Bible Zirna Hmasâwn Tak Kaihhruaina—Inawpna Pâwl Lama Zirlaite Kaihruaiin
1. Engvângin nge chawlhkâr tina Bible zirnaah Jehova inawpna pâwl chungchâng sawi chu a ṭangkai?
1 Mite Bible kan zirtîr huna kan tum ber chu thurin zirtîr ringawt ni lovin, zirlai chu Kristian kohhran zînga mi ni tûra ṭanpui pawh a ni tel a ni. (Zak. 8:23) Jehova Thuhretute—Tute Nge An Nih? Eng Nge An Rin? tih brochure hian he mi ti tûr hian min ṭanpui thei a. Bu khat chu Bible zirpui tharte hnênah pe la, chhiar tûrin fuih rawh. Chu bâkah, Jehova inawpna pâwl chungchâng thu pakhat sawipui nân chawlhkâr tina Bible zirna hun tlêm tê chu la ṭhen rawh.
2. Engtin nge Bible zirlai chu kohhran inkhâwmnaa tel tûrin i fuih theih?
2 Kohhran Inkhâwmte: Bible zirlaiin Pathian inawpna pâwl a lo hriat thiam theih dân bulpui ber chu kohhran inkhâwmnaa kan zînga a telvena aṭangin a ni. (1 Kor. 14:24, 25) Chuvângin, chawlhkâr tina inkhâwm chi nga kan neihte chu vawi khata pakhat zêl hrilhfiahin Bible zirlai chu kan inkhâwmnate hmêlhriattîr ṭan ang che. Vântlâng thusawi lo awm tûr thupui chu hrilh rawh. Vênnainsâng zirna leh Kohhran Lehkhabu Zirnaa kan zir tûr thute chu hmuhtîr ang che. Theocratic Rawngbâwlna School leh Rawngbâwlna Inkhâwm chungchâng sawi rawh. School-a chanvo i neihin, anmahni chu i tihchhinpui thei bawk a ni. Inkhâwmnaa thusawi ṭha zual bîk laite chu hrilh ang che. Kan thu leh hla chhuaha thlalâkte chu thil awm dân ngaihruat thiam tûra ṭanpui nân hmang rawh. Bible zirna in neih hmasak ber ṭum aṭangin inkhâwm tûrin sâwm nghâl ang che.
3. Inawpna pâwl hmêlhmang engte nge kan sawiho theih?
3 Hriatrengna hun te, inkhâwmpuite, leh bial kan kârte a hnaih hian, hêng remruatnate hrilhfiah nân leh anmahni tihphûr nân hun rei lo te chu hmang ang che. Hêng zawhnate: Engvângin nge Jehova Thuhretute tia koh kan nih? Engvângin nge kan inkhâwmna hmun chu Kingdom Hall kan tih? Upate leh kohhranho rawngbâwltute chanvo chu eng nge ni? Engtin nge thuhrilh rawngbâwlna leh bial chhûng chu enkawl a nih? Engtin nge kan thu leh hlate tihchhuah a nih? Engtin nge inawpna pâwl chu sum leh paia chhawmdâwl a nih? Rawngbâwlna enkawlnaah branch office leh Governing Body chuan eng dinhmun nge an chelh? tih zawhnate hi a tahtawl te tein chhâng chho zêl rawh.
4, 5. Engtin nge kan video-te chuan inawpna pâwl ngaihhlutna a tuh chhoh?
4 Mi Zirtîr Thei Tak Video-te: Bible zirlaiin Jehova inawpna pâwl mak ropui tak a hmuh theih dân kawng dang leh chu kan video-te hmangin a ni. To the Ends of the Earth tih video hian khawvêl puma kan thu hrilhna a lantîr a, Our Whole Association of Brothers hian khawvêl pum huapa kan inunauna a târ lang a, United by Divine Teaching hian Jehova Thuhretute inpumkhatna neih a târ lang bawk a ni. Kan magazine-te leh thu leh hla chhuah dangte kum nga chhûng lo dawng tawh ṭhîn hmeichhe pakhat mittui chu Jehovah’s Witnesses—The Organization Behind the Name tih video hian a ko chhuak hial a ni. Amah tlawhtu Thuhretu chu a lo rin tawh angin, video a en hnuah chuan inawpna pâwl pawh a ring thei tih a hre ta a. Chu nu nên chuan dân ang thlapa Bible zirna neih ṭan a ni a, a kâr lehah chuan Kingdom Hall-a inkhâwmnaah a tel ta bawk a ni.
5 Chawlhkâr tina kan Bible zirpuite nêna minute rei lo tê hmanna leh hmanrua min pêkte hmangin, Bible zirlaite chu tûn laia Jehova inawpna pâwl hman awmchhun lamah kan kaihruai thei a ni.