I Fate Chu An Inpeih Em?
1. Engvângin nge school naupangte tân inpeih a ngaih?
1 School luh hun a lo thleng leh ṭêp tawh a. I fate chuan chona leh nêksâwrna thar an la hmachhawn ngei dâwn a ni. Tin, “thutak hriattîr” theihna hun remchâng thar pawh an nei dâwn bawk. (Joh. 18:37) Chu mi atân an inpeih em?
2. Inpeih thei tûr chuan naupangte’n eng nge an hriat ngai?
2 I fate chuan hnam hmangaihna hun serh leh sakhaw lam ni serhah hian engte nge tel tih an hre chiangin, chûng thiltiha tel a dik loh chhan chu an hre chiang bawk em? Zirna sâng ûm tûr, ngaihzâwng nei tûr, leh zu leh ruihhlo hmang tûra nêksâwrna chu do tûrin an inpeih em? Chûng thiltih ṭha lote chu an sakhuain a phal lo an ti mai dâwn nge ni a, an thurinte an hrilhfiah thiam zâwk dâwn?—1 Pet. 3:15.
3. Engtin nge nu leh pate chuan Pathian Biakna neih zân chu an fate inpeih tûra ṭanpui nâna an hman theih?
3 Pathian Biakna Neih Zân Chu Hmang Rawh: School an kal chhûng zawngin a ṭûl ang zêlin sawihona i neihpui ngei ang. School an luh leh hmaa an tawh theih âwm harsatnate chungchâng theih tâwp chhuaha i sawipuina chuan i fate chu inrintâwkna a neihtîr dâwn a ni. Engvângin nge Chhûngkuaa Pathian Biakna neih zân pakhat emaw, a aia tam emaw chu hemi atân hian i hman loh vang? I fate’n school luh leh an inngaihtuah huna an huphurh ber chu i zâwt thei ang a. Naupangte chu an lo upat zâwk a, hriatthiamna an lo neih zâwk tâkah chuan kum hmasa lama i sawipui tawh thute pawh i sawipui leh thei ang. (Sâm 119:95) Nang chu an zirtîrtu, counselor, a nih loh leh an school kalpui lema changin, tihchhinna (practice session) i neihpui thei a ni. I fate chu Bible hmanga chhânna pêk dân zirtîr la, Reasoning bu te, leh Young People Ask lehkhabute hmang tûrin zirtîr bawk ang che. Nu pakhat chuan a fate chu school luh dâwn apiangin an zirtîrtu tharte hnêna Jehova Thuhretute zînga mi an nihzia an hrilh dân tûr chu a tihchhinpui ṭhîn a ni.—Vênnainsâng, December 15, 2010, (English) phêk 3-5 en rawh.
4. Nu leh pa fingte chuan eng nge an tih dâwn?
4 Hêng ni hnuhnûnga Kristian ṭhalaite tawh harsatnate chu a “khirh” chho tial tial a. (2 Tim. 3:1) Nu leh pa fingte chuan chûng an harsatna tawh tûrte chu thlîr lâwkin, an fate chu hmachhawn tûra inpeih tûrin an ṭanpui ang. (Thuf. 22:3) School luh leh hmain i fate chu inpeih tûrin theih tâwp chhuahin ṭanpui ang che.