Pathian Hnênah Zawhna Kan Zâwt Tûr A Ni Em?

MI ṬHENKHAT chuan Pathian hnêna zawhna zawh chu thil dik lo niin an ngai a. Anni chuan Pathianin thil engemaw thlentîr a phal leh phal loh chhan zawh chu amah zah lohnaah an ngai pawh a ni thei. Chutiang chuan i ngai ve em?

I ngai a nih chuan, mi ṭha tam takte pawhin Pathian hnênah zawhna an zâwt tih hriat chu mak i ti mai thei. An zawhna zawh, a hnuaia entîrnate hi lo chhinchhiah ang che:

Mi rinawm Joba: “Eng tizia nge mi suaksualte chu an nuna, an lo upat a, a ni, an lo hmuingîl theih ni?”—Joba 21:7.

Zâwlnei rinawm Habakuka: “Engati nge vervêk taka titute chu i en theih a, mi suaksualten an aia mi fel an ei zawh laia i ngawih reng?”—Habakuka 1:13.

Isua Krista: “Ka Pathian, ka Pathian, engah nge mi kalsan?”—Matthaia 27:46.

Hêng zawhna an zawhte chhehvêla thute i chhiar chuan, tih tak zeta zawhna an zawh avânga Pathian Jehovaa a thinur thu târ lanna i hmu lo vang. A dawhtheihna chu thil mak a ni hran lo. Entîr nân, taksa hrisêlna atâna kan mamawh zualte dîl chu Pathian zah lohna a ni lo va. Chûng kan thil dîlte chu lâwm takin min pe ṭhîn a ni. (Matthaia 6:11, 33) Chutiang bawkin, ani chuan rilru leh ngaihtuahna hrisêl tak min pe thei tûr thute chu phal takin min pe a. (Philippi 4:6, 7) Isua chuan a zirtîrte hnênah: “Dîl rawh u, tichuan an pe ang che u,” tiin a hrilh hial a. (Matthaia 7:7) Hetianga a sawi hian, tisa lam thil mai ni lovin, zawhna pawimawh takte chhânna hmuh chungchâng pawh a sawi tel a ni.

Hun remchâng nei ta la, a hnuaia târ lan zawhna a eng ber hi nge Pathian hnêna zawh i duh?

● Ka nun hian thiltum a nei em?

● Ka thih hian engtin nge ka awm ang?

● Engvângin nge hrehawm ka tawrh i phal?

“Pathian Lehkha Thu zawng zawng hi Pathian thâwk khuma pêk” a nih avângin, Pathian min pêk a chhânna chu a Thu, Bible-ah i hmu ang. (2 Timothea 3:16) Mi ṭhenkhatte’n a chunga zawhnate an zawh chhan leh a chhânna Bible-in a pêkte chu ngaihtuah ang che. (w12-E 11/01)

[Footnote]