ang. (Mt. 24:14; Mk. 13:10) In tin kalin emaw, kawtthlêrah emaw, lehkha thawn leh phone hmangin emaw, a nih loh leh tawnchawpa thu hrilin emaw a theih anga tam mite hnêna Pathian Jehova hming puan chhuah chu i tum tlat ang u.

Pathian Jehova chuan a hming tihthianghlim nân hma a rawn la thuai dâwn tih kan ring tlat thei a. (Ezek. 36:23) A hming tichhetute ngawihtîr an nih hun chu a lo thleng thuai ang. Pathian Jehova hming hriattîr a, a lalchungnunna chawisângtu Jehova chhiahhlawh rinawmte tân chuan chu mi nî chu ni ropui a va ni dâwn êm!

Pathian Jehova’n a mite a ngaihsak tih chu kum 2009-a khawvêl hmun tam taka kan neih “Ngaihven Reng Rawh U!” tih District leh International inkhâwmpuiahte hian a lang chiang hle. Chûng inkhâwmpuite chu theocratic thilthleng pawimawh takte zînga mi a ni a, Jehova nî atâna inring lehzual tûrin min chêttîr a ni.—Mk. 13:37; 1 Thes. 5:1, 2, 4.

Pathian Jehova chu kan chungah a ṭha tak zet a; kan thinlung a tilâwm a ni. Ani chuan hlobet hring dup hmunahte min chawlhtîrin, chawlhna tui kamahte min hruai ṭhîn.—Sâm 23:1, 2; 100:2, 5.

Pathian Jehova rawngbâwlnaa in inhman zêl hian, ani chuan mal a sâwm zêl ang che u tih ring tlat ang che u!

Khawvêl puma kan unaute hmangaihna nasa tak nên,

In unaute,

Jehova Thuhretute Governing Body